ما بعد حبوب منع الحمل | إعادة توازن الجسم + مكملات 🌿💊

Sunday, April 4, 2021
 


مرحبا، 

جالسة المقعد رقم 66L في الطيارة في رحلة العودة إلى جدة بعد إجازة جميلة قضيتها في الرياض مع أهلي.
قررت أستغل الوقت في كتابة التدوينة الرابعة من سلسلة #متلازمة_تكيس_المبايض إللي بديتها قبل فترة، لأني ما أضمن كيف بيكون وقتي بعد ما أرجع للشغل ..

فقبل ما أبدأ حابة أشكركم من كل قلبي على رسايلكم الحلوة وعلى حماسكم لهالجزء من التدوينة ومره من كل قلبي أتمنى تفيدكم تجربتي وتلهمكم لو شويا بس!

والجديدين على هالسلسلة أنصحكم تطلعون على المواضيع السابقة عشان تكونون معانا بنفس الجو..

المهم يا طويلات العمر، آخر شيء كتبته كان لما قررت أوقف القلوكوفاج وحبوب منع العمل، كنت عارفة إنه التجربة ماراح تكون سهلة بس تحتاج مزيد من الصبر. جسمي تعود على الحبوب الهرمونية لما يقارب عقد كامل من الزمن، ففكرة إني أوقف هالمصدر دفعة وحدة وأخلي جسمي يرجع يسوي إعادة تهيئة ويفرز هرموناته بشكل سليم وتجيني دورة بشكل طبيعي كانت فكرة تحتاج عزيمة وصبر!
فتوكلت على الله ورميت الحبوب!

أول شهر مر عادي ما صار أي شيء بدون أي أعراض أو دورة شهرية، مر الثاني نفس الشيء، مر الثالث نفس الشيء، مر الرابع كمان ما صار شيء، بديت في الخامس لاحظت إنه خلال الشهر طلعت لي حبوب دهنية كانت جديدة علي حول عظمة الفك وكان فيه شوي من أعراض ما قبل الدورة خفيفة لا تذكر بس لأني كنت بزيادة قاعدة ألاحظ كل شيء يصير بجسمي فصرت ألاحظها،  لكن عدا شهر وراحت الأعراض بدون ما تجي الدورة ..
الشهر اللي بعده (الشهر السادس بعد تركي للحبوب) صار نفس الشيء.. جتني أعراض خفيفة بدون دورة وخفت وقمت أهوجس لا يكون حامل!  ورحت اشتريت تحاليل حمل وكانت النتيجة طبعًا سلبية!، فكنت مستغربة من الوضع وبنفس الوقت حريصة إني أحاول أكون رايقة وما أكبر الموضوع أو أوتر نفسي عادي أخلي جسمي يشوف شغله.. بس وقتها صرت أفكر بهالأعراض اللي تجي وتروح حسيت كأن جسمي في حالة مقاومة، فقررت أقرأ وأبحث عن إذا ما كان فيه أشياء طبيعية ممكن تساعدني في هالمرحلة وتعطيني دفعة 

 وقتها طحت عى موضوع يتكلم عن مكمل غذائي اسمه (Myo Inositol  مايو إنوسيتول) ولقيت توصيات كثيرة له في المواقع اللي تخص تكيس المبايض، وتعمقت عنه وجلست أقرأ دراسات وتجارب ومرررره أذهلني مفعوله وتجارب الناس المتفاوته عليه حتى في الريفيوز حقته في أمازون وآيهيرب كانت تشجع! 

طبعًأ المايو إنوسيتول له مفعول أقرب ما يكون للقلوكوفاج –الميتافورمن- فهو مره يناسب اللي يعانون من مقاومة الأنسولين، عشان كذا فيه دراسات وتجارب تثبت مساعدته في توازن الهرمونات وبالتالي إنقاص الوزن وتنظيم الدورة ويساعد على الحمل بإذن الله وكمان تحسين المزاج للي يعانون من إضطرابات المزاج قبل الدورة << يعني جد زي القلوكوفاج من ناحية التأثير لكن بآثار جانبية أقل وأحسن شويتين برأيي. (المصدر

