رحلة هايكنق جبلية صيف 2020 | تدوينة مصوّرة! 🧗‍♀⛰

Thursday, December 31, 2020
في مراجعة سريعة حبيت أسترجع فيها أهم الأحداث اللي صارت لي في عشرين عشرين، فتحت استديو الصور بجوالي وجلست أستعرض الصور بداية من 1 يناير واللي كان تاريخ رحلتي للرياض لتجهيز حفلة ملكة أختي اللي وثقتها لكم كل تفاصيلها -هـنـا- 
وصولًا ليوم الإثنين الموافق 10 أغسطس! 

وقتها كنا في بلجرشي، وبشكل سريع من غير أي تخطيط قررنا في اليوم اللي قبله إن فجر يوم الإثنين بنطلع في رحلة هايكنق بقيادة أبويا طبعًا  هالمرة وجهتنا بتكون جبلية لمنطقة ماهو متعارف عليها بين الناس!

في المرة السابقة اللي كتبت تدوينة أول هايكنق مع بابا كان مجرد تست اختبار لقدراتنا ههههههه السنة اللي فاتت ودانا أبويا نفس الجبل اللي مخططين له بعد ما تأكد من إمكانياتنا ونجاحنا في الإختبار  وهالمرة بنروح له بس بيكون مسارنا أصعب حبتين!

تجهيزاتنا كالتالي:
روان تحضر ساندوتشات وكوروسون للفطور، وأبويا عنده عدة الشاي حقت الطلعات، وأخواتي وماما كل وحدة تجهز نفسها بس  << نحاول نطلع هالمره خفيفين لطيفين قد ما نقدر لأن المره السابقة أخذنا معانا نواشف للفطور وتكبكب زيت الزيتون حق الجبن على التونة وانخبصنا شويا وكان معانا مؤونة صغيرة أشغلتنا حبتين  فهالمرة كل شيء بيكون خفيف 

طلعنا بالسيارة في نقطة ممكن تطلع لها السيارة وبدأنا الرحلة 



طبعا حطوا في بالكم مبدئيًا إنه الصور بالجوال << كنت ماخذه الكاميرا وصورت فيها بس مالي خلق أنزلها صراحة 
الشيء الثاني إنه الصور أبدًا ما تبين الإرتفاع أو الإنخفاض زي بالواقع 
الشيء الثالث: إذا حابين تشوفون تفاصيل الصورة؛ بامكانكم الضغط عليها لتكبيرها 

أما عن خط سيرنا كان بالصعود للأعلى بعدين ناخذ مسار من اليمين ونروح للجهة الثانية من الجبل نجلس هناك نرتاح ونفطر وبعدين نرجع من نفس المسار لأن المنطقة صخرية وعرة ومو أي مكان يناسب المشي أو التسلق فيه  





الوالد القائد الله يحفظه، اللي يكتشف هالأماكن الجميلة وقررنا نخلي هالمكان سرّنا الصغير وما نعلم فيه أحد << بعدين بأقول لكم السبب 
<< ركزوا على الكيس القطني من قلاين 


نظرة على القرية اللي تحت بعد ما قطعنا مسافة وبديت أفقد أنفاسي 


يبدو في الصورة إن صعود هالصفاة سهل  تذكروا يا أصدقائي إن كثير من المظاهر خدّاعة!



ناس واقفة تلتقط أنفاسها وناس واقفة تصور المرحلة الثانية من الرحلة وناس قاعدة تصور الناس اللي تصور وبطتنا نطت في بطن بطتكم 


شفتوا لما قلت انه فيه بعض الأماكن وعرة، يعني زي هاذي مثال مصغر: أحط رجلي على حجرة وأحركها شوي بقدمي عشان أتأكد من ثباتها قبل ما أطلع فوقها، عشان لا سمح الله لا تلف رجلي وتنعسم أو أدردب كلي تحت  



سبحان الله هالجبل عبارة عن كتلة صخرية وحدة عظييييمة!! ترا احنا نقط جنبه حرفيًا 

وانتقلنا للجهة الثانية من الجبل وكان المنظر عالم آخر طبيعة حقيقية ما وصلها البشر وعبثوا فيها 
كان المكان يطل على جبال أخرى ويتخللها الضباب، وكان يعتبر هالمكان مكافأة لأن الشمس صارت ورا الجبل وصار المكان فيه ظل حلوو ودرجة الحرارة كانت في بداية العشرين مئوية 


هذا المكان يبدو معبد! تعرفون مين اللي يمشي فيه كل يوم؟ 
قطيع الماعز وراعيهم، مكان حضيرتهم كان قريب من المكان االلي وقفنا فيه السيارة.. وفي كل المرتين اللي جينا فيها المكان كانوا يطلعون في الصباح يتريضون وياكلون ويتمشون ويرجعون حضيرتهم قبل الظهر ما ألطفهم! << كان عندي صور لهم من العام، إذا لقيتها بأرفقها هنا.. أو يمكن بتلاقونها في انستقرامي في صور2019 

المهم، أثناء مشينا هنا لقيت هالمكان مرره حلووووو كان نفسي نجلس فيه بس بابا اقترح نكمل ولقينا مكان كان أجمل برضو! 


