مشاعر تمر عند أي صانع محتوى | سواليف 🤧🧠

Friday, July 19, 2019
*هاذي أنا طالعة من فترة السبات التدويني* 

مرحبببااا من قلب قلب قلبببي والله!! 

اليوم كان زي أي يوم من الأيام اللي مرت هالفترة، يومي مخبص شويا ما عندي روتين محدد وكله ماشي عالبركة زي ما يقولون  << الوضع مو فلة أبدًا بالنسبة لي خصوصًا إنه صاير فيه تغييرات كبيرة بالشغل فلو ما كنت مشغولة جسديًا فبكون مشغولة ذهنيًا وفيه حفلة صاخبة جوا راسي طول الوقت 
المهم، اليوم خميس رجعت من مشوار، غيرت ملابسي شغلت المكيف رحت جبت الشنطة اللي حاطة فيها العدة حقت الحواجب وشغلت اليوتيوب قدامي وقمت أشقر حواجب وأصبغها شعره شعره ومره منسجمه وفجأة طق في راسي سؤال قاعدة أتفاداه من زماان!!  
*ليش ما صرت أنزل بوستات عالمدونة زي أول؟؟ ليش حماسي اختفى مع انه الدوافع والنية موجوده؟*

وتوصلت للآتي 
1- الوقت اللي كنت أكتب فيه تدوينات في وقت شبه دوري ومتواصل هو الوقت اللي كنت فيه بأمريكا  طبعًا المكان الجغرافي ماله علاقة، لكن كنت متفرغة للتدوين أكثر من ناحية الوقت، وكان مخي صافي ما عندي أحد ولا عندي أخبار ولا حياة اجتماعية هناك فكان صدق مخي مرره جاهز ورايق للتدوين  هذا غير اني كنت مجهزة البيئة والمكان المناسبين للتدوين في السابق.. 
بس مو مشكلة أبدًا  سالفة إني أقعد انتظر الوقت والظروف تناسب مزاجي ما راح تنفع لذلك بأتأقلم عالظروف وبضبط وضعي باللي أقدر عليه << وهاااذي انحلت الحمدلله! 

2- كل مره يصير شيء مهم يستحق التوثيق أصوره بحيث إني لاحقًا يصير أكتب عنه تدوينه تحمس وكذا .. بعدين يجي هاللاحقًا -بعد مدري متى- وأكتشف انه الوقت مره تأخر أو إني صدق نسيت كثير من التفاصيل اللي تستحق الذكر وأشوف انه الموضوع ما صار يستحق ينكتب في المدونة << فأخلي الصور للانستقرام  ما عندي شيء يروح عالفاضي! بس صدق التأجيل عشان أتفرغ وأسوي تدوينة محترمة كان أحد العوائق.. باحاول أبطل مثاليات وأوصل اللي أبغا بالطريقة الأنسب والأوضح بعفوية أكثر!

3- على طاري إنه الموضوع ما يستحق ينذكر بالمدونة  كثييييير مرات فجأة تجيني رغبة أكتب بالمدونة بعدين أفكر انه امم ايش الفايدة اللي راح يتلقاها القارئ؟!   المشكلة مو هنا!! المشكلة انه صديقاتي البلوقرز لمن يقولون هالكلام، أنا أول وحدة تنط عليهم انه لااا ترا الناس تبغى شيء يونس أو أفكار حلوة أو يوميات بسيطة وسعادات صغيرة ما بيروحون يقرون في مدونة عن موضوع دسم! لأنه المدونة هي مدونة ماهي مووسوعة  والحقيقة إنه فيديو اليوتيوب اللي كنت أشوفه وقت ما كنت أسوي حواجبي هو عبارة عن فلوق من عينة (رحت / جيت / سويت / طبخت / نمت... وكذا!) شيء يونس يحسسك قاعدة تكلمين اختك فيس تايم وتاخذين اخبارها  فاستوعبت قبل ما أكتب هالتدوينة اني أنا اللي قاعدة أحط حواجز ومطبات ومقاييس صعبة قدام نفسي 
<< يعني شوي شوي لاحظت إني قمت آخذ التدوين بجدية اكثر من اللازم وأسعى إن مدونتي تكون شيء ماهو قريب مني ولا من شخصيتي! 

لذلك..
اللي بيحصل إن شاء الله الحين (بعد ما أمسح المشقر اللي يبس ونشف على وجهي وآخذ شاور استكناني) وأنزل هالبوست طبعًا!
إني -إن شاء الله- راح أرجع أدون بحرية بدون حواجز وبدون أهداف وبسواليفي وبأسلوبي المعتاد وبأرجع آخذ كاميرتي معايا بكل مكان كمان عشان أوثق لكم الأشياء الحلوة وأرجع للبكت ليست أشطب منها بإذن واحد أحد 

<< هالكلام كتبته لسببين عشان يكون زي تعهد قدامكم وعشان أستحي على وجهي إذا انقطعت 
والسبب الثاني عشان إذا فيه أي بلوقر أو يوتوبر أو أي صانعة محتوى على أي منصة على وجه الأرض تمر بالمرحلة اللي مريت فيها تصير تحس على دمها وتتنحنح وتنزل تدوينة حلوة زي ما كانت تسوي بالسابق  << يعني باندا وسبات شتوي وكذا