كيف يعمل هالمكمل بالجسم؟
خلوني أبسطها بهالشكل.. الحين الخلية الطبيعية فيها زي الجسر يسمح بدخول السكر بداخل الخلية عشان يعطيها طاقة، بس في حالة مقاومة الأنسولين يكون هالجسر مو موجود! عشان كذا السكر يبقى في الدم يدور والبنكرياس يقعد يفرز أنسولين على طول! لكن عشان نحل هالمشكلة نحتاج نخلي الخلية تبني هالجسر باستخدام المايو إنوسيتول << هذا العنصر موجود بالطبيعة في الفواكه وبعض البقوليات بس مررره كميات ضئيلة، فعشان كذا ينصح في هالحالة استخدام هالمكمل عشان نبني الجسر بالخلية بشكل طبيعي ونساعد على الحد من فوضى مقاومة الأنسولين اللي بتحصل! 

طبعًا فيه دراسات وتجارب ثانية تقول إنه الأفضل استخدام المايو إنوسيتول مع مكمل ثاني من نفس الفصيلة اسمه دي كايرو إنوسيتول (Myo Inositol + D-Chiro Inositol) بوزنية 40:1. وفيه كثير شركات تجارية تبيعهم مع بعض جاهزين ومدموجين بهالوزنية / وفيه دراسات تقول ما تفرق كثير.. (المصدر)

فاللي حصل اني طلبت كبسولات مايو اينوسيتول من ايهيرب وأخذتها بحسب الجرعة الموصاه في العلبة (4 حبات باليوم) >> رابط المنتج هنا

<< فاصل إعلاني! احنا للحين ما زلنا عالمدرج وتوه الكابتن أعلن إنه الرحلة بتتأخر بسبب سوء الأحوال الجوية في جدة خخخخ حظي خايس بالتأخير وحظكم حلو إني بأكمل التدوينة

فباختصار مر الشهر السابع والثامن والتاسع هذولي كنت أستخدم فيهم المايو إينوسيتول وكانت الأعراض حقت الدورة تجي كلها وتروح بدون ما تجي الدورة، كان عندي اعتقاد داخلي إنه أي تغيير بالجسم لازم ياخذ ثلاث شهور إلين يجيب نتيجة سواء كان مكمل أو دايت أو أي شيء بالكون << لاحد يسألني عن مصدر هالاعتقاد  لأني قمت ألاحظ إنه بعد ثلاث شهور صارت أشياء غريبة!

 طبعًا في الشهر التاسع كانت الأعراض قاعدة تزيد وتصير أقوى لدرجة إني مره خفت أكون حامل جد هالمرة وماني مستعدة لهالشيء نهائيا  أذكر وقتها كان رمضان وكنت أسولف لزوجي إنه أحس جسمي منتفخ وعندي تقلصات ونفسيتي مره خايسة والشم عندي صار قوي لدرجة تقرف والدورة قاعدة تستهبل وأسوي تحليل حمل منزلي ويطلع سلبي! جلست معايا الأعراض والتقلصات أكثر من أسبوعين الين قررت أكلم دكتورة على (تطبيق صحة) وحكيت لها كل شيء وأبديت قلقي بخصوص طول فترة الأعراض قالت لا عادي ممكن الدورة تسوي كذا وعادي طبيعي إنه أعراضها تطول في بعض الحالات، بس احتياط روحي أقرب مستوصف وسوي تحليل حمل بالدم..  طبعًا وقتها كان عزززز فترة كورونا والحضر ففكرة إني أروح مستوصف أو أزور دكتورة كانت تخليني أتراجع كثير!
لكن، ما مرت كم ساعة من محادثتي مع الدكتورة إلا والدورة تشرف!  << طبعًا كان برمضان! لازم تجي في رمضان! مهما تأخرت دورتي وتلخبطت مستحيييل تفوت رمضان 
بس ما أنكر إني كنت مبسوطة إنها جت بشكل طبيعي والحمدلله مرت بسلام واحتفلت في قلبي وكذا 