وبعدها جلسنا على هالصفاة --صخرة كبيرة ملساء- وجمعنا أغصان صغيرة كانت مكسرة وطايحة في المكان عشان نجهز الشاي الأحمر للفطور  <<أنا قلت لكم من قبل إني مره أشتهي الشاي الأحمر في بلجرشي؟ له طقوس وأجواء تحببني فيه أكثر من القهوة 







بعد ما أفطرنا وتبادلنا أطراف الحديث والتصوير واللزي منهو! فجأة قاطعتنا أصوات مززززعجة أصوات قرود 
كانت أول مره في حياتي أسمع أصوات صراخ القرود بهالشكل! حطيت مقطع فيديو صورته من قلب الحدث << الله يعين آذانكم عالصوت 

كانت مجموعة قرود مجتمعة في قمة هذاك الجبل الصخري اللي كنت أتغزل فيه فوق! ويبدو اننا وترناها او بالأحرى هي وترتني!
صارخنا عليها بأصوات -الله لا يسمعكم فيها- توقعت بعدها انها بتروح ما درينا انها استانست على التواصل ونشبت
وقتها كان أبويا يقول انها تخاف إذا شافت معاك عصاة كبيرة أو شيء بس أنا شخصيًا طقتني الركب بس كنت مسوية فيها انه مرره عادي  بالذات لأننا بنرجع من جنب الجبل اللي هم فيه!
فشلنا عدتنا وفي طريق للعودة

مقطع فيديو قصير صورته عشان أسمعكم أصوات القرود 





في طريق العودة صرنا نستغل مرورنا من جنب المخلفات البلاستيكية واللي كانت أكثرها علب مويا وصرنا نجمعها في الطريق


وفي هذا المكان ائتمني أبويا على حفظ خصوصية هالمكان ووعدته اني ماراح أعلم أحد عليه  << شايفين العلب البلاستيك بين الشجر؟ الحمدلله شلناها كلها!



<< إذا كنت تعتقد أن النزول من الجبل أسهل من الصعود فانت غلطان 

بعد المشوار وضربة الشمس اللي بدأت تقوى وحملة التنظيف اللي كانت بالطريق؛ وصلنا بالسلامة واحنا مبسوطين بإتمام المهمة 
بس قبل ما تكتمل فرحتنا بهذيك اللحظة أمي استوعبت إنه طرحتها ماهي على كتفها  المشكلة مو بس اننا بنرجع بلجرشي وهي لابسة توربان! كمان هذيك الطرحة كانت مرره مفضلة لدرجة انه محاولات الاقناع انه (عادي محد درا عنك) ما نفعت فاضطريت أرجع معاها نتسلق الجبل ونحاول نتذكر من فين مشينا وندوّر واحنا مو عارفين هل بنلاقيها قريب والا يمكن مكان ما جلسنا في الجهة الثانية من الجبل  
كان شعور تسلق الجبل بعد الوصول لخط النهاية له تعب من نوع آخر ههههههه بس أمي صارت تستودعها الله، وتقول خلاص أنا استودعتها الله، وربي بيرجعها لي   وفعلًا هذا اللي حصل! لقيناها بعد ما طلعنا مسافة وكانت متخبية بين الصخور والشجر  
واحتفلنا واحنا نلتقط أنفاسنا ورجعنا للسيارة وااه يا شعور الجلسة على مقاعد السيارة المريحة بعد التعب  شعور لذييذ!

وانتهت رحلتنا في كوكب.. لالا أمزح، انتهت رحلة الهايكنق الجميلة، أذكر لما ركبنا السيارة كان أبويا مشغل أغنية الأماكن لمحمد عبده وشبابيك السيارة مفتوحة والهوا البارد يهفهف وأنا متكية عالشباك أتنفسس 



وودعنا القرية الصغيرة وجبالها الجميلة، على أمل نرجع لها أو نكتشف غيرها في رحلات هايكنق أخرى بقيادة والدي وبرفقة أمي وأخواتي 



والحمدلله الذي بنعمته تتم الصالحات 
كنت في سباق مع الوقت إني أنزل هالتدوينة في آخر يوم من سنة 2020، كنت مره حابة إني أوثق ألطف أحداثها اللي صارت رغم صعوبة باقي أيام هالسنة!

دعواتي لكم بسنة جديدة حلوة ومليئة بالذكريات الجميلة 


فوتووكوا بعافية 

     
  •  
  •  
  •  
  •  
  •  




2 comments:

  1. مممتع جددددًا
    ربي يحفظ لكم عائلتكم الجميلة يا رب
    استمتعت بالحكاية والسرد والاكشنات خاصة القرود يمّه عشت الجو معكم 🥲

    واستمتعت بالصور بعد ♥️
    وقعدت أتخيل يوم قلتي طريق معبّد للراعي والغنم إن الراعي ممكن كان بنت صغيرة بس ما شاء الله قوتهم وتعودهم غير

    ربي يمدّ في صحتكم وعافيتكم ولطفكم 💕

    ReplyDelete
    Replies
    1. سعيدة إن التدوينة أعجبتك! 🤩
      فعلًا القرود ورتني جانب آخر من شخصيتها يصدم! 🤣

      الغنمات والراعي التقينا فيهم في كل المرتين، أذكر في المرة الأولى لحقتنا غنمة صغيرة وتصورنا معاها وكانت إضافة لطيفة للرحلة! 💕

      أجمعين يارب ويخلي لك حبايبك! 🤲

      Delete

Top