رسالة لك اقرئيها قبل العيد 💌 | احتفلي هالسنة بطريقتك!

بسم الله الرحمن الرحيم.. أول شيء وقبل كل شيء مررره شكرًا لصديقتي البلوقر داليا إنها نفضتني اليوم الفجر بكلامها اللطيف ورجعت لي الحماس إني أكتب تدوينة 

من دخل الحجر وأنا أكتب تدوينات مره كثير بس كلها غير مكتملة وفي مواضيع مرره كثيرة ومختلفة!

يعني أبدأ وأنا متحمممسة مرره وعندي أفكار وطاقة وشرارة حماس بداخلي وأكتب شويات وبعدين أنشغل شوي وأرجع ألاقي نفسي طفيت وأوقف.. ومرات أصير أراجع نفسي (امممم روان كأنه كلام كثير لازم تختصرين) أو (روان كلامك مره خرابيط رتبيه وحطي نقاط بشكل أسهل وأنسى أرجع لها) أو (وش راح يستفيدون إذا قرؤوا هالشيء) أو مثلًا (يبغالك تدعمين الموضوع بدراسات ومصادر موثقة << وبعدين ذهب ولم يعد) .. أتوقع هالشيء قد مر عند كل مدونة أو صانعة محتوى على كل المنصات! وقد كتبت موضوع سواليفي *هـنـا* 

<< شايفين كل هالكلام اللي فوق؟ تراه بس عشان أحكي لكم قد إيشش أعاني عشان أسولف معاكم هنا 

لكن هالتدوينة اليوم بتكون على موضوع انه (مافيه عيد) اللي قريتها 487387 مره إلين الحين.. شفتوا كيف جت داليا نفضتني وخلتني أكتب هالتدوينة؟ أنا الحين جاية عشان أطش بوجهك مويا عشان تقومين تعيدين زي المسلمين <<< هههههه يمه حسيتني أم  لالا أمزح تراني مو عنيفة بهالشكل.. بس أتخيلك جالسة ببجامتك صار لك كم يوم ومنسدحة السرير ولابتوبك على بطنك تتفرجين نتفلكس شويا تنقلبين جهة الشاحن وتاخذين جوالك وتفتحين التويتر تتحلطمين وتقرين أخبار كورونا والحظر << وولا تهون حلطمات شركات الشحن والتوصيل ما شاء الله أخذت نصيب الأسد هالفترة   

فـ ودي يعني أشوفك مشرقة ومنتعشة يوم العيد ومبسوطة تقضينة بأجمل طريقة ممكنة، وتذكرينة بعد 78 سنة وتقولين ما كنت أتوقع إن هذاك اليوم بيطلع بهالجمال رغم الظروف اللي مرينا فيها! عشان كذا بأكتب لك -بارتجالية- أفكار بسيطة مره مره مره ممكن تسوينها للاستعداد ليوم العيد.. 

