وصلني إيميل قبل شويا على آداء مدونتي وكم عدد النقرات اللي جتها ووش أكثر التدوينات زيارة! توقعوا معي وش أكثر تدوينة زيارة يللاا؟...... تدوينة قصة ولادتي بصالح 😂♥️✨️
هالايميل كان إشارة إني أبدأ الحين أكتب قصة ولادتي الثانية، لأني أسوفها كثير مؤخرا والحين احس خفت انسى التفاصيل 🌪
بصراحة الولادة حقتي بحد ذاتها ما كان فيها تفاصيل كثير، لكن ما قبلها وما بعدها شيء رهيب 😂.. نرجع من أول يوم في السنة الميلادية ١/١/٢٠٢٦ هذاك اليوم تأكدت إني حامل باختبار منزلي، كنت شاكة شوي لبعض الأعراض وأهمها كان الكسل والتعب وانطفاء الشغف كأني مكتئبة وفوقها بطني منفوخ 🙂 مدري هو النفسية نفخت بطني والا انتفاخ بطني جاب لي النفسية! الزبدة هالباكيج كان شوي غريب على جسمي من لا شيء! فكان منطقي جدا اني الاقي خطين في اختبار الحمل..
وهكذا مرت السنة كلها بثقل وتعب وتسدح إلى مالانهاية، كنت اتوقع انها بس اول ثلاث شهور وتروح الاعراض وبارجع فراشة بس مااش استمريت على الحال مع حجم بطن متزايد، حتى كنت اذكر لما كنت في الشهر الثامن جتني براكسون هيكس كثير وقوية ورا بعض وكنت متأكدة إني ماراح أكمل اسبوعين من الشهر التاسع من قوة الآلام + بطني الكبير! حتى رجعت أقارن صور بطني لما كنت حامل بصالح والحين! يالله سبحان الله كيف فعلا كل حمل غير عن الثاني << لكن في المقابل ما زاد وزني كثير ولا تجمع في جسمي سوائل زي بحملي الأول، والحمدلله شكلي وشعري كانوا حلوين << خفت إنه بنتي تاخذ من جمالي زي ما يقولون كهيل زمان عن الحامل بالبنت 😂
الزبدة، مرت الأيام بصعودها وهبوطها إلين فجأة راحت البراكسون هيكس اللي استلمتني الشهور الأخيرة! وحسيت والله الوضع مو بطال! فرصة أتحرك وأمشي وألعب مع صالح أعطيه حنان واهتمام بما إني بأكون في بيت أهلي مشغولة عنه بعد الانجاب.. وصدق هذيك اليومين لما خفت البراكسون هيكس لهيت عن موضوع الولادة وصرت ابغا اروق واستمتع وأتمشى وهكذا 🤭 << وبشكل رسمي حابة أبلغكم إنه هاذي وصفة الولادة السليمة 😂👏
قمت من النوم الساعة ٨ بطني يعورني بس مدري ما عرفت أحدد شكل ونوع العوار، حاولت زي السلحفة المقلوبة إني أغير وضعية نومي وأنقلب عالجهة الثانية، عسى النونو تهجد شويا وأحاول أرجع أنام! بس ماش 🫤 الألم يضايق مرره! قمت دخلت تشات جيبيتي وسألته تذكر لما جتني تقلصات وخفت انها تكون ولادة وجيت اشتكي لك وقلت لي انها براكسون هيكس؟ طيب حكيني وش كان شعوري وقتها اوصف لي ألمي؟ قال كنتي تحسين بشد متكرر في بطنك لمدة دقيقة وحولها وبعدين يفك بس بدون ألم، لكن الحين لا ألم يمسك بطني ويفك، لو استمر بانتظام قد يكون ولادة، واذا صار ملخبط وكذا فممكن طلق كاذب 👀
قلت اوكي قومي يا بنت الحلال خذي شاور دافي واسترخي خلي المويا الحارة تفكك عضلاتك وروقي وكذا عسى يخف الألم، وبالفعل أخذت هالشاور الحلو، لكن ما تغير شيء! قلت امممم احتمال إنه هيفاء راح تجي اليوم! 🤩 وصرت أتحمس بدل ما أتضايق من الألم! قمت ضفرت شعري ولبست فستان ينفك من قدام وصرت أفكر وش ناقص أحط بشنطة المستشفى؟
الباور بانك / المعمول / عباية الخروج .. ومن باب الاحتياط ما افطرت! شربت عصير واكلت تمر وطحينة 🥰
طبعة على بال ما قام الهزبند وصلوحي كانت اوريدي الآلام أكثر وضوح كيف انها تمسكني شوي وتفكني شويات بس الوقت ما كان مرره منتظم!
