تجهيزاتنا لحفلة ملكة أختي بالبيت 💍⚜

Friday, January 31, 2020
أول يوم أربعاء من هالعقد واللي كان يوافق 5 يناير 2020 احتفلنا في منزلنا بمناسبة عقد قران أختي "إيمان" 



قررنا نعمل حفل النساء في المنزل وبدأنا تخطيط والتنفيذ وكل شيء في أقل من أسبوعين! كان التحدي كبير خصوصًا إنها أول مره نسوي فيها مناسبة بهالحجم في المنزل.. عشان كذا كنت جدًا متحمسة أوثق كل شيء أقدر عليه بحيث يكون مرجع ومصدر إلهام لكل أحد حاب يجهز مناسبة بالبيت، وكمان يصير ذكرى ونيسة أرجع لها في مدونتي 


بسم الله، 

خلوني في البداية أحكي لكم قد إيش كان عامل الوقت يعتبر تحدي كبيييررر مره مره بالنسبة لنا!! 
انخطبت أختي وأعلنت عنها رسميًا في بداية شهر ديسمبر، وتقرر إنه يكون الزواج في إجازة بين الترمين! يعني تقريبًا بعد شهر من الخطوبة، فبما إنه ما راح يكون فيه وقت طويل بين عقد القران والزواج؛ فكان المخطط إنه تكون حفلة الرجال في المِلكة علينا، وحفلة النساء بالزواج على أهل العريس، حلو؟ حلو 
فكعادة حفلات الرجال في مناسباتنا، أبويا حجز قاعة في نادي ضباط القوات المسلحة والدعوة قهوة وشاي وتمر ووشوكولاته والعشاء بوفيه، بس باقي أبوي ياخذ بشته وعلبة عود لتبخير القاعة وصلى الله وسلم  .. هاذي انتهينا منها!

*المقطع من تصوير أبويا يوم حفلة الرجال في النادي*

إلين قبل موعد الملكة المحدد بـ10 أيام بالضبط! كلمتني أمي وقالت انه لازم نسوي عشاء ونعزم عالأقل أم العريس وأخواته وزوجات أخوانه يوم عقد القران، وكانت أمي شايلة هم إنه تبغى تجهز شيء مرتب وانه مافيه وقت أبدًا! 
وقتها أمي كلمت أم العريس وعزمتهم على العشاء في بيتنا وسألت عن عدد الضيوف اللي بيجون معاهم وقالت تقريبًا من 15 إلى 20  عاد أنا تحمست إنه المناسبة راح تتحول من عشاء استقبال وتعارف إلى حفلة على نطاق أكبر.. 

بعد حوارات ونقاشات واتصالات - بما إني في جدة وأهلي بالرياض - خططنا مراسم الحفل والتجهيزات اللي نحتاج ننجزها من بدري وتوصلنا لهالترتيب:

- مكان الحفل: 
قررنا نفتح مجلس الرجال والمقلط على بعض عشان نستفيد من المساحات حتى تشيل أكبر عدد من الضيوف في مكان واحد، وبما انه مستوى المقلط مرتفع درجة عن مجلس الرجال قررنا نحط كوشة صغيرة في الوجه، ونغطي الجدار اللي خلفها بستاير بيضاء يرتبها لنا كلها محل تنسيق حفلات.
اخترت أتعامل مع "ملك الحفلات" اللي جهز الكوشة اللي اخترتها وقرروا يضيفون بوفات صغيرة على جوانب الكوشة عشان تشيل عدد أكبر وتضيف شكل أنيق 
وكمان احتجنا نستأجر سماعة كبيرة بستاند وكان صوتها مناسب جدًا مع المساحة بحيث ما تكون مزعجة وصاخبة ولا هادية بزيادة!
أما الزفة والأغاني وهالسوالف قررت أجلس عليها برواقة وأسوي قائمة مرتبة مع خواتي *يعني بأشتغل دي جي بعد*  

