أبسط طريقة لصناعة مكرميه: معلاق لأصيص الزرع | DIY macramé plant hanger

Friday, October 16, 2020

 

مرحبا، 

اليوم فجأة صار فيني طاقة ولله الحمد بعد فترة أقدر أسميها كسولة  واشتطيت على كل شيء حولي قمت أشوف وش اللي يحتاج تنظيف أو تغيير أو تبديل أو شقلبة .. مدري أي شيء!

فطاحت عيني على هالكورنر جنب آلة القهوة.. 


اوكي حسيته مره زحمة وحوض الزرع الخوص اللي ورا شوي كبير على المكان.. فقررت أغير مكانه 

بس ما عندي مكان بصراحة   فقررت أصنع لي معلاق مكرميه لأصيص الزرع بطريقة مررره بسيطة وسهلة 

عشان تطلع النتيجة الأخيرة زي كذا 


يللااا نبدأ بالطريقة الخرافية المعقدة جدًا؟ 


بسم الله.. (شمرت أكمامي) 

أول شيء، في هذا العمل كل اللي تحتاجينه هو خيط ومقص ويدك .. 

ممكن يكون الخيط قطني أو خيط صوف (سميك أو رقيق) أو خيط جوت... ولك حرية الخيار والإبداع 

-بالنسبة لي اخترت خيط جوت (خيط خيش) لأنه الأنسب مع شكل ولون السلة اللي بأحط فيها حوض الزرع -



تاخذين عدد زوجي من الخيوط (أقل شيء يكون 8) وتحددين طول الخيوط على حسب حجم أصيص الزرع وعلى حسب الارتفاع اللي تبغين تعلقينها فيها الأصيص، وتقصينهم بطول واحد 

 وبعدين تجمعينهم بنفس الطول وتسوين عقدة بالأخير أو ممكن تتركين مسافة بنهاية الخيوط قبل العقدة لو ودك يصير فيه خيوط نازلة وكذا حركات يعني 

- بالنسبة لي سويت (6 أزواج من الخيوط = 12 خيط) تقريبا طولها متر -


أسهل طريقة وجدتها في تنفيذ الشغل وتحديد المقاسات المطلوبة بدون وجع راس هي هاذي:

انك تقلبين أصيص الزرع وتحطين العقدة الأساسية في الوسط

بعدين تاخذين كل خيطين مع بعض وتحطينهم في جهة مختلفة وتكون المسافة بينهم متساوية

كل خيطين تعملين فيهم عقدة صغيرة، يكون مكانها على حافة أصيص الزرع

بحيث تطلع بهالطريقة .. زي كذا 






بعد ما تسوين عقد في كل الجهات.. يصير تنتقلين للصف اللي بعده من العقد .. اوكي؟ (أحس الشرح الكتابي أعقد من العملية بكبرها بس ما عليكم سهلة ترا )

تاخذين خيط من العقدة اللي عاليمين وخيط من العقدة اللي عاليسار وتنزلين مسافة شوي (نقول -مثلا- تقريبا 5 سم)  وتعملين عقدة

وتنتقلين للي جنبها وتسوين نفس الشي (خيط من اليمين وخيط من اليسار وتنزلين شوي وتسوين عقدة) الين ما يصير شكلها كذا 



وبنفس الطريقة ونفس المقاسات تسوينها للصف الثالث من العقد 

*عاد إذا المقاسات طلعت مو ضابطة فالوضع سهالات.. أبد.. فكي العقدة وعدليها والحياة حلوة 

بالنسبة لي اكتفيت بثلاث صفوف بما إنه المسافات بين العقد سويتها متباعدة.. بس لو هي قريبة من بعض أو أصيص الزرع عندك صغير أتخيلها بتحتاج عقد أكثر ومسافات أقصر وطبعا عدد خيوط أكثر 

بس بالأخير راح تطلع بهالشكل بعد ما أقلبها 




آخر شي سويته كان عقدة كبيرة أجمع فيها كل الخيوط وأخليها في الطرف، والهدف منها للتثبيت 

بس بامكانك تسوين حفلة عقد وأشكال وظفاير وحركات من فوق عشان يكون شكلها بالتعليق لطيف.. وإذا بغيتي تشوفين أفكار اكتبي في بنترست (macrame plant hanger) واذا تبغين تشوفين نماذج لهالنوع من الخيوط زيدي كلمة (jute) في خانة البحث 

بس شخصيًا اكتفيت بهالطريقة الأساسية وهي الأبسط وصار شكلها مررره حلوو 😍




أبسط من كذا مافيه!! 

مره سهلة وبسيطة وغير مكلفة! وممكن تبدعون فيها وتعيدون تدوير أشياء موجودة عندكم بالبيت وتحولونها لأصيصات  أو تحولون جدارية عندكم لأدغال داخلية 

بالأخير:

أتمنى لو سويتم هالطريقة أو شيء يشبه لها، انكم تشاركوني هيا أو تعملوا لي تاق عالإنستقرام مرره يسعدني أشوف إبداعاتكم 


وفوتككوا بعافية 

      
  •    
  •    
  •    
  •    
  •    

 

8 comments:

  1. الله 😍 ماعرفتك وانتي تسوين DIY 😂
    بس فعلا حبيت النتيجه مره تسلم ايدك 💛❤️

    ReplyDelete
    Replies
    1. 🤣يووه عاد ترا مرره أمخمخ على هالسوالف وأحبها بس قلييل أشارك
      مرره أسعدني انها أعجبتك 😍ربي يسلمك فاطمة 💕

      Delete

  2. ما شاء الله تبارك الله مبدعه كعادتك،😍👌 تذكرت تدوينتك عن الثيم الرمضاني 😍 الله يبلغنا رمضان وكل عام وانت بخير 😁❤

    ReplyDelete
    Replies
    1. مرره شكرًا لك 😍 جد عاد أحب تدوينات رمضان لها فايب مختلف
      ربي يبلغنا اياه واحنا بصحة وعافية يارب

      Delete
  3. حبيتها مره 🤩🤩 خاصة مع الحوض الخيش 👌🏼

    ReplyDelete
    Replies
    1. يسعدك ربي مرره شكرا عفاف 😍😍❤

      Delete
  4. جدا حبيت الفكرة ��
    عاد سبحان الله حتى انا فيني طاقة تجديد هالفترة
    مشكورة عالفكرة

    ReplyDelete
    Replies
    1. الأشياء اللي تكون مصنوعة يدويًا دائمًا تكون فيه مشاعر حب تصدر منها واتجاهها 💕
      باكون ممتنة إذا شاركتيني صورة عملك 🙏

      Delete

Top