سواليف مرره عشوائية بس أكثرها عن الشعر 😩

 قبل شهر تقريبًا جتني رسالة على الإيميل فيها تأكيد معلومات الدفع لدومين مدونتي (نطاق / رابط خاص مدفوع) 

وجتني حالة إدراك إنه وااو متى آخر مرة كتبت تدوينة؟ أو متى آخر مره عالأقل جا على بالي أكتب تدوينة؟ أحس اني في هالمرحلة الحياتية -الأمومة- صرت مركزة أكثر على المسؤوليات الجديدة المرتبطة بالأمومة  بس لدرجة ماقد جا على بالي في يوم أكتب شيء؟

من فترة لفترة أفكر أقول وااو معقول كنت في يوم من الأيام كذا يعني أي شيء أبغا أسويه أقوم أسويه عادي وبالمدة اللي أبغاها!  مرره غريب! نسيت الشعور صدق  الحين وقتي أبدًا مو بكيفي وأتوقع كل أولوياتي الحياتية تغير ترتيبها

لكن! أنا واعية جدًا ومدركة إني الآن نسخة أفضل (Updated version of me) أكبر وأنضج وأعمق -نقول إن شاء الله؟! - بس فعلًا مبسوطة بنفسي الحين ولا أفكر كثير كيف زي ما يقولون "أستعيد نفسي القديمة" لأني ما فقدتها الحمدلله  بس هي زي ما قلت ترتيب الأولويات تغير..

امممم على طاري إني صرت أكبر؟؟؟ انتم ملاحظين اجتياح الشيب خلال هالسنتين في كل الأعمار مؤخرا؟ اوكي أنا ما عندي مشكلة معاه بس هو قاعد يسوي لي مفاجآت كل ما وقفت قدام المراية الله يهديه بس..  عندي حكي كثيييير عن الشعر والله..

اممم تحذير! هالتدوينة ماهي عن موضوع معين.. هي عبارة عن خرابيط قاعدة تدور في راسي صار لها عشر دقايق من لما فتحت مدونتي.. 

يس فتحت مدونتي قبل شويا أتطمن عليها أشوف شخبارها بالذات إني كنت مترددة إذا أجدد اشتراك الدومين السنوي وإلا أسحب عليه بما إني مطنشة المدونة؟ بس الحمدلله حمسني الهزبند إني أحافظ عليها وعلى الدومين.. المهم أقول لكم فتحت المدونة وجلست أقرا التعليقات على موضوع ولادتي وحملي  تججننن التعليقات صدق مرره شكرا على كل أحد يكتب شيء حلو في المدونة أو يجي يكلمني عالانستقرام .. أما الجزء الثاني من التعليقات اللي جاني في المدونة والانستقرام والتويتر مدري اكس: كيف حملتي؟ استخدمتي منشطات؟ أخذتي كلوميد؟ وش سويتي عشان تحملين؟  طيب تعرفون وش اللي يقهر أكثر؟ لما تبدأ الرسالة أو التعليق بـ "قريت كل تدويناتك عن التكيس"  طيب وش فهمتي منها؟ 

صدق بنات ترا أنا غرضي من المدونة أفيد من كل قلبي وأحط نفسي مكان كل وحدة محتارة وتبحث وتسأل بس تخلوني أضطر أقول "كتبت كل شيء بالتدوينة ارجعي اقريها" أتوقع هاذي السالفة تواجه 98% من البلوقرز أو صناع المحتوى بشكل عام.. والا؟ (خلوكم من النسبة من كيسي / بس أحس كل أحد)

تعرفون شعور لما يكون عندك سواليف كثيييييييررررررررر وبتقابلين صديقتك أخيرًا وودك تكبين عفشك بعدين تقول ااه ترا يمكن في أي لحظة يجي أبوي ياخذني  في هالحالة إما تقولين ربع سالفة وتنطين على اللي بعدها أو انه مخك يجيه لاق وتطير السواليف المأجلة هذيك << كل هالمثال عشان أشرح لكم قد إيش مخي قام يكبكب سواليف وأنا أحاول أرتبها لكم هنا، وقاعدة أكتب بسرعة لأنه ممكن في أي وقت أسمع صوت صالح يبكي يبغاني  

المهم.. على طاري الأمومة

في أول شهور كنت أحس إني أركض أركض أركض يعني كل شيء صرت أسويه اكسبريس وحتى دوامي صار عن بُعد وبرضه ماني قادرة ألحق شيء أحس وقتي مرره ثمين يعني ما عندي وقت أمشط شعري وطول الوقت مسوية كعكة فوق! ومع التساقط اللي بعد الولادة صار عندي مهمة جديدة مزعجة وهي كنس الأرض من شعري لأنه كان طويل .. قلت بسسس هذا وقته أقص بيكسي  وخلاص عزمت ورحت صالون ....... لحظة جا صلوحي (سنعود بعد قليل) 

