تجربتي الكاملة مع التاتو المؤقت من: إنك بوكس Inkbox ☪

Thursday, January 4, 2018

مسااء / صبااح السعادة والمسرّات عليكم جميعًا 💜
كل عام وانتم بخير، وأتمنى لكم جميعًا سنة سعيدة وجميلة يااارب 😻

إذا فاكرين في نهاية ديسمبر نزلت بالسناب تشات عن التاتو المؤقت اللي سويته وكنت مرره منهارة عليه وعلى فكرته
وكثيير بنات تحمسوا معايا وسألوني عنه ومن فين أخذته وحقيقي ما قلت لأحد عن الموقع إلين أجرب المنتج مرره كويس
وأشوف من ناحية الفاعلية والتحسس والثبات وكل شي وقلت إني راح أكتب تدوينة كااملة عنها وعن تجربتي هنا 👀

فهاا أنا ذا 🧟‍♀


في إجازة الصيف لمن كنت جدة كنت جالسة أبحث عن صوالين كبيرة ودخلت حساب الإنستقرام لأحد المراكز اللي قالت لي عليه بنت خالتي وجلست أفرفر في الصور إلا وألاقي من ضمن الخدمات إنهم يسوون تاتو مؤقت وإنه آمن وطبيعي والأشكال كانت مرره حلللوة الصدق، كانت أسعارهم تبدأ من 300 ريال، وحقيقي كنت مررره متحمسة وعادي أدفع مبلغ زي كذا على شيء آمن ومن مواد طبيعية.. بس ما أدري إيش اللي أشغلني ونسيت سالفة هالمركز بكبره إليييين رجعت أمريكا.. وبيوم فجأة افتكرت التاتو اللي بالمركز وتحسفت اني نسيت 😒 دخلت الحساب مره ثاانيه وقاعدة أشوف الأشكال اللي يسوونها.. وأنا بوسط حسرتي إلا وأشوف كرتون أسود صغير بطرف الصورة 😍 وألقط الاسم وأبحث عنه في قوقل إلا ويطلع لي الموقع حقهم في أمريكا!! وااات 😍😍😍

اسم الموقع أو المنتج InkBox دخلت أشوف إيش سالفة المنتج حقهم~
هم عبارة عن شباب بدؤوا مشروعهم في البحث عن طرق تخلي التاتو شيء مؤقت أو على قولتهم (permanent bad decision) لأن الغالبية اللي يسوون التاتو العادي يتحسفون بعد ما يتغير تفكيرهم / مبادئهم / أعمارهم فيكون هالتاتو إما بشكل أو عبارات لا تليق لأوضاعهم في المستقبل، هذا في حالة إنه إحتفظ بشكله.. لكن في الغالب إنه اللون يقلب مع الوقت إلى لون رمادي مخضر بشع ويزيد بشاعة مع تمدد الجلد أو الترهل أو التجاعيد << هذا كله من وجهة نظري الشخصية!
ففكرة التاتو المؤقت كانت تناسب اللي عندهم ضمير ونظرة مستقبلية 😂 فجربوا كثير وبحثوا أكثر إلين ما اكتشفوا قبيلة في أمريكا الجنوبية تستخدم الحبر المستخلص من فاكهة اسمها (Genipa Americana جانيبا أميريكانا) كانوا يستخلصون منها الحبر وينقشون أجسامهم بهالطريقة لآلاف السنين.


 فبهالطريقة توصلوا لصبغة آمنة وعضوية، وجزء من مبيعات هالتاتو صارت ترجع للقبيلة اللي ياخذون منها هالفاكهة!
حقيقي عجبتني الفكرة خصوصًا لمن قرأت من خلال الموقع إن التاتو يقعد من 8 إلى 18 يوم.. حسيتها مدة معقولة وتحمست ودخلت أشوف الأشكال ومرره كانت جميلة مدري تذكرت صور التمبلر وأنا أتصفح 🤤
انبسطت لمن لقيت العبارة اللي تمثلني "Trust your wings" .. عاد تعرفون وين الصدمة! هههههههههههههههههه
لمن لقيت سعرها 19$ يعني تقريبًا ب71 ريال ومع الشحن داخل أمريكا والتاكس كلفني حاجة وعشرين دولار  اووفف ههههههه وذاك الصالون كانوا بيسوون لي اياها ب300 ريال المجرميين! 
المهم حطيت طلبي في السلة، وقلت أخليها كم يوم إذا لقيت نفسي لسى متحمسة لها باطلبها وإذا طفيت باسحب عليها << حركتي الجديدة خخخ، ولكن لقيتني مرره متحمسة لها بعد مرور فترة وقررت أطلبها ووصلتني وقعدت عندي أسبوع تقريبا وأنا أأجل إلين يجي اليوم المناسب << مدري الصدق وش كنت أنتظر إلين يوم اشتطيت وقررت أسويه



