معلومات ماقد قالتها لي ولا أي دكتورة عن تكيس المبايض! 👀

Monday, February 1, 2021


 مرحبا!
كتبت في التدوينة عن تاريخي مع متلازمة تكيس المبايض ونقطة التحول اللي خلتنني أبحث أكثر في هالموضوع .. (لو ما قرأتي التدوينة السابقة اضغطي هنا عشان تقرينها أول!)


بعد ما يأست إني ألاقي الجواب اللي أبغا أسمعه من كل دكتورات النساء اللي زرتهم + أخصائية التغذية، قررت إني أبحث عن جذور المشكلة.. لأن كل اللي سمعته إن التكيس مو معروف سببه -في هذيك الأيام، يارب إن الوضع تغير الآن- وإنه قد يكون وراثي؛ بمعنى آخر: مالك حل إلا إنك تاخذين حبوب منع الحمل أو أي حبوب هرمونية أخرى إذا ودك إن أمورك تكون تمام!
بس مااش ماني مقتنعة فيها! أحس هالأدوية تعالج الأعراض بس مو المشكلة الأساسية زي النظارة هي تصحح النظر بس ما تعالج العين! 

كنت كل فترة أطيح على معلومة جديدة أو دراسة جديدة بعضها مؤكد وبعضها مجهول المصدر وبعضها تمت دراستها على عدد بسيط من المرضى، بس على مرور سنييييين توصلت لاستنتاج: بما إنه مو كل البنات اللي عندهم تكيس لهم نفس الأعراض ولا كلهم عندهم نفس التاريخ! فمعناها ببساطه إن أسبابه متعددة وتختلف باختلاف المسبب الرئيسي لها 

 قبل ما أذكر الأسباب اللي لقيتها حابة أنوه في البداية إني مو طبيبة ولا مختصة، المعلومات اللي بأذكرها هي نتاج قراءاتي وبحثي ونتاج تجربتي وتجارب بنات بعضهم أعرفهم شخصيا وأكثرهم جمعنا هالموضوع اونلاين، والمصادر بتكون مرفقة عند الضغط على بعض المعلومات.. 
وبس خلاص نرجع لأسباب التكيس المعروفة 

1- مقاومة الإنسولين: لما الشخص الطبيعي ياكل يصير السكر يروح بالدم، يقوم البنكرياس يفرز هرمون الأنسولين اللي مهمته هي أخذ السكر وإدخاله جوا خلايا الجسم عشان الخلايا تستفيد منه كطاقة، بس لسبب ما في حالة التكيس تصير الخلايا ما تستجيب للانسولين (ترفض تدخل السكر في الخليه) فيبقى السكر يجري في الدم وتقوم البنكرياس تفرز زيادة انسولين عشان الخلايا تستقبل السكر لكن لا مجيب.. وبهالطريقة يكون السكر مرتفع بالدم بسبب مقاومة الأنسولين.. 
  • فغالبًا اللي هذا سبب التكيس عندهم يكون أهم الأعراض اللي تظهر لهم مع التكيس هو زيادة في الوزن. (المصدر)
2- لخبطة هرمونات: الهرمونات منظومة متكاملة وأي هرمون يزيد أو ينقص لأي سبب يصير يأثر على توازن باقي الهرمونات..
  •  عشان كذا نلاحظ كثير بنات تكون دورتها مره منتظمة وبعد ما تستخدم حبوب منع الحمل وتتركها تكتشف انه صار عندها تكيس. << في المقابل لو دكتورتك وصفت لك حبوب منع الحمل عشان التكيس أنصحك من كل قلبي توقفينها لأنها رح تزيد حالتك سوء -مو بس عن تجربة؛ كمان دراسات أثبتت هالشيء-! (المصدر)
  • وفي حالات تكون الهرمونات الذكورية التستوستيرون / الاندروجين عندهم متلخبطة ومرتفعة (على فكرة الهرمونات الذكورية والانثوية موجودة في أجسام كل الرجال والنساء بس بنسب مختلفة) فنلاحظ اللي زايدة هالهرمونات عندهم زيادة بشعر الوجه ويكون الشعر في أعلى الراس يتساقط أكثر من أي مكان! (المصدر)
  • كمان اللي يمرون بضغوطات وإجهاد قوي يرفع لهم هرمون الكورتيزول يكون هو سبب التكيس عندهم وممكن يسبب انقطاع للدورة الشهرية يوصل لسنوات (المصدر) 

3- الالتهابات: تصير لما جهازك المناعي المتمثل بالخلايا البيضاء يحارب أجسام دخيله عليه، ومو شرط تكون هالأجسام بطبيعتها ضارة، ممكن تكون شيء جسمك يرفضه ويتحسس منه ويقعد يتعارك معاه وانتي ما تدرين -زي على سبيل المثال القلوتين الموجود في القمح!- 
  • غالبًا اللي عندهم هالنوع من التكيس يكونون يعانون من أنواع مختلفة من الحساسية (ربو / اكزيما / انتفاخ القولون.. وغيره. (مصدر)

