تأثير الفراشة بعادات صحية بسيطة 🦋🌪

Friday, March 2, 2018


اكتشفت مع مرور الوقت إنه عشان أكون صحية مو معناها إني أسوي تمارين مقاومة وآخذ بروتين شيك وأصور جزمتي الرياضية في الجيم زي ما كنت أسوي 😂😂 كان عندي صورة في ذهني إنه هاذي هي الحياة الصحية ولمن إضطريت أوقفها تأزمت نفسيًا انه اااخخخ خلاص ما صرت صحية فاستسلمت 😅

لكن عبارة حياة صحية عالم متشعب من الاختيارات، فيه الأم الحريصة على طبخ غذاء أولادها بنفسها هاذي تعتبر إنسانة صحية!
واللي تتبع حمية خالية من السكر أو الكربوهيدرات نقدر نقول عنها صحية كمان.
اللي تحرص يكون غذاءها طازج من الطبيعة كمان صحية. إللي تلبس جزمة رياضية في المشاوير الطويلة عشان تحافظ على ركبتها واستقامة ظهرها ما نقدر كمان نقول عليها صحية؟ واللي زيي وقت الأكزيما ما تستخدم منتجات فيها مواد كيميائية ما تعتبر صحية؟ 😂😂😂 

لذلك كل واحد يقدر يكون صحي بمفهومة الخاص، مافيه مدرسة وحدة نقدر نطبقها على كل الأجسام ونضمن لهم الصحة 100%
فمن هنا بأسولف لكم عن بعض العادات الصحية البسييييييييييييييييييييييطة اللي دخلتها أو غيرتها في نظامي، بعضها من مدة طويلة وبعضها من قريب.. كلها تشترك ببساطتها وسهولة الاستمرارية عليها حتى في أكثر الأيام إنشغالًا << وهذا اللي نحتاجة لتغيير نمط حياتنا بشكل تدريجي 👏


راح أبدأ بالعادات اللي تندرج تحت النشاط البدني،
  1. إستقامة الظهر: أعترف إني من فترة مو بسيطة وموضوع إستقامة الظهر والرقبة صاير يخوفني! 👀  صرت أحرص كثير مرات إني حتى لمن أبغا أمسك الجوال أرفعه على مستوى عيني << أحاول أكون دقيقة لمن أسوي هالحركة بمكان عام ويكون قدامي أحد  موش عايزين مشاكل 🤳 لأني ببساطة ما أبغا أوصل سن التقاعد وأنا محدبة والا عندي الدسك والا عندي لغلوغ  أو حتى تكون مشيتي مشية وحدة مخذولة مطئطئة راسها لأن عظلات رقبتها ما تعودت تشيل راسها!  كذلك مرات أشتغل عاللابتوب أو أتفرج منه على مسلسل مثلًا أثناء ما أنا جالسة أمشي فحرصًا على المحافظة على استقامة ظهري أحاول أحط اللابتوب فوق كرسي والكرسي يكون فوق الطاولة عشان أقدر أتفرج وأنا رافعة راسي 
  2. التمغط! ايه التمغط stretching  *أتحداك تكملين بدون ما تتمغطين* على كثر ماهو مريح بكل أشكاله واحنا ناخذه على إنه شكل من أشكال الكسل إلّا إنه في الواقع مرره مفيد صحيًا لزيادة مرونة العظلات ويقلل من الإصابة بالشد العظلي غير إنه يساعد على تدفق الدم للعظلات << فبالتالي الدم راح يغذي الأنسجة العظلية أسرع ويتخلصها من الفضلات، فتحسين الدورة الدموية اللي يحصل كمان راح يساعد العضلة عالاستشفاء السريع إذا لا سمح الله صارت إصابة زي التمزق. ومعلومة أخرى كمان أضيفها.. بما إنه غالبًا التوتر يصاحبة شد وتشنج في العضلات؛ فالعكس يصير لمن تتمغطين وتفكين الشد الحاصل  طرق التمغط كثيرة على حسب العضلات المستهدفة لكن الجميل فيها إنك تقدرين تسوينها في كل الوضعيات: واقفة / جالسة / متقرفصة / منسدحة!  
  3. التنفس بشكل صحيح! تصدقون إنه أكثرنا مو قاعد يتنفس بالشكل الصحيح؟ *طيب أتحداك تكملين بدون ما تاخذين نفس عميق!*خصوصًا لمن نكون متوترين أو مركزين في شغله لا شعوريًا نفَسنا يصير قصير وهالشيء يأثر كثير على عمل وظائف جسمنا لأنه ببساطة الخلايا مو قاعدة تحصل على كفايتها من الأكسجين، مو بس كذا! كمان أغلبنا يتنفس من صدره بينما المفروض يكون التنفس الصحيح من البطن عن طريق الحجاب الحاجز *زي البيبيات* كلنا واحنا صغار كنا نتنفس صح بس مع الوقت وشفط البطن خلال اليوم لا شعوريا يصير التنفس من الصدر << صح والا مو صح!  فبتصحيح طريقة التنفس أكون وصلت الاكسجين الكافي لخلايا جسمي + مرّنت عضلة الحجاب الحاجز.
  4. أكون نشيطة على طول، فيه كثير أيام تمر عليه ما أقدر أطلع برا أمشي أو أروح الجيم أو حتى أتمرن في البيت لظرف ما، فأحاول أعوض بالحركة المستمرة في البيت، يعني زي الحين أنا جالسة أكتب التدوينة وأنا على الطاولة ومويتي هنااك على طاولة بعيدة يصير أروح أشرب منها وأرجع مكاني بدونها. أو مثلًا لمن أطلع المواعين من غسالة الصحون أو أشيلها من القاعدة اللي نجفف عليها الصحون يصير أودي كل ميعان لحالة وأرجع أخذ واحد ثاني وأوديه وأرجع وهكذا.. يعني من المختصر أكون هبة ريح لمن يكون الموضوع فيه قومة  ومن الأشياء اللي ساعدتني على استدراك هاذي النقطة وهي السوارة الرياضية اللي ألبسها على طول.. 
من قبل خمس سنوات اقتنين سوارة نايكي Nike Fuel Band SE وكنت ألبسها بشكل يومي وما أفسخها حتى وقت الإستحمام بما إنها مقاومة للماء، فكانت تحسب خطواتي ونشاطي خلال اليوم والسعرات اللي حرقتها مع حساب النبضات وغيره من الخصائص اللي كنت أتابع من خلالها أدائي بشكل دوري. لكن في السنة الخامسة من الكرف حصل خلل في الزر الأساسي لسوارتي مما اضطرني إلى استبدالها بسوارة Fit Gear 2 من Samsung طبعًا هاذي مختلفة كثير عن سوارة نايكي بما إنها مربوطة بجوالي فأقدر أتحكم بجوالي من خلالها بجانب موضوع حساب السعرات ونبضات القلب وغيره.. والحمد لله للحين ماشية معايا زي الحلاة << يارب بارك لي فيها وتعيش أطول من سوارة نايكي 