اذكر وقتها كنا على اساس نفطر، الا وياسر أخوي يدق علي، كنت وقتها مرتاعة ما ابغا تجيني التقلصات وأنا بوسط المكالمة لأني كعادتي كنت حريصة ما أبلغ أحد عن ولادتي إلا بعد ما أولد بالسلامة، لأنه وقت المخاض أفضّل إني أكون داخل فقاعة وهدوء بدون ربشة أو اني افكر بأحد أو أرد على أحد أو أطمن أحد وكذا.. أبغا أكون حاضرة في اللحظة 🧘♀️ والحمدلله انتهت المكالمة بدون ما انفضح وكنت مره رايقة وأنا اتكلم 😂👏
صار الوقت يمر وأنا أرتب وأجهز وأحرك حوضي وآخذ نفس مع الانقباضات واستخدم تطبيق الكونتراكشنز عشان يحسب لي! الين قال يللا يالطيبة جهزي نفسك واستعدي للروحة للمستشفى، قلت اوكي لسى فيه وقت ما بعد حمي الطلق ولا اصلا انفتحت موية الرحم! بس حسيت الهزبند معلق ماهو عارف يسوي شيء بس يراقب وضعي 😅 بعدها أقنعني تحت التهديد إني اروح المستشفى الآن! يعني أسوء شيء ممكن يصير هو اني أقعد عندهم وأولد متأخر ولا إني أولد بالبيت والا بالسيارة! 🫠
وفعلا انطلقنا الساعة ١ الظهر تقريبا وكنت حاطة اندرمات تحتي بالمقعد عشان لو فجأة انفكت الموية 😅 ونزلت الطوارئ، كنت ماخذة معي توت باق كبيرة فيها الأشياء اللي باحتاجها وقت المخاض فقط (معمول / عصير اناناس / اندوير / شال كبير / شبشب ربر / سماعات وكريم واشياء كذا..) وعلى أساس إذا جوا يدخلوني ولادة خلاص يصير الهزبند يجيب للشنطة الكاري اون فيها الاشياء اللي باختاجها وقت اقامتي
دخلت الطوارئ، وقلت انا جاية عشان عندي طلق وانا في الاسبوع ٣٨، قالوا اوكي ادخلي الترياج او غرفة الفرز.. قاسوا طولي ووزني وضغطي وسكري وقلبي ووو حرارتي! طلعت حرارتي ٣٨° قالوا ااوووه امم تحسين بألم أو شيء غير الطلق؟ قلت لا قالوا ما نقدر ندخلك طوارئ النساء والولادة الين ما نتأكد انه ما عندك كورونا ولازم حرارتك تنخفض! 😅 فأخذوني مكان ثاني اعطوني باراسيتامول في الوريد وسووا لي اختبار كورونا .. وعلى بال ما تنخفض حرارتي وتطلع نتيجة كورونا، قمت أرقص ورا الستارة على انغام في راسي واحاول اتحرك لأني حسيت الطلق خف وتباعدت المدة اللي بين الطلقات 🙃 وأنا كلشش ما اتخيل اني بعد هالدراما ارجع البيت وانتظر الولادة من جديد! خلاص انا تهيأت إني أجيب البيبي اليوم 🫥 عاد وقتها كان محمد يلفلف حول المستشفى ما يدري يروح البيت والا يجي ياخذني، قلت مدري قد ايش باقعد بس انا احس إني خلاص لازم اولد اليوم، روحوا انتم .. فقلت شكل القمطة حقت السخونة هاذي والكورونا هي السبب في تهدئة الطلق، يللا يا روان اعطي نفسك توكيدات وارقصي وسوي سكوات وكذا.. الين ما جا الممرض لقى جرعة خافض الحرارة خلصت + قاس حرارتي لقاها صارت ٣٦° + بشرني إنه ما عندي كورونا.. جاب الكرسي المتحرك عشان ياخذني على طوارئ النساء والولادة، قلت يو نو ووت! ابغا أمشي عشان النونو ينزل شوي بالحوض قال اوقي مام ☺️ وشال شنطتي وصار يمشي قدامي وأنا امشي كذا 🐧
دخلت طوارئ النساء وسووا لي تخطيط، وأثناء ما الدكتورة تشوف كم فاتح الرحم الا وتنفتح عليها موية الرحم كان وقتها الرحم فاتح من ٤ الى ٥ سم 😍😍😍 انا وجهي متشقق وناسة! وصدق بعدها صارت الانقباضات اسرع واقوى الين ما ودوني قسم الولادة خلاص وغيرت ملابسي.. دخلت غرفة رقم ١ كانت القابلة ماليزية اسمها جينيفر عسل مره وانا أحب بصراحة اني اسولف مع الطاقم الطبي قبل أي اجراء عشان نرتاح على بعض، بعدين قالت انا باجلس قريب من الباب اذا احتجتيني كلميني وخذي راحتك وكذا وقتها جلست اصور وكلمت اختي خولة قلت لها ااا انا بالمستشفى واحس اني بأولد اليوم << ما تدري اني على سرير الولادة 😂 طبعا قلت لها هالكلام عشان تبلغ أمي وأبويا بما إنهم وقتها كانوا في بلجرشي وكانوا ماخذين راحتهم على اساس باقي على ولادتي اسبوعين وبعدها يجون جدة 🤣 ومسكينه اختي اختبصت وراحت بيت اهلي ترتب وتجهز وكلمت أمي قالت لها انه روان كان عندها تقلصات وكذا 🤣 كل واحد يمهد للثاني..
