تجهيز الشنطة لرحلة الإبتعاث للخارج ✈️ 💼 (موضوع محدّث)

Monday, February 27, 2017

*الصورة من موضوع مذكرات رحلة الإبتعاث*


أولًا مبروك عليك البعثة، الله يعطيك خيرها ويكفيك شرها.
تذكري إنه هاذي مرحلة لا تنسى من حياتك خليها ذكرى جميلة ولا تنسي إنك سفيرة بلدك ودينك قبل كل شي في بلد الإبتعاث
فكوني خير سفير💖


الحمدلله، تيسرت أمور البعثة..
جاك القبول، طلعت الفيزا، وحجزتي تذاكر السفر، قرّب الموعد ✈️

بأكتب لك في هذا البوست بعض الأشياء اللي أشوفها مهمة وإللي لازم تحطينها بعين الإعتبار أثناء تجهيزك للسفر 😍💪
⚠️ تنويه: هذا البوست موجه لكل شخص مسافر للدراسة في الخارج، قد يكون فيه معلومات تختص للمسافرين للولايات المتحدة فقط فخذي من المعلومات اللي يناسبك.



shall we..?



أولًا،
أكيد بيكون عندك تصور عن المدينة إللي بتروحين لها وعن موقع المعهد وبتكونين حاطة خيارات للسكن إللي ممكن تنتقلين له،
شوفي عن طريق بوكنق فندق قريب من المنطقة إللي مخططة تسكنين فيها.
<<ومهم تستشيرين المبتعثين اللي سبقوك في هالمدينة عن أفضل الأحياء السكنية اللي تكون آمنة وفيها خدمات قبل كل شيء.

* ضروري تسجلين في جوالك اسم الفندق إللي بتروحين له أول ما توصلين + عنوانه
راح تحتاجين تسجلين هالمعلومات في الورقة اللي بيعطونك هيا في الطيارة قبل الوصول
كمان راح تحتاجين تدخلين العنوان في تطبيق أوبر إذا بتستخدمينه لمشاويرك
كمان ممكن راح تحتاجين العنوان عشان تفتحين لك ملف في الملحقية -إذا انتي مبتعثة على حساب الدولة- وبعد ما تنقلين بيتك تغيرين العنوان في موقع سفير.

* لأنه ما يصلح تسافرين ومعاك كاش كثير فيفضل تستخدمين بطاقة فيزا.
وعلى طاري الأمور المالية وهالسوالف، يفضل تسوين لأحد من أهلك توكيل في السعودية عشان يقدر ينوب عنك لمن تكونين في الخارج سواء في معاملات البنوك أو غيرها.

* مهم يكون عندك ملف فيه أصل ونسخ من:
جواز السفر / التأشيرة / ورقة تسديد رسوم السيفيس / ورقة الـ i 20 / وقرار الابتعاث -إذا كنتي مبتعثة من برنامج الملك-/ صور شخصية / وجميع الأوراق اللي تخص المعهد أو الجامعة إللي رايحة لها

* كمان ضروري يكون عندك نسخة إلكترونية من المستندات المذكورة سابقًا في ذاكرة خارجية كمان ترسلين نسخ منها على إيميلك عشان إذا تلف الميموري أو فقدتيه لا سمح الله.


*كل ما كانت أوراقك مرتبة أكثر ومحطوطة في مكان سهل الوصول له في المطار كل ما تسهلت أمورك أكثر*


ثانيًا،

بيختلف إختيارك للملابس إللي بتاخذينها معاك باختلاف المدينة اللي انتي مسافرة لها كمان موعد سفرك، 
يعني مثلًا.. وحدة بتسافر في الصيف إلى مقر دراستها في فلوريدا غير عن وحدة بتسافر في الشتاء إلى فيرجينيا.
نمط حياتك واختيارك لوسيلة المواصلات بتحدد لك أكثر إيش ممكن تاخذي من ملابس وجزم..
يعني إذا إنتي ناوية تعتمدين على المشي واستخدام وسائل النقل العامة راح تحتاجين سنيكرس وجزمة رياضية أكثر من الكعوب، وقيسي عليها..
* إذا كانت المدينة إللي بتسافرين لها باردة وثلجية ما أنصحك تشترين كثير جاكيتات قبل السفر، لأنك إذا وصلتي هناك بتلاقين الجاكيتات اللي تناسب أجواءهم بأشكال كثييييرررة متنوعة وأسعار متفاوتة. 
* إذا كنتي محجبة أو حتى منقبة، خذي خامات عملية بألوان رسمية عشان تقدرين تستخدمينها مع أكثر الملابس، 
من تجربتي الشخصية كان القطن دبل ستريتش هو أفضل شي جربته من ناحية الثبات وانه ما يتطعج، إذا ما لقيتيه بأسعار مناسبة روحي لأي محل أقمشه بيطلع لك ألواان وأشكال من هالخامة بأسعار ما تتعدى 30 ريال سعودي.