طيب نجي عند العادات الغذائية، 
من حسن حظي إني أفضّل الطبخ المنزلي على الأكل في المطاعم بكثيرررر. فسالفة إني أعرف المكونات بالضبط اللي داخله جسمي يعطيني راحة كبيرة ويحسن اختياراتي مع الوقت كل ما علمت نفسي وثقفتها أكثر في أمور التغذية  فأشياء بسيطة أدخلها وأشياء أخرجها وبعضها أبدلها ما تعتبر شيء يذكر؛ لكن له تأثير على المدى الطويل.. زي مثلً..
  1.  ما أدخل في بيتي زيت للقلي (اللي أستخدمهم في الأكل هم زيت الزيتون وزيت جوز الهند فقط).
  2. ما عندي سكر أبيض نهائيًا، وأستخد باكيتات سيتيفيا العضوية وغالبًا استهلاكنا ما يتجاوز 7 باكيتات في الاسبوع لقهوتنا اليومية أنا وزوجي << طبعًا جا هالتقليل بالتدريج. لأن اللسان يتعود كمان، كل ما كثرتي بهارات وملح وسكر في أكلك يكون لسانك ما يتعود إلّا على هذا المستوى وأكثر، وما دونه يكون شامز.
  3. أستخدم صحن صغير في الأكل، هالحركة تخليني أستشعر الكمية أكثر وما أغرف كثير 
  4. ما أشتري الملح التجاري نهائيًا، الملح البحري هو خياري الأمثل << لكن حتى مو اسم انه طبيعي آخذ راحتي عشان ما تحتبس السوائل بجسمي وأتنفخ 
  5. من العادات الغذائية اللي دخلتها في نظامي أيضًا وهي شرب مويا + خل تفاح عضوي على الريق.. ليش؟ لأن خل التفاح يعزز الطاقة + يقلل الشهية + يزيد عملية الأيض (التمثيل الغذائي) + يعمل على تنقية الكبد من السموم + بما إنه عالي بالبوتاسيوم فيعتبر علاج جيد لي يعانون من شد العضلات.
  6. مؤخرًا صرت الصباح أشرب المويا مع ملعقة من العسل.. ليش؟ العسل غير إنه يغذي الجسم لقيمته الغذائية العالية، كمان العسل يعمل على زيادة المناعة في الجسم + يقلل من أمراض القلب والشرايين لأن العسل يعمل على تذويب الكوليسترول الضار + يساعد على التخلص من عسر الهظم +  العسل يعتبر مضاد للبكتيريا ومضاد للفايروسات ومطهر.. 
عن أبي سعيد -رضي الله عنه-: أن رجلا أتى النبي -صلى الله عليه وسلم- فقال: «أخي يشتكي بطنه؟ فقال: اسقه عسلا. ثم أتاه الثانية فقال: اسقه عسلا. ثم أتاه الثالثة، فقال: اسقه عسلا. ثم أتاه فقال: قد فعلت. فقال: صدق الله وكذب بطن أخيك، اسقه عسلا، فسقاه فبرأ»


