حيل نفسية بسيطة تقدرين تستخدمينها في المواقف اليومية 💁‍♀💫

 يسعد مسااءكم وصباحكم وكل أوقاتكم جميعًا 

تدوينتي اليوم غير شكل  

بما إنه تستهويني كتب علم النفس البسيطة وسوالف البرمجة اللغوية العصبية وأحب أقرا بهالمواضيع كثير، قبل فترة بالمصادفة طحت على مقالة أجنبية تتكلم عن حيل نفسية بسيطة يقدر أي شخص بالحياة يسويها بمواقف يمر فيها باليوم حبيتها مرررره وشدتني كثير، بعضها استوعبت إني أسويها بطريقة أو بأخرى وأكثرها كانت جديدة عليا حاولت أجرب كم وحده منهم والباقي ما حصلت لي الفرصة أجربهم لسى .. عااد انتم اكتبوا لي إذا جربتم شيء من هالحركات تحت 

الحيلة النفسية الأولى تقول:

إذا شفتي اللي قدامك ناوية تجرك لنقاش والا داخلة على هوشه وبراسها حرش؛ جربي قولي لها كلمة حلوة أو امدحيها أو أي شيء لطيف راح يخليها تخققق وتقلل من دفاعاتها، وهالشيء طبعًأ مو مفروض يكون جديد علينا لأنه انذكرت بالقرآن "وَلَا تَسْتَوِي الْحَسَنَةُ وَلَا السَّيِّئَةُ ۚ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ (34)" .. عاد أنا أول مره شفت تأثير الكلمة الحلوة وقت الغضب من بنت أخويا الصغيرة هههههه لمن تسوي مصيبة وأحد بيعصب عليها تقول "أنا أحبك"  ومرات تزودها بحضن يخلي اللي قدامها كذا  

الحيلة الثانية:

يقول لك إذا تبغين اللي قدامك يوافق على طلبك؛ جربي وانتي تسألين انك تومئين براسك ايجابًا كذا مع تعابير حماس  يقال هالحركة يستخدمونها الموظفين في المطاعم لمن يقترحون عليك بعض الأصناف وانها تجيب نتيجة مبهرة في الغالب  برب باروح أجربها!

الحيلة الثالثة:

ههههه هاذي مرره حبيتها وأنا أتخيلها  لمن تسألين وحدة سؤال وهي تحاول تتجنب الإجابه؛ جربي تسألين وتوقفين شوي وتبقين عينك بعينها (فلانة تكلمتي عني أمس بجمعتكم؟ .......... ........؟) سكوتك كذا مع ابقاء التواصل البصري ماراح يحسسها بالراحة فبالتالي راح تبدا تتكلم وممكن بعد تعطيك تفاصيل عن الاجابة اللي تبغينها وبدون نصب لأنه غالبًا سكوتك مع مواصلة النظرات راح تعطي إنطباع إنك تعرفين الصدق 

<<< بس انتبهوا تسوونها بتسحيب سواليف ما تخصكم عاد 

الحيلة الرابعة:

لا تطلبين طلب من شخص باستخدام عبارة "تقدرين تسوين لي كذا كذا كذا..؟" على انه اسلوب ألطف في الطلب بس غالبًا المخ يفسر السؤال نظريًا من دون وعي. يعني مثلًا لا تقولين لاختك وهي واقفه "تقدرين تقفلين المكيف؟" لأن مخها بيصير يفكر انه فعليًا عندي القدرة اني اقفله بس مالي خلق  بس لو قلتي لها "الله يعافيك قفلي المكيف" المخ ماراح يفكر في جواب بالقبول أو النفي لأنه من الأساس ما كان فيه سؤال فبتقفل المكيف بطريقها! 

