10 أسباب خلتني أقع في غرام مكنسة جانو Jano 6in 1 stick vacuum

 مساء / صباح (وكل أوقات) الخير لكم جميعًا 

امممم تدوينة اليوم بتكون ريفيو على شيء صراحة مرره مستانسة عليه مؤخرًا للدرجة اللي حسيت إني لازم أسولف لكم عنه في المدونة بالتفصيل اللي مره ممل  وكلي أمل انكم تحسون بنفس شعور الـ(وااو) اللي جاني في  نهاية هالتدوينة 

يب مكنسة!  مين كان يتوقع قبل عشر سنوات انه روان بتقعد تتحبب على مكنسة وتدلعه وتمسحها بعد كل استخدام كذا يعني شوي وتبوسها؟ محد  المهم خلوني أحكي لكم سالفتها أول!

ييللا؟

امم من زمااان مرره مره وأنا خاطري بمكنسة كهرباء صغنطوطة أبغا وحدة خفيفة وتنظف زين وما تاخذ مساحة ومافيه كيس يحتاج تغيير أو قطع غيار أو فيها فلسفة كثير من الآخر.. يعني شيء يشبه اللي كانت عندي لمن كنت بأمريكا (اللي ما لقيت زيها) 

بما إنه أرضيتي باركيه مو موكيت ولا عندي حيوانات أليفة أو أطفال بالبيت، فنقدر نقول إنه احتياجي للمكنسة ما يشترط انها تكون شيء جبااار أو حق كرف ومدري كم ألف واط لالالالالا! .. بعد بحث لقيت في موقع اكسترا مكنسة -شكلًا- تشبه حقتي اللي بأمريكا بس البراند مختلف والسعر كان أقل من اللي بأمريكا وما كان عليها أي ريفيو عالنت << يدوب شفت مقطع يوتيوب بس كان انبوكس فما أعرف كثير عن جودتها  بس كل مره كنت أقول خلاص بأشتريها يصير شيء يثنيني رغم انها مررره كانت رخيصة.. إلين آخر مره برمضان خلاص خلاص حطيتها بالسلة وباطلبها بس شفت شكاوي الناس عن التوصيل في فترة الحجر ومشاكل في الشحن فتركتها بالسلة إلى يومكم  

اللي صار في شوال انه اختي راحت السيف غاليري وتقول بالمصادفة شافت مكنسة هناك صغنطوووطة من ماركة Jano كانت 6 in 1 وفيها اكسسوارات رهيبة وشكلها ظريف فما قاومت وأخذتها بسرعه.. ولمن جربتها جت منهارة تحكيني عنها (بما إنها عارفة قصة بحثي عن المكنسة المنشودة!)  صدمتي الأولى لمن جابتها في كيس تسوق قماش ! لمن فككتها صارت نتفه وأنا توقعتها بتجيب شيء كبير أو طويل .. بس مره كانت بسيطة تقول أحطها بالكيس وأحتفظ فيها على رف << شرطي الأول تحقق: انها تكون صغيرة 

قالت رواااان جربيهااا وأعطيني راايك! قلت اوكي زين انه المكان يحتاج كنس بعد ما استشورت شعري  وجربتها يمممه! قلبي! حبيتهاا بناات  اليوم الثاني رحت السيف غاليري وكانت آخر حبة من اللون الأبيض وأخذتها وبدأت هنا قصة حب الله يكفيكم 

أما الأن باكتب لكم 10 أشياء حبيتها في هالمكنسة:

1-  حجمها صغير ككل، تقدرين تفككينها وتخزنينها في أصغر مساحة ممكنة! وتجي معاها قاعدة أحفظ فيها المكنسة وقطعها اللي استخدمها معاها.. أو ممكن أسوي زي خوله أحطها في كيس قماشي يحفظها لي في مكان مرتب 

2-  وزنها يعتبر خفيف فسهل إني أكنس الأرضية فيها أو أشيلها لكنس الشبابيك أو الكنب وغيره.. ما تتعبني أثناء التنظيف 

3-  التانك حقها شفاف فأشوف الوسخ بشكل واضح وأنتبه إذا المكنسة شفطت لي شيء مهم بالغلط أو شيء .. هالنقطة حلوة مرات وتفجع في مرات ثانيه << بأحكيكم عن المره اللي فجعتني فيها بعد شويا 

4-  فيها زر أتحكم فيه بقوة الشفط  زي لمن أبغا أكنس الستاير مثلا يصير أخفف قوة الشفط عشان الغبار ينشفط مو الستارة بكبرها  تدخل 

5-  التانك حقها بلاستيك، ما أحب المكانس اللي تصير من جوا قماش أحسها بؤرة للحساسية وعث الغبار  الحلو في هاذي إني بعد كل كنسة يصير أكب محتوياتها بالزبالة وأغسل كل شيء وأرجعها مكانها جديدة للاستخدام القادم 

