نصائح واقتراحات من تجربتي مع الأكزيما ❄ ?How to prevent eczema flare-ups

Saturday, February 17, 2018

من أصعب التجارب اللي مريت فيها خلال الفترة الماضية كانت الفترة اللي جتني في الأكزيما أو الحساسية اللي بجلدي، كانت صعوبتها تكمن في إنه اللي قاعد يحصل لي شيء جديد عليّا وما كنت عارفة كيف أشخص هذا الشيء اللي طلع بجسمي هل هو حبوب وطفح جلدي بسبب الحرارة أو تحسس جسمي من شيء جديد لمسته أو أكلته مثلًا! ما كنت أدري بالضبط إيش سالفته 👀 
فبعد ما تم تشخيص الحالة إنها أكزيما؛ حثت كثير وقرأت أكثر وجربت أشياء كثير واستشرت أطباء.. لذلك حابة أنقل لكم هنا خلاصة تجربتي وإيش الأشياء اللي تعلمتها واللي أفادتني -بفضل ربي- بعد مرور سبعة شهور من المعاناة~


أول معلومة مهم تعرفينها إنه الأكيزما هي عارض نتيجة تحسس وماهي مرض بحد ذاته..
أهم مرحلة في علاج الأكزيما هي معرفة مسبباتها ومهيجاتها، لو قدرتي تلاقين استشارية حساسية ومناعة لا تترددين بالروحة لها لأنه هناك بتسوي لك اختبار حساسية لأنواع من المأكولات ومواد في البيئة ممكن تسبب لك حساسية، بالنسبة لي لمن رحت عند الاستشارية وسويت اختبار حساسية، كانت يدي اليمين فيها عينات لحبوب لقاح مختلفة وغبار وفطريات زي العفن وأشياء من البيئة، واليد اليسار كان فيها عينات مأكولات زي البيض والقمح وبعض الفواكه ومنتجات الحليب.. والنتيجة إن يدي اليمين كانت مولعة أكثر العينات فيها 😅 طلع عندي حساسية من كثير شغلات ومن ضمنها الغبار << وهذا الشيء اللي يفسر نوبات العطاس اللي كانت تجتاحني في كثير أماكن لمن يشغلون التكييف الصحراوي.
لو خيار الذهاب لاستشارية المناعة غير متاح لك أنصحك بأخذ الموضوع على عاتقك والبدء بتسجيل الأشياء اللي تشتبهين إنها السبب وتجربين تقطعين كل نوع لفترة محددة وتشوفين إذا ارتاح جسمك أو لا.. أعرف قد إيش الموضوع مو سهل لكن قد يوقف معاناتك للأبد، وعشان أعطيك مفتاح مساعد.. الدكتورة قالت لي شغلة مررره مهمة نظرًا لخبرتها الطبية، قالت إنه غالبًا الأكزيما تكون سببها مهيجات من البيئة بينما الربو يكون سببها نوع من الأطعمة. فممكن تبدئين بالبحث عن المهيجات الخارجية سواء بالطبيعة / أنواع أقمشة / مواد معينة تتعرض بشرتك لها أو حتى ممكن شعر حيوان أليف تربينه في بيتك!

في الوقت اللي تكون بشرتك فيه في قمة هيجانها وحساسيتها أنصحك بعدة شغلات تسوينها عشان ما يتفاقم عليك الوضع وما تتهيج أكثر 🙏

1/ الأقمشة الملاصقة لجسمك:
- حاولي قد ما تقدرين إنك تلبسين الأقطان فقط وابعدي عن الأقمشة المصنعة اللي يدخل فيها البوليستر والنايلون بنسب عالية. لأنها مو بس ممكن تكون أحد أسباب التهيج، كمان لأنها راح تكتم الجلد وتزيد من حرارته وتعرقه << وهالشي نحاول نتجنبه خلال هالفترة عشان ما يزيد الطين بله.
- أتوقع من البديهيات إنه الجلد المتهيج ما ودك تكونين شادة عليه بلبس ضيق لأنه يسبب شعور مررره يضايق، لذلك حاولي يكون اللبس واسع وفضفاض يخلي البشرة تتنفس.
- الملابس الداخلية على وجه الخصوص مهم إنها تكون قطن وحاولي تبعدين عن البانتيز أو الكلوت الضيقة أو اللي فيها كلف ومطاط ثقيل / بالإضافة لاستبدال البرا أو السوتيان بأنواع بدون سلك معدني في حدودها بالذات وقت النوم.
- الحرص على نوعية القماش ما تنطبق فقط على الملبس! بل حتى على شراشف السرير وأغشية المخدات واللحاف، حاولي تكون قطنية دائمًا.. واحرصي على تغييرها بشكل دوري مع غسل الشراشف بمويا حاارة عشان تتعقم مع كل غسلة.
- تجنبي المخدات الريش، كثير يشوفون تحسن ملحوض بعد ما يستبدلونها بمخدة بحشوة عادية.
- بالنسبة لغسيل الملابس تجنبي منعم الأقمشة وصابون الغسيل العادي، نصحتني بنوعين من صوابين الغسيل وتعتبر جيدة وخالية من المواد الكيميائية المهيج (All Free and Clear و Dreft) بالنسبة لي استخدمت Dreft وهو مخصص لملابس المواليد وممكن تلاقين لها بدائل مخصصة للمواليد والبشرة الحساسة في السوق وابعدي عن التجاري تمامًا.