 *هاذي الحجابات اللي أخذتهم معايا فقط من الدبل ستريتش ونوعت بباقي الخامات لكن اكتشفت إنه هاذي كانت أكثر شيء حللتهم 👍
اووه!
كمان إذا كنتي بتاخذين حجابات لا تنسي تاخذي القطعة اللي تنلبس تحتها <<مدري شسمها
*هاذي القطعة أخذتها عالسريع ما كنت أقدر فايدتها الحقيقة << نظرًا لأني كنت ألبس طرحة فما تحتاج 😅
المهم مرره مهمة وأفضل تاخذين كذا قطعة من كذا لون.

* إذا كنتي تنوين تلبسين عباية، بتلاقين أكثر المصممات عندهم أشكال جميلة من العبايات الملونة إللي تقدرين تلبسينها في أمريكا وبيكون شكلك ساتر وبنفس الوقت أنيق. وبنفس الوقت تقدرين تروحين أي محل عبايات -زي في سوق طيبة في الرياض- تختارين أي موديل من المعروض وتطلبينه يخيط لك نفسها بألوان من اختيارك << غالبًا ما راح تتعدى 400 ريال -إذا طقتها الحمى- وتقدرين تتفاوضين حتى توصلين لسعر أفضل كمان 👍



ثالثًا،

بالنسبة للأجهزة.. (شاحن جوال / شاحن لابتوب / شاحن كاميرا / استشوار / فير أو استريتنر... إلخ)
* قبل ما تفكرين تاخذين أي جهاز معاكي، تأكدي من قوة الفولت حقه لأن في أمريكا كل الكهرباء 110.
بتلاقين بعض الأجهزة -زي الشواحن مثلًا- مكتوب عليها زي كذا 


يعني إنها بتشتغل على 110 وكمان 220 👍 تمام وضعه في السليم.

كمان بتلاقين بعض الأجهزة اللي فيها محول زي هذا


كمان كويس، إذا كان 220 حوليه 110 بإستخدام مفك مربع أو ملعقة أو أي شيء 😆 🔧🍴

* كمان لازم تحطي في بالك إنه أفياش الكهرباء في أمريكا مو زي عندنا ثلاثية! ضروري تشترين توصيلة كهربائية من نوع جيد تركب عليها أجهزتك الثلاثية بحيث يكون نهاية سلك التوصيلة فيش ثنائي أمريكي.

هذا شكل الأفياش في أمريكا 👇

بتحتاجي توصيلة كذا تكون مداخلها 👇 -هذا الشكل تركب عليه كل أنواع الأفياش-

ويكون نهاية سلك التوصيلة كذا 👇 (حتى لو اضطريتي تسوين حفلة أفياش المهم تكون نوعية جيدة)



* هاذا الشكل من الأفياش ضروري تاخذينه من السعودية، لأنك ما راح تلاقينه في أمريكا بأي مكان.




رابعًا،

بالنسبة لمقاضي الصيدلية، 
* إذا انتي تاخذين حبوب معينة بشكل دوري -زي حبوب منع الحمل مثلًا- خذي الكمية إللي تكفيك أربعة شهور إلين ما تصيرين تراجعين مع طبيبة في أمريكا أو ممكن تاخذين كمية تكفيك كل مدة إقامتك، في جميع الأحوال مهم تطلبين من طبيبك وصفة طبية لنوع علاجك <<عشان إذا طلبوها في المطار.
* ضروري تاخذين مسكنات زي بنادول إكسترا وبنادول نايت << راح تحتاجينه بالذات مع اختلاف التوقيت.
* كمان مهم تاخذين فيتامين سي فوار عشان يدعم مناعتك مع تغيرات الجو وتعب السفر.
* مرهم للحروق (ميبو)، للأسف هنا ما يعطونك اياه إلا بوصفه طبيه، وياااما وياما تلسعت من الفرن والا الفير أو المكواه وتمنيت إني أخذته معايا!  
* حبوب الحساسية .. من أشياء أفضل تكون عندك بالذات إنك بتعيشين في منطقة مختلفة طبيعيًا وما تدرين إيش إللي ممكن يهيج جسمك ويتحسس منه.
* بخاخ الربو + شراب الحموضة... قيسي إحتياجك منها. 
* احسبي حسابك في الفوط الصحية، ممكن تاخذين وقت إلين ما تلاقين النوع اللي يناسبك
* بتحتاجين مناديل مبللة في السفر بشكل عام وبالحمام بشكل خاص 😐 
<< تجربتي مع مناديل مسك كانت مرررره جبارة إذا قدرتي تقتنينها مرره بتحبينها.




خامسًا،

بعض الأشياء المتفرقة إللي ما بتلاقينها في أمريكا بسهولة 💔

* قهوة عربية وعدتها، (قهوة / هيل / دلة أو ترمس / فناجيل قهوة).. إذا إنتي من عشاقها أمني نفسك من بدري 😌
وعلى سيرة القهوة العربية، ترا ما بتلاقين هنا أنواع كثير جيدة من التمر، 
* إذا انتي تحبين نوع معين من التمر خذي الكمية إللي تكفيك لأنك صدق ما بتلاقين خيارات كثيرة.

* أقيم البهارات هنا حسب تجربتي (تؤدي الغرض) ممكن تلاقين أنواع جيدة في المحلات الهنديه في أمريكا لكن سعرها أغلى بكثير من سعرها بالسعودية.. فإذا فيه أنواع من البهارات تفضلينها كثير خذي لك كمية 👍

*طبعًا سجادة الصلاة والجلال والمصحف أول شي بالشنطة ❣️ ساعة الفجر راح تعطيك جو في البيت مع صوت الأذان وكمان تعطيك تواقيت الصلاة الصحيحه.

* الشطااااااف.. طبعًا إذا إنتي بتقيمين مدة طويلة في السكن اللي بتستأجريه، ممكن تشترين شطاف من أمازون وتركبينه بعد ما تاخذين إذن من إدارة السكن، وبتلاقي الطريقة كاملة على مدونة أروى العمراني 
وممكن تشترين من ساكو هذا الإختراع اللطيف جدًا يفك أزمة 😍


وممكن كخيار آخر تشترون الـ Travel Bidet 
اللي تكون بهالشكل..

تلاقون هذا النوع في موقع أمازون
وتبتلاقون نفس الفكرة بأشكال وأسعار مختلفة، لكن حقيقةً ما عندي فكرة وين ممكن تحصلونها 😐



امم تقريبًا هاذي أهم الأشياء اللي خطرت في بالي وحسيت صدق مهم أذكركم فيها أثناء ما انتم تجهزون، والموضوع هذا بيبقا محدّث كل ما جا ببالي شي بأكتبه هنا  🌱 
أما باقي الشغلات بتلاقونها في كل المحلات، وفي أمازون وبكل مكان..
 وإن شاء الله البوست القادم راح أذكر فيه أهم المواقع إللي راح تفك لك أزمة وانتي في أمريكا 👍

وقبل ما أودعكم، بس حابة أشكر صديقتي المدونة سرمدية النقاء على إلهامي لكتابة هذا الموضوع 😍🌷
* وإذا تعرفي أحد ممكن يستفيد من الموضوع شاركيه الرابط لتعم الفائدة وكذا 🎅*

وووبس يللاا

فوتتكوا بعافية 🌎✨

__________________


🎀

     
  •  
  •  
  •  
  •  
  •  



4 comments:

  1. شكرا روان على التدوينة ، سعيدة إنج نزليتها ��
    جدا المعلومات مفيدة، التفاصيل الصغيرة اللي ذكرتيها ما كانت بتطرأ على البال

    القطعة الصغيرة اللي تنلبس تحت الحجاب نحن نسميها أمطة ما أدري أنتوا تسمونها نفس الشيء ولا.


    وعلى فكرة وأنا أكتب التعليق اتصلت علي أمي وسألتني نيوجرسي بعيدة عن سياتل؟ لما قالت سياتل تحديدا حسيت ثلج على راسي، شمعنا قالت سياتل تحديدا وفي هذا الوقت، ما أدري وعمري ما سولفت لها عنج ��

    ReplyDelete
  2. ولااااو ما سويت شي ♥️♥️♥️
    إييه على طاري القطعة هاذي قد سمعت وحده بفيديو تقول أمطة بس ما كنت متأكدة منها حسيت الاسم غريب كأنه "قمطة" بس بالمصري هههههه أجل طلع الاسم الرسمي لها 😂👍

    يالله!! جد غريبة لأن مو كثير يعرفون سياتل 😍😍 بس للأسف نيوجرسي في أقصى الشرق وسياتل في أقصى الغرب وبينهم 5 ساعات بالطيارة زي من دبي لباريس متخيلة! 😅

    ReplyDelete
  3. تدوينة مفيدة جداً يعطيك العافية ، الأدوية مأزمتني في بريطانيا كل شي عندهم لازم وصفة طبية 😭 و الافياش عندنا زي السعودية ٢٢٠ اكثر فكرة حبيتها حق الملف الي فيه الاوراق المهمة يبغالي اسوي كذا 💞

    ReplyDelete
    Replies
    1. ربي يعاافيك 😍 صدق ميزة أمريكا كهربتهاـ يعني حتى اللي يبغون في السعودية يشترون أجهزة من أمازون، يشترونها من أمازون البريطاني عشان الفولت 👍

      صدق أنا هنا لمن خلصت مؤنتي حقت الأدوية طلبت من موقع في الهند عنده تقريبًا أغلب أدويتنا في السعودية تطلبين وتنزلين وصفة العلاج ويشحنونها تطول شويا بس تفك أزمة 😅

      Delete

Top