بداية الرحلة 🌄 إبتعاث المرحلة ال11

Sunday, September 11, 2016
بسم الله الرحمن الرحيييييم.. وبه نستعيييين... 💎

أول شي أحتاج أوجه رسالة ترحيبية بالرابط الجديد..  وعقبال النيو لووك إن شااء الله 💅
 ثاني شيء.. اممم مدري وش ثاني شي

بس المهم هنا راح أكمل سواليف رحلة الإبتعاث وأكتب التحديثات الجديدة وش صار و إيش ما صار
عسى إن تكون هاذي المدونة مرجع ليّا مستقبًلا ❤


 باختصااار باختتتصااررر.. تسهلت الأمور رغم إنها طاااااااالت.. وجاني الآي توني وحجزنا موعد مع القنصلية الأمريكية في شهر مايو << عجبتني وأنا أكتبها كذا مايو مايووو مايو أيّار .. إيش أحلى مايو وإلّا أيّار؟ أحس أيّار فخمة كذا أدبية صح!
المهم..
حسب خطتنا.. حجزنا موعد السفارة في شهر مايو.. واحنا سفرنا في أغسطس وبداية دراستنا في سبتمبر

لحظة.. بأكتب الشهور هنا عشان تتضح الصورة..
(يناير - فبراير - مارس - أبريل - مايو - يونيو - يوليو - أغسطس - سبتمبر - أكتوبر - نوفمبر - ديسمبر)

طبعًا من شروط الملحقية الأمريكية إنه استخراج الفيزا ما يكون قبل الدراسة بثلاثة شهور، طبعًا إحنا رحنا قبل الدراسة بأربع شهور وفي بالنا كثير من حلطمة الطلّاب حول تأخر استخراج الفيزا وكنّا نقرا إنها تطول عندهم كثيررر.. فقلناا أوكي نوديها عندهم من بدري وخلهم يتفحصونها ويمحصونها إلين يشبعون 👮
بس إللي حصل.. إنه لمن رحنا وسوينا المقابلة وقال أوكي وافقنا على فيزتكم لكن تعالوا جيبوها قبل الدراسة بثلاث شهور.. وأعطانا ورقة حمراء وعليها تشيك إنه لازم نرسل لهم الجوازات عبر أرامكس في شهر يوليو بتاريخ 18.. حلو!

وتمر الأيام واحنا نخطط ونخطط ونعيد النظر في بعض الأمور المعيشية.. وكمان تواصلنا مع بعض المجمعات السكنية 
بس كلهم أعطونا معدل الأسعار التقريبي وقالوا قبل ما تجون بفترة ونعطيكم معلومات إذا فيه شقق أو ستديوات شاغرة. 🌈
.. جا اليوم الموعود إللي ودينا فيها الجوازات لأرامكس عشان يوصلونها للقنصلية، مر يوم يومين ثلاثة وبدأ القلق وكل يوم الهزبند  يدخل موقع السفارة الأمريكية يشوف حالة التأشيرة ويطلع مكتوب "تحت الإجراءات الإدارية" وهاكذا ومالنا إلّأ الدعاء برمضان وقتها 🙏
عاد وقتها كنّا نقرا عن إللي قعدت فيزته 7 شهور واضطر يأجل دراسته وعن إللي رفضوها فجأة وإللي تأشيرته طلعت مع إنه بالموقع مكتوب "تحت الإجراءات الإدارية".. وزدنا نفسنا حوسة وتشتيت .. إلين جاء اليوم إللي يرسلون أرامكس فيه مسج إنه جوازاتكم جاهزه.. اليوم إللي بعده من الحماس الهزبند ما نام ومن الصبح الساعة 9 أول ما فتحوا راح لهم وأنا نايمة عشان يرجع بالجوازات ويفاجأني << لأني مره كنت مشتطة عليهم 😒
المهم من الوناسة ويطلع الشقة بالدرج 14 دور وهو صايم بعد <<هذا لا قالوا طاير من الفرحه ما شاء الله ههههههه
ويدخل الغرفة ويفتح الظرف إلّا ويلاقي ورقة حمراء مع الجواز .. مضمون الورقة إنه التأشيرة تحت الإجراءات الإدارية وقد تستغرق 6 شهور كحد أدنى
!!
عفوًا 
!!
ويفتح الظرف الثاني وإلّا حتى الجواز الثاني مرتزة معه نفس الورقة 😲 عاد تخيلوا الصددددمممة والتكة والنفسية وقتها 
والله من القهر ما قدرت أرجع أنام! 
يوه ياااربب يعني نكلم المعهد نأجل إلين بعد ستة شهور؟ وإلّا مثلًا نشوف دولة ثانية؟ طب طب كيف!! 😭😭😭😭
بس الحمدلله إنه رحمنا برمضان وكانت وقتها أيام عشر فما قنطنا من رحمة ربي والدعاء 💓 