بعد ما خلصت المكمل اللي كان عندي جربت خليط من مكمل المايو إنوسيتول مع الدي كايرو إنوسيتول على شكل بودرة.. جربت أنواع كثير بشركات مختلفة وما حسيت انه كان فيه شيء أحسن من شيء كلهم ممتازين.. بس النوع اللي كنت أطلبه في أمازون الامريكي وقفوا يشحنونه من بعد كورونا، وبعدها طلبت هالنوع اللي استخدمه من موقع evitamin المنتج رهيب بس التعامل مع الموقع كان مأساوي فما أعتقد اني راح أطلب منهم مره ثانية.. وعموما صار الحين مكمل المايو اينوسيتول مع الدي كايرو متوفر في ايهيرب على شكل كبسولات (تلاقونه هنا) لكن راح احاول اتواصل معاهم واطلبهم يوفرون نفس النوع اللي عندي حاليا زي البودرة أحسه أريح ينشرب بدال التبليع 

جا الشهر اللي بعده ما حسيت بأي شيء، وفي نص ذو القعدة بديت أحس بالأعراض تروح وتجي وجا ذو الحجة وزادت الأعراض وطبعا طبعا طبعا بما إني مره متحمسة ليوم عرفة وكنت حاطة خطط وآمال... توقعوا وش صار؟؟؟ جت الدوراااه! هههههههه 
وهكذا صارت الدورة تجي كل شهرين إلى ثلاث شهور تقريبا ولسى تعتبر غير منتظمة بس موجودة أهم شيء 

طبعًا مو بس هاذي المكملات اللي آخذها وحدها، آخذ كمان اوميغا 3 وملتي فايتمنز زي سنترم من فترة لفترة حسب القيمة الغذائية اللي بأكلي، يعني عادي إذا يوم حسيت إني أكلت أكل مغذي وفيه دهون صحية وفيتامينات يصير أسوي سكيب للمكملات هاذي.. وهكذا!
فبشكل عام أحرص على نوعية الأكل اللي يدخل جسمي قدد ما أقدر انه يكون مغذي.

 
طيب نجي عند سالفة القلوكوفاج!
تذكرون لما حكيتكم كيف إنه كان عندي مخاوف إني بمجرد ما أوقفه ينفرط وزني وكذا؟ امممم اللي صار بعد ما وقفته كان العكس تماما! أول شيء اختفى انتفاخ البطن إللي كنت أعاني منه لسنين! ووزني تماما كان ثابت وطبيعي، يتغير بتغير نمط غذائي وحركتي وهكذا! فيعني من الآخر ما استفدت منه غير نفخة البطن والنفسية الخايسة 
 
طيب يا روان من بعد ما وقفتي حبوب منع الحمل مالاحظتي شيء غير أعراض الدورة اللي كانت تجيك شهريا؟
اوووه إلا طبعا! حبوب كانت تحتوي على هرمونات الحمل كانت بجسمي سنييييين وفجأة وقفتها وش بيصير؟ أول شيء شعري طاح جلس يمكن ثلاث شهور وأنا كل ما لمست شعري تطيح خصله  .. حتى كنت أتفشل إذا رحت عند أحد وقمت من مكاني ولقيت عالمقعد شعر بمكاني 
هذا غير انه الشعر نفسه صار ضعييف وخفيف مره.. ما كنت أفهم اللي قاعد يصير، يعني شعر نبت سميك كيف يصير ضعيف بدون تدخلات؟ 
أو زي في حالة الحمل أو حبوب منع الحمل؛ كيف تخلي الشعر الخفيف أثقل وفيه لمعة؟ مدري مدري كيف! المهم انه هالشيء استمر معايا عدة أشهر وصار يتحسن تدريجيا الحمدلله.
طبعا بشرتي في السابق كانت تعتبر عادية وما كنت أعاني من حب الشباب لسنين طويلة من بعد ما استخدمت روكتان .. بس لما وقفت حبوب منع الحمل صارت تطلع لي حبوب دهنية حول الفك زي ما حكيتكم، بالإضافة للحبوب الهرمونية اللي تجي كبيرة وتعووور ما قد جتني من قبل بحياتي إلا بعد ما وقفت حبوب منع الحمل! بس هاذي بالذات لاحظت تحسنها بعد ما استخدمت المايو إنوسيتول.
 
