رياضة الحديد (التوقعات vs الواقع) | برضو سواليف 🏋‍♀

Friday, March 22, 2019


يا هلا يا هلا، سولفت المره اللي فاتت عن قصة حياتي مع الرياضة والأكل الصحي كيف بديت وكيف صرت والطلوع والنزول اللي مريت فيه، وكيف إني لمن مسكت خط وطولت على نفس التمارين طفشت منها .. (عاد إذا ما قريتي السالفة الأولى اضغطي هــنــا لأنه هذا الموضوع مرتبط بذاك 

لمن جاني شعور االطفش من التمارين كنت وقتها جربت الايروبكس وجربت الزومبا وجربت الهيت كارديو فما كان قدامي خيار إلّا إني أبدأ في تمارين الحديد خصوصًا إني كنت مررره معجبة في جوه وجو تمارينه وكل تفاصيله فحسيت إنه هذا الوقت المناسب إللي خلاص لازم أشبك خط معاها ..

وفعلًا زوجي حمسني وعمل لي جدول تمارين -بما إنه بهالمجال صار له أكثر من عقد- وطلعت الدمبلز والأوزان حقته من المخزن واستانست على تمارين الحديد أكثر شيء لأنه مافيه تنطيط وتعب صراحة  يعتمد على قوتك العضلية من الآخر! 
وبالحديد لاززم تغذيه صححححح وكمية بروتين عالية وتكون سعراتك مناسبة لاحتياجك مو أقل! لأن بعد كل تمرين العضلة تصير فيها تمزقات داخلية وتحتاج بروتين كثيير عشان تبني وتقعد تشتغل مدة طويلة بعد التمرين تستهلك طاقة وسعرات في عملية البناء  وهاذي العملية كلها اسمها (استشفاء) << هذا فيما يخص التغذية في هالمرحلة

أول أسبوع لي كان ثقيل شوي على نفسي إلين قدرت أدخل في الجو وأستشعر بقوة التمريين وأتعرق وأنا أأديه وأتعب بعد كل جولة بديت أحس إنه اووكي الوضع جد ما يمزح 
جدولي كان (الأحد: صدر / الإثنين: أكتاف / الثلاثاء: سواعد / الأربعاء: ظهر وخصر / الخميس: بطن وسفلي) بحيث إنه الويك إند اخذه استراحة أعطي عضلاتي فرصة إنها ترتاح وتنمو بالقدر اللي تتحمل فيه الوزن اللي كنت أتمرن فيه 
الحلو بتمارين الحديد إني كنت كل كم أسبوع ألاحظ إنه عضلاتي أخذت على الوزن اللي كنت أشوفه صعب وثقيل قبل فترة وأصير أزيد العدات أو أزيد أوزان الحديد وهالطريقة كانت تساعدني أحس بالتقدم اللي أأديه تمام 
طبعًا -في نوفمبر- صورت نفسي قبل ما أبدأ وأخذت قياسات جسمي كلها وكمان قست وزني وكل شيء عشان يصير عندي مقياس أشوف التغييرات عليه لا أكثر..
طبعًا قبل ما أبدأ ما كان عندي هدف شكلي واضح لكيف أبغا أصير بعد ما أبدأ حديد، كان تركيزي إنه أبغا أبني عضل ويصير جسمي أكثر قوة وتحمل وأكيد أبغا أشوف عضلات بارزة  وكنت أثناء رحلتي أتفرج صور كثير قبل وبعد وأتابع مدربات وبنات مهتمات بالرياضة والحديد يعني جوي صار كذا مرره إلين استوعببببت إنه حتى الصور اللي آخذها بالسناب صور الدمبلز والبروتين  << آسفة ما بعيدها وعد 

المهم، مرت الأسابيع وصرت أشيل أوزان كنت أشوفها خارقة أول ما بديت ومرت الأيام وصرت أشوف البايسيبس واغرمت في منظرها صراحه  
وحقيقي صرت مرره مبسوطة وكنت كل فترة آخذ صورة وانقلها لألبوم بجوالي خاص مجمعة فيه كل الصور من يوم ما بدأت بالحديد، إليييين قبل اسبوعين خلصت تمريني كالعادة وأخذت صورة لنفسي بعدين جا على بالي إني أرتب الصور بالألبوم وأكتب عليها التواريخ، وتحمست لمن شفت الصور قلت خليني أسوي كولاج وأجمعها في صورة وحده عشان أشوف مراحل التغيير وكذا خصوصًا إني من زمااااااان ما أخذت قياساتي أو قست وزني 
وجت لحظة الحقيقة بعد مرور 18 أسبوع = 4 شهور ونص 
جا الوقت اللي أقول فيه واااو كيف كنت كذا يا سبحاان الله 
           
