أشياء كنت اتمنى أعرفها قبل ما أبدأ في التدوين 💌

Tuesday, January 31, 2017


  السلاااام عليكم والرحمة ❤️

تعرفون إيش اليوم؟
اليوم 31\ 1 ...
يوم ميلاد مدونتي! صار عمرها سنة وخخخخ النووونووو 😭❤️🎂🎆
يالله كيف بسررعة تطير الأيااام!! 

وبهاذي المناسبة العظيمة، جايتكم بسوااليف عن التدووين 🙏
أِشياء ما كنت أعرفها في مجال التدوين أبدًا، وأشياء كنت أعرفها بس ساحبة عليها، وكمان أشياء خيررر شرر ما كنت أعرفها 😅
(وأشياء تعلمتها من خبرتي الطويلة 12 شهر خخخخ)


shall we..?




1- قبل ما أفكر أسوي مدونة..
إيش هدفي منها؟ عندي معلومات مختلفة أبغا غيري يعرفها؟ أبغا المدونة مكان يجمع خواطري ومقالاتي؟ أبغا أصير مشهورة؟ أبغا تجيني منتجات مجانية؟ << ايواا فيه ناس كذا هدفهم ترا 💁
لكن حطي في بالك، كل ما كان هدفك العطاء أكثر من التلقي، وكانت رغبتك الأولى هي التدوين بحد ذاته؛ هنا أظمن لك المتعة في الكتابة وراح تحسين دائمًا إنه عندك أفكار تبغين تطرحينها وعندك معلومات تبغين تشاركينها، ما راح يجيك وقت تحسين فيه بالطفش! صدقيني 😏
في المقابل؛ إذا كان هدفك عشان الشهرة، عشان أسوي إعلانات، عشان يصير اسمي "بلوقر" .. بيكون وقتها اهتمامك فقط منصب على عدد القراء وعدد المتابعين، وبيجي وقت بتطفشين! بتيأسين! بتقولين وش بلاني أسوي مدونة!
هذا الكلام مو من راسي أنا فقط، بل كمان رأي كثير من المدونات المخضرمات 😇 << حبيت الاسم 😂

طيب.. 
2- حددي مجال تدوينك..
إنتي تحبين الفاشن؟ تحبين الميك آب؟ تحبين السفر؟ تحبين القراءة؟ تحبين الفنون؟ تحبين كتابة الخواطر والأدب؟
لو سويتي المدونة وانتي لسى ما تعرفين عن إيش بالضبط تبغين تكتبين .. عادي ترا 😂😂
أغلب المدونات بعد كم سنة تلجئ لحذف تدويناتها الأولى.. لأنها ما تحس بالرضى عنها، تحس إنها ما تنتمي لها عرفتوا كيف 😂
( أنا بعد قد كتبت تدوينة عن السخونة وطرق تخفيفها وعلاجها بعد ما عشت التجربة مع الهزبند بس طااابعاا حذفتها هههههه )
طبيعي تُمرين في مرحلة "السلطة" تحسين اممم ابغا أكتب عن الترندز في شتاء 2016 / أكتب عن تجربتي في الأمومة / أكتب عن أحسن لابتوب في السوق وفجأة تكتبين طريقة المرقوق هههههه ،، طبيعي إلين تعرفين المجال إللي تحسين إنك فعلًا شغوفة فيه!
بعد فترة راح تكتشفين إنه فيه مواضيع معينة هي اللي راح تلاقين متعتك فيها،
 تلاقين نفسك تستمتعين أثناء كتابتها تحسين المعلومات قاعدة تطلع بانسيابيه وما تملين وانتي تكتبينها! 
لمن تلاقين نفسك في المجال إللي تحبينه راح تتتغير كثييييييييييير أشياء للأفضل وعليها لازم تسوين كم شغلة عشان تبقين ماشية في الوجهة السليمة 💕