يقولون "إذا عرف السبب بطل العجب"، إذا شاكة إنه مشكلة التكيس عندك الأساسية هي أحد الأنوع اللي ذكرتها، فأنصحك إنك تعملين التحاليل اللازمة عشان تقدرين تتعمقين أكثر بالمسبب 

خلينا نتفق إننا نحاول نتنور أكثر ونتعلم عن جسمنا ونحل المشكلة بأكثر الطرق أمان! وهي بتعديل مفاهيمنا الغذائية ونمط حياتنا الصحية بما إني سمعت وقرأت قصص ناجحة كثيييير كانت بعد الله بتغيير الغذاء ونمط الحياة .. مثلًا:
  •  قرأت كثير تجارب بنات عندهم تكيس في المبايض والتزموا بحمية الكيتو لفترة معينة ولاحظوا إن الدورة عندهم رجعت تمام وراح منهم شعور الخمول وبالإضافة أكيد لنقص الوزن عندهم.. ولو إني ضد هالنظام لفترة طويلة لكن أعتقد إنه البنات اللي عالجت هالحمية مشاكلهم كان المسبب عندهم هو مقاومة الأنسولين، لذلك لما قطعوا السكريات وقطعوا الكربوهيدرات انحلت مشاكلهم، لكن أنصح اللي تعتقد إنه مقاومة الأنسولين هي سبب التكيس عندها يصير تتبع حمية قليلة النشويات "low carb" تمتنع فيها عن النشويات البسيطة بالأخص والسكريات بكل أشكالها (السكروز / الجلكوز / الفركتوز / مالتوز / وحبيبنا اللاكتوز).. يعني باختصار باختتصار.. تتبع حمي غذائية مناسبة لمرضى السكري وتزيد الحركة والرياضة عشان يكون كل شيء تحت السيطرة بطريقة طبيعية تخليها تتجنب الأدوية.
  •  واللي تشتبه إن مشكلتها بسبب لخبطة هرمون؛ يصير تعمل تحليل دم يوضح معدل الهرمونات بالجسم، وأنصح من كل قلبي إنها تصير تبحث عن مسبب إرتفاع الهرمون وغالبًا بيكون بسبب عادة غذائية أو في حالات يكون بسبب أدوية أخرى.. العادات الغذائية اللي ممكن تأثر على الهرمونات زي استهلاك المنتجات الحيوانية ومنتجات الألبان بكثرة / كثرة الوجبااات السريعة / أو استهلاك الأكل المصنع والمعلب وطويييل الأجل / أو قد يكون في المقابل استهلاك زائد في التوفو والصويا << ولو انه الدراسات مره كانت متباينة ما بين المؤيد بتأثيرها والمعارض، لكن لو شفتي فيه علاقة بين وقت استهلاكك لها مع وقت لخبطة دورتك وهرموناتك فاعرفي انه لها دور. أما فئة البنات اللي راحت منهم أعراض التكيس كلها بسبب اتباعهم لحمية نباتية فأعتقد إنهم كانوا من هذا النوع.
  • أما لو استبعدت النوع الأول والثاني وكانت من اللي يعانون من حساسيات في العادة؛ فغالبًا إنه الالتهابات هي سبب التكيس عندها وتحتاج ديتوكس في البداية ينظف الجسم مع البحث عن المسببات اللي قاعدة تحوس جسمك وانتي ما تدرين!.. قد يكون أشياء كثيرة! ممكن الشيء اللي قاعد جسمك يتحسس منه  قاعد يسبب مشاكل ثانية زي التكيس في الجسم.. وقد يكون أيضا بسبب ارتشاح الأمعاء اللي يسببه القلوتين / قد يكون شيء بسيط زي استخدام الأواني البلاستيك ضارة / أو حتى نبتة طفيلية طلعت في حديقتك وانتي مستانسة عليها وهي سامة! << المجال كبير ومتوسع يحتاج منك بحث ونظر في عاداتك اليومية.

هذا الكلام اللي كتبته فوق ماهو تشخيص هي مجرد  مفاتيح أو مجرد أفكار ممكن تولع لمبة عندك تخليك تراجعين نفسك وتبحثين أكثر الكلام الأقرب لحالتك وتراجعين نفسك ونمط حياتك وعاداتك الغذائية..

طبعًا فيه فئة لا تتفق مع الفكرة المذكورة في الأعلى ويشوفون إنه تكيس المبايض هو اللي يجيب مقاومة الأنسولين ولخبطة الهرمونات والالتهابات، لكن ما لقيت مصدر موثوق لهالفكرة حتى الآن..
 شخصيًا أنا مره مؤمنة جدًا بمقولة الطبيب الحارث بن كلدة اللي قالها قبل مئاات السنين: "المعدة بيت الداء، والحمية رأس الدواء" سواء كانت بأحد الأسباب الثلاث أو حتى سبب مجهول! مجرد رجوعنا للأساسيات ولحياة فطرية طبيعية عضوية راح يرجع الجسم يعمل بشكله الطبيعي اللي ربي خلقه فيه .. أساسيات يعني:

أكل نظيف من مصادر طبيعية + حركة أكثر + توتر أقل!