والنتيجة كانت ولا شيء  جسمي في الوضع العادي ما تغير زي ما كنت أتخيل يعني ما تغير مقاسي مثلًا، ما لقيته زي صور بيفور وآفتر اللي كنت أشوفها في الحسابات الرياضية! << وبنفس الوقت ما أنكر إني إذا شديت جسمي تبرز عضلات أكثر ما كنت راح أشوفها في السابق لو عصرت جسمي تعصر  بس لوهلة جتني خيبة أمل قلت يا بنت هي خاربه خاربه ورحت أقيس وزني وتفاجأت برقم ما قد شفته بحياتي .. حسيت فيه شيء غلط قاعد يصير، وعاد ما قصرت حطيت السبب في بطئ الحرق وحطيته في حبوب منع الحمل وشويا قلبت على الكم حبة كربوهيدرات اللي آكلها .. ويعني سويت دراما للكوتش هزبند حقي 

وبعدين لمن هديت وشرح لي الوضع استوعبت أشياء كثيرة كنت غافلة عنها بهذيك اللحظة..
أول شيء: مقاساتي ما تغيرت صحيح بس جسمي انشد كثير عن السابق والعضلات برزت في بعض الأماكن 
ثاني شيء: السيلولايت خف بنسبة كبيييييررررة أقدر أقول إنها شبه اختفت؟ ممكن! 
ثالث شغلة: الوزن اللي صدمني هو وزن عضل صغيييير لو نفس الوزن اللي زدته كان دهون؛ أتوقع ما كنت راح أقدر ألبس ولا حتى بجامتي المهفهفه  فالمفروض ما أنغر برقم الميزان بتاتًا البتة
رابع شيء: أنا اللي قاعدة أسويه هو بناء مشروع طويل المدى، أقرب فترة ممكن أقيم نفسي فيها هي بعد ثمانية شهور أكون كملت سنة! 
خامس حاجه: للي بتسوي الحديد وهدفها الأساسي تخسيس فلازم تعرف إنه 60% من مشروعها لازم يكون دايت! لكن لو هدفك بناء عضل اقرئي عن التغذية وقت التضخيم والتنشيف

سادس فقرة (مره مهمه): انتبهي للوقت اللي تاخذين قياساتك أو صورك فيه، ما يكون بعد وجبه / أو يكون وقت اقتراب الدورة الشهرية أو بعد يوم كنتي ماكله فيه موالح سببت لك احتباس سوائل.. هالأمور كثثير تفرق! وأتوقع لو إني كنت ماخذه قياساتي وصورتي اليوم مثلًا بدال قبل اسبوعين.. كان نظرتي تغيرت << واقع! 
سابع نقطة وآخر شيء: االحمدلله على الصحة والعافية والقوة  
جسمك هو هبة من الله، استثمري وقتك وجهدك وطاقتك فيه.. ابنيه صح وغذيه كويس وعمرك لا تعتمدين على المشي أو الكارديو فقط.. ولا بيجي يوم وبتاخذ الحمل والولادة من صحتك وبتكبرين بالعمر وانتي مريحة جسمك وقت ما بيصير فيه عضلات وأوتار قوية تشيل جسمك.. لو انتي حاطه في بالك إنك بتوصلين للثمانين بصحة وقوة وعافية ونشاط ابدئي اهتمي بجسمك من الآن والا ما بتوصلين الستين إلى وانتي متكسوحة 



هاذي تجربتي من البداية مرورًا بمرحلة الصدمة واستئناف الرحلة وانتهائًا بالتحذير الأخير 
أتمنى تكون تجربتي أعطتك فكرة ما وحركت فيك شيء كويس 
وو بس خلاص مافيه جزء ثالث 


فوتتكوا بعافية 

        
  •        
  •        
  •        
  •        
  •      


4 comments:

  1. تدوينه مفيده ��️‍♀️ مره مره شكرا هلى مجهودك
    أنتي حمستيني للحياه الصحيه واني اوصل في هذا الدرب
    ����

    ReplyDelete
    Replies
    1. ربي يسعدك ويعطيك الصحة والعافية والجسم اللي تتمنينه بعد 🙏🏼💕

      ممتنة لهالتعليق اللطيف 🍃

      Delete
  2. محد تحطم يوم قلتي النتيجة كانت ولا شي 🌚😂😂 عمومًا احس الميزان مو الحكم الحكم الفعلي هو الملابس اللي تصير واسعة فجاءة *شعور يجنن مع اني انقهر على ملابسي 😂😂💔*

    ReplyDelete
    Replies
    1. ههههههههههه الواقع كان ولا شيء مقارنة بالصور اللي كنت اشوفها قبل وبعد.. لكن عضلاتي زادت السيلولايت خف لياقتي صارت أكبر والأهم نفسيتي صرت أقدر أسيطر عليها.. وهاذي أمور كلها ما تنشاف بالميزان ولا بالصور خلال ٤ شهور 😉👏🏼

      إن شاء الله في نوفمبر القادم أقدر أكتب تدوينة تبرد خاطرك 😂💕

      Delete

Top