نبدأ؟

1. ابدئي بنفسك، تجهزي للعيد بطريقتك.. بالطريقة اللي تسعدك وحدك 
2. خذي شاور دافي طويل/ سوي حمام مغربي / خذي لك باث دافي بالأملاح /  استخدمي صنفرة جسم تحبينها / غسول استحمام بريحة منعشة.. فالاستحمام الطويل هو البداية 
3. ادهني بشرتك وسوي لها مساج بكريم مرطب / ممكن زيت أطفال / ممكن زبدة كاكاو أو شيا / ممكن لوشن عطري.. أي شيء لبشرتك خليها تترطب وتنتعش.. وخذي وقتك بهالخطوة.. وراك شيء؟ 
4. بالنسبة لي أحس شعري من الأشياء اللي إذا صارت تمام أحس إنه إطلالتي كلها تمام، ففي الأيام اللي ودي يكون شعري فيها مرتب أحب أجففه نص تجفيف بالاستشوار وأسوي ظفيرتين فرنسية عشان يطلع شعري مموج بطريقة مرتبة.. عجبتك الفكرة؟ طبقيها 
5. على طاري الشعر، جربي قبل العيد تحطين فيه خلطة حنا تغير لونة وتغلف شعرك وتزيده لمعان.. عشان (ليش لا!) 
6. أو جربي تسوين لك خليط من الزيوت اللي عندك تحطينها على شعري كم ساعة عشان تغذي فروتك وترطب شعرك وتتخفف النفشة 
7. شقري حواجبك إذا تحتاج ترتيب، واستخدمي عليها جل الصبار عشان يترتب شكلها بطريقة طبيعية وبشيء مغذي ومفيد 
8. قبل كم يوم جربت شفرة فلامينقو على الوجه وأول مرة ما يطلع لي حبوب بسببها! اكتشفت انها مره رهيبة بعد ما جربت أشيل باتجاه الوبر وأبرّد وجهي بعدها بتونر موية الورد.. كيف تجربتك مع شفرة فلامينقو؟ 
9. على طاري التونر، جربي حطي تونرك المفضل أو موية ورد في علبة بخاخ واحفظيها في مكان بارد، راح تعطي نتيجة أجمل أضعااااف من لو انك حطيتيها بقطنة ومسحتيها على وجهك.. جربيها! 
10. اصنعي صنفرة طبيعية ومغذية لنفسك: (قهوة خشنة + سكر + أي نوع زيت طبيعي) .. فيه أجمل من شاور دافي وبريحة القهوة؟ لأ طبعًا! 
11. حسب احتياج بشرتك اختاري القناع الخاص فيها.. بشرتك دهنية؟ استخدمي قناع طيني، بشرتك جافة؟ استخدمي قناع مرطب، بشرتك حساسة؟ استخدمي قناع طبيعي مغذي... بشرتك محتاجة تدليع؟ حطي عليها شيت ماسك وسوي لها مساج بأطراف أصابعك بعدها 
12. افتحي دولابك، ودوري على البجامة اللي من زمماان ما لبستيها.. طلعيها وعطريها والبسيها قبل النوم   بتكتشفين قد إيش هي رهيبة بس انتي معلقة على بجامتين وسحبتي على هاذي!
13. أطراف شعرك خفيفة؟ هشة؟ كل وحدة متزاعلة مع الثانية؟ كل وحدة طولها مختلف عن الثانية؟ طبيعي! ترا ما يحتاج الموضوع صالون عشان تقصين أطرافه، افتحي اليوتيوب وشوفي تتوريالز لطريقة قص أطراف الشعر بالمنزل .. اكتبي (trimming your hair at home) وخذي مقص شعر أو مقص حااد وقولي بسم الله وطبقي اللي تعلمتيه  بتلاحظين مظهر شعرك صار أكثر حيوية << غير انه يحسن النفسية لحد يسأل كيف قبل ما يجرب لأني مدري 
14. قصي أظافرك بشكل مرتب وابرديها ولمعيها، بتصيرين تحبين تطالعين فيها حتى وانتي تكتبين بالجوال 
15. جربي طرق جديدة لتسريح الشعر بدون حرارة! بالرولات / بالتظفير / بالبنس.. ايش أسوأ شيء ممكن يصير؟ 
16. الحين بعد ما سمكرتي نفسك، نجي الحين للمحيط اللي حوالينا  لأنه كمان عنصر مؤثر بالنفسية رضيتي وإلا انرضيتي 
17. خذي نظرة شاملة لغرفة نومك وشوفي وين الأماكن اللي ما ودك تطالعين فيها وقت طويل وابدئي فيها 
18. سريرك هو مكان أحلامك السعيدة والمكان اللي تقضين فيه أكثر ساعات يومك، لازم يكون نظيف ومريح ويبهج قلبك.. فابدئي بتغيير الشراشف والأغشية واللحاف واستخدمي طقم من زماان ما استخدمتيه!  