3- إنشاء المدونة..
حددي المنصة إللي تكتبين فيها مدونتك، أشهر منصتين للتدوين هي Blogger و Wordpress
أنا شخصيًا ما فكرت كثير وقت ما جيت اختار كان قدامي Blogger اللي هو تبع قوقل فعشاني أثق كثير في قوقل ومخرجاتها تحمست وأنشأت مدونتي عليه وكان جدًا سهل وبسيط وكل شي فيها واضح، في المقابل أعرف كثير مدونات يفضلون  Wordpress لكن بما إني ما جربته فما أعرف أوجه الاختلافات كثير 👀 
وممكن تختارين منصة تدوين أقل رسمية مثل التمبلر << زي مدونة خديجة عالتمبلر لكنها جممميلة وأحب تدويناتها مرره! 
وفيه كمان مدونات معتمدين على التدوين في الانستقرام <<  زي الفاشن بلوقر شهد، والفاشن بلوقر مرمر الكويتية أبدعوا في مجالهم.. ولو إني كنت تمامًا ضد فكرة إن وحدة تسمي نفسها بلوقر وهي ما عندها بلوق رسمي.. لكن اكتشفت بعدين إن الموضوع أكبر وأوسع من موقع نصور ونكتب فيه، وعلى قولة القايل -كل واحد ينام عالجنب اللي يريحه- العبرة بتوصيل الفكرة بغض النظر عن الكيفية 😋💕

طيب..
4- عشان تنشئين مدونتك لازم تختارين اسم..
الاسم هو المرحلة الأهم لأنه هو اللي بيكون البراند حقتك، هو اللي بتنعرفين من خلاله.
لازم يكون الاسم يوحي بالمواضيع اللي بتكتبين عنها، سواء فضلتي يكون باسمك الصريح أو باسم مستعار.. مثلًا:
إذا مدونتك عن الأدب، الكتب، روايات، خواطر >> قلم روان / صحيفتي / خواطر بطة هههههه 
إذا مدونتك عن الأعمال اليدوية / خياطة / إعادة تدوير >> معمل روان / صوف أحمر / من صنع يدي

أسماء تبعدين عنها:
- الاسماء الطويلة .. (رحلة مغامرات روان - ما يجول في خاطري - هي حياة قصيرة ولكن ... فهمتوا قصدي؟ 
اسم مدونتك لازم يكون قصير جدًا ومختصر وهالشيء بيفيدك حتى لمن تختارين عنوان لرابط المدونة.. يكون أسهل بالكتابة والحفظ 👍
- الأسماء اللي مرتبطة بفترة معينة.. ماما روان << البيبي اللي كنت أكتب عن أماكن شراء مستلزماته وعن أسااليب تعاملي معاه كبر بعد سنوات واختلفت المواضيع إللي أكتب عنها، صارت هو يهتم بنفسه طيب اسم مدونتي "ماما"؟ ههههه حسافة صح! 
مذكرات مبتعثة << طيب انتهت فترة الابتعاث ورجعتي بلدك وما صار فيه شيء يحمس تكتبينه لمتابعينك.. خلاص توقفين تدوين والا كيف؟ أصلا طالما تغير عليك اللقب ماراح تكون الناس مهتمة زي أول بقراءة تدويناتك
- الأسماء المكررة.. حاولي ما تقتبسين اسم أو براند لمدونتك.. روان لوي فيتون!! 😅😅 قورجستانا ههههه
- ممكن يكون عندك اسم مستعار، مثلًا أنا أيام المراهقة كنت أسمي نفسي دبورة وبككككلل المواقع اسمي dabboora
لكن مو معقول أجي أحط اسم مستعار لمدونتي "رونه" / "نونو" / "راري"!!
مرره مو بروفشنال أبدًا 😅

بالنسبة لي.. للأسف ما أعطيت موضوع اختيار الاسم الوقت الكافي، فريحت راسي وخليته Rawan's Blog أو مدونة روان.. 
كان بإمكاني لو فكرت شويا أختار اسم عام شويا ومرتبط فيني بدال مدونة روان << خصوصًا إني لمن أبحث عن الاسم يطلع لي كثيررررررررررر مدونات اسمهم روان! بس عاد خلاص تأخر الوقت 😬 
يعني وقتها أنا ما كنت صراحة أعرف في إيش بتتخصص مواضيعي فكنت مخليتها عن اسلوب حياتي عشان كذا كنت أبغا اسم عام.. لكن لو رجع الوقت كان ممكن أسميها امممم Absolutely Rawan \  او ممكن اسمي السابق dabboora أو سواليف روان .. او أي اسم ممكن يوصل شعور الللي مطيحة الميانة معاكم ههههههه 😝


