ناموسة خربت علاقتي بدكتور قوقل ☠️

 من زماان ما جتني هالرغبة الجامحة بإني أكتب تدوينة!! ليه؟ لأن السالفة فريششششش 
كذا توني دخلت البيت فسخت عبايتي وفتحت اللابتوب 

- خلونا نتفق انه مو لازم صورة ولا بأراجع كتابتي  .. شغل سريع سريع عشان إذا قعدت أأجل أعرفتي ما راح أنزل-

اليوم الثلاثاء، الساعة 10 بالليل.. اوكي؟

قبل أمس زي هالوقت تقريبا فجأة جا ببالنا نطلع برا نمشي بس كذا، أخذنا صالح بالعربية وجلسنا نتمشى تحت بالشارع عادي بالليل دقيناها كعابي

وأشوف فيه ناموسة تدور حول صالح وهو متصنم مرره ما شاء الله عليه مؤدب حتى يده ماله خلق يحركها  وأنا أهشهش حوله وأروح يمين يسار بالعربية << يعنني أضيع الناموسة! لأني أذكر قبل مدري كم شهر قد جته لقصة تحت عينه وجلست منفوخة وشكله يحزززن بالذات إنها كانت قبل سفرتي للرياض ولقاؤه الأول مع باقي أفراد العائلة  الزبدة أدري إنه هو ولقصة الناموسة مررره مو أصدقاء! وعنده بخاخ حق الناموس لكنه بالسيارة أستخدمه للطلعات..

بعد ما خلصت جولتنا رجعنا البيت عادي وإلا محمد يقول روااان شوفي جبهة صالح فيها لقصة ناموسة حمرااا  واو بيوتييفوول! 

نام عادي زي أي نومة خايسة يقوم فيها كثير ويبكي ويتقلب (أظنه يمر بفترة تسنين).. وصحي عادي في موعد صحيانه وما كان فيه شيء غريب، وتغدا ولعب وأنا كان عندي وقتها شغل وتسليم ووو، بعد الظهر جيت إلا وألاقي جبهة صالح منتفخة من النص (بما فيها أعلى الأنف!!) صار فيه كذا مساحة كبيرة منفوخة بين عينه!  المنظر يفجع وينرحم وكل شيء!

سألت محمد إذا طاح أو شيء قال لا عادي جته كم صقعة خفيفة وهو يلعب بس مافيه شيء خطير! وصدق أصلا ما سمعته بكى أو شيء! فجا ببالي إنها الناموسة بس مدري يعني استغربت انه ليه توها تنتفخ واللقصة صار لها أكثر من 12 ساعة! 
عاد وقتها كل ماحد شافه مرره تفاجئ << وخولة عاد كانت ردة فعلها حكاية ختمتها ببكاء من قوة ما شكله يحززن وعللت تصرفها بهرمونات الحمل  << فهمت شعورها اففف

أعطيته قبل النوم جرعة من شراب الحساسية عشان مدري حسيت لازم!  يمكن تحسس؟
انتهى أمس على خير، ونومة صلوحي الخايسة هي هي .. قمنا ولاحظت النفخة خفت شوووي من فوق ونزلت تحت كذا صار من تحت عينه منفوخ شويا + هو نفسيته صارت خايسة أكثرررر وما يبغى أحد ويبكي على أي شيء وصار متضايق من راسه ويبكي ويفرك وجهه بصدري ... ايوااااه بدا الفار يلعب في عبي  قمت أعطيه جوه وأسايسه وأسبحه ونلعب سوا بس هو مو على بعضه وحتى شهيته للأكل مو مره! قمت قلت محمد يللا على أقرب مستوصف خلي طبيبة أطفال تشوفه  

المشكلة إنه محمد مرره ما كان في المود وعنده شغل كثير فصار الوضع توتر فوق توتري أنا لأنه الدعوة ناموسة مو شيء خطير بس مدري مدري خفت < < يقول إني هبلت فيه  بس متأكدة إنه يبالغ هه