- الضيافة:
اخترنا تكون ضيافة القهوة عبارة عن تمور ومعمول وشوكولاتة مكشوفة ومغلفة، وطبق واحد موالح يكون مع الشاي قبل العشاء.. أخذت أمي طقم صواني تقديم لمحل "روز" عشان يجهزها كلها مسبقًا.
أما القهوة والشاي، فاستعنا بصبابات يجون بطقوم القهوة والشاي معاهم ومعاهم قهوتهم والشاي وأدواتهم كاملة << حقيقي مره كانوا مريحات وفاهمين شغلهم ما احتجنا نناديهم كل شوي 

- العشاء:
قررنا يكون العشاء خارجي في الهواء الطلق  وتفاديًا لموجات البرد المفاجئة طلبنا دفايات خارجية من"ملك الحفلات" اللي برضو استعنا فيه لتجهيز طاولة الطعام مع كراسي وطقم مائدة لـ25 شخص، واقترحت خولة نحط عقود لمبات ليد تنور المكان وتعطي منظر خرافي!   << كان اقتراح صائب
أمّا بوفيه العشاء فقررت أختي اللطيفة لينة تطلبه من مطعم "برج الكباب" بما إنه لها تعاملات سابقة معهم في مناسبات مختلفة وأكلهم كان لذيذ << ولو إنه صار لنا منهم مقلب مرتب ليلة الحفل بس وقتها الواحد يضطر يمشي للأسف 
وبالنسبة للكيكة فعروستنا قررت تختارها بنفسها وحجزتها برضو من "روز" بحيث يوم الحفل ناخذها مع صواني الضيافة 

- التوزيعات:
كانت التوزيعات نوعين، جزء كان عبارة عن شمعات فواحة جاهزة على شكل تولة عود بغطاء ذهبي وعليها كريستال (اعتمدنا الذهبي كلون رئيسي بما إنه أغلب الاكسسوارات والأطقم اللي في المجالس ذهبي) كان شكلها لحالها حلو وما اضطرينا نضيف عليها شيء زيادة .



والنوع الثاني من التوزيعات كان ستاند أكريليك شفاف صغير عليه دبلتين، قررت أسوي تصميم وأطبعه على ورق لاصق أحطه على الستاند ونحط على قطعة شوكولاته بالويفر *بتلاقون صورتها تحت*
 << حزر فزر الشوكولاتة من فيين؟؟ من روووز صحح  معليش بصراحة أنا مره أحب التشوكليت وأفهم فيه كثير وأميز الزين من الخربوطي مهما كان اسم المحل! بس حقيقي والله شوكولاتة روز لذييييييذة طعم الكاكاو فيها غني وسكرها متوازن وإذا ذوبتيها يصير قوامها كريمي مو كلها زيت! 



المهم.. كانت هاذي الخطط اللي اشتغلنا على تنفيذها..


قبل الحفلة..
  •  جوا "ملك الحفلات" البيت وشافوا المجلس والمكان اللي بنحط فيه العشاء واتفقوا مع أمي على التفاصيل والإضافات اللي بيضيفونها ودفعنا العربون وخلاص.
  • اخترت زفة "ملكوك واكتبوا كتابك لعبد المجيد عبدالله وداليا" انهرت عليها أول ما سمعتها  وسويت قائمة أغاني مع عروستنا، وحملتهم في جهازي ونزلت نسخة احتياط في فلاش ميموري لحالات الطوارئ لا سمح الله.
*كانت طاولة الطعام هي محطة الشغل الجماعي لذلك تجاهلوا الحوسة* 
  • عملت تصميم لوقو باسم (إيمان & فيصل) مع تاريخ الحفلة، وطبعناها وقصقصناها وثبتناها مع التشوكليت وصارت جاهزة.


  • وليلة الحفلة سوينا تنظيف عميق للمجالس والحوش وجهزنا كل شيء نحتاجه من ضيافة وتوزيعات حتى المناديل وحاويات صغيرة عشان العاملات يشيلون فيها المناديل والقراطيس وهالسوالف.. كل شيء حطيناه على طاولة الطعام عشان ما ننحاس يوم الحفلة.