5- مظهر مدونتك..
ما بأتفلسف عليكم كثير هنا، إذا انتي مصممة وعندك حس فني وابداعي خيييييرر ووبركة، سوي لوقو يناسب مدونتك واسمك واختاري الألوان اللي تشوفيها مناسبة وتعبر عنك.. ولا تضيقين صدرك من البداية إذا حسيتي إن المدونة شكلها مااش.. ترا أغلب المدونات مرت بمراااحل من التحسينات، لازم تشتغلين بشكل مستمر على مدونتك إلييين توصل للشكل اللي تحسينه الأقرب لك 💛


أول ما فتحت مدونتي كانت بهالشكل تقريبًا لشهووور


بعدين سويت تغييرات بسيطة في الألوان والخطوط، بس حسّنت كثير من مظهر المدونة العام


اختياري للوقو كان من ورا فكرة إني أكتب في مدونتي كلام من القلب للقلب، سواليف حقيقة بشفافية، مرره كان عاجبني اللوقو والكونسبت حقه لكن المشكلة العظيييمة إنه اللوقو عبارة عن صورة مزروفة من قوقل 😤 مررره كان خطأ جسيم أتمنى ماحد فيكم يرتكبه! 🙈
فعشان كذا في أحدى التطويرات قررت إني أصمم وأرسم اللوقو بنفسي وأختار الألوان اللي تناسبني عشان يكون براند خاص فيني 😎💖


طيب لو انتي مو عارفة كيف تصممين وما عندك أفكار، في البداية تلاقين كثيييييييرر قوالب جاهزة مجانية تقدرين تثبتينها على مدونتك سواء بلوقر والا ووردبريس، اكتبي في قوقل Free Blog Template
وططبي واختاري 😍😍
وبعد فترة من التدوين وإذا شفتي إن التدوين صار أمر جدي تمامًا، تقدرين وقتها تشترين قالب بالمواصفات اللي تبغينه << طبعًـا بيكون فيه كثيير خصائص أفضل وأجمل من المجاني بدون مقارنة!
وممكن كمان تشترين دوماين خاص بمدونتك.. يعني مثلُا بدال ما يكون عنوان مدونتك
www.SuperRawan.blogspot.com
يصير www.SuperRawan.com
وسعر الدوماين الخاص في Bloger بــ 12$ في السنة إذا ما خاب ضني! يعني مرررره رخييص!!
طبعًا هالكلام ينطبق حتى على الـ Wordpress أكيد... بس ما عندي معلومات كفاية عن الطريقة أو الأسعار << ياليت مدونات ووردبريس يشاركوني بتجاربهم في الكومنتس .. أكون جدًا ممتنة 🙏💜



6- محتوى مدونتك..
ميزة المدونة إنها شي مرررره خاص فيك ولك الحرية التااامة في التصرف فيها، يعني ترا مافيه أبجديات ولازم تسوين كذا ولا تسوين كذا.. لكن إذا إنتي تبغين مشروع المدونة يكبر ويصير لك قراء ومتابعين بشكل دائم؛ خليك في مجال واحد وأبدعي فيه.. لو انتي تحبين الفاشن كثير وتتطلعين على الموضة والأسواق أول بأول وقعدتي تكتبين عن الفاشن بشكل خاص، بعد مدة من التدوين راح تكون مدونتك مرجع لكثير ناس في هالمجال، يصير ممكن أي وحدة تبغا تسافر شوبينق وتبغا تعرف إيش التريند مثلًا تصير على طول تدخل مدونتك تلاقيها فيها أخبار وسواليف عن الفاشن وتغطيات لأسابيع الموضة وعروض الأزياء.. ممكن بعد فترة مدونتك تلفت إنتباه أصحاب العلامات التجارية في هالمجال ويتعاملون مع مدونتك لتسويق منتجاتهم .. صح؟ ممكن! 🎊