أما أنا حسيت ابغا طاقة شوي وفتحت عصيري أشرب وطلعت المعمول وأول ما حطيته بفمي يبسستت!
فجأة فمي ما قدر يتحرك وريقي نشف وصارت المعمولة بفمي مقدر أطلعها ولا اقدر ابلعها، وقتها عرفت إني انتقلت لمرحلة أخرى من الطلق، وصار الألم كله أسفل بطني وفي فخذي وصار عندي شعور ملحّ بالدفع، جت الممرضة قالت اوكي مبين في التخطيط إنك خلاص ولادة، ما ادري قد ايش استغرقت مني عملية الولادة، لأني من اول ما دخلت المستشفى فقدت الاستشعار بالوقت تماما! اذكر منظر الاضاءة بالغرفة واذكر القابلة ومعها ممرضة سعودية وهم يشجعوني مع كل انقباضة ويمسحون علي ويهدوني لما اوقف التقط انفاسي.. أذكر إني في الوقت اللي بين الدفع أقعد اتنفس وامسك وجهي اضغط على عيوني << شعور ما تعرفه غير اللي جربوا الولادة الطبيعية عسى الله لا يحرم كل الأمهات الجنة 🥹
جت هيفاء الساعة ٥:١٥ العصر بصحة وعافية 🥹 اللحظة اللي بعد خروج البيبي من ألذذذذذ اللحظات اللي فيها مشاعر عجييبة لأن بمجرد خروج الطفل يوقف الطلق ويوقف الألم ويوقف الوقت! شعور غريب ترا لأن السويتش اللي يصير بالمشاعر فجائي جدا، بس كنت كل اللي قاعدة أسويه هو إني أحمد الله وأشكره وأثني عليه وأحس لو طول عمري حمدته وشكرته ما بتكون كفاية! .. عاد بعدها تجي ولادة المشيمة على إنه الألم والطلق يرجع من جديد كأنك تولدين إلى إني كنت في عالم آخر من الهواجيس، تذكرت لما علقت المشيمة بعد ولادتي بصالح، شوي خفت لا يصير هالشيء! فصرت ادفع بكل مافيني والحمدلله ربي خيب ضنوني ومخاوفي ❤️🩹
طبعا المستشفى ما شاء الله فول هاوس مافيه أسره في قسم التنويم فأخذت وقتي بغرفة الولادة نمت وتغديت بعدين نقلوني غرفتين إلين ما استقريت بغرفة التنويم أخيرا الا اليوم الثاني مساء.. وهنا نجي عند البلوت تويست اللي صارت معي 😂 مو قلت إنه ما كان فيه غرفة تنويم جاهزة؟ فبالتالي مافيه زيارة داخل قسم الولادة! سووو مافيه أحد يجيب لي الشنطة اللي جهزتها للمستشفى 🤣 صحيح إنه المستشفى يوفر لي كل الاحتياجات وقدرت استحم وأغير ملابسي وكل شيء من عندهم بس اااععع ابغا اشيائي وبجايمي وشراريبي 😆 بس يللا يللا عدت الحمدلله، أول ليلة كان فيني طاقة وكنت مره رايقة وتشيل واكلم واضحك واسولف وكالمتوقع مني، خرشت أهلي بخبر ولادتي بالذات اخويا ياسر 🤣😂 طلع كان حلمان فيني عشان كذا دق يتطمن، وبرضه ابويا حلم بوجود بنت لابسة فستان أخضر وكان شكلها يشبه هيفاء بالواقع بس كان بالحلم مستغرب ما عرفها 🤭💕 وأنا أولد وحدة من خواتي جلست تدق علي كأن عندها احساس كمان! مرره غريب رغم اني كنت اكتب واسولف لهم طول الوقت بالقروبات يعني مافيه شيء مختلف 😂