يوم الحفلة:
  • أول شيء وصلوا العاملين من "ملك الحفلات" عشان يركبون الستاير والكوشة وطاولة الطعام والسماعات وهالسوالف كلها بالعصر وتقريبًا خلصوا على وقت صلاة العشاء


*الصورة مقصوصة من مقطع فيديو من جوالي*
  • بهالوقت جبنا الضيافة والكيكة من "روز" وجهزناها على طاولة الطعام (محطة العمل حقتنا )، صار كل شيء نحتاجه في الحفلة أو نجهزه من بدري نحطه عليها.. حتى حلاوة النعناع واللبان والمنديل المبلل اللي بعد العشاء والفواكه اللي بنحطها على بوفيه العشاء جهزناها هناك بحيث في وقتها يصير نرتبها في مكانها المناسب << ااخ كانت حركة مريحة! 




*الكيكة اختارتها أختي بالشوكولاتة وعليها الورود سماوية نفس لون فستانها*

    


  • وقبل ما يوصلون الضيوف بشويات كان العشاء وصل وجلست أختي لينة معاهم تشرف على تنظيم الشغل 
<<< ايييييه تذكرت سالفة!  اللي كان متابعني هذيك الفترة في الانستا ستوري ليلة الحفل باللييييل بعد الساعة 2 صرت أسمع صوت رعد كثير وكنت حاطة يدي على قلبي من جد! ما صار دقايق من وقت ما سمعت صوت الرعد إلا والسماء صارت تششششششششش مطر غزيييير مره!  استغفر الله بس أول مره أحتار بشعوري مدري أفرح بالمطر وإلا أشيل هم العشاء اللي بيكون برا؟! طبعًا استمر المطر الين اليوم الثاني بالصباح فلما جا وقت العصر كانت السماء مغيمة بدون مطر فاحتياط قررنا نخلي العشاء تحت مظلة القراج وفتحنا الملاحق بحيث لو نزل مطر أو كان الجو مره بارد يصير أي أحد يقدر يغرف من البوفيه ويدخل ياكل بالملحق 


رتبت أنا وخواتي طاولة الطعام الخارجية حطينا عليها المناديل والشمعدان والمشروبات وهالسوالف .. لكن قبل وقت العشاء بوقت قصير استوعبنا إنه السماء مرره صفيت وصار الوضع أمان فسوينا عمل جماعي مع خواتي والعاملات بحيث ننقل الطاولة هاذي من تحت القراج إلى نص الحوش بالطول يصير المكان أشرح وأريح بالحركة <<< ما كانت مهمة سهلة  بالذات بعد الترتيب هذا، والطاولات كانت قزاز كبيرة والقاعدة منفصلة عن السطح بس سويناها الحمدلله وطلع الشكل أجمل بكثيرر 






*صورة قصيتها من فيديو بجوالي*

طبعا زي ماهو واضح  الصور من كل بحر قطرة، بعضها كانت من الكاميرا وقت الروقات وأخرى من مقاطع صورتها بالجوال عالسريع بالذات بعد ما وصلوا ضيوفنا كنت مرره مشغولة بدور مشغلة الدي جي و المصورة والمنسقة، وأهم شغلة مسكتها هذيك الفترة هي إني كنت وصيفة الشرف للعروسة  حقيقي هذيك الفترة صرت كل شيء كنت أتمناه في وصيفة يوم زواجي  العروسة أيًا كانت مناسبتها طبيعي تكون مرررره متوترة حتى إذا كان كل شيء تحت السيطرة تلاقينها تتحقرص إذا ما كان من الترتيبات، بيكون من شكلها وطلتها، أو زفتها أو الناس الجديدة اللي بتقابلهم... مليون شيء وشيء يدور في ذهنها فلازم يكون معاها أحد هادي يعرف يمتص المواقف يشتغل بهدوء ويطمنها على طول ويحكيها عن كل شيء حلو يصير، وإذا فيه شيء مو زابط ما ينقله لها يحاول يعالج الموضوع بسكات.. وأتوقع كثير جربوا الشعور كيف أو عالأقل يعرفون أحد قريب لهم مر بهالمواقف  فالحمدلله مسكت هالدور من كل قلبي خصوصًا مع قصر الفترة اللي بين الخطوبة والزواج فأكيد راح تكون بالنسبة لها فترة عصيبة جدًا تجهز فيها مناسباتها ونفسها ودبشها << هذا غير التحضيرات النفسية  فالحمدلله  جد إني كنت متماسكة وسوبرومن وقتها من جد 