الزبدة شافته الدكتورة وسألتني إذا طاح أو مدري وشو قلت لها كل اللي صار وأنا من جد ما أدري بالضبط وش فيه إذا هي ناموسة والا صقعة أو يمكن شيء ثاني أنا ما أدري عنهوأعربت لها عن قلقي، قالت لازم نحوله على طوارئ أطفال هم يشوفونه وأعطتني ورقة إحالة  أنا بغيتها تطمني إلا هي أقلقتني أكثر.. بس إللي اتفقنا عليه أنا وزوجي إنه هي تبغى تفتك من المسؤولية لأنها حتى كشف سريري ما سوت له! .. فقال محمد ما عندها سالفة، الولد قاعد يتحسن وما فيه شيء خطير هي لقصة بالأخير ورجعنا البيت.. وصلوحي أخذ قيلولته وأنا قمت أخلص شغلي اللي ما بديته والحياة رجعت هادية وحلوة .. 

كنا متفقين نطلع اليوم مع صلوحي يلعب بالرمل في الكورنيش وناخذ له ألعاب رمل عشان يغير جو ويتعرض للشمس شويا ونتعشى بعدها << كنا محتاجين نغير جو شويا بعد الستريس..

مدري وش اللي خلاني أدخل قوقل وأكتب بالانجليزي انتفاخ الجبهة والانف وأقعد أدور في صور الأطفال عشان ألاقي أحد زي حالة صالح  بنااات بلييز لاحد يسويها! طلع لي pott's puffy tumor هو زي التهاب يجي بسبب الجيوب الانفية يصير فيه سوائل بالجبهة وأعلى الأنف ويحتاج عملية يشفطون السوائل ويعطونه كورس مضادات حيوية لأن هالالتهاب بالذات اذا ما تعالج يصير أشياء مرره مو زينة << طبعا المرض يعتبر نادر ويجي للي عندهم التهاب جيوب مزمن بسس أنا مخي وقتها ما صار يشتغل بشكل سليم  وسوسة تااايم!

https://www.aliem.com/saem-clinical-images-series-facial-swelling/

<< هاذي الحالة كانت شكلًا تشبه حالة صالح ومنها بديت الوسوسة! 

وأبدأ أتذكر انه ما ينام واقول ااه هو يفرك خشمه لما يبكي يمااه !! ورحت عند محمد مسكين أتشكى << هو ما صدق اني هجدت المرة الأولى! لااا والحين جايته بمرض جديد والتهاب وجراحة ومدري وشو! فجلس يقنعني اني أتوهم وبلا خرابيط والولد قاعد يتحسن ومافيه شيء خطير، وأنا بقلبي أقول محمد قاعد يسلك لي  بس اوكي خلاص روان جد بلا وساوس أعوذ بالله من الشيطان يللا خن نخرج ونغير جو..

ورحنا طلعنا البحر وأنا نفسي ما قصرت طلعت طاقتي السالبة بالرمل لعبت وغبرت عبايتي  وصالح انبسط ما قصر حتى نام في السيارة من التعب.. بعدها نزل محمد المطعم يطلب وأنا وصالح بالسيارة، شويا قام من النوم يفرك عينه ويبكي << مرره عادي زي دائمًا يقوم من النوم منفس بس أنا لأن لسى فيه أفكار ما تعاملت معاها بشكل منطقي طول الوقت كنت أتجاهل.. ومع الوقت طفش صالح وقام يزن ويحن ويبكي أكثرر ويصارخ، ومع البكى يمسك راسه مكان الانتفاخ.. أنا هنا كنت على وشك أدخل في حالة هلع! مخي صار يفسر البكى انه قاعد يتألمممم  أول ما دخل محمد السيارة قلت صالح يبكيي!  وهو:  طيب؟ قلت شوووف يمسك راسه شووف دمووع  << الايموجيز تمثل نفسيتي بس كنت بطلة ما بكيت لسى  

