أكثر مثل أردده يحياتي وازعجت فيه كل أحد حولي هو No expectations, no disappointment
ولأن دائما خيبات الأمل تجي بعد التوقعات (بالذات لو كانت حتمية) فهاا أنا هالأيام قاعدة أعيش أحد فترة الإحباطات اللي توقعت إني تجاوزت سخافتها وحقيقي ما أبغا أدخل بفوضى أفكارها..
بس خن أحكي القصة بدون ألغاز.. بسم الله..
وصلني إيميل قبل شويا على آداء مدونتي وكم عدد النقرات اللي جتها ووش أكثر التدوينات زيارة! توقعوا معي وش أكثر تدوينة زيارة يللاا؟...... تدوينة قصة ولادتي بصالح 😂♥️✨️
هالايميل كان إشارة إني أبدأ الحين أكتب قصة ولادتي الثانية، لأني أسوفها كثير مؤخرا والحين احس خفت انسى التفاصيل 🌪
بصراحة الولادة حقتي بحد ذاتها ما كان فيها تفاصيل كثير، لكن ما قبلها وما بعدها شيء رهيب 😂.. نرجع من أول يوم في السنة الميلادية ١/١/٢٠٢٦ هذاك اليوم تأكدت إني حامل باختبار منزلي، كنت شاكة شوي لبعض الأعراض وأهمها كان الكسل والتعب وانطفاء الشغف كأني مكتئبة وفوقها بطني منفوخ 🙂 مدري هو النفسية نفخت بطني والا انتفاخ بطني جاب لي النفسية! الزبدة هالباكيج كان شوي غريب على جسمي من لا شيء! فكان منطقي جدا اني الاقي خطين في اختبار الحمل..
مع الحمل وتضارب الهرمونات والانشغال بولدي واحتياجاته اللي قررت أدحش معاها مشروع التدريب على الحمام قبل ما أثقل أكثر وأنشغل بالبيبي الجديد وهواجيسي اللامنقطعة حول الانتكاسات اللي تصيب الطفل الأول 🪐 بعد ما يجي طفل جديد يحتاج اهتمام وتفرغ وسهر مصاحب مع الرضاعة وكل أكشنات البيبي الجديد اللي تصاحبها.. صارت تراودني مشاعر (وهي أكيد واضح لكم انها من كثرة الهواجيس!) مشاعر أقدر اسميها "الاحتراق الأمومي" << مدري ذا المصطلح قد قريته في مكان ما والا من كيسي ..
بس عموما أحس مرات ودي آخذ بريك من المسؤوليات الأمومية عسى الله لا يحرمني منها ♡