الحمدلله الذي بنعمته تتم الصالحات 
انتهت حفلتنا على خير، كانت من أروع ما يكون، ما تخيلنا الأوضاع راح تسمح لنا نطلعها بهالشكل صراحة بس كان العمل الجماعي هو السبب بعد الله  انبسطنا وانبسطوا الضيوف وتعرفنا عليهم وكانوا ناس طيبين مره -شعور جميل لمن تكبر دائرة العائلة والمعارف بالمصاهرة - وجلسنا جلسة غير رسمية بعد العشاء مع بعض سولفنا ورقصنا واستمتعنا، انزفت أختي مع عريسها وكان لي الشرف أوثق لحظاتهم الأولى مع بعض..

<< إلين هاللحظة وأنا أكتب -بعد مرور ما يقارب شهر- كل ما أتذكر هذيك الفترة آخذ شهيييييق زفييييير وأبتسم إن كل شيء مر هذاك اليوم بسلاسة.. 

بعد ما خلصت الحفلة بسلام جت اللحظة اللي كنا ننتظرها من اسبوع: وهي اننا نفسخ الكعوب ونمسح المكياج ويبدأ التقرير واستيعاب الأحداث  

بعد هالحفلة هل أأيد مناسبات البيت؟ ايييييييييه مررره تجنن أوسع صدر بالذات لو فيه معاك أحد يساعدك وعندك وقت كافي تجهزين فيه للحفلة وبعد الحفلة تروحين تنامين مو زي لو سويتيها في قاعة فندق مثلًا -زي في حفلة ملكة أختي أو ملكتي- أذكر كان بعد الملكة تعب من نوع آخر نلملم الأشياء ونطلعها الجناح المحتاس من تجهيزاتنا بالأساس ونكلم كذا سيارة تجي تنقلنا وتنقل الأشياء وقروشة مره!


وهاذي كانت حفلة ملكة أختي الكبرى إيمان، 
ربي يوفقها ويسعدها ويهنيها بحياتها وعقبال السناقل كوولهم يااارب...


فوتكووا بعافية.. 



     
  •  
  •  
  •  
  •  
  •  

6 comments:

  1. الله يباركلها ويوفقها مرررة انبسط لكم

    ReplyDelete
    Replies
    1. ربي يسعد روحك الحلوة يارب 💖

      Delete
  2. الله يوفقها يارب ♥
    ياااااه روان استمتعت بالتدوينه كثيييير دخلت جو بالاحداث اللي صارت 🤓
    يعطيك الف عافيه يا احلى وصيفه ❤💋

    ReplyDelete
    Replies
    1. ويوفقك ربي ويسعدك فاطمة 😍💓
      أسعدني إن التدوينة دخلتك الجوو المطلوب 💃 مررره شكرًا لك يا سكر 💖

      Delete
  3. الف مبروك الملكه ، الله يتمم لها على خير يارب
    و ماشاءالله شغلكم مرتب و يفتح النفس ،، اشتهيت بوفيه ههههه .. يعطيك العافيه على التوثيق و الجهد .. الله يزيد أفراحكم

    ReplyDelete
    Replies
    1. ربي يبارك فيك ويسعدك الجوهرة 😍💓
      مررره شكرًا لك هذا من ذوقك << للأسف حتى أنا مشتهية البوفية كماان ما كنت حاسة فيه!😫💔
      وربي يعافيك ويعطيك مثل دعوتك الحلوة يارب 💗

      Delete

Top