البوكس يجي بهالشكل، وفيه ورقة التحذيرات وطريقة التثبيت، وشريحة مربعة فيها شكل التاتو ومسحة كحول، ومنشفة خاصة لهالتاتو..
يفضل إنه قبل ما تشيلين التاتو تسوين سكرب وتشيلين الخلايا الميتة إذا ودك التاتو يقفعد فترة أطول، وهذا اللي سويته ✌
بعدين تحطين الكيس الأسود اللي فيه المنشفة بالمايكرويف أو تحطينه في حمام مائي  ساخن..
 الخطوة الثانية/ تشيلين اللصقة اللي على شريحة التاتو وتثبتينها على المكان اللي تبغين فيه التاتو وبعدين تمسحين من فوقها بمسحة الكحول.
الخطوة اللي بعدها/ تفكين الكيس اللي فيه المنشفه وتكون المنشفة داافية مايلة للسخونة وتحطينها على التاتو بحيث إنه يغطي الشريحة كاملة، وبيدك الثانية تضغطين على المكان بقووة وتحاولين تنقلين يدك على كامل المكان عشان تضمنين إنك ضغطتي على كامل الشكل.. وبعد مرور ربع ساعة تقريبًا ترفعين يدك وتشيلين اللصقة وبتشوفين أثر خفيييف لشكل التاتو، لكن مهم إنك تغسلينه بمويا وصابون وتجففين المنطقة بالربت بالمنشفة.. وعاد بعد 24 ساعة بتلاقين اللون صار واضح معاك..
إذا مو واضح شرحي هاكم الفيديو هذا يوضح الطريقة باختصار *هـنـا*

عاد هنا كنت مرره مبسوطة ومتحمممسة أحس إني حققت شيء مرره من أول كان نفسي فيه 😭💖
وكنت أنتظر اليوم الثاني بفااارغ الصبر عشان أشوف كيف يطلع الشكل النهائي 💓

وفعلًا اليوم الثاني مرره كان اللون حللوو وقوي ومستانسة عليه 😭💖
اليوم الثالث كنت فرحانة فيه مع إنه اللون صار أخف بس أهم شي الشكل واضح بدقة 😋
اليوم الرابع هه هه كأنه صار أخف أكثر واللون مرره باهت 😀
اليوم الخامس بعض الحروف اختفت وبعضها صارت خفييفة ما أدري إذا السبب لأن يومتها كنت لابسة بلايز وجاكيت أكمام طويلة فتأثرت من الاحتكاك؟  << بس حقيقي الشكل طالع باايخ 😞
<<< مع التنويه إني حطيت التاتو في الفترة إللي ما كنت مضطرة أتوضا فيها طول اليوم + أثناء الاستحمام أمرر الشاور جيل على المكان بيدي بدون ليفه أو غيرها عشان ما تخف.. رغم هذا
اليوم السادس صار مختفي بنسبة 93% فلمن شفت الوضع كذا استحميت ونظفت المكان بالفرشة وراح تمامًا 😅
يعني عشان نككون واقعيين التاتو قعد معايا 3 أيام بس 🙃
ما أدري لو وقتها كنت أتوضا طول اليوم أو ألبس أكمام طويلة أو مسافرة مكان حار أو فيه رطوبة أو مسبح قد إيش كان ممكن تقععد!

*أعتذر عن جودة الصورة الأولى لأنها مأخوذة من مقطع فيديو 👀 مدري كيف نسيت أصور*

فأعتقد لأني كنت متوقعة إنها بتطوووول أكثر عشان كذا انصدمت، والا اللون والشكل والفكرة ما كانوا سيئين صراحة 💗

هل ممكن أرجع أشتريها؟
اممم ممكن أشتريها لو هفت الفكرة راسي مره ثانية واشتهيت أحط تاتو (وأنا بأمريكا)..
لكن لو أنا بالسعودية ما أعتقد إني راح أتعنى وأطلبها وأشحنها على هالنتيجة، أتصور لو أخذت تصميم ورحت عند نقاشة تسوي لي الشكل مع صبغة سودا بأطلع بنفس النتيجة إذا مو أحلى 👍 <<إلا لو عندك مشكلة من الحنا أو الصبغات عمومًا.



