رحلتي إلى هوليوود ✈ (2) : Madame Tussauds Hollywood

Wednesday, January 11, 2017


ااااالسلام عليكم والرحمة 😍💞

قبل اسبوعين تقريبًا نزلت تقرير رحلة هوليوود وتحديدًا (اليونيفيرسال ستوديوز)
مرررره كنت طاايرة من الفرح على تفاعلكم 💛💛💛
وجاني كم سؤال على دايركت الإنستقرام وراح أجاوبه بآخر هالبوست 🙌

زي ما ذكرت لكم سابقًا إن رحلتي كانت مدتها ثلاثة أيام فقط! وكانت مخصوص عشان أزور اليونيفيرسال ستوديوز وألعب ألعب ألعب ألعب ألعب وأطلع اللي في راسي عشان كذا اخذنا تذكرة لمدة يومين،
يعني يوم السفر، ويوم للعب في اليونيفيرسال، ويوم للتمشي فيه والتصوير، ويوم الرجوع لسياتل..
حلو؟


سكنّا في هوليوود بوليفارد، هو شارع يعتبر صغير لكن شهرته الكبيرة جت من Walk of fame 
*اللي هي هاذي النجوم اللي في الأرض ومكتوب في كل نجمة اسم فنان \ مخرج \ مغني \ ممثل \ مذيع ..إلخ*


الشارع كمان فيه محلات تذكارات ومطاعم وكافيهات ومتاحف ومسارح وأشياء كثيرة بالإضافة للشخصيات الكرتونية والموكرتونية وفيه عروض استعراضية وأشياء كثير تعطي حياة وبهجة للمكان🎭
أمّا بالنسبة للنجوم اللطيفة إللي عالأرض.. 😂
طبعًا هي على امتداد الشارع كوووووله! مو بس كذا! كمان على رصيف الجهتين.. يعني شايفين هالرصّة إللي بالصورة فوق؟
فيه زيها في الجهة المقابلة من الشارع، فأنصح إللي رايحين يبحثون عن نجوم معينة يصورونها إنهم يروحون بالصباااح مرره يكون المكان شبه فاضي ورايق ويقدر الواحد يمشي ويقرا ويوقف بوسط المكان على راحته 😪

بالنسبة لنا، بعد ما رجعنا من اليونيفيرسال ستوديوز أخذنا فرّة بالمكان نستكشف وزي كذا 😍
ونقرا الأسماء اللي نعرفها على النجوم،، 
لكن الصدق أكثر أسماء كانت تستحق الوقوف لها للتصوير هي هاذي 😎





😍👏👏👏👏👏👏👏
بعد هالفرارة كان قريب مننا مول <<حسب قوقل ماب كان اسمه Parking Hollywood والله أعلم 👀
المهم المول مررره حلووو صدق ويفتح النفس للتسوق، حتى لقيت فيه فرع KIKO ميلانو 😮 وأنا إللي كنت أحسبه بس في أوربا!
عاد وقتها ما عندي نية تسوق قعدت أدور مطعم نبغاا ناااككل يا نااس! 🍴
ولقينا في الدور الثاني من السوق Johnny Rockets << أذكر أول ما فتح بجدة كنت متحمسة له بس ما كان الفرع يشجع على الجلسة 😢 
فروعهم في أمريكا أقل من السعودية شكلًا لأنها تعتبر diner أكثر من إنها مطعم!
بس أكلهم.. لذذذذييييذ 😋

تعرفون لمن تكونون جوعانييين وتطلبون أكل كثييرر تحسبون إنكم بتخلصون أبو جده في دقيقة، ولمن تمر 10 دقايق من تقديم الطلب تستوعبون وش انتم مسويين! ههههههه طبعًا أخذنا الباقي تيك آوااي ندري إن باقي يجي وقت ونتشهووى هالأكل
<< زيي الأحين وأنا أكتب التقرير 💔😦
🎶

اليوم التالي هو يوم السفر، صحينا وتقهوينا ورتبنا أشياءنا وطلعنا من الشقة الساعة 11 ورحنا المكتب وسلمنا المفاتيح وتركنا شنطنا بالمكتب لأنه رحلتنا مسائية وعندنا متسع من الوقت نقضيه هنا قبل ما نروح المطر البعيد جدًا جدًا جدًا 🐌

وبدون تخطيط مسبق قرر الهزبند إننا نروح متحف الشمع (مدام توسو) عشان أشطب أحد أمنياتي إللي في البكت لست  😭💜💜
كان المتحف مرره قريب على هوليوود بوليفارد وكان ظهر والمكان راايق كأنه صباح! 
ورحناا متحف المداام توسوووووووووووو