حياتنا الآن كل مالها وتصير أسهل من السابق وأريح جسميًا ولله الحمد، لكن ربي خلق أجسامنا بعظام قوية وأقدام مرنة ومفاصل وعضلات وأوتار وغيرها لأن الجسم مصمم للحركة! أجسامنا خلقت لنتحرك سواء كان عندك زيادة وزن أو حتى محتاجة تزيدين وزنك، موضوع الحركة والرياضة هذا نمط حياة يضمن لك بإذن الله حياة صحية وعمر طويل وانتي بقوتك وعافيتك!

احفظي المعادلة!  

المهم يا صديقاتي، ما أبغا التدوينة تاخذ منحنى ثاني بس كنت أبغا أذكركم إنه الحركة بركة، والمو حركة مو بركة  

أحس عاد اني طولت في هالتدوينة يمكن عشان فيها معلومات أكثر وكنت حريصة إني اتثبت منها قبل ما أنقلها، وأتمنى تكون أفادتكم لو نقطة! هالشيء بيعني لي الكثييييير  
 لكن زي ما وعدتكم هاذي التدوينة ماراح تكون الأخيرة إن شاء الله، بالذات إن تفاعلكم ورسايلكم بخصوص الجزء الأول كانت في بطين قلبي الأيسر  فلا تحرموني من رسايلكم وتجاربكم ومشاركاتكم 

إن شاء الله المره الجاية أحكيكم وش سوا فيني الجلوكوفاج وايش سويت/هببت بعد الزواج  

أما الآن.. فوتكوا بعافية 




6 comments:

  1. يالله كلامك بالصميم والله !
    فعلا الرياضة تحتاج تكون نمط حياة مو لهدف معين ونتركها، وانتظر جديدك بالموضوع هذا .
    شكرًا جزيلًا

    ReplyDelete
    Replies
    1. ممتة لتعليقك اللطيف.. هذا الكلام اللي يعطيني الدفعة إني أكمل 💝

      Delete
  2. تدوينة جميلة ومفيدة جدا ..
    شكرا لك وننتظر بقية السلسلة 💕
    أنا اكتشفت قبل كم سنة أن جسمي لا يتحمل القلوتين .
    طبعا كان بالصدفة
    أول شيء اكتشفت أن سبب الصداع والثقل بعد الافطار هو الخبز فتركت الخبز في الصباح إلى العصر وفعلا ارتحت جدا
    وركزت على البروتين وورقيات او فواكه الصباح
    وجربت نوع شوفان في كندا وكان ممتاز وكنت مرتاحة
    وبعد كم سنة أكلت في الافطار أكلة شعبية بالدخن ومع اني كثرت منها إلا إني قمت من الافطار خفيفة ومرتاحة وشبعانة وبحثت عن الدخن واكتشفت انو خالي من الجلوتين (مع ان غالب الأكلات الشعبية تسبب لي نفس الثقل والصداع)

    فاستوعبت الفكرة 😋
    أي شيء فيه قلوتين يشعرني بالثقل وكأن في صخرة في معدتي وصداع غريب
    وأي شيء خالي من القلوتين حتى لو كان من الحبوب ارتاح عليه
    وهكذا انحل جزء من مشكلتي
    وبعد مقالك استوعبت كمان انو قد يكون كمان أثّر على انتظام الدورة 😎

    ReplyDelete
    Replies
    1. مرره شكرًا على مشاركتك الثرية إيناس 😍
      والحمدلله إنك وعيتي على هالنقطة، سبحان الله كيف إنه كل جسم له نظام مختلف عن الثاني، مهم الشخص يبحث في نفسه لأن مافيه أي شيء دقيق يقدر يقول لك الأكلات اللي جسمك يرفضها من غيرها..
      فالحل هو الملاحظة وتدوين الأكل مع متابعة تأثرها 👍

      المشكلة في القمح اللي نستهلكه الحين صار معدل جينيًا ومقزم عشان تصير دورة إنتاجه أسرع، ويوصل لنا بالغالب كدقيق أبيض خالي من القشرة اللي فيها الألياف.. سبحان الله كيف انه القمح لما ينئكل كامل بقشرته ما يرفع الانسولين وقليل أشخاص ممكن يضرهم زي ما يصير مع القمح الأبيض منزوع القشره << فجأه قمت أتفكر! 😆

      Delete
  3. جعل مايدون إلا روااان 💘 رغم اني ماقد عانيت منها بس والله كمية تفصيلك للمعلومات وجهدك بالبحث واضح جدا، الله يكتب أجرك ويزيدك علم ويبارك فيه ياربّ.

    ReplyDelete
    Replies
    1. ااه مرره شكرا! ❤️❤️ تعليقك يعني لي الكثير والله!

      Delete

Top