فختامًا حكيت لكم تجربتي كاملة 😁 ما بأحمسكم وأسوّقه عليكم وانه المنتج الخرافي زي ما كنت أعتقد ولا بأقول إنه مخيس وشكله بايخ.. مدري مدري انتم احكموا 🤷‍♀
ووو بس والله سلامتكم 😂💜

فوتتككوواا بعاافية~ 😘☯
____________________

🎀

        
  •        
  •        
  •        
  •        
  •        


12 comments:

  1. اوه خساره كنت حيل متحمسه معك ، لمن قلتي مؤقت توقعته يبقى ثلاث شهور أو شيء كذا يفرق عن الداج والحنا
    في عيد الحج هفتني نفسي زيك عليهم حييييل و طلعت رسمات من بنترست تاتو للرقبه والساقد والمعصم وجبت نقاشه سوتها ليا بالداج طلعت خراااااافيه
    لو تعرفين تاتو ايليف في العشق المشبوه عملت زيو فظهري بحروف اسمي طلع يسسسسطل وقعد اسبوع أو عشر ايام م بهت خصوصا اللي فالساق و الظهر لانو مايجيهم المويا كثير

    كانت كل رسمه ب ١٥ ريال بس

    اذا جيتي السعودية خذي معاك بودرة داج وارسمي ع كيفك يختي والله ولا المرمطه حقتهم 😅

    ReplyDelete
    Replies
    1. ههههههههههههههههههه واضح لك الصدمة من كتابتي 😂😂😂😂
      فعلًا والله حسيت لو أشوف وحدة نقاشة تقدر تزبطة لييا بالشكل اللي أبغاه ويطوول معايا أكثرر
      بس أبغا أعرف بودرة الداج قصدك هي البودرة الصغيرة اللي يستخدمونها لصبغة الحواجب؟؟

      Delete
  2. تحطمت يوم قلتي انمسح بثالث يوم :( التاتو القديم اللي بمحلات الكماليات يقعد اكثر ������ اتذكر مديرتنا بالمتوسط تجيب زيت وقطن عشان يمسحونه البنات ومع الفرك يتقطع بس ما يروح صامد ����

    ReplyDelete
    Replies
    1. يوووه جد!! ترا مررررررره من زماان عن التاتو هذاك توقعته حق أبو كم ساعه توني أدري انه ممكن يقعد أكثر من يوم 😍

      Delete
  3. لمن شفتك متحمسة أحسب جد سويتي تاتو حقيقي ههههههههههههههه أشوا الحمدالله مؤقت
    كان في محل بمجمع عندنا التاتو الصغير ب 15 كبير 25 بخاخ يبقى اسبوع ! و أكثر لو حطيتي عليه باودر
    ما يحتاج أقولك اني كنت رايحة جايه عليه هههههههه
    بس عجبني المنتج
    والعبارة رهيبة (Trust your wings )
    في طريقة أرخص , قلم خطاط بس قبل امسحي المنطقة بمسحه طبية ووانتظريها تنشف
    ارسمي بقلم خطاط اسود
    بيطلع زي تسربات بالجلد نظفيها بأستون بيطلع مرتب
    بعدها رشي بودرة و بخي سبراي شعر وانتظري ينشف
    يبقى 4 أيام تقريباً
    ويعطيك العافية عالمنتج اللطيف
    أجل طلع تاتو مؤقت وانا منصدمة والله وانا اشوف ههههههههههههههه

    ReplyDelete
    Replies
    1. هههههههههههههههههههههههههه ما شفتي الفلم إللي سويته بقروب أهلي! والصدمة إنهم صدقا إلى حد كبير إني ممكن أسوي تاتو حقيقي 😭😭😂💔💔💔 آآووتش!

      أذكر مره في الجامعة كانوا مسويين بازار وت وحدة تسوي التاتو بالبخاخ وكان زحمةةة عندها وقلت باروح لها اليوم الثاني وتفاجئت للأسف انهم منعوها 💔 بس حقيقي كان نفسي أجربه أذكر وقتها كانت هبة التاتو اللي ورا الإذن 😎

      بس فكرة القلم تحممس أول مره أسمع عنها 😍 يبغالي أسوي دودلنق

      Delete
  4. عندي تاتو بعبارات شعر مرمي في الدرج من سنين ولا عمري سويته 😂😂😂😂

    ReplyDelete
    Replies
    1. هههههههههههههههههه أذكر جت فترة كانت هبة التاتو العربي وشعر وحركاات 😂😂😂😂

      Delete
  5. حلو البوكس بس قليل مرا 3 أيام
    شكراً لعرض تجربتك

    ReplyDelete
    Replies
    1. جدًدًدًدًا !! 💔
      << عشان ماحد يطيح فيها 🤑

      Delete
  6. تحمست كثير وانبسطت لكن تحطمت لمن ذكرتي انها ماطولت
    كم مره اتحمس للتاتو ويجذبني شكله كثير
    تجربة حلوة

    ReplyDelete
  7. حسافة إنه ما يجلس 💔 ولا أنا تحمست مرا و فتحت الموقع و أخترت أشكال و احترت بينهم أشكال كثير تجنن 😍 تخليته زي الحنا بعضهم يطول فيهم و يسير غامق و البعض لا فممكن أجربه لأن الأشكال روعة و يمكن كمان الجو له تأثير

    ReplyDelete

Top