<< وهاذي هي المدام توسو إن كانكم ما تعرفونها 😏
اسمها ماري توسو، كانت تحب تشكيل الشمع واحترفت فيه وفتحت متحفها الأول في لندن، والحين فروعها منتشرة بكل مكان حتى الصين لحالها فيها 5 فروع 👲 وهالسنه بيفتح في نيو دلهي، وفيه باليابان وسنغافورة وتايلند وألمانيا واستراليا وحتى اسطنبول، تركيا <<توني أدري الصدق خخخخخ 😹
أمريكا فيها 6 فروع: هوليوود 😎، نيويورك، أورلاندو، سان فرانسيسكو، لاس فيغاس، وواشنطن دي سي
والفرع السابع بيفتح هالسنة في ناشفيل، ولاية التنيسي..
<< وعقبال ما أشوف له فرع بالسعودية أو متحف أحسن منه 😇
وأتوقع كل فرع أو كل منطقة جغرافية تختلف فيها الشخصيات، زي مثلًا فرع لندن قد شفت فيه تمثال شمعي للملكة إليزابيث.. 
<< تحمست أشوف فرع اسطنبول 😍 أتصور إن الشخصيات إللي فيه من الحضارة العثمانية! 💕

عاد بما إننا في هوليوود، فمن المؤكد إن التماثيل الشمعية لشخصيات كانت لها بصمة في تاريخ السينما الهوليوودية..
إللي يحمس فيها إن التماثيل نفس الواقع من ناحية طول صاحب التمثال ولون البشرة واللبس وكلللل التفاصيل الدقيقة.
كنت مبهورة فعلًا كيف دقة التشكيل والنحت حتى للتفاصيل الدقيقة زي الأظافر! 😲
وهناك لك الصلاحية بلمس التماثيل وتصويرها طبعًا والتصوير معاها حتى! مهيئين المكان لدرجة حتى الإكسسوارات إللي لابسينها بعض الشخصيات جايبين زيها عشان إذا أحد حاب يلبسها ويتصوور معاها بنفس الثيم 😍😍
*أترككم مع بعض الصور، والباقي كانت شخصية مالي خلق أغطي فيها 😓*


*ونفطر مع أودري إللي ذاابحتكم صورها* 😤

* صورة لطيفة للهزبند لمن كان كاوبوي* 😍







*تخيلوني جنبها وأنا رافعة ثلاثة أصابع وأودعكم وكذا*




*صورة لطيفة ثانية للهزبند أثناء آداء الواجب 💑*




المتحف كبيييرر دورين، خذوا وقتكم كللله في التفحص والتمحص فيه وطلعوا مواهبكم التمثيلية في التصوير مع التماثيل بطرق عفوية 😂 تراا متعععة! عشان كذا نصييححححة لا تسوون فيها برستيج وانتم تتصورون عشان الناس إللي حولكم ترا ماحد درى عنكم 🙌 عيشوا اللحظة  بكل تفاصيلها!

وعلى طاري عيشوا اللحظة، 
في رحلتي هاذي حاولت أستمتع فيها بكللللل جوارحي وحواسّي بعيد عن التصوير سواء بالكاميرا أو السناب أو غيره من أنواع التوثيق إللي تسرق مننا جمال اللحظة الحقيقي 💎
عشان كذا أكثر الصور كانت في اليونيفيرسال ستوديو وفي المتحف بعد ما استغليت المكان زيييين بعديين قعدت أصور 😁