2/ العناية الشخصية:
- نصحتني الدكتورة بالاستحمام اليومي بمويا دافية بحرارة الغرفة (لأن الباردة جدًا زي الحارة تهيج المنطقة المتحسسة).
- وعشان في حالة تهيج البشرة نحاول إننا ما نعرضها لمواد كيميائية، نصحتني الدكتورة بجل الإستحمام من شركة Dove تعتبر أفضل من غيرها لأنها مختبرة من قبل أطباء الجلد (وممكن تستخدمين المستحضرات من شركة ديتول كمان جيدة لكن احرصي على الترطيب بعدها لأن بعض الأنواع تجفف) + نصحتني بشامبو وبلسم Free and Clear لكن إذا ما لقيتي هاذي الأنواع في الصيدليات المحلية إسألي الصيدلي عن الأنواع المخصصة للبشرة الحساسة وتجنبي اللي فيها عطور ونكهات وألوان تمامًا.
- الترطيب هي أساس استشفاء الاكزيما بكبره! الترطيب لازم يتضاعف خلال فترة تهيج الإكزيما لأنه كمان يساعد على تخفيف الحكة بشكل ملحوظ. الترطيب بكريمات ثقيلة خالية من المواد الكيميائية زي كريمات سيتافيل Cetaphil وكيو في QV أو سيرا في Cera Ve << مهم تكون كلها كريمات مو لوشنات.. وممكن تستخدمين زيوت زي زيت الزيتون أو زيت اللوز مثلًا.. تدهنين المنطقة المصابة أقللل شيء مرتين في اليوم غير ترطيب كامل الجسم بالكريم بعد الاستحمام.
- الفازلين بحد ذاته ما يعتبر مرطب أبدًا ولا يغني عن المرطبات، لكن يعتبر جل عازل يحافظ على الترطيب في البشرة ويحمي المنطقة المصابة بالذات إذا تخمشت من آثر الحك.
- استبدال الفوط الصحية التجارية بأنواع ذات قطن عضوي خالية من المبيضات والمواد الكيميائية.

3/ نصائح عامة:
- تقليم الأظافر بشكل دوري ومقاومة الحك يساعد على استشفاء الجلد بشكل أسرع ويمنع المضاعفات اللي تصير في المنطقة المصابة مع الحك وجرح البشرة.
- عند هيجان البشرة حاولي مقاومة الرغبة في الحك وضعي كمادات باردة على المنطقة لتسكينها، وادهنيها بكريمات مرطبة تساعد على تخفيف الحكة.
- الترطيب الخارجي للبشرة لا يغني عن الترطيب الداخلي بشرب المويا وادخال أصناف من الدهون المفيدة ضمن الوجبات اليومية.
- ضاعفي الفائدة في الزيت أو في مياه الشرب بالقراءة عليها بالرقيا لأن القرآن شفاء للناس. 
- حاولي قدر الإمكان الابتعاد عن المراهم الطبية اللي تحتوي على الكورتيزون لأن مفعولها مؤقت وتضعف دفاعات الجسم، وللأسف راح ترجع لك الأكزيما بعد فترة بشكل أسوء من السابق.
- احذري العطور خلال فترة تهيج الأكزيما أو في أسوء الأحوال ابعديها عن بشرتك، وهالكلام يشمل أي لوشنات وكريمات معطرة.
- التعرض للحرارة والتعرق المستمر يعد من مهيجات المنطقة المصابة للأكزيما، حاولي تجنب الحرارة وتهوية المنطقة قدر المستطاع ؛ وإذا تعرضتي لها خارج المنزل مثلًا حاولي أول ما ترجعين البيت تاخذين شاور بمويا بحرارة الغرفة مو أدفى من كذا.
- استعملي القلوفز الربر المغلف عند غسل المواعين وتنظيف مرافق المنزل بالمواد الكيميائية والصوابين ومساحيق التنظيف، أو البسي القلوفز القطن داخل النوع المطاطي لتفادي التعرق.
- التوتر والقلق من الأشياء اللي تساعد على تهيج الأكزيما (إذا ما كانت الضغوطات النفسية هي السبب الأساسي في بعض الحالات)، حاولي الاسترخاء وأخذ نفس عميق.. وممكن تستعينين ببعض الخطوات اللي كتبتها في هاذي التدوينة.
- حاولي تسيطرين على درجة حرارة الغرفة بحيث ما تكون باردة جدًا أو حارة، وينصح باستخدام فلاتر لتنقية الهواء في الأيام العاصفة.


وتقريبًا هاذي أهم النصائح اللي ممكن أعطيها من قلبي لأي وحدة تعاني من الأكزيما لأني بالضبط عارفة بالضبط إحساسها، وإذا حابة تعرفين أكثر عن المنتجات اللي جربتها؛ لا تفوتين هذا الموضوع في مدونتي  💕

💌 لطفًا شاركي التدوينة مع أي أحد ممكن يستفيد منها 
أمنياتي لكم بوافر الصحة والعافية ~

فوتتكوا بعافية ⛅💧


           
  •              
  •              
  •              
  •              
  •              








6 comments:

  1. التوتر والقلق اكثر عامل يأثر علي
    نصائح رائعه وغنية جداً وبتفيد كل وحدة تعاني من الاكزيما
    والله يشفيك ويشفي الجميع يارب

    ReplyDelete
    Replies
    1. سبحان الله جسم الإنسان عالم!
      كيف تغير المزاج يؤدي إلى تغير في الهرمونات اللي بحد ذاتها تلعب في مناعة الجسم 💖

      Delete
  2. لم يسبق لي أن أصبت بها.
    لكن سأشاركها بحول الله مع من يحتاجها
    شكرا لك روان على ما قدمت وكتبت. ��

    ReplyDelete
    Replies
    1. ربي يبعدها عنك وعن كل حبايبك مريم 💕
      ربي يكتب أجرك 🌹

      Delete
  3. يعطيك العافيه روان. نصائح قيمة

    ReplyDelete

Top