لو انتي فنانة بالطبخ! وتحبين تبتكرين أكلات، تستمتعين وانتي تخبصين في المقادير ويجيك إطراء كثير على أكلاتك، وخصصتي مدونتك للأكل تحطين فيها وصفات لأكلات شهيرة، أكلات من المطبخ التايلندي/الفرنسي/ الايطالي، تنزلين مواضيع عن أساسيات الطبخ، وأهم الأدوات اللي تشتريها العروسة لمطبخها، تكتبين عن مثلُأ كذا طريقة لعجينة الفطاير، أو مثلًا كذا طريقة لصنع الباشميل! 👀 << هه قاعدة أعطيكم أفكار هههههه 😂
لو انتي خصصتي نفسك في هذا المجال مثلًا، بيصير لك متابعين في فئة عمرية معينة، بيصير أي وحدة عندها شح أفكار إيش ممكن تطبخ اليوم غداء ممكن تدخل مدونتك وتلاقي أفكار بالمقادير المتوفرة عندها! ممكن لو انتي توسعتي وصرتي تنزلين مثلًا طبخات ممكن الصغار يسوونها، أو أكلات تنفع اللي يسوون حمية.. بتتوسع دائرة متابعينك وقرائك.. 😋👍
ممكن شركات الأغذية يرعون تدوينتك، وممكن يطلبونك تسوقين لأحد منتجاتهم باستخدامك لها وهنا يكون عندك دخل من ورا شيء ممتع وجميل بالنسبة لك!.. ممكن؟ ليش لا! 💖

لو انتي فنانة، رسّامة.. لك سنين وانتي تمارسين هالموهبة! ترسمين بالألوان المائية، الزيتية، الآكريليك، ترسمين بتابليت رقمي، أو ترسمين بالفحم أو بالقهوة!.. شاركي قرائك خبراتك في المجال، سوي دورات مجانية على المدونة كيف أختار الألوان المناسبة، كيف أشتري أدوات احترافية بميزانية محدودة، بوست خطوات رسم بورتريه، تغطيه لزيارتك معرض فنون، تغطية لزيارتك متحف في أحد البلدان، ممكن تخصصين صفحة فيها صور لأعمالك مع وصفها وتعرضينها للبيع، صح؟ مرره بتكون شيء بطل! 😭😭

يعني الخيارات والمجالات مالها حد وكلها مفتووووحة قدامك بس انتي انتبهي لها! 💎

العبرة في التدوين إنك تكونين إنتي، ما تقلدين أحد سواء باسمك، بمواضيعك، أو ممكن حتى بالتصوير!
إذا لقيتي في نفسك الاهتمام لشيء معين ومافيه أحد قد كتب عنه لا تقولين مين بيقرا لهالمواضيع....!
 لكل شي له قراءة، له متابعينه، قد يلاقون المعلومات بلغات ثانية وبيفرحون لمن يلاقون أحد عربي يكتب عنها.. زي ما انتي حبيتي هالشيء ترا فييه ملاييين غيرك يشاركونك هالإهتمامات 🌄 وكل ما كتبتي من قلب وبشغف بيظهر هالشي للي يقرؤون تدوينتك ✨

🎶

ختامًا،
هذا مو كل شي عندي بخصوص التدوين، هذا الموضوع راح يكون بااذن الله بداية السلسة 🐣
راح أحكي لكم في المرة القادمة عن طرق تطور من مدونتك وكم شغلة تساعدك على الترويج لها 🐝

ويلااا حبيباتي فوتتكووا بعافية 🍇💛



_____________________________



🎀

     
  •  
  •  
  •  
  •  
  •  



19 comments:

  1. حبيت التدوينة جدًا يا روان ، جدًا مفيدة لأي شخص بيبدأ تدوين
    تسلم أناملك اللي خطت <3

    ReplyDelete
    Replies
    1. شكرًا جزيلًا لك ميمي 💕
      أسعدني تعليقك كثيرًا ✨

      Delete
  2. أنا من المتابعين لتدوينتك من زمان ♡♡♡ ما شاء الله أسلوبك في الكتابه جميل جدا وسلس وطريقة سردك للمعلومات واختيار العبارات تشد القارئ و على فكرة تصويرك جميل جدا ❤

    أتمنى لك المزيد من العطاء والتقدم يارب
    ولا تحرمينا من جديدك 😀🌹

    ReplyDelete
    Replies
    1. للمتابعين القدامى معزة خاصة في قلبي 💗
      تعليقك صنع يومي 💞 شكرًا لك ~

      Delete
  3. اخخخ يا نقطة الاسم ☹️💔💔 اسم مدونتي غير ورابطها غير 😢💔💔

    ReplyDelete
    Replies
    1. اتوقع تقدرين تغيرين اسم الرابط بسهولة.. ويصير أي أحد يدخل رابطك القديم يتحول اوتوماتيك للرابط الجديد 😍😍 هاذي ميزة بلوقر