يسس أنا من الأشخاط اللي يؤمنون بالطب النبوي والطب البديل والعودة للطبيعة 
وكل ما بعدت عن الأكل الجاهز والمصنع وأخذت أدوية وعلاجات وخرابيط كثيرة كل ما أنبني ضميري وحسيت أكثر إني مو صحيّة 

كانت هاذي بعض العادات اللي دخلتها في نظامي، ومرره مبسوطة فيها رغم بساطتها وياااااااااااااااااااااااااااااارب أستمر عليها بعد ما أرجع للسعودية ياارب .. دعواتكم كمان إني ما أخرب نومي وأشقلب يومي  


فوتتكوا بعاافية 

                
  •                       
  •                       
  •                       
  •                       
  •                       




10 comments:

  1. يااه استقامة الظهر من العادات اللي بلتزم فيها انا بعد بس عشان شي ثاني 🌚 خل اكتب تدوينتي وتعرفينه << كيف التشويق 😂😂👌🏽

    ReplyDelete
    Replies
    1. هههههههههههههههههههههه والله فعلًا شوقتيني 😂😂
      بتصيرين مودل؟

      Delete
  2. حبيت تدوينتك والنقاط الي ذكرتيها الخل جربت فتره اللتزمت بيه وحسيت بخفه ورشاقه وانه الجسم نظيف

    ReplyDelete
    Replies
    1. إيييه فعلًا مرره بطل الخل 👌
      شكرًا على مرورك عبير 💓

      Delete
  3. كالعادة روان.
    تدويناتك سوبر فوائد و تعطي طاقة للإنجاز ��
    و هالتدوينه وقتها مناسب جدا
    بحكم اني باديه ادخل عادات صحية في يومي
    يعطيك العافيه

    ReplyDelete
    Replies
    1. ربي يسعدكك ويعافيك الجوهرة 💕
      جميللة فكرة إدخال العادات الصحية لروتينك، بالنسبة لي أؤمن بالفكرة اللي في الحديث النبوي "أحب الأعمال إلى الله أدومها وإن قل" 💕 أسعى دائمًا للبدئ بالأشياء البسيطة حتى تتحول لعادات وهذا ما أنصح فيه الجميع 💌

      Delete
  4. شكرا لاني ماخلصت التدوينة الا وانا شاده ظهري ورافعه الجوال وقاعده اتنفس مزبوط واخطط فمخي لشرب المويا بالخل عالريق 😅💕
    تدوينه لطيفه زي صاحبتها

    ReplyDelete
    Replies
    1. هههههههههههههههههههههه بس والله وهذا المطلوب 😂💖

      Delete
  5. أحب تدويناتك جدا، وعادة ما أشعر أن هنالك تشابه بيننا في أسلوب الحياة وكأنك تتحدثين على لساني،

    بخصوص استقامة الظهر، موضوع مهم جدا، ويسبب لي حرج كبير، حاليا استخدم المشدات وشعرت أنها نشطت العضلات وأصبحت أفضل.

    موضوع الزيوت، لعلك جربتِ بخاخ الزيت؟، يوجد منها نوع قابل للتعبئة تضعين الزيت الذي ترغبين.
    من البدائل التي استخدمها أيضا الشحوم، أطلبها مع اللحم من الملحمة.

    ألهمتيني في موضوع الملح، لعلها تكون هذه خطوتي القادمة
    أما السكر فأتمنى فعلا حظره من المنزل لكنه موجود للضيوف،


    شرب الماء علي الريق يعطي نشاطا فعلا ويكسر الكسل..


    من الأمور الصحية التي أنصحك بك،
    القسط الهندي، وهو من الطب النبوي
    أشعر أن مناعتي جدا تحسنت معه، (أتناوله كبسولات)

    استبدال الخبر الأبيض بالأسمر والنخالة، شخصيا تمكنت من التقليل ولكن الامتناع التام يحتاج إلى وقت،

    أتمنى لك حياة مديدة وسعيدة تعيشينها بصحة وعافية،

    ReplyDelete
    Replies
    1. أهلا فيك سرمدية أسعدتني قراءة تعليقك، 💕

      الملح اللي استخدمه حاليا صخري كمان يعتبر صحي وغير مكرر، أشتريه خشن واطحنه بنفسي مره ممتاز ونكهته أوضح من البحري حتى فيعتبر خيار بديل كمان 🤩

      بخصوص القسط الهندي هل تعرفين مصدر مضمون له؟
      حيقيقي أسمع عنه كثير بس ما قد تعمقت فيه.. كلامك حمسني أقرأ عنه أكثر

      ربي يمدنا بالصحة والعافية والفرح دائمًا وأبدا 💚

      Delete

Top