عاد هااتك ناس تهوّل وناس تشكك وناس تصبّر.. قلنا بس نقفل أذاننا و نكمل بحث وقراءة المجربين..
إلين لقينا أشخاص كاتبين إنهم قدموا على تأشيرة أمريكية من القنصلية الأمريكية في الظهران (أظن) ورجعوا لهم جوازاتهم مع ورقة تفيد إنهم رجعوا الجوازات عشان القنصلية بتقفل لإجازة عيد الفطر ويستلزم على المقدمين إرجاع الجوازات بعد إجازة العيد،، ونفس السالفة قريناها لواحد قدم على التأشيرة من السفارة الأمريكية بالرياض!! 
قلنا أوكي! الحل إننا نسوي نفسنا مو داريين ونرجع لهم الجوازات بعد إجازة العيد.. وفعلًا ارسلناها وبعد مرور أسبوع يمكن جاني وللهزبند مسج من أرامكس إنه تعالوا خذوا جوازاتكم << لكن الفرق إنه الهزبند طلعت له تأشيرة "حسب ما يظهر في الموقع" وأنا لسى تحت الإجراءات الإدارية .. وفعلًا طلعت تأشيرته وأنا لا !!
😭😭😭😭
هنا مو بكاء! لا نحيب هههههههه 
ليششش ما يطلعونها!! مافيه إلًا يطلعونها هههههههههه
تعرفون وش سوينا؟؟
سوينا نفسنا مضيعين وأرسلت جوازي للمرة الثالثة << مع إنهم قالوا ما ترسلها إلّا بعد ما نطلبها منك ههههههههه
لكن..
الحمدلله طلعت المرة الثالثة يمممه يممممه والله إحتفال وش ذي التأشيرة ما صارت 👊
أول ما استلمناها بسرعة نضبط أمور السفر خلاص مافيها هههههه  وتيسرت الحمدلله ياااررب 💖💖💖


ونجهز إصدار القرار وكل شي بسرعة قبل لا يصير شيء بعد! 👻





هرمنا من أجل هذه الورقة 😿


___

__
العصر الجديد 

<< ينفع أكتب روايات وتشابترز وحركات! 👶
عاد صار الوضع جد وقرب موعد السفر وأرجع أتواصل مع إدارات المجمعات السكنية وانصدمت بواحد مرره كان معجبني بس سعره ضضررربب مرره ارتفع يعني خنقول لمن تواصلنا معاهم قالوا سعر إيجار الشهر للشقة من غرفة وحمام هم 1400-1600$
لكن لمن سألناهم عن المتاح في هذيك الفترة أعطونا كم شقة وكلها أسعارها 1600 وشي!! وااات! 
بس كالعادة لازم بلان بي وسي ودي .... إلى مالا نهاية

بعد حجز الطيران حجزنا الفندق لمدة 10 أيام إلين ما نضبط كل أمورنا..



في يوم 18 أغسطس ودّعنا وتوكلنا على الله بعد ما احتفلنا مع عمّاتي 💜
وعلى دبي ترانزيت 19 ساعة





حجزنا بفندق بس من قبلها وأنا تعباانة ومن الإجهاد في الأسابيع إللي قبلها من التعزيل والترتيب تعبت أول ما وصلت دبي << شعور المرض في الغربة شنييييع الله لا يبلى به مسلم 💔

*صورة من دبي* 😂

* إيه على طاري الشطّاف هههههه قبل سفرة تركيا اشتريت شطّاف من ساكو اسمه شطّاف الطهارة أو شي زي كذا للمسافر والمبتتعث << على كلامهم.. طريقة تركيبة سهلة بس كللللل الأماكن اللي رحت لها ما ركبت عليه حتى هنا في أمريكا فحرفيًا ما استفدت منه قاعد عندي زينه*


نرجع لمحور حديثنا،، فترة إقامتي في دبي كانت شينة كنت تعبانة وجسمي يرتعش ومعدتي مشقلبة طبعًا وقتها كنت مواصله ومحتاجه أناام بس من التعب ما قدرت إلا غفوات، واليوم الثاني تحسنت حبتين وسافرنا على سياتل 13 ساعة بالجو..
بس خن أوريكم خط الرحلة.. ولاحظوا الطيارة من فين تمر أوكي! 😂


