قصتي مع الجلوكوفاج + حبوب منع الحمل بعد الزواج 🌸🌿 | سواليف بنات

Wednesday, February 17, 2021

مرحبا! 

مره آسفة إني طولت هالمرة عليكم 
بس جاية اليوم أكمل السلسلة بالجزء الثالث وبسولف لكم فيه إللي صار معايا مع القلوكوفاج وما بعد الزواج 

فلو ما قرأتي أجزاء السلسلة السابقة، أنصحك بقراءتها أول عشان تفهمين القصة كاملة..


لما كنت في ثالث سنة بالجامعة في أحد مراجعاتي، قالت لي الدكتورة كيف انتي ما تاخذين جلوكوفاج! مره مهم للي عندهم تكيس ضروري تاخذينه لأن اللي عندهم تكيس معرضين للاصابة بالسكري، وان هالدوا مره بيساعدك في تنظيم الدورة وحتى تحافظين على وزنك وانه كثير ناس استخدموه ونزلت أوزانهم وكلام مرره كثير كان جديد عليا فما كان عندي خيار إلا إني أوافق لأني جد خفت بعد كلامها 
قالت لي أول ما بتاخذينه بيكون قوي على بطنك بيسبب تلبك وانتفاخ وكل شيء ما ودكم فيه  فقالت أول أسبوعين خذي بس حبة 500 مجم وبعدها يصير تاخذين حبتين وحدة بالصباح ووحدة بالمساء!
وجد مره التزمت فيه وأول عارض طلع لي هو انتفاخ بالبطن! بس مو اي انتفاخ لالا يعني شيء ما يمزح  كنت أتوقع انه بس في البداية وبعين جسمي بياخذ عليه وتروح.. لكن صار بطني مره حساس لدرجة لو لبست أي شيء ماسك على طول يتهيج.. أذكر في أحد المرات رجعت من الجامعة ونفسيتي خايسة ورحت عند أمي أبكي أقول لها بطني منفوخ مدري ليه! << ترا مره كنت مؤمنة ان هالشيء مو بسبب الجلوكوفاج لأن كل التجارب اللي قريتها بالنت عنه كانت انها تحرك البطن وتسبب اسهال فالبطن يكون مرتخي وانها تنحف لدرجة ناس وقفوها لما نزلت اوزانهم  فكان عندي إعتقاد إنه هالدوا هو اللي مضبط أموري وانه بمجرد ما أتركه راح ينفرط وزني!  

مرت سنتيت وأنا أستخدم الجلوكوفاج بالاضافة للدوفاستون.. وقبل زواجي بشهر بعد ما تناقشنا أنا وزوجي موضوع الخلفة، رحت عند الدكتورة قلت لها أبغا مانع للحمل فصرفت لي إياه بالاضافة للجلوكوفااج زي ماهو مكتوب في ملفي الصحي اللي أخذته معاي لدكتورتي الجديدة بعد ما نقلت جدة وكملت على نفس الوصفة 

مرت أول سنة من الزواج ومره زاد وزني فيها لأنه ببساطة أكلنا كان خنبقة وكله مطاعم وطلعات وسفرات رغم اني كنت أهلك نفسي رياضة بس الأساس كان خربان "التغذية"  بعدها رحت أمريكا واستقريت وصرت أطبخ كل شيء بنفسي ونفسيا ما كنت متوترة إنه اووه زاد وزني وفيه عزيمة أو جمعة وملابس الجهاز حقتي ما صارت مرتبة عليا ووو كل هالضغوط النفسية والاجتماعية اختفت، فلاحظت بعد عدة شهور لما اشتريت ميزان كان وزني ناقص 6 كيلو بدون ما أسعى لهالشي! كيف؟ كنت أطبخ أكل نظيف + أتحرك بالبيت ومشاويري أطلعها مشي وبالباص + نفسية مرتاحة إلى حد كبير  
طبعا وقتها كنت لا أزال آخذ حبوب ديان + جلوكوفاج لأني تعودت عليها لدرجة لما عرفت انه هالأدوية بأسماءها التجارية هاذي مو موجودة بأمريكا صرت أطلب كميات من موقع صيدلية من الهند بعد ما أرسلت لهم وصفتي  فبعد مرور سنة حسيت نفسي مره مصختها فقررت أروح عند دكتورتي في أمريكا عشان توصف لي نفس الأدوية لكن بأسماء تجارية مختلفة.. فقلت لها اني أستخدم ميتافورمن (جلوكوفاج) قالت عندك سكر؟ قلت لا بس عندي تكيس! قالت اممم لازم أسوي لك تحليل دم أشوف معدل السكر بجسمك  فطبيعي انه وقتها كان المعدل يعتبر كويس! قالت ما تحتاجين!  قلت هل إذا وقفته أسمن؟  قالت يمكن!  قلت أجل أصرفيه لي  << كنت خايفة من فكرة إنه حبوب منع الحمل تسمن فصرت متمسكة بالميتافورمن مرره! وفعلا صرفته لي..
مرت سنوات ورجعت السعودية وأنا ما زلت آخذ أدويتي..