      Delete
    2. مبروك روان عامك الأول واتمنالك مزيد من التقدم��
      امم انا الصراحة كنت حاطة في بالي اسم معين بس لقيته مأخوذ واضريت اختار من الخيارت الي اعطاني هيا الموقع.. كان فترة خصم وحبيت استغلها قبل ماتخلص����
      مشكلة ووردبريس انهم مايحتاجو بس دومين عشان تسوي مدونة خاصة لا لازم كمان استضافة ممكن تشتريها من موقعهم وممكن تشتريها من مواقع ثانية تربطك على ووردبريس بكل سهوالة وسرعة زي بلوهوست الي انا استخدمه وكثير مدونات يستخدموه����

      Delete
    3. ربي يبارك في حياتك نور وأتمنى لك المثل يا جميلة 😍😍❤️❤️
      بالنسبة للاسم أنا زيك في البداية لمن كان الدوماين .blogspot كانت اسم مدونتي هذا مأخوذ مما اضطرني أسوي حفلة وطلعات ونزلات، لكن لمن قررت أخصص الدوماين الحمدلله لقيت هذا متاح وبسرعه أخذته بدون تفكير مطول 😅

      بالنسبة لاستضافة الوورد بريس جدًا غريبة..يعني ممكن أسوي مدونة مجانية عادية وإذا أبغا دومين خاص اشتري استضافة؟
      وهل إذا اشتريتها تضل محتويات المدونة؟ << أهم شي 😂

      Delete
  4. كل سنة و البلوق بخير ��
    عجبني اسم " خواطر بطة " .. ههههههه يا زينك يا رونتي
    شكلي اذا عملت مدونة بسويها بهذا الاسم
    يحفظك ربي يا احلى بنت بالدنيا ❤️❤️❤️

    ReplyDelete
  5. روااانتي الجميييلة و مدونتك بعد مرررهههه حلوه و الشعار الصراحه بطلل و كييووت شكلة و كلامك مرهه منطقي .. انا مريحه نفسي و مسميه مدونتي رغد مرطان على اسم العائلة و اذا كتبتي اسمي بقوقل ما راح تلقين غيري ههههههه استمري يا جمييلة لا تنقطعييين 3> 3>

    ReplyDelete
    Replies
    1. مدونتك مرره حلوة وأحب كتاباتك وحلووو كمان إنها تكون باسمك بالذات إذا ضمنتي إنه محد كثير زي اسمك << أخاف أكتب مدونة روان الغامدي وتطلع لي البنت اللي مع مريم حسين ههههههههه

      Delete
  6. انا كمان مدونتي بتكمل سنه وما كتبت اول تدوينه للحين تعبت لينما لقيت اسم للمدونه >>>> ياكثر المدونات باسم ايمان ههههه مونتك لطيفه وجميله اتمنى لك التوفيق

    ReplyDelete
    Replies
    1. ربي يسعد روحك الحلوة إيمان 😂 أعرف شعورك مره زين!

      Delete
  7. حبيت نصائحك جداً ربي يعطيك العافية وجداً ياليت لو تنزلي موضوع عن كيف تروجي لمدونتك أو قناتك باليوتيوب , كثير بنات عندهم أفكار بس للأن مو عارفة شلون توصل محتواها للناس فتحسي ما تحققت الفائدة أن الناس تستفيد لأنها ماوصلت لهم أصلاً.

    ReplyDelete
    Replies
    1. شكرا لك.. ابشري باكتب موضوع بهالخصوص إن شاء الله 💟

      Delete
  8. نصائحك حلوة انا مبتدئة بالتدوين ياريت تعطينا نصائح كيف تروجيلمدونتك

    ReplyDelete
    Replies
    1. مرحبا،
      أنزلها في حساباتي للسوشال ميديا + تليغرام نافذة المدونات

      Delete
  9. طرحك وأسلوبك جميل ماشاء الله
    واضح حبك للعطاء ربي يبارك فيك
    بالصدفة لقيت مدونتك في قوقل وما اجملها من صدفة
    دمت بود

    ReplyDelete
    Replies
    1. شكرًا لك وعلى تعليقك اللطيف إللي رجعني لهالتدوينة 💓
      سعيدة بوجودك هنا أيضًا 🌸

      Delete

Top