الحيلة الخامسة:

هاذي المعلومة رهيبة ههههههههه إذا فيه وحدة بثرا مسكتك وبدأت تسولف سواليف بثرا زيها ومانتي عارفه تصرفينها أو تسكتينها؛ أبدددد بس حطي عينك بوسط جبهتها ولا تحركينها  هالحركة راح توترتها وما راح تخليها ترتاح بالحكي 

الحيلة السادسة:

إذا كان فيه وحدة معاكم في التيم كسوولة مره ويومها بسنه، لا تعطينها المهام بصيغة "سوي كذا / افعلي كذا" واستبدلي هالعبارة بـ "ابدئي بكذا" هالعبارة تعطي إنطباع نفسي إنه اللي راح تسويه هو بس بدايه وشغله بسيطة.. وبعد ما تنجزها قولي "كويس مرره، كملي بهاذي" يعني طريقة تقسيم الشغل بمهام متسلسلة راح تخليها تنجز بمهاارة لأنك حسستيها إنه الشغل بسيييط وكلها كم خطوة فقط لأنك غيرتي العبارات  

<< في مرات أحتاج إني أطبق هالأسلوب مع نفسي في الأيام اللي أحس فيها بالتثاقل من العمل 

الحيلة السابعة:

إذا كنتي في مكان عام زي سوق أو في صالة انتظار وفيه وحدة قاعدة تخززك وماهي راضية تشيل عينها منك (ويااامااا تصييرررر)؛ نزلي عينك وطالعي برجولها بتركييز  لا تستسلمين ولا توقفين نظراتك لرجلها يقال هالحركة راح تخليها تستخف وتشك بعمرها والله أعلم  

<< جاري التجربة 

الحيلة الثامنة: 

إذا تبغين تبنين علاقة مع وحدة بالدوام مثلًا، جربي أطلبيها تقول لك على شغله أو تشرح لك اياها حتى لو كنتي تعرفين المعلومة  هالحركة راح تحسن موقفها العام اتجاهك أو ممكن تكون بداية سواليف وعلاقة صداقة زي ما صار لي في السنة التحضيرية بالجامعة لمن كنت أدخل كتبي بعد كلاس الانجليزي بالشنطة والتفت على اللي جنبي (نورة الدوسري هاااي ) 

وقلت لها اا معليش ما سمعت ايش قالت الميس؟ 

- قالت ناتبيسسهعتنىلبيسقفغعهخعغفقبلا << نسيت عاد!

- اووه ما فهمت عليها لسى ما استوعب الاكسنت حقها 

وبدأت السواليف اللي خلتنا نسلم على بعض الكلاس اللي بعده وهكزا الين صرنا صديقات رسميًا 

الحيلة التاسعة: 

يقول لك الشخص لمن يكون مركز في شغل مررره فهو في الغالب ما راح يدري وش اللي في يده، يعني مثلًا لو أمك تكلم تليفون ومره منسجمة وأخذتي منها الكوب اللي بيدها ترا ما راح تدري عنك وحتى لو قلتي لها بعدين انك اخذتي الكوب ماراح تتذكر  والعكس كمان ممكن يصير لو جالسة ترتبين المكان وحطيتي المخدة بيد أخوك وهو يتابع المباراة بحمااس  راح يحطها عالكنبة جنبة بس بدون وعي 

<<< عاد أنا هوايتي لمن أشوف أمي تكلم تليفون أحط راسي بحثلها وأسلمها شعري تلعب فيه  لأني أدري بتسوي رسومات وتسريحات على حسب السالفة اللي تسمعها أو تقولها 

وأخيرًا الحيلة العاشرة:

في بعض المرات لو بغيتي وحدة تنجز لك شغلة بإخلاص وذمة وضمير جربي بس وقولي لها إنها ما تقدر تسوي الشيء الفلاني وشووفي كيف التفنن بس عشان تثبت لك العكس  

<<< توني أستوعب العبارات اللي يكتبونها في حسابات الدايت "سأنحف وستندمون"  أجل طلعت السالفة عناد بس!

ختامًا مره استانست في كتابة هالتدوينة أحس إني طلعت عن المألوف في مواضيعي هنا بس أتمنى تكونون مخمختم عليها كمان  المهم قولوا لي إيش أكثر وحدة من اللي فوق دخلت براسك؟ 

ووفوتكووا بعاافية 

 
 
 
 
 
 

17 comments مجرد أفكار 💭, مهنة وأعمال