طيب نرجع لمتحف الشمع 🌀
تقريبًا في نهاية الجولة بتلاقون عرض 4D سينيمائي، ااا ناسية إيش كان أتوقع فيه رجال آليين وكذا.. لو معاكم أطفال متأكدة 100% بينبسطون عليه أكثر منكم 😁
وبعدين تروحون لمكان فيه شرح كيف يصنعون هالتماثيل وكيف إنهم يقعدون يثبتون الشعر حبة حبة عشان يبان طبيعي وكيف يسوون المكياج وكل شيء كل شيء! مكان مبهر للي يقدرون الفنون 😎
وبعدين تقدرون تسوون مجسم من الشمع على شكل يدكم، بس ما أعرف التفاصيل cuz I wasn't interested😅
اوووه صح! ترا في المتحف نفسه وانتم تتمشون بتلاقون بوثات تصوير تتصورون هناك ويعطوننكم بار كود تقدرون تطبعونها وتشترونها وانتم طالعين، وتقدرون بكل لطافة تعطون المصور/ة كاميرتكم يصورونكم بالاثنين وتسحبون على صورهم 👍😛
بالأخير، بيطلعكم المتحف على محل يبيع فيه تذكارات ومغناطيسات وتيشيرتات وأشيااء كثيييرر توووننس وأسعارها حلوة!!  😍😍
🎶
بعد مشوار المتحف اللطيف والجميل، جلسنا ندور مطعم قريب عشان بعدها ناخذ شناطنا ونروح المطاار الذي هو بعيد جدًا جدًا جدًا 👏
وقتها صراحة كنت أبغا أغير عن الأكل الأمريكي والبرغر وهالشغلات << وهالشي صعّب علينا مهمة البحث عن المطعم المناسب إللي نتغدا فيه 😔 وقعدنا ندور ندور ندور ورحنا المول وقعدنا ندور ندور ندور، والهزبند يقول هاا جوني روكتس؟ لاااا.. ستاربكس؟ لااا .. طب هالمطعم الصيني؟ لااع 👀 مدري وش كان في بالي.. المهم شوي قفلت الأخلاق ههههههه
المهم طلعنااا امم االدور الثالث من المول، مدري من فين دخلنا ومن فين خرجنا، الزبدة إننا لقينا محل French Crepe
وفجأة قلت خلاص أبغا هنا 😆 << يعني جوعانة وتبغين أكل وتتشرطين وآخرتها كريب! 
وشكل المحل ترا مو مرره ذاك الزود 😸 فتحت المنيو اللي على الطاولات الخارجية وقعدت أتصفح وأنا واقفة شويا لقيت عندهم كرواسون بالتركي (الحبش) وجبنة ومدري وشو << عااد طاااحت سعابيلي لأني من عشاق الكرواسون ومن زمان ما قد أكلت شي زي كذا 😭
طبعًا جلسنا بالجالسات الخارجية وطلبت لي وللهزبند << وهو ما كان راضي على اختيارا البتة خخخخ
وأنا الصدق ما كنت متأكدة كيف بيكون هالكروسون بس الأكيد إني أحبه وباكله 😄
وجا الطلب! 
<< يمه قاعدة أبلع ريقي وأنا أتذكره 😭😭😭😭😭😭💔
طيب بدون وصف، بأوريكم الصورة اللي أخذتها لطلبي بعد ما أكلت نصه.. استعدوا

خلاص ما بأكمل هالبارت 😭
🎶

بعد ما ذا.. رحنا أخذنا شنطنا وطلبنا أوبر وعالمطار البعيد جدًا جدًا جدًا
أول ما ركبنا السيارة تفاجأت منها! 
مو الموديل، ولا النظافة، ولا الريحة، ولا أسلوب الترحيب.. لالالالا

شوفوا وش كان السائق الأمريكي حاط بالسيارة
*كنت مصورة من جوالي ما قدرت ألتقط إلا جزء بسيط جدًا*


شفتوا هالشبك؟ ممتد من مقعد السائق إلين المقعد إللي جنبه!
 حاط فيه سناكات وحلويات، وعلى التكاية بين المقعدين ورا حاط سلة فيها قوارير مويا 😨 عادي عندكم؟!
مرره انبهرت من هالحركات ما شاء الله 😢👍
كان سائق مضياف يلطف الجو ويمرر الوقت بالسواليف مع الهزبند بدون بثارة، ومر الوقت بسررعة ووصلنا المطار بسرعة! 😮
ولمن نزلنا أعطانا هذا الشيء اللطيف!


بطاقة مكتوب عليها إنه شكرًا إنك ركبت معايا وأتمنى لك يوم سعيد! 
وفي الجهة الثانية من البطاقة ملصق علك 😭😭😭
والله حركة بسيطة بس كان لها التأثير السعيد للدرجة إللي أكتب عنها وأوثقها في مدونتي 💜
*هذا هو الإحسااااااااااااان في العمل* << بصوت أحمد الشقيري
🙋
🎶
ووصلنا المطار وركبنا الطيارة وقتها قد غربت الشمس، فكان المنطر من ناافذة الطيارة سااااحححررر ✨
خصوصًا لمن طلعنا فووووق وصرنا نشوف لمبات لوس أنجلس مع البحر والسماء لونها كحلي 😍🌟
كانت الرحلة هاادية ومرريحة وراايقة خصوصًا إن الإضاءة في الطيارة كانت خفيييفة فاسترخخييت 
إلين ما جا وقت السناك اللذيذ 😋
كان عبارة عن شي زي الناتشوز، وديبينق أو تغميس كأنها حمص مفلفه وكرفس وتفاح 🍏