أما اليوم الثاني من الولادة كان جسممي مكسرررررر كل عضلة تولول لحالها وعظامي توجعني وحتى اللي يكلمني يبان في صوتي اني أشتغل بوضعية حفظ الطاقة 🪫 والحمدلله جت شنطتي ولبست ملابسي واحس قمت اصير انسان شوي شوي وفرت عيوني بشوفة حبايبي وأهلي كمان وصلوا جدة وجوني.. عاد المستشفى كانوا مره حريصين إني ما اطلع الا وانا مررره بخير عشان كذا ما قدروا انهم يفوتون موضوع اني جايتهم مسخنة وانا ما اشتكي من شيء! فجلسوا يسوون فحوصات ومزارع وتحاليل وجلسات مضاد حيوي لمدة يومين، وكانوا يجيبون لي هيفاء (ما عدا أحد الأيام ما جابوها الين ما تطلع نتيجة أحد التحاليل وكنت احس وقتها بشعور مرره بشع) بس الحمدلله عوضتها اليوم اللي بعده وجلست عندي وقت طويل ♥️♥️ يوم الجمعة كان مفروض هو يوم الخروج وكل شيء تمام غيرت ملابسي وحطيت ميك اب خفيف وجهزت ملابس هيفاء حقت الخروج وانتظر محمد يوصل عشان يسجل هيفاء ويخلص الاجراءات ونطلع، شويا دخلت علي دكتورة أطفال وممرضة معاها << أنا لوهلة مخي صار فيه ايرور! مو مفروض ممرضات الحضانة يجون؟ ليش دكتورة؟
شوي قامت عرفت على نفسها وقالت معليش يمكن البيبي تبقا معانا يومين، اشتبهنا بوجود التهاب في السرة ونبغا بس نتطمن عليها ونسوي لها بعض التحاليل وخزعة نخاع ومدري وشو .... انا ما صرت ادري وش قاعدة تقول! قلت إن شاء الله خير! طيب قد ايش ممكن تستغرق قالت يمكن ٤٨ ساعة لأنه برضه ويك اند وكذا.. قلت اوكي.. واول ما طلعت هي من الغرفة قمت ابكككككيي يس الأكيد انه مو بحجم بكائي لما طلعت من المستشفى بدون صالح، لأنه هالمرة جت الدكتورة وشرحت الوضع واعطتني توقيت محدد فصار عندي تصور حول الوضع بشكل عام فكنت طول الوقت اتصبر واقول الحمدلله الحمدلله واتذكر الجانب المشرق إنه هذا لمصلحتها والحمدلله إنهم حريصين وبيتابعونها بمجرد الاشتباه وان شاء الله إنها بين أيدي أمينة، يللا يا روان فرصة تنامين وترتاحين شوي بالبيت << قده وقتها أختي جابت لي ميلاتونين بس ما قدرت انام بالمستشفى ابددد اطول مدة نمتها كانت حول ساعتين ونص..