لكن اللي صار إنه وزني رجع هههههههههههه والله هالمرة رجعت أطبخ بنفسي ورجعت أتمرن أكثر من أول بس مدري حسيت كان فيه شيء غلط ما أدري وشو بالضبط! فرجعت أقرأ أكثر في التغذية والتكيس وهالأمور 

وقتها تعرفت على Kym Campbell وموقعها، وصرت أقرا فيه كثيير وقرأت تجربتها في استخدام الأدوية لتحسين دورتها الشهرية والإنجاب وكيف انه كل محاولاتها كانت تدمر جسمها أكثر من السابق.. لها قصة مرره حلوة إن شاء الله أقدر أحكيكم عنها لاحقًا.. بس الزبدة إنه الحين كل أمورها تحت السيطرة ودورتها الشهرية مره منتظمة وبشرتها تعكس صحة جسمها الداخلي بدون أي دواء أو عقار طبي، كله بالتغذية السليمة اللي تناسب وضعها الصحي.. صرت أقرأ تجارب البنات الناجحة  اللي معاها في قروب الفيس بوك >> تلاقون بعض القصص بالإنجليزي (هــنـــا 

المعلومات اللي كانت تقوله كانت تفتح لي أبواب ثانية للبحث والتفكير أكثر في ضرر حبوب منع الحمل، فصرت مره أفكر كثير إني أوقفها، فرحت عند طبيبة الأسرة حقتي فجلست أسولف لها إني مره أفكر أوقف حبوب منع الحمل بالذات إنه بالسنتين الأخيرة صارت تطلع لي أكزيما مره قوية فجأة وأنا ما عندي تاريخ فيها، كنت أقول لها أحس جسمي قاعد يشتكي من شيء ماني عارفة إيش هو.. بالذات إنه صار لي فوق تسعة سنين وأنا أستخدمها!
قالت لي لاااا مره ماله دخل! شوفي الأجانب من الوحدة تبلغ إلين تنقطع عنها الدورة وهي تستخدم ماني الحمل وماجاهم شيء  فنصحتني أكمل عليها بما إنه عندي تكيس وقالت إذا بغيتي تحملين بسيطة، يصير تستخدمين دوفاستون وأعطيك معاه كلوميد (حبوب منشطة للتبويض).. فقالت لي على قصص مريضات تعالجوا عنها كان عندهم تكيس وانه كل شيء تحت السيطرة.. فقلت أوكي على مضض وطنشت أفكاري واستمريت على وضعي السابق 

مرت أربعة شهور على هذيك السالفة، وأنا أحس موضوع حبوب منع الحمل قاعد يقرقع براسي! 
كنت وقتها وما زلت حتى الآن أشوف نفسي غير جاهزة للحمل، لكن خفت من إنه يكون جسمي تعود تماما على حبوب منع الحمل << لأن فكرتها ببساطة إنها تحتوي على نفس الهرمون اللي يفرز للمرأة الحامل فيعطي إشارات للدماغ إنه فيه حمل عشان ما يصير تبويض! وطبعًا ما أحكي لكم إنه من يوم بدأت أستخدمها صار لي سنين وأنا شعري مرره صاير كثير وبلمعة وبشرتي مره كانت صافية وقتها  أعطتني البريقننسي قلو لفترة طويلة! فمتأكدة إني إذا قررت أوقفها راح ينصدم جسمي مره وبتصير حالة طوارئ فكنت أحتاج إني أكون مره متأكدة من قراري لهالخطوة 