وقتها محمد استسلم مني ما لقى لي حل، قام فتح لوكيشن المستشفى ورحنا للطوارئ، قال محمد انتي اللي تكلمي قولي كل شيء  دخلت عند الطبيبة وشرحت لها كيت كيت كيت ووريتها راسه أول ما انتفخ كيف كان قالت اوكي بآخذ الصورة عشان أوريها الاستشارية وفجصت صلوحي << وأنا أحس اني تطمنت شويا .. دخلت الاستشارية وعدت عليها الاسطوانة وقلت لها عن المرض اللي شفته وووو ونظراتها كانت زي  / وأحس محمد كان وجهه زي 

بعد ما اعطيتها التاريخ المرضي والحساسيات ومدري وشو.. وبعد التشخيص وما سمعت مني كل شيء قالت بالمختصر يعني: انتي جيتي الطوارئ عشان لقصة ناموسة  بس صدق صدق الله يسعدها جاوبت على كللل أسئلتي وعن التهاب الجيوب وأعراضه << عشان أشيل هالمرض اللي قريت عنه من راسي تماما << وطبعا ولا شيء من أعراض التهاب الجيوب عند صالح! .. واقترحت لي اني أتابع مع أخصائي حساسيات ورشحت لي طبيب عندهم ممتاز .. فيعني مافيه شيء الحمدلله، لكن في حال تطور الوضع أو زاد الانتفاخ تعالي مره ثانية.. المشكلة انه في الوقت اللي رحت عندها كان الانتفاخ خف أكثر، حتى قعدت تقول هو الحين وجهه منفوخ؟ هههههه شكله كأنه طبيعي بس ملامح ما تشبه وجه صلوحي 

طبعا أنا بس طلعت صرت أقول اااه الحمدلله الحمدلله لأنه صدق الحمدلله الحييييييين تطمنت لأني استشرت أحد مختص وتكلم معي بمنطقية وحقائق مو تسليك يعني، طبعا جزء من "الحمدلله" حقتي كان بصوت يسمعه محمد عشان يحزن عليا انه اووه كنت قلقانه بس انا أم مسكينة خايفة مو موسوسة زي ما يقول وخليته يطق مشوار طوير وخربت طلعته وعشاه ههههههههههه 

والحين رجعت البيت وأحس إني مجهدددة نفسيا، أبغا أستوعب اللي صار..

تحديث: عمتي تقول كانت عند جارتها وتسولف عن اللي صار لصلوحي وقبل ما تكمل شرح قاطعتها وحدة تقول ااه اكيد انتفخ راسه وبداية خشمه! لأنه بنت بنتها صار لها بالضبط زي كذا بسبب لقصة ناموسة  وهذا تأكيد ثاني..

ماهي الفكرة والعبرة من السالفة؟
1- لا تساومين بصحة طفلك لأنه ما يعرف يتكلم أو يعبر، عادي خليك حريصة ولا تكونين مفرطة

2- قوقل الحيوان ماهو دكتور.
3- وهالنقطة هي الأهممممممممممممم: لا تتابعين أو تحيطين نفسك بأمهات خوافات، ترا صدق أنا أبدًا مو كذا، بس استوعبت لوهلة اني قبل كم يوم كنت أسمع سالفة وحدة بالسناب تحكي تفاصيل خوفها على ولدها لما اشتبهت في تعبه وكيف انها كانت ميته رعب الين ما طمنها الدكتور  تركت كل شيء في النت وقام عقلي اللاواعي يتعلم منها هالصفة بس!

صدق أول سنة أمومة هي سنة انتقالية بحياة كل بنت! أشياء كثير تصير بحياتها (أول مره) تتعامل مع مشاعر غريبة وتضطر انها تاخذ قرارات لوحدها في كثير من المرات، مرحلة حياتية كذا تنضجك 3 مرات عالأقل عن قبل الأمومة.. ااخخ بس ما أقول إلا الله يجزي والديننا أعلى درجات الجنة ويرزقنا الحكمة والسداد وحسن التربية والصبر يارب 

بس والله شكرا على انصاتكم هههه وتراني مرره اشتقت أدوّن ووو بس والله خن أروح آكل عشايا البارد هههههه

 وفتكوا بعافية 

2 comments