المهم اني رحت بيت أهلي وقضيت الجمعة والسبت متماسكة واتصبر واسولف واضحك واستقبل الورود واصور فعاليات النفاس مع القشر والقرص والعسل والسمن والماش والخلبة وكل اللزي منهو 😂✨️ اليييين جا يوم الأحد قلت خلاص عدت ٤٨ ساعة احتمال يكون وضعها اوكي وتطلع لي بالسلامة او يكون وضعها مو اوكي بسلامتها وتحتاج تقعد اكثر ويكون فيه إجراءات طبية نكست ليفل، وهنا كل ما كان الوقت يمر انا اتوتر اكثر واكثررر اتخيل الدكاترة تبدا عياداتهم ٨ وبعدين يشوفون الاطفال المنومين ويطلعون عالتقارير ونتايج التحاليل ومدري وشوو << كنت اتخيل الوقت اللي ممكن يستغرقونه حتى يدقون علي، وجربت دقيت بس محد رد على تحويلة العناية المركزة ٢ الييين جت الساعة ١٠ تقريبا وقتها كل شوي كانت تجيني رسالة يسألوني هااه كلموك المستشفى؟ وبعضهم يتصل وكنت اتووتررر من الاتصالات اكثر شيء! ما ابغا احد يدق ويشغل الخط 😭 هنا مشاعري تفجرت خلاص، والحمدلله إللي ألهمني وحطيتها كل بالدعاء والابتهال، كنت أكلم ربي في خلوة واشكي له واحكي له واحمده على النعمة اللي اعطاني اياها وأسأله إنه ما يحرمني منها ويطمن قلبي بخروجها بالسلامة واني مقتنعة إن تدبير ربي وخططه في الأرحم لنا ولها وأنا مسلمة في جميع الأحوال فارحم ضعفي وقلة حيلتي.. تكلمت تكلمت تكلمت الييين خلاص ارتحت وحسيت كذا هم وانزاااح سبحان الله وبعدها جتني نومة حلوة رغم انها برضه ما كانت طويلة.. قمت بعد الظهر مسكت جوالي على طول اشوف لا يكون جاني اتصال وجوالي سايلنت او شيء! وبعدها جلست منسدحه هالسرير والبلاكاوت مقفل كل شوي تجي أمي تتطمن علي وتجيب لي أكل عسى الله يوفقني لرد جمايلها، بس كنت طول الوقت ماسكة الجوال اسوي سكرولنق او ألعب بلوكودوكو ابغا الوقت يمشي مافيني شغف لأي شيء ثاني، جت أختي وبنتها يونسوني الله يسعد قلبهم وشوي هه كأني تنشطت وفتحت جزء من الستارة 😂 ودقت أختي الأصغر تسولف معي وكذا << اشوا انه من جوال أمي 😅 ولهيت بالسواليف واخذنا الوقت اليييييين يجيني اتصال من المستشفى! فجأة كنت منسدحة وجلست وكانت الممرضة تتكلم بآكسنت هندي قالت روان؟ البيبي دستشارج خلاص متى بتجين؟ انا: في اقرب وقت.. مسافة الطريق 😭😭😭
كلمت محمد قلت يلا يلاا تعال، وقمت ابشر أهلي وخواتي وتنشططت فجأة وقمت حطيت ميك اب خفيف واخذت لبس دلوعي حق هيفاء .. ورحت غرفة العناية المركزة ٢ ولبسوني القاون والماسك ورحت شفتها زسمحوا لي آخذها لغرفة الرضاعة الين ما يجي الدكتور، لقيتها عبيطة ودلوعة وتسرق القلب زي ما كنت اشوفها وقت تنويمي .. بعذري كنت متفاجأة إنها تعبانة كانت تبدو بخير وأفضل حال ، وبعدها جا الدكتور وطمنا عليها وقال ممكن تروحون عند طبيب أطفال بعد شهر يشيك عليها .. والحمدلله من قبل ومن بعد، أخذنا هيفاء وطلعنا من المستشفى ورحت فيها بيت أهلي وكانوا جايبين بالونات ومحتفلين بخروج هيفاء بالسلامة وأحس الحمدلله ردت روحي وعشت باقي أيام نفاسي بالشكل الطبيعي بدون تشكي وكل تعب صار على قلبي زي العسل بعد اللي صار 😂💕
فيارب مثل ما فرحتني بعودتها، فرح كل وحدة تتمنى الضنى بالذرية الصالحة الطيبة المعافاة وطمن كل أم عايشة في خوف وقلق وترقب على طفلها ولا تريها فيهم مكروه 💕
هاذي هي قصة ولادتي بهيفاء، كتبتها على دفعات وساعات متقطعة عشان تبقى إن شاء الله ويجي اليوم اللي تقراها هيفاء وتعرف قد إيش سوت في قلبي أم شبر ونص ♥️
أتوقع إني أشتغل مطورة أعمال في حياة أخرى.. المهم في حال انك ما قريت (
) أخذتها أيام الجامعة من موقع فانيلا كان عليها رسمة طاووس مرره جميلة.. كنت أستخدمها في المستوى الخامس أظن أشيل فيها القواميس الكبيرة لبعض المحاضرات لأني أخاف على شنطي وعلى كتفي 
وبعدها صرت أستخدمها كثير ببعض مشاويري زي النادي وحتى بسفراتي، مره أشوفها شيء جميل وعملي وخفيف ويشيييييل! فصدق كرفتها << دقيقة لازم أنزل صور لحقائبي المفضلة 
كان ببالنا بزنس طباعة على تيشيرتات بس تكون تصاميم funky غريبة وأشياء كذا مرتبطة في جيلنا وذكرياتنا وتصاميم تكون customizable تصير قابلة لتعديل الأسماء مثلا.. وهكذا 