اللي حصل إنه في يوم من الأيام كذا فجأة كذا في المغرب رحت لزوجي قلت خلاص بأوقف حبوب منع الحمل وبأوقف القوكوفاج معاه! << ما أعتقد إنه كان متفاجئ من قراري هذا لأني كنت لوقت طويل وأنا أشاركه أفكاري حول هالموضوع..
قال طيب وايش راح يصير بعده؟ قلت متوقع اني بأقعد شهور ما بتجيني الدورة بعد ما كانت أعرف موعدها باليوم والساعة مع حبوب منع الحمل! قال طيب ماراح تنفسين؟  قلت ما أضمن بس أحتاج مساعدتك ودعمك في هالوقت! 

وفعلًا كان هذاك آخر يوم آخذ فيه الحبوب.. وما زلت محتفظة بهذاك الشريط وكاتبة عليه التاريخ 



إيش صار معايا؟ أعراض إنسحاب جسدية ونفسية؟ هل رجعت دورتي الشهرية؟ هل زاد وزني بعد ما تركت الجلوكوفاج؟ ايش روتيني اللي أتبعه هالفترة.. وغيرة بأذكره بالتفصيل إن شاء الله 

ولو عندكم أسئلة أو أشياء حابين إني أتكلم عنها للمواضيع القادمة أكتبوها تحت لي أو أرسلوا لي بأي وسيلة حابينها  
وراح توحشوني إلين وقت التدوينة الجاية 

فوتتكووا بعافية 



5 comments:

  1. تدوينة رائعه وملمة ، بالنسبة لتجربتي 8 سنوات وانا استخدم الجلوكوفاج معدل حبتين باليوم 500 غرام .
    اكثر مااعاني منه تساقط الشعر من الامام و حبوب البشرة وشعر الدقن ، دورتي ولله الحمد منتظمة جداً وتوقعت ان الجلوكافاج بينقص وزني لكن ماتغير شي ولو مااسوي كنترول على نفسي يزيد بشكل كبير ونزوله بطئ ، جربت حمية الكيتو ونزلت وزني كثير لكن لخبطت الهرمونات وبسببها تاخرت الدورة ، وحبيت اذكر لك ان حملت قبل 6 شهور وانا استخدم الجلوكوفاج ورفضت الاستشارية اوقفة تقول الدراسات الجديدة ذكرن انه ممتاز للحامل ومايضر الجنين 🥴
    تدوينتك عطتني أمل وحماس جديد اني ارجع ابحث اكثر واكتشف سبب التكيسات
    ننتظر بشوق للتدوينة القادمة

    ReplyDelete
    Replies
    1. رجعت من جديد عندي سؤال
      هل الحليب ومشتقاته لها دور في التكيسات لو قطعناها؟

      Delete
    2. مرحبا تغريد 💕
      صحيح أختي من الأشخاص إللي انتظمت دورتها مع الجلوكوفاج، وكويس إنك مرتاحة معاه وشايفة نتايج 😍في حالتي كان العكس تماما ههههههه ما كان فيه نتايج وبنفس الوقت كنت خايفة أوقفه.. وفعلا في حالة التكيس أسهل شيء يصير هو زيادة الوزن من أدنى نقطة يزيد وصعب تنزيله << لكن الحمدلله إنه مو مستحيل.. مقدور عليه بس يحتاج خطة طويلة الأمد عشان تبان النتايج 🥱

      بخصوص سؤالك الثاني.. إييه سبحان الله كثير نااس انصدموا لما قطعوا منتجات الحليب ما أعرف إذا هو تأثير حساسية اللاكتوز والالتهابات اللي تسببها أو انه بسبب الهرمونات اللي فيه.. بس الأكيد إنه كثير تحسنت حالتهم من بعده، فلو انتي من النوع اللي تستهلكها كثير جربي وقفيها أقل شيء ثلاث شهور ولاحظي جسمك بعدها 💙

      Delete
  2. بشرينا وقولي لي انك لقيتي علاج ... انا تعبت منها وما اخذت الجلوكوفاج للحين وافكر اخذه لان الدو
    ره ابدا مو منتظمهه

    ReplyDelete
    Replies
    1. شوفي الجزء الرابع من التدوينة كتبت اللي صار من بعد ما تركت كل الحبوب
      https://www.therawanz.com/2021/04/blog-post.html

      Delete

Top