رحلة هايكنق جبلية صيف 2020 | تدوينة مصوّرة! 🧗‍♀⛰

Thursday, December 31, 2020
في مراجعة سريعة حبيت أسترجع فيها أهم الأحداث اللي صارت لي في عشرين عشرين، فتحت استديو الصور بجوالي وجلست أستعرض الصور بداية من 1 يناير واللي كان تاريخ رحلتي للرياض لتجهيز حفلة ملكة أختي اللي وثقتها لكم كل تفاصيلها -هـنـا- 
وصولًا ليوم الإثنين الموافق 10 أغسطس! 

وقتها كنا في بلجرشي، وبشكل سريع من غير أي تخطيط قررنا في اليوم اللي قبله إن فجر يوم الإثنين بنطلع في رحلة هايكنق بقيادة أبويا طبعًا  هالمرة وجهتنا بتكون جبلية لمنطقة ماهو متعارف عليها بين الناس!

في المرة السابقة اللي كتبت تدوينة أول هايكنق مع بابا كان مجرد تست اختبار لقدراتنا ههههههه السنة اللي فاتت ودانا أبويا نفس الجبل اللي مخططين له بعد ما تأكد من إمكانياتنا ونجاحنا في الإختبار  وهالمرة بنروح له بس بيكون مسارنا أصعب حبتين!

تجهيزاتنا كالتالي:
روان تحضر ساندوتشات وكوروسون للفطور، وأبويا عنده عدة الشاي حقت الطلعات، وأخواتي وماما كل وحدة تجهز نفسها بس  << نحاول نطلع هالمره خفيفين لطيفين قد ما نقدر لأن المره السابقة أخذنا معانا نواشف للفطور وتكبكب زيت الزيتون حق الجبن على التونة وانخبصنا شويا وكان معانا مؤونة صغيرة أشغلتنا حبتين  فهالمرة كل شيء بيكون خفيف 

طلعنا بالسيارة في نقطة ممكن تطلع لها السيارة وبدأنا الرحلة 


قصص السناب تشات لعبت بأفكاري! 😯💔 | سواليف

Tuesday, December 22, 2020

 
صار لي موقف قبل كم يوم حسسني بتأنيب ضمير شديييييد وخلاني أرجع أعيد حساباتي مع نفسي حقيقي! 

قبل كم يوم كنا طالعين نتمشى في مكان مفتوح وجالسين نتعشى في أمان وسرور وفرح، إلا ألمح بطرف عيني ورا السيارة بمسافة أربع أمتار رجل رث الثياب وما كان مرتب شكله بالإجمال، كان حوله كم بسة تحوم شويا انحنى وشال بسة سودا وحطها على كتفه وجلس يربت عليها وفجأة التفت جهتي  عاد أنا سويت نفسي مشغولة بالعشاء والسواليف وحسيته وقف شويا بعدين اختفى ورا السيارة.. 

الرجل النبيل | الكتاب اللي غيرني! 📖

Thursday, December 17, 2020
 

قبل كم ساعة خلصت قراءة كتاب (الرجل النبيل) وسط بحر من الدموع وشعور عميق بالفقد أحسه مع آخر كلمة قرأتها فيه..
شعور صعب إنك تقرئين كتاب يحكي عن بطل بشخصية كاملة ومثالية بطريقة بشرية! تعيشين أحداثه في كل فصل من فصول الكتاب وتنتهي بموت البطل!
Top