إيوا نمر من فوق قرين لاند << مع إني ما شفت فيها إلّا البياض بس أوكي نسلك لهم!
المهم إننا نمر من فوق أراضي ثلجية متجمدة واحنا بعز الصيف و أنا لسى في حالة استشفاء لكن لسى فيني توعك يعني ما أبغا أبرد ههههههههه






عاد هنا صدق قمت أحس بالبردد وقمت أرتجف وكأن حالتي ساءت!
<< بس الموضوع جد كان برد ماهو نفسي ههههه باللهي شوفوا بس القزاز الداخلي للطيارة كيف صاير!


ويجي الأكل وآكل عشان أدفى << ودي أعيد التجربة وأنا بصحتي كاملة عشان أتذوقه << يممه جعت 😵


المهم.. قضينا 13 ساعة بالجو واحنا نلحق الشمس ههههههه تخيلوا إن سفرتنا كلها ظهر تكككه تكه .. على قولى رزان كأننا عالقين في الزمن 🎭



ووصلنا سياتل الحمدلله، تسهلت إجراءات الدخول وأخذنا تاكسي وعالفندق.
تجربة الفندق كانت سيئة بحكم إن غرفها خارجية بس تحملت عشان موقعها كان قريب من المجمعات السكنية إللي كنت أبغا أشوفها وعشان إذا نقلت شقتي أصير أحبها وأحس فيها بالراحه أكثر وكيذا 😜
بعدين جتنا صدمة الأكل كنّا نحتاج مطاعم بما إننا في فندق ومافيه مطبخ.. بس وقفنا عند سالفة الخنزير والكحوليات 🐷💔
أول كنّا مرره فرحانين إنه قدام الفندق فيه مكدونالدز بس وقتها كان في راسي معلومة إنهم يستخدمون اللارد في القلي <<طبعًا مؤخرا دخلت موقعهم أبحث لقيت إنه المعلومة مغلوطة لكن كثير مطاعم تستخدمه لأنه أرخص .. عاد أمور الأكل الحلال والحرام قريت عنها في السابق تعمقت فيها كثيررر جدًا وصار عندي وعي حولها واستعنّا بتطبيق "حلال Halal" في التسوق من السوبر ماركت وتطبيق "Zabiha" في التعرف على المطاعم إللي تبيع أكل حلال.. وبالأخير أخذنا حليب وتوست ونوتيلا من تارقت وصرنا ناكل فيها 😤

المهم .. عشان ما أفلّها بالسواليف..🐡
شفنا مجمع سكني ارتحنا له والإدارة  كانت جدًا متعاونة وورونا شقة مودل وورونا المجمع والخدمات وكل شي.. شقتنا كان فيها عيب واحد إنه مافيها غسالة ومجفف لكن جنبها تقع غرفة الغسيل المشتركة << بس أخذنا الموضوع بإيجابية وقلنا أوكي عشان ما تزيد فاتورة المويا والكهربا خخخخخ
قالت الموظفة إن الشقة بتفضى في اليوم الفلاني ورحنا في اليوم الفلاني ووقعنا العقد وقعد أفصفصه ورقة ورقة كان العقد 45 ورقة 😪 أدري كتاب ما صارت! 👵
استلمنا المفاتيح ودخلنا شقتنا وقلنا بسم الله ,, وسجلنا ملاحظاتنا بالصور (عشان ما يحسبونها علينا واحنا طالعين) 
ورجعنا الفندق كان باقي لنا فيه كم يوم.. رحنا تارقت بحكم إنه قريب من الفندق والسكن يعني حق أبو 10 دقايق مشي، واشترينا المنظفات ومقومات الحياة 👍 
أمّا بالنسبة للأثاث جزء طلبناه أونلاين من موقع والمارت (وطلبنا مواعين أساسية جدًا وتلفزيون وطرًاحة -أو ماتريس- ومكينة قهوة اممم يعني بشكل عام الأشياء الثقيلة) .. والجزء الآخر من الأثاث قررنا إنه يكون من آيكيا بحكم إننا نعرفه ونعرف أسعاره وحافظين بضايعه وكمان ميزة أثاثه سهولة الفك والتركيب عشان في حالة قررنا ننقل وناخذه أو نبيعه.