19. افتحي شباك غرفتك، خلي نور الشمس يدخلها ويتجدد فيها الهواء، وجربي تطلعين راسك برا وتاخذين نفس عمييييييييق بما إنه الهواء الخارجي هالفترة هو أنظف شيء قد صار من سنين! فاستغليها حتى لو كان الجو برا حار، نص ساعة ماراح تفتك فيك  جربي وقولي لي شعورك بعدها... انتظرك!
20.  امسحي قزاز الشباك، نظفيه أو انفضيه، واشفطي الغبار اللي حول الايطار بالمكنسة الكهربائية. انتِ تستحقين تتنفسين هواء نظيف!
21. على طاري النظافة، ترا الكم خطوة القادمة بتكون في مجال التنظيف، وراح أذكرك بالأماكن المنسية بغرفتك اللي تحتاج لفتة اهتمام منك  بس لا توقفين قراءة ترا بيكون فيه أشياء لطيفة.. وعد! 
22. فلتر المكيف، لا تنسينه! تشطيف سريع عشان يعطيك هواء بارد نقي وتساعدين مكيفك يعمل بكفاءة ويبرد على قلبك من جد! 
23. امسحي الأسطح ولمعيها، وكنسي الأرضيات وامسحيها وخلي المكان يلق كأنك في غرفة فندق 
24. ودك تحسين بالتجديد بدون ما تضطرين تشترين شيء جديد لغرفتك؟ غيري أماكن الأثاث!! وااااو الشعور اللي بعدها يقتل! 
25. لو مافيه فرصة تغيرين مكان أي شيء بغرفتك، جربي غيري ترتيب الديكورات زي الأشياء اللي عالتسريحة.. غيري موقعها / غيري التحف / بدلي أماكنها / دخلي المكياج بالأدراج / حطي كم عطر خفيف يناسب جو الصيف والباقي دخليها بالأدراج << جربي فعليًا تخلين تسريحتك متخففة قد ما تقدرين وجد هالمرة بتحسين بجو الفنادق << مقطعة قلبي هالفنادق 
26. غرفتك نظيفة الحين؟ شكلها يفتح النفس ويسر الناظرين؟ مره مستانسة على الجو العام فيها؟ الحين باقي حاسة الشم متعيها في غرفتك.. بخريها / ولعي شموع / شغلي فواحات بريحتك المفضلة / رشي عطر عالمفارش. حاولي تخلين الجمال يلامس حواسك الخمس كلهم!! 
27. كيف اشتغلتي على الحواس الخمس بانعاش غرفتك؟ منظرها حلو لعيونك / الاسطح نظيفة والسرير وثير ومريح لبشرتك /  والرائحة نظافة وانتعاش لأنفسك / نجي للسمع.. شغلي تلاوة قرآن هادية ومريحة (مثل القارئ ياسر الدوسري / وديع اليمني / ناصر القطامي.. أكثر ثلاثة أحب تلاواتهم مررره!) / ممكن تشغلين أصوات طبيعية في الصباح *مثل هاذي* أو أصوات ليل وهدوء وسكينة *مثل هاذي* / أو ممكن تشغلين أناشيد رمضان والعيد اللي تحبينها لأنها راح تدخلك للجو اللي تحبين..
28. وأنا أكتب النقطة اللي فوق تذكرت حاسة التذوق وحسيت اني تورطت كيف الواحد يذوق جمال غرفته!  بعدين لمن جيت هنا استوعبت إنه عشان المود يكتمل لازم يكون معاك شيء تشربينه أو تاكلينه وانتي تستمتعين بإنجازك! يعني أنا الحين حاطة كاسة حليب وتمر سكري عليه خليط طحينة وبينتر بتر وأكلت شويا منها بنص التدوينة من باب التشجيع وتاركة الباقي قدامي أبغا أكافئ نفسي فيه إذا خلصت منها  فانتي كمان إذا رتبتي ونظفتي وخلصتي تحتاجين مكافأة من نوع لذيذ! 
29. خلصنا من جانب تدليل النفس + وتهيئة المكان.. وصارت نفسيتك مره أفضل، وصرتي متهيئة للتغييرات، مافيه شيء سخيف مضايقك الحين.. انتِ مستعدة تستقبلين العيد، وتحتفلين فيه مع عائلتك أو حتى مع زوجك فقط! وراح يكون بإذن الله يوم جميل لو استعديتي له.. فممكن لو سمحتي تستعدين للاحتفال؟ 
30. نكمل على موضوع المحيط حقك؟ أيًّا كان أكثر مكان تجلسين فيه؛ زينيه بزينة العيد سواء كان مكان خاص فيك لوحدك، أو إنتِ وأهلك، أو أسرتك الصغيرة وأطفالك! تجمعوا سوا واصنعوا زينتكم سوا 
31. إذا حابة يكون فيه زينة ورقية عالجدار أو عالمدخل، ابحثي في بنترست عن أعمال ممكن تسوونها بالأدوات المتوفرة معاكم، وممكن تبحثون عن تصاميم لزينات جميلة تطبعونها وتجهزونها مع بعض ( ممكن تلاقون نماذج جميلة عند العنود العصيمي / نوف العبودي / نورية / وعند مصممات غارفيكس فنانات! لو تعرفون أحد شاركوا حساباتهم في التعليقات).