استمتعت بهذيك الرحلة، شويا أتفرج في النجوم، شويا أقرا، شويا أدعي، شويا أبلع بهدوووء بدون صوت بكاء ولا شيء 😁
الله يكثر الرحلات إللي زي كذا 💞
لمن قربنا من سياتل، كان المنظر من الطيارة عبارة عن نجوم قدامك وتحتك غيوووم منورة بنور المدينة إللي تحتها 😭 المنظر يصيح من جممااله سبحاان الله! شويا دخلنا جوا الغيوم ☁️ شويا أركّز 👀 إلا واحنا جوا غيمة ممطرة 😭 يممه تمنيت أشوف هالمنطر بالصباح! وثقته بصورة من الجوال كانت بأفضل جودة ممكن لأن المكان مظلم


مو مبين؟ طب شوفوا هالصورة الحين 👇


أضواء سياتل مع المطر 😭
لالالالا بالواقع كان جمممييللل لمن تتأملون سبحان الله!!

ولمن قربت الطيارة من الهبوط استوعبت إن الأرض كانت مغطاااه بالثلج! 
<< أنا قد قلت لكم إن سياتل ما يجيها ثلج إلا نقط خفيفة وما تقعد عالارض بسرعة تذوب؟
جتني صدمة من المنظر 😮❄️
قمت أشك ياربي هل اللي شفته هذاك جوا الغيمة كان مطر والا ثلج! 👀

طبعًا مع هطول الثلوج هاذي تعطلت الرحلات وتأخرت، وقعدنا مدة بالمدرج ننتظر طيارة تطير وتفضى بوابتها 


والحمدلله ما طولنا كثير، ونزلنا المطار وأخذنا اوبر ورحنا البيت وإحنا مبسوطين على الرحلة إللي بدأت بثلج وانتهت بثلج 😍
ووصلنا البيت ونطل من الشباك..
سبحاان الله كيف الثلج ولون السماء منوور المكااان!! 
وإلا جهة الباركنق مرره مظلمة 




والحمدلله رب العالمين، كانت رحلة ممتعة فيها طلوع ونزول لكن نشكر ربي دائمًا إنه سخر لنا كل شيء فيها حتى نستمتع فيها بهالشكل 🔮
 ولازم تعرفون إن أساس أي رحلة ممتعة هو التخطيييط المبكر للرحلة كاملة والتخطيط المالي وتخصيص ميزانية محددة بالذات إذا كنتم طلّاب مبتعثين مره مهم هالشيء 💜

وأخيرًا بأجاوب على كم سؤال..



وفوتتككووو بعاافية -مقدمًا- 👶🎋


_______________________________



🎀

     
  •  
  •  
  •  
  •  
  •  




🎊


- روان هل أعجبتك لوس أنجلس؟ وهل ممكن تزورينها قريب؟
- بشكل عام ما شفت فيها شي مبهررررر لكن الأكيد ممكن ممكن ممكن أزورها في حالة كان معانا سيارة ونعرف أحد في لوس أنجلس يدلنا على أفضل أماكن يروحون لها السكان المحليين. 💁

- هل اليونيفيرسال ستوديوز مناسبة للحامل أو إللي معاها أطفال صغار؟
- ايواا المكان فيه ألعاب مناسبة للجميع، بالنسبة للألعاب الخطيرة مكتوب عليها تحذيرات وما بيسمحون بدخول أي أحد ممكن تشكل عليه اللعبة أي خطر.
وبشكل عام حتى لو انتم مو حقوون لعب؛ برضو راح تكون اليونيفيرسال ستوديوز والسسيتي والك ممتعة للتمشية والتسوق وكل شيء وتناسب كل الأعمار حرفيًا! 😍

-هل تعتبر لوس أنجلس غالية؟
- من تجربتي إللي طرحتها لكم، ما أشوف إنها غالية لو بأقارنها بولايتي الحالية، لكن أكيد نمط سفريتكم وموعد التخطيط للرحلة واستخدامكم للسيارة من عدمه كلها عوامل تأثر على تكاليف الرحلة. 💸💸💸

- ليه ما رحتي ديزني لاند؟
- اممم ديزني لاند إللي في لوس آنجلس ماقد كانت هدفي، إللي صدق ودي أزورها هي ديزني ورلد إللي في أولاندو هي إللي أشوفها صدق تستحق الزيارة 😍

0 comments:

Post a Comment

Top