فاصل إعلاني ثاني! بنات صار لي فوق ساعة ونص وأنا أكتب ولسى احنا في المدرج ما تحركت الطيارة ههههههه بس شكلنا على وشك نطير لجدة أخيرا! 

المهم.. بالختام..
الحمدلله أنا الحين مرره مرتاحة، نفسيًا وجسديًا، الدورة تجيني بشكل طبيعي بدون تدخلات هرمونية، صحيح مو كل شهر بس ما تطول كثير وإن شاء الله يتحسن الوضع مع الوقت. أما بخصوص بشرتي مرره صفيت كثير عن أول، يعني الحبوب اللي تطلع الحين كلها حبوب طبيعية تطلع بسبب ظروف خارجية  .. أما شعري اعتمدت على روتين عناية مره رهيب جالسة أشوف شعري يتحسن مع الوقت وقاعد يرجع شعري الثقيل الويفي اللي كنت أعرفه من زمان، لسى ما وصلت للنتيجة اللي أبغاها بس في الطريق إن شاء الله 

مره ممتنة لله أولًا وآخرًا هو اللي سخر اللي المعلومات اللي أفادتني بهالرحلة ولا شيء كان بشطارتي من بداية الرحلة حتى الآن..
اللي ناوية أسويه الآن إني أرجع لروتيني الرياضي بعد انقطاعات متواصلة! وبأكمل تجارب واكتشافات بجسمي << ما ورانا شيء الحياة وحدة  وإن شاء الله أوصل المرحلة إللي أجي أحكيكم فيها إنه كل أعراض التكيس صارت تحت السيطرة بإذن الله تعاالى 
 
عاد أنا من يوم ما بدأت هالسلسة اكتشفت مره كثير بنات مهتمات بهالمواضيع سواء من صديقاتي في الحياة الواقعية أو الافتراضية.. حكوني عنكم الحين..

هل قد مريتم بفترة كنتم حاسين إنكم مره تحتاجون تسيطرون على أعراض التكيس بشكل طبيعي؟ أو مرتاحين على الأدوية وما ودكم تغامرون؟ .. وين انتي ممن هالرحلة؟
 

محدثتكم من طبقة الأوزون تسلم عليكم 
وفوتتكوا بعافية 
 
 كود خصم ايهيرب: FCD9753



6 comments:

  1. أهلا روان .
    مستمتعه معاك بهذي السلسلة ، عرفتيني على موضوع كنت أسمع فيه وما أعرفه .
    ضحكتيني يوم قلتي أنها الدورة شرفت في الرمضان ههههه ، يتهيألي أن للصيام سر في الموضوع . يمكن ساعد الجسم بطريقة أو أخرى ليعود لطبيعته
    بالتوفيق لك في رحلتك و شكرا لك على المعلومات

    ReplyDelete
    Replies
    1. يا مرحبا! 💓
      أسعدني تعليقك وأتمنى جد إني أكون سبب في نشر الوعي عن تكيس المبايض لأن مره فيه لغط كبير!
      ااه بخصوص الصيام صحيح أعتقد هالشيء كمان لأن برضه فيه كثير بنات عندهم تكيس ولهم تجارب إيجابية مع الصيام العككسي 👍

      Delete
  2. تحمست أعرف روتين عنايتك بشعرك () يارب تكتبين عنه بالتدوينة القادمة، انبسطت انك الحين مرتاحة بالنتيجة وان نهاية الرحلة كانت تستحق انك قطعتيه، جدا سعيدة بإنك شاركتي رحلتك الله يبارك لك بعلمك.

    ReplyDelete
    Replies
    1. مره شكرًا لك روين 💕
      ااه تصدقين إلى الآن كل فترة أكتشف شيء جديد وأقول الحمدلله إني لسى ما كتبت التدوينة عشان أحكي البنات عنها ههههههه
      إن شاء الله قرريب أجمع المعلومات وأرتبها في تدوينه وراح أبلغك عنها 😍

      Delete
  3. يسلمو على المعلومات و نقل التجربة بطريقة ممتازة

    ReplyDelete

Top