32. انفخوا البلونات لو قدرتم تحصلون عليها من أقرب مكان بتكون إضافة حلوة للمكان  عمري ماراح أكبر أو أتخلى عن عادة البلونات يوم العيد إن شاء الله! منظرها عندي = عيد  ولو ما قدرتم تحصلون عليها؛ فالبركة بالزينات والكتابات والأفكار الرهيبة اللي بتلاقونها في بنترست!
33. خططي لفطور العيد، ايش بتاكلون عالفطور؟ ممكن تزينين طاولة الطعام أو السفرة الأرضية.. التزيين بيخلي مائدتك فاتنة حتى لو كانت أصناف الفطور خفيفة وبسيطة، حضري سفرتك من الليل.. استخدمي مفرش أو سفرة أنيقة، جربي نسقي المواعين اللي عندك بطريقة جميلة، استخدمي الشموع والورود والنباتات الصناعية في تزيين السفرة.. لو بدأتي في التفتيش بين أغراضك بتكتشفين أشياء كثير ممكن تنسقينها مع بعض بطريقة ماقد خطرت في بالك!
34. أرجع أذكرك! هالعيد سوي كل شيء نفسك فيه بدون قوانين! ماحد بيشوفك وبيشوف بيتك غيرك انتي وعائلتك فاستمتعوا فيه بطريقتكم الخاصة 
35. مو  عشان ما بيجي ضيوف ما تسوون قهوة وحلاوة للعيد! حضري طاولة القهوة حطي فيها طقم الضيوف الفخم، استخدمي الترمس الحلو صفي الفناجيل بطريقة أنيقة، إذا ما قدرتي تجيبين شوكولاتة العيد جربي تسوين حلى منزلي خفيف ولو عندك كائنات صغيرة لا تنسين تخلينهم يشاركونك هالترتيبات لأنها راح تعني لهم الكثير  ااه صح كمان لا تنسين تجهزين لهم العيديات لو ريال تحطين عليه فيونكة أو تحطينه بداخل بلونات وتنفخينها بتكون حركة كيوت! 
36. نجي الحين عندك إنتِ، بعد ما انتعشتي وتنعنشتي وتسمكرتي، ما صرتي تحتاجين الحين غير إنك تحضرين لبس جميل من دولابك، لبس تحبينه وتحبين ألوانه، وتحبين شكله على جسمك، لبس يجيب لك البهجة لمن تشوفينه وتحسين بالثقة بنفسك لمن تلبسينة << أكيد وانتِ تقرئين هالكلام جا على بالك واحد! وتذكري.. هالعيد مافيه قوانين اجتماعية؛ فالبسي اللي ودك فيه 
37. جهزي اللبس اللي جا على بالك من ليلة العيد، اكويه وبخريه وعطريه وعلقيه قدامك.. ما يمانع تنسقين معاه كيتن هيلز أو سلايدز أنيق ومجوهرات ناعمة تكمل لك طلتك 
38. لو عندك كاميرا احترافية، اشحنيها من الليل وتأكدي إن الميموري فيه مساحة لتوثيق فعاليات صباح العيد وتاخذون صور جماعية لعيد الفطر 2020، ومافيه مانع كمان تستخدمين جوالك للتصوير، أهم شيء نظفي الاستديو حقك وخليه مشحون تمام عشان ما تفوتين على نفسك فرصة توثيق هذا العيد 
39. من لما يعلن في المغرب إن بكرا ليلة العيد لا تنسون سنة التكبير بعد ما ربي أتم علينا هالشهر  "وَلِتُكْمِلُواْ ٱلْعِدَّةَ وَلِتُكَبِّرُواْ ٱللَّهَ عَلَىٰ مَا هَدَاكُمْ وَلَعَلَّكُمْ تَشْكُرُونَ"  قلبي قاعد يرفرف وأنا أتخيل هذا الموقف، أحب بهجة ليلة العيد، احب صوت التكبيرات تصدح في البيت، كبروا في بيوتكم أو شغلوا أصوات التكبيرات من ليلة العيد إلين الصباح 
40. لا تنسون إن صباح العيد بيكون فيه خطبة في الحرم المكي والمدني، حطوا على قناة القرآن أو السنة بالتلفزيون أو عاليوتيوب واسمعوها مع عائلتكم في صباح العيد، ولا تنسون تكلمون أهاليكم وحبايبكم فيديو تعايدونهم بدعوات حلوة وابتسامة أحلى 

وخلصت 40 نقطة كتبتها بشكل ارتجالي، أتمنى تكون ألهمتكم وأشعلت فيكم الحماس والترقب لهذا اليوم بشكل أو بآخر 

وأسأل الله أن يعيد علينا رمضان أعوام عديدة وأزمنة مديدة واحنا بأفضل حال وأن يتقبل مننا وإياكم الصيام والقيام والدعاء..

كل عاام وانتم بخيروفرح وسعادة

وفووتكووا بعافية 

 
 
 
 
 
 

3 comments تجهيزات أي شيء 🌈, رمضان ☪, مجرد أفكار 💭