وبس يللا خلاص باروح أفكر بمواضيع تحمسني أكتب زي أول 
*** وبما إنك وصلتي لهالجملة حابة أقول لك مرره شكرًا على وقتك وانك جالسة تقرين الأفكار اللي تدور براسي حاليًا 


فوتتكووا بعافية 


         
  •          
  •          
  •          
  •          
  •       



10 comments:

  1. متحمسة للتدوينات الجايه ��بالأنتظار ����

    ReplyDelete
    Replies
    1. ربي يسعدك مره شكرًا
      وإن شاء الله تعجبك يارب 💖

      Delete
  2. يسعد مساك روان .. ع طول اول ماشفت عنوان التدوينة تركت الي بيدي وبدأت اقرا لان حاليا هذي الفوضى الي في راسك موجود مثلها في رأسي 😄😄وقاعدة اشتغل ع تدوينة وحده من اسبوعين ومو راضيه تنتهي ولاتتضبط ولااعرف لها بداية من نهاية (لفت نظري لما قلتي الجو مناسب للتدوين لاحظت انو قاعده اكتب تدوينة باوقات واماكن ماتساعد للكتابة وهذا الشيء يشتت مايساعد فشكرا على البوست التحفيزي واستمري 👍❤

    ReplyDelete
  3. فعلًا والله لو تشوفين أفضل فترة كنتي تدونين فيها وتقارنين بينها وبين الوضع الحالي، أكيد بتلاقين اختلاف بأشياء كثير حتى ممكن تكون غير اللي كتبتها.. مثل شح الأفكار / الصدمة بين الواقع والمتوقع من التدوين / تغير التوجهات.. وهكذا

    وإن شاء الله راح ترجعين لهالموضوع وتنفضينه نفض ويطلع من أجمل المواضيع اللي كتبتيها في المدونة واضح موضوعها يحمس دامك ما استسلمتي منها 😍👌

    ReplyDelete
  4. روااان تدوينتك على قد ما هيا بسيطة على قد ما هيا رهيبة، خصوووصاً نقطة ثلاثة، بالضبط هذا الي أعاني منه رغم أنه ماليا في التدوين بشكل جدي وعلني غير كم شهر، أحس كل فترة ضايعة ما أدري بالضبط كيف أكتب وأيش الطريقة المناسبة والي في نفس الوقت تضيف شي للقارئ.

    يعني أحس غايتي من التدوين واضحة بس الطريقة هي الي متعبتني وشروطي الكثيرة وممكن ميلي للمثالية

    شكراً روان على التدوينة 💙💙💙💙💙

    ReplyDelete
    Replies
    1. فعلًا والله حاسة بشعورك وللأسف السعي وراء الكمال هو اللي مخرب السالفة كلها..
      لكن حطي في بالك إن موضوع الكمال هو شيء نسبي، واللي تشوفينه ما يستاهل قد يعني كل شيء لشخص آخر، فرغي ما بجعبتك في المدونة وانشري على طول بدون تردد ولا تحرمينا من تدويناتك الجميلة ريم 😍💓

      Delete
  5. بالضبططططط ، و ربي نفس حالتك أنا و لا استحيت على دمي XD
    عندي مشاريع مرة كثيييرة و كل يوم التدوين احدها
    كل يوم أصحى و ادخل المدونة و ابدأ كتابة
    و لما انهي التدوينة أحس فيها شي ناقص احسها مو متكاملة
    فاحطها ضمن المسودات حتى صارو ما ينعدو على الاصابع
    صراحة اكبر عائق بالنسبة لي هو البحث عن الكمال
    و صار وقت اوقف هالشي و انزل تدوينات عفوية
    ترا حتى انا استمتع بتدوينات اليوميات و المشتريات و ذي الانواع
    بس بعدما اكتبها احس مالها فايدة و كلها سواليف فارغة
    و بالنسبة للوقت اللي تعودت اكتب فيه كان بالويكند و العطلة او الصباح معظم الوقت
    لكن فجأة واجهت أصعب سنة جامعية أضف لها اني كنت ادرس تخصصين بنفس الوقت
    حسيت نفسي ضايعة و مو ملحقة لا على مسؤولياتي و لا على هواياتي
    و لما توقفت بذيك الفترة تعودت على حياة ما فيها تدوين
    شكرا لك روان لانك شاركتينا افكارك
    حمستيني احط ذيك التدوينات و برجع ان شاء الله
    ♥♥ و آسفة على طول التعليق ، يومك جميل بإذن الله

    ReplyDelete
    Replies
    1. أسعدني والله قراءة تعليقك اللطيف لبنى 💓
      ربي يسهل لك وتفرحينا بتخرجك يا كريم، أما في الوقت الحالي افتحي مدونتك وأتحفينا باللي في المسودات..
      ومتأكدة إن تدويناتك بتلاقى أصداء أكبر مما تتوقعين.. انشريها ولا تحرمينا من جمال حرفك 💖

      Delete
  6. اهلا بعودتك روان
    ما نستغني عن مواضيعك وسوالفك .
    بإنتظار قريحتك التدوينية :)

    ReplyDelete
    Replies
    1. ربي يسعدك الجوهرة
      شكرًا لك على هالكلام الحلوو,, إن شاء الله باكمل خط 😍

      Delete

Top