6-  تجي معاها قطعتين معدنية عشان أتحكم في ارتفاع المكنسة أو طولها، فطولها ودقتها مره مناسبة للأماكن الضيقة اللي ما أوصل لها بسرعه (مثل تحت السرير أو الكنب..) دايم يتجمع غبار ويطير الشعر هناك فهالقطع تساعد على الشفط في هالمناطق 

7-  تجي معاها قطعة دقيقة لشفط الزوايا والأماكن الصغيرة زي إطارات الشبابيك أو فوق النعلة تصير تشفط بذمة وضمير 

8-  راس كنس الأرضيات يتحرك في جميع الإتجاهات  فمره يسهل لي الكنس في الأماكن المتعرجة أو فيها عوائق زي أرجع الكراسي وكذا تصير تتحرك بينها بإنسيابية  بالإضافة إلى انه معاها قطعة صغير تتركب قبل كنس الموكيت والسجاد بحيث تشيل الشعيرات الصغيرة 

9-  اوكي كل اللي ذكرته فوق رهيب بس ماهو خرافي ماقد حصل.. اللي كان خرافي بالنسبة لي هو قطعة كنس المرتبة وقطعة كنس شراشف السرير والكنب والستاير.. اااه بنات أنا حاطة طبقتين شراشف وأغيرهم وأغسلهم بشكل دوري ومرره يعني واثقة انه مرتبتي مره جديدة  إلين ما جا الوقت اللي كنست فيها المرتبة بغيت أبكي خلاص!  المهم إنه أقدر أقول لكم لو مافيه بهالمكنسة الا هالقطعة خذوها! << على فكرة إلى الآن كل ما أكنس يطلع كذا فاكتشفت انه هالغبار موجود على طول 

10-  السيف هو وكيل هالمكنسة وعليها ضمان لمدة سنتين، يعني أتطمن متى ما صار شيء وإلا شيء لا سمح الله أقدر آخذها لأي فرع للسيف غاليري ويصلحونها لي << مو إعلان بس مره كانت نقطة مهمة بالذات إني ما كنت لاقيها عنها أي ريفيو فما كنت حابة آخذ شيء يكون تمشية حال.. أنا نظامي استثماري  أدور لشيء يعيش معاي صراحة.

ولأنه الأشياء المثالية فقط موجودة في المدينة الفاضلة، فأكيد لهالمكنسة عيوب.. رغم إنها ما كانت شيء كبير بالنسبة لي لكن بأذكرها لكم عشان يكون عندكم تصور كامل 

1. المكنسة لأنها عبارة عن قطع تنفك وتتركب فما فيه شيء يسندها أو يوقفها إذا بغيتي تكنسين الأرضية لازم تكونين ماسكتها أو تسدحينها 
2. أثناء الكنس تشوفين الغبار والفتافيت تدور داخل التانك فلما تقررين تكنسين شيء مرتفع وتمسكين المكنسة بالمقلوب يصير الوسخ يطيح على الفلتر ويسده ويصير يطلع صوت مزعج وهوا حار.. فإذا بغيتي تكنسين شيء مرتفع الأفضل إنك تفضين التانك أول 
3. التانك حقها صغير يعني هي حقت تكنيس غرف مو تكنيس بيوت، فما تتحمل وسخ كثير، لو بغيتي تكنسين مساحة أكبر أو غرف أكثر أقترح إنك تفضين التانك بعد كل غرفة 

وبس والله  

المكنسة هاذي كانت إضافة لطيفة لغرفتي وكانت أكثر حتى من احتياجي وحقيقي توفقت فيها الحمد لله 

كل اللي تحتاجه منك، إنه بعد كل استخدام تفضين التانك حقها وتغسلينه مع السفنجة وقطع البلاستيك وترجعينها بعد ما تنشف تماما وتمسحين الجهاز بقطعة قماشيء مبللة وإن شاء الله تعيش معاك العمر كله 

 إذا ودكم تشوفون تفاصيل أكثر عن المكنسة وسعرها الرهيب تلاقون المكنسة على أمازون السعودي بسعر مره حلو (هــنــا) 

واللون الأسود منه شوفوه (هــنــا)

هذا كان كل شيء لتدوينة اليوم  عاد صدق حسيت إني أم العروسة وأنا أصورها وأحكي عنها 

أتمنى تكون عجبتكم 

وقولوا لي في التعليقات إذا كان شعوري اتجاهها يستاهل والا لا << عاد خفوا علي إذا كنتم تعتقدون إني اوفر 

وفتكوواا بعافية 

 
 
 
 
 
 

15 comments Report, Shopping | تسوق 💸, تجربتي | Review