بــــ‪٩(♡ε♡ )۶‬ـــــااكككك << شفرة خاصة بمواليد التسعينات 

المهم رحت عند كوافير مرره فنانة وسمعتها واصلة السما ولما جلست قلت لها اسمعي أنا أم جديدة أوكي! وما عندي وقت أهتم بشعري فأبغاكي تقصين بيكسي قالت شوفي البيكسي ترا ما بتطلع حلوة إلا اذا استشورتيها قلت لاالااا استشوار انسي! أبغا قصة تكون حلوة للشعر الويفي .. قصة low maintenance من الآخر.. قالت ااه أجل ما بينفع لك البيكسي مرره بيحتاج عناية واهتمام واستشوار والا بتصحين كل يوم وشعرك واقف على فوق!! أنا انصدمت ..

دقيقة بنات خن أوريكم صورة القصة اللي وريتها.. لأني كنت أقول لها أبغا القصة برضو تكون أنثوية كمان..

 الزبدة أقنعتني انه مرره ما ينفع، بس بناءً على شروطي (قصير / للشعر الويفي / مناسب على وجهي) قالت بأقص لك قصة تناسبك.. وتشك تشك تشك وقصته لي زي كذا:

أول ما خلصت، طلبت من الأخصائية تجي توريني كيف أسرحة لأنها قصته بناءً على مكان فرقة شعري الطبيعية..

أول ما خلصت جاني شعور اللي واااو  حلووو أوكي مو زي ما كنت أبغا بس ستل حلو! 

لكن.. استمتعت فيه لمدة أسبوع واحد، الاسبوع الثاني ما زلت أدهر بالبكلات والأطواق والبنس .. الين اشتقت إني أربطه!

أنا شعري ما شاء الله يطول بسرعة وأعرف هالشي من زمان لما قصيت بيكسي أيام الجامعة أذكر ما استمتعت كثير بسرعة طال وخربت القصة.. بس أنا الحين شعري أطول من المخطط له فبسرعة لاحظت طوله وبدأ يتحول من قصة كيوت إلى شعر مدرج لنص الرقبة << هو حلو بس أنا ما أحب هالطول مرره مشخصنتها معاه  

الزبدة إني مرره مقهورة كيف صدقت حكم الكوافيرة على نوعية شعري وانه القصة ما تناسبه << رغم إني جربتها من قبل + شعري ويفي ناعم يعني أنا لما أنام تتفكك الويفز ويصير طايح بدون معالم مو واقف على فوق  

صار لي الحين من لما قصيت 4 شهور، وكل فترة أهوجس يا هل ترى أفضل أرجع أقصه بيكسي عشان يطيح اللي في راسي والا خلاص أصبر بما إني قطعت شوط وأطوله عشان ما أعيد مراحل التطويل هاذي من جديد؟  

نويت إن شاء الله إذا تجاوز طول شعري الكتف إني أصبغه لولايت << أتوقع هالأفكار هي جزء من متلازمة أشقر العروسة والنفاس إللي ما طلعتهم في الوقت المناسب 

أما بخصوص التساقط، الحمدلله في هذيك الفترة (بعد 4 شهور من الولادة) خلاص بدأ بشكل تدريجي يخف التساقط .. استخدمت تونر بخاخ من متجر الرفيف لمنتجات الشعر بشكل مؤقت واوريدي خلاص 4 شهور كافية انه الجسم يستعيد توازنه وتترتب الهرمونات وباقي الأمور والروتين فيصير كل شيء أهدأ.. فتعود الحياة وتنمو الحشائش والأزهار من نفسها.. ونبدا نشوف البيبي هير << من الآخر: زي ما الهرمونات بنفسها وقت الحمل ارتتفعت وسببت لك زيادة نمو في الشعر / نفسها بيصير لها درووب وتروح ويروح الشعر معاها / نفسها بترجع تتزن وينمو شعرك بشكل طبيعي بدون ما تتفلسفين وتسوين أشياء وتاخذين مكملات << إلا إذا تشوفين إنه الحالة تستدعي زيارة طبيب فانتي أبخص بوضعك 

واو الساعة صارت 12:55 بعد منتصف الليل.. أعتقد صار لازم أختم هالتدوينة العشوائية وأحتفل مع نفسي إني مكملة كتابة هنا 

وإن شاء الله يعود لي الشغف التدويني وأرجع أكب العشاء عندكم أصدقائي وحبايبي 

فوتكووا بعافية 

4 comments مجرد أفكار 💭