كيف تطبخين الـ مو مقلوبة | Inspired by Maqlooba 🍲

Thursday, October 6, 2016
صباح \ مساء الخيرات لكم جميعًا 🍇

بدايةً أحب أوضح لكم شغلة عني 😁:
إنسانة تحب الطبخ الفري ستايل، يعني شويا عشوائي، ما أعتمد على مقادير مكونات الطبخة، والبهارات أحطها اعتمادًا على حاستي النظر والتذوق 👅
مثال: قبل عيد الأضحى حسيت إنه لازم نسوي مقلقل!! فدخلت موقع كوك باد وقريت طرق كثيرررة لإعداد المقلقل وشفت إجمالًا كيف تتسوى وفهمت الطريقة ويوم العيد فتحت الثلاجة وطلّعت اللي حسيته مناسب والحمدلله ضبطت 🌚💃


المهم،،
<< الله يرزقني كثر ما أقول هالكلمة وأكثر!

يومًا ما مرره اشتهيت مقلوبة! 😢 أبغا مقلوبة أمي 💞
لكن الأكشن بالموضوع إني أستخدم صدور الدجاج فقط مو دجاج كامل، ولا عندي باذنجان ولا عندي كوسة << أهم مقومات المقلوبة 😅 بس أنا أبغا مقلوبة يعني كييييييفففف!!

كذا...



🎶 
🎶
🎶

طلعت نص صدر دجاجة (حق نفرين) 👳👳



🎶

وطلعت خضار مشكلة مفرزنة 



🎶

وقطعت بطاطسة وبصل << لأن -من الآخر- مافيه أكله عربية تتسوى بدون بصل 🔑



🎶

دائمًا أستخدم زيت زيتون بكر << لكن احذري ما يوصل درجة حرارة عالية لدرجة يطلع منه دخان
وحطينا البصل عليه إلين يحمر مدري يصير ذهبي 🌟



🎶



🎶

ما أدري إيش الفرق بين اذا حطيت البهارات عالبصل لحاله أو بعد إضافة المكونات كاملة << ما لاحظت فرق!
المهم حطيت بهاراتي المفضة (شويا ملح بحري | كمون | بودرة ثوم | بابريكا ) << طبعًا كميتي بالنظر كالعادة 😁



🎶

وحطيت الدجاج وقلبتها مع البهارات والبصل إلين لونها يصير أبيض


🎶


  🍅بعدين فجأة جا على بالي أحط صلصة طماطم 
وحطيت مويا بالكمية إللي تغطي الدجاج شويا 

(يعني جد الوضع عالبركة 😂)



🎶

بعدين حطيت البطاطس لأنها شويا تاخذ وقت أكثر من غيرها في السلق إلين تنضج 



🎶

بعدها بوقت حطيت باقي الخضار بعد ما ذاب منه الثلج ❄️
ونقلبها وبعدين نتركها إلين تنضج



🎶

اممم شكل الخضار والدجاج استوت 👌👌



🎶

بعدين حطيت نص كاسة رز (حق نفرين) 👳👳
ووزعتهم على القدر بحيث تغمرها المويا



🎶

 وغطيت عليها القدر << وما ننسى نشيّك عليها كل شويا مو نقعد عالسناب 😅



🎶

اممم اووكي الرز صار مستوي والمويا راحت... يعني صاار جاهز 🔔



🎶

اممم لا تتوقعون منّي أقلبها وأسوي حركات فنية وكيذا،، 
أحط القدر عالطاولة عشان الأكل يبقى حار أكبر مدة وكل من إيدوو إلوو..


الصورة أبدًا مو فنانة والسبب يرجع للجوع 😇
وكانت نتيجة الـ مو مقلوبة لذيييذة 😋
"الحمدلله الذي أطعمنا وسقانا من غير حول منّا ولا قوة"



طيب بالنسبة لطريقة الأكل،،
هل أنتم من الأشخاص إللي تجتمع على طاولة الطعام وقت الأكل -أستثني من السؤال العائلات الكبيرة 😅- وإلّا زي في بيتي ساحبين على طاولة الطعام وتاكلون بالصالة قدام التلفزيون! 🙃 << أدعوا لنا نتخلص من هالعادة 🙏
المهم،،
جربوا تلعبون شوياات بمكونات الطبخة وصدقوووني بتستمتعوووون بنتائج إختراعاتكم 👽💜


يلاا حبايبي،، 
فووتتككوا بعافية 🦄
___________________________


🎀

     
  •  
  •  
  •  
  •  
  •  



1 comment:

  1. حبيت طريقتك انا كمان ماللتزم في الطبخ بس الحلى لازم بالمقدار تصويرك جميل مره

    ReplyDelete

Top