أسبوع من شهر يوليو | يوميات 👄🗨

Monday, July 29, 2019


اليوم الأحد، 21 يوليو

اليوم يوم هادي ورايق جدًا بالنسبة لي، ولمن أقصد رايق يعني راسي مافيه خربشات وأفكار وتشتت مدري والله ايش السر << أصلا مالي خلق أفكر عن سر هالشعور << يمكن السر انه مالي خلق أفكر 
المهم، لي فترة -يعني حق أبو كم شهر- وأنا أفكر انه خلاص شعري صار بالطول اللي أقدر أشيل منه التدريج اللي سويته في رمضان السنة اللي فاتت.. مدري وش خبط على راسي يومها وأروح صالون مزدحم في رمضان واطلب أخصائية شعر ماقد جربتها بحياتي انها تقص لي مدرج وأوريها صورة للنتيجة اللي أتوقعها << طبعًا ما يحتاج أقول كنت أظن وكنت أظن وخااب ظني لأنه صدق كنت أظن وكنت أظن وخاب ظني  المشكلة انها كانت قاصته مره مره قصير الطول هذاك اللي قبل الكتف الخايس اللي ماهو طويل ولا قصير ااع اضطريت اصبر سنة عشان أقرر اليوم أروح عند زوجي المصون أقول له يقص لي هالمدرج وأرجع روان الحقيقية اللي شعرها ستريت دايمًا  هففف شعور الشعر المقصوص مرره مرييح يحسسك بالإنتعاش ويجدد الروح اسألوني! 

الحين مستكنة بعد ما قصرت أظافري وبردتهم وصار شكلهم حلو وهم قصار 
المضحك في الموضوع اني كملت شهر وأظافري مربعة  طول حياتي وأنا أسويهم شكل لوزي وقبل شهر قررت أغامر وقصيتهم مربعة وكنت مرره مو حابتهم واضطريت أنتظر الين يطولون عشان أغير الشكل، بس المفاجأة اني مع الوقت صرت أحبهم وكل شوي أطالع فيهم واتغزل بيني وبين نفسي حتى وأنا أكتب الحين عالكيبورد  المهم صرت استملحهم!


أدري اليوم ما عندي سالفة تذكر << الحين بيقولون ليتها ما رجعت تدون هههههههههههه 
بس صدق حابة أكتب شيء حلو يحصل لي كل يوم خلال هالاسبوع، عاد اليوم هو يوم استكناني كان لنفسي بحت (يعني مو أكثر من إني قصيت شعري ستريت وقصيت أظافري مربع )، وإن شاء الله يصير فيه أشياء تحمس أكتبها لكم بكرا 


- بي آر بي -


اليوم الإثنين، 22 يوليو

قمت الصباح وأخذت كالعادة كاسة مويا فيها ملعقة خل تفاح عضوي وملعقة عسل. فوائدها ممرره مره جبارة (يعطيك طاقة عالصبح، يرفع المناعة لأنه كل من العسل وخل التفاح مره جبارين في قتل البكتيريا والفطريات اللي تجتاح الجسم يوميًا، يخفف من الكوليسترول، ومره حلو للي يعانون من مشاكل في الهظم أو في المفاصل وفوائد كثييره -تقدرون تبحثون عنها) لكن لكن  لكن!
الأسبوع اللي راح كنت مستمره عليه ولاحظت لخبطة في دورتي الشهرية  وتذكرت إني قد سبق وقرأت معلومة عن تأثير خل التفاح على الدورة الشهرية خصوصًا اللي عندهم تكيس مثلي لكن ما أدري إذا هالتأثير في صالحي أو لا -أبحثوا عن التفاصيل-  لكن من هذا المنبر أعلن إني بأستبدل خل التفاح بالليمون خلال أيام الدورة، وكلها فيها الخير والبركة إن شاء الله 


اليوم نفسيتي مش ولا بد ومزاجي ما يسمح لي أسلك ههههه أبغا أتضارب مع أحد عرفتوا هالمزاج؟، لذلك كانت فكرة حلوة مره إني أطلع في الهواء الطلق أمشي وأغير جو.. بالنسبة لي الشاور والمشي هم أكثر شيئين يغيرون مزااجي من 0 إلى 100 



ااا وبالمرة كمان آخذ كوكيز بما انه بنز كوكيز فتح من قريب في جدة أخيررررًا  
كنت أمووووووت بالكوكيز حقهم زمان لمن كنت بالرياض كنت أروح لفرعهم اللي بصحارى واللي عند مكتبة جرير فرع الحمراء عشان أسهر عليه أيام الدراسة  وصدق كان من أكثر المحلات اللي فقدتها لمن نقلت جدة لدرجة في أول لقاء كان يجمعني بأمي بعد ما تزوجت وصيتها تجيب لي بنز كوكييز وهي يا قلبي من كثر ما كانت بتسعدني جابت لي بوكس كبييييرررررر أكلت منه أكلت أكلت أكلت اليييين طلع من خشمي ههههههههه صدق عاد كوكيزهم لذيذ بس كبييير ودسم فأكثر من حبة أحسه يغث 



وبهاذي المناسبة حابة أقول لكم لا تسألوني عن وزني إلا بعد ما تبدا الدراسة  وقتها نقدر نتفاهم.


- بي آر بي -



اليوم الثلاثاء، 23 يوليو

أمس كان يوم صعب على نفسيتي، كان فيه شيء كذا مو مضبوط خلاني أجلس جلسة مصارحة واكتشفت من خلالها إنه الأيام اللي راحت كنت أحس بعدم التوازن من جميع النواحي، إحدى النواحي كانت إني انصبيت في الشغل للدرجة اللي خلتني أقصر على جوانب أخرى في المقابل. لذلك الحمدلله قمت اليوم من النوم وأنا رايقة وعلى قولة القايل (من زان نومه زان يومه) أحاول أتدارك اللي أتداركه وبالأخير "لا يكلف الله نفسًا إلا وسعها" 


اليوم العصر نزلت صورة عالإنستقرام لمبنى لفت نظري في منطقة البلد (جدة التاريخية) كانوا مسوين فيه زينة لطيفة ظريفة ضمن فعاليات موسم جدة وكانت الزينة مرره شكلها رهيب من كثر ماهو غريب .. لحظة أحط الصورة عشان تفهمون السالفة 


مره كنت ميتة على الحركة، كيف حولوا هذا الكائن اللي تشتهر فيه منطقتنا (أو جدراننا) إلى رمز أو زينة بشكل ظريف يزين المساحات الفارغة في هذا البيت القديم  بس مو هنا السالفة! 
عدد التعليقات إللي أبدوا قرفهم وقشعريرتهم من المنظر كان مو طبيعي صراحة  استوعبت إنه الوضع هو فوبيا ماهو مجرد قرف وياااي وكذا والا بنظري فيه فرق شاسع بين إنهم يحطون جدار فيه وزغ عن جدار عليه رسومات سوداء بدون معالم لوزغ!

عاد صدق صدق حد من اللي قاعد يقرا كلامي الحين يشوفها حركة ظريفة زيي والا أحطكم بعد مع جماعة الفوبيا؟ 


- بي آر بي- 


اليوم الأربعاء، 24 يوليو

اليوم يعتبر يوم روتيني من ناحية الشغل، قاعدة أحسب متى آخذ بريك وأسافر بلجرشي أقضي عيد الأضحى هناك مع أهلي وأجدادي وخواتي << فجأة تذكرت إني ما شريت هدايا العيييييد!  لحظة أكتب في البلانر عشان ما أنسى!

المهم اليوم شفت الفيديو اللي نزلته غادة صاحبة قناة Ghada's Life كان عن ترتيب الدولاب وتذكرت إنه فقرة ترتيب الدولاب هاذي فقرة مؤجلة صار لها فترة مو قصيرة  الرفوف اللي في دولابي هي أكثر شيء ينعفس لذلك مستقبلًا إن شاء الله راح يكون دولابي كله كله كله تعليق << ذكروني بس 
فتحمست من بعد الفيديو وأخذت لابتوبي معايا فتحت اليوتيوب عشان يونسني وأنا أشتغل وبديت أفرغ الدولاب من كل شيء 


طبعًا استوعبت إنه عندي مساحة مرره أحتاجها بس كنت حاطة فيها كراتين تخزين اللي كان ممكن ألاقي لها أي مكان ثاني غير الدولاب  فأقدر أقول إني سويت إعادة ترتيب لمكان الرفوف وفي بالي بعد ما أكتب هالتدوينة إني أشوف موقع آيكيا وأشوف المنظمات إذا عليها تخفيضات تحمس تناسب المساحات اللي عندي  أو أكبح جماحي يمكن وأنتظر الدولاب المستقبلي اللي بيكون كله تعليق؟  خلاص ولا شيء .. انتا مو انتا، وانت جوعان مدري جيعان مدري ايش يقولونها! باي


هاا أحسن؟ 
ايواا الحمدلله أكلت وأنا أتفرج يوتيوب لفيديوات أفكار لهيلثي بريكفاست << ظمير ميت -مؤقتًا- 
الحمدلله قسمت البلايز ما بين: 1- الأكمام وحقت المناسبات: علقتها، 2- البوديات والتانك توبز (بما اني ألبسها كثير بالبيت): سفطتها فوق بعض لحال / 3- التيشيرتات: برضو سفطتها وخليتها لحالها بالرفوف 


 أما البناطيل عندي قسمتها برضو ثلاث أقسام: 1- البناطيل السوداء والرسمية: هاذي طبقتها فوق بعض وخليتهم مع بعض
2- الترينقات واللقينقات وحقت الرياضة: خليتهم برضو لحالها مطبقة فوق بعض
3- الجينزات والجقنزات: ذي لوحدها كمان

محتارة بالبجايم، مدري وش أسوي فيها كل وحدة شكل شيء وقماش غير وحجم مختلف ما قدرت أرتبهم سوا  هاا أرجع أفتح موقع آيكيا؟ 



- بي آر بي- 




اليوم الجمعة، 26 يوليو


مدري إذا لاحظتم أو ما لاحظتم إني ما كتبت أمس شيء!  الصدق إني كنت مرره ناسية وتذكرت قبل النوم << وأنا بالعادة قبل النوم بفترة أحاول أعتزل كل الأجهزة عشان كذا ما كان عندي نية إني أقوم أكتب شيء .. لكن!
بأعطيكم هايلايتس لأهم الأحداث أمس: صحيت الظهر  << كنت اليوم اللي قبله ماخذة بنادول نايت ونمت على الساعة 2 بدال 6 و 7 الصبح  أمانة مو إنجاز؟
عاد مع مشروع تعديل النوم عندي أمل لسى إنه حتى نظام أكلي يتعدل صايرة أبدًا ما أجوع ويادوب وجبة وحدة آكلها وعادي معدتي تقعد تهظم فيها 3738974378 ساعة! وأبقا شبعانة لليوم الثاني ااخخ ادري مره مره مره خطأ وبينعدم الحرق عندي كذا << ماهو ناقص 
فلمن طقني الجوع أمس بعد المغرب رحنا مطعم البرغر المفضل حاليًا عندي وهو I'm hungry الحين أقول لكم ليه أحبه 


أحبه لأنه قريب مني خخخ لا أمزح أتوقع حتى لو هو آخر ملكوت رب العالمين يسوى أتعنى له، البرغر حقه ااخخ لذيييذ ولحمته مرره طازجة وترفة وجوسي رغم انها مو كبيرة مره << بنات صدق اللي تتذوق في اللحم وتتعود عالفريش يصير صعب ترجع تستلذ ببرقر الفاست فود العادي  سووو اللحم حقهم شيء، والبَن (خبز البرقر) اللي يستخدمونه هو خبز البطاطس وهذا على ضمانتي لو ودكم تسوون برقر بالبيت وتبغونه يطلع شيء خرافي خذوا له خبز البطاطس لذييييذ طعمه وطررري وما يكعم 
وبطاطسهم يعتبر عادي مافيه شيء مميز، والمشروبات عندهم ريفل كلها حتى إذا طلبتم قهوة بالصبح تقدرون تعبونها مليون مره ب6 ريال بس  << ألوووو ايم هانقري ارعوا لي هالبوست لو سمحتم! 

وبعد ما قرت نفسي وأكلت رحنا لكورنيش الحمراء .. عاد الصدق الصدق لمن شفت وضع الكرنيش جتني التكة  تعرفون لمن يكونون أقاربكم نايمين عندكم كم يوم ومرره تكونون مبسوطين بعدين فجأة يسافرون ويصير البيت هدوء وتقعدون تشيلون الطراريح وترجعون كل شيء مكانه كذا وتحسون بفراغ عاطفي؟؟ كذا شعوري لمن رحت الكورنيش بعد موسم جدة  عشان كذا ما طولنا يدوب نزلنا ورجعنا السيارة 

هاذي أهم الأحداث اللي صارت أمس.. 

اليوم صحيت الساعة 11  ورتبت الغرفة وولعت بخور وأحس إني ولأول مرة من زماان ما حسيت بأجواء يوم الجمعة! 
الحين الساعة 3 قبل العصر، وفتحت لابتوبي على أساس عندي شغل طووييل أبغا أخلصه، وفجأة تذكرت المدونة وقمت أكتبها وسحبت عالشغل  خطأ خطأ روان .. عاد لو صار معايا شيء يحمس اليوم بأرجع باللي أكتب، ولو ما صار شيء بأكتب بي آر بي 
............

أبشركمممممممم


ما صار شيء يحمس صراحة  كان شغل واجتماع عصف ذهني ويوم عملي بالطراز الأول .. الحين أقدر أقول:




- بي آر بي -



اليوم السبت، 27 يوليو،

اليوم أقدر أقول لكم إني مبسوطة من نفسي لعدة أسباب، السبب الأول إني صحيت بدرررررررررري 
صحيح إني صحيت من حلم الساعة 9 بس حسيت انه خلاص جسمي أخذ كفايته من النوم الحمدلله 
قمت وتقهويت وبعدين حملة ترتتيييب عنيفة جدًا جدًا جدًا إليين الظهر أدت إلى اننا نقرر نروح ايكيا واستعرنا سيارة كبيرة عشان تشيل الأشياء وهوووب على أقرب فرع 


بعد ما وصلنا واستعان زوجي بمساعدين قدعان طلعوا الأشياء وبدأنا نلعب ليقو حق الكبار (بين قوسين: نركب أثاث آيكيا)  
هالمرة أنا كان عليا التوجيه والإرشاد وقليلًا من المساعدة والترتيب.. والباقي كان عالهزبند  << والدليل إني قاعدة أصور في عز المعمعة 


من الأشياء اللي كانت باااطة كبدي سابقًا هي مساحة تخزين عندي فوق دولاب الملابس، كان فيه بوكس مشجر وبوكس أسود وكيس أحمر وكرتون فيه البزنس كارد وكل واحد حجم وشكل وتشوه بصري من الآخر.. فقررنا بالأخير نشتري بوكسات بيضاء نرتب فيها الاشياء وبالمرة نصفي اللي ماله داعي.. وما يحتاج أقول إني لقيت الكثير من الخرابيط وفواتير وضمانات وأوراق قديمة ووأكثر من الذكريات اللي تستحق الاحتفاظ 



<< ذكروني بعدين أحكي لكم لأي درجة أححب رسومات الأطفال!! 

المهم شغل التركيب والترتيب والجولة الثانية من التنظيف (ما بعد الحوسة)  وبعد تغيير الشراشف وغشاء اللحاف وكل شيء كان الوقت قبل المغرب خلاص، جلست آخذ نفس وجا ببالي أكتب هنا بالمدونة.. الا وتذكرت كم مهمة أحتاج أخلصها حق الشغل وأخذني الوقت الين بعد المغرب يوم قرصني الجوع وأروح أسوي لي عشاء سريع سريع، يا دوب جلست تعشيت وشفت نص فيلم وجيت الحين اكتب التدوينة بعد ما جهزت الصور وزبرقتها (شوفة عينكم الحلوة 


وبس والله راح أكمل إنتصاراتي العظيمة هاذي وآحضر درس اونلاين وبعدين ألبس بجامتي السعيدة وأناااااام << هالمرة باجرب أنام بدون بنادول نايت اتأكد إذا جسمي تعلم الدرس والا لسى! 



- بي آر بي-












لاااا لحظة!! ويين وين بي آر بي! وااو 
خلااص صح نسيت!
اليوم كملت أسبوع وأنا أدوون! 
يممه كيف كذا بسرعة؟

لحظة باروح أقرا من فوق وش هببت هالأسبوع صدق 
.
وااو صدمة هههههههه طلعت أيامي مو زي بعض مثل ما كنت أعتقد! عيشتكم معايا كل مراحلي المزاجي
وأنا منفسة وأنا مكروفة وأنا سنعة وأنا رايقة كل شيء ههههههههه حتى من حسن الحظ إني توفقت بالتدوين بهالأسبوع اللي رجعت أغير فيه نومي وروتيني وستايلي بعد! ههههههه وااو 
هههههههههه صدق مدري شقول! بس مرره استمتعت بالتدوين كل يوم، ومره أتمنى انكم خشيتم جو معايا وعشتوا معايا يومي
ابتداءًا من الاندومي وآم هنقري وصولًا إلى البطاطس المشوي والبرغر المنزلي بالخس والتوست البر هههههه 

معليش اني بآخر كم سطر علقت على واو بس مدري شاقول، اقترحوا علي يا جماعة الربع 


فوتتكووا بعافية! 


          
  •            
  •            
  •            
  •            
  •        

6 comments:

  1. قاعدة اتقهوى واقرأ تدوينتك وكأنك تسولفين علي لايف، احب تدويناتك 🙊💛💛

    ReplyDelete
    Replies
    1. مرره يسعدني إنك حسيتي بهالشعور 💓
      حب متبادل لك ولتدويناتك عفاف العسل 💗

      Delete
  2. حياااااتي يا زين من نزل تدوينة حمااااااس.. لو سمحتي روان لا عاد تتركين التدوين استمري خصوصا اليوميات جميلة جدا ..
    قاعدة اشرب قهوتي واقرا تدوينتك ..

    انتظر تدوينتك الثانية بليز لا تصيفي ��♥️♥️♥️

    ReplyDelete
    Replies
    1. صدق خلاص بطلت قلة أدب ههههههه والله اشتقت للتدوين ولمجتمع التدوين والسواليف في الكومنتات 🤣
      مرره شكرًا لك داليا السكر على لطافة تعليقك .. صنعتي يومي 🌤❤

      Delete
  3. مره انبسطت وأنا اقرأ خصوصاُ كلمتك اخر شي "طلعت أيامي مو زي بعض " !
    :) ♥️♥️ عقبال ما احس هذا الشعور أنا كمان

    ReplyDelete
    Replies
    1. أسعدني إن تدوينتي أبسطتك 💓
      متأكدة بتكتشفين إنه أيامك يتخللها أحداث كثير لو جربتي تسترجعين أحداث يومك كل ليلة 💗 جربي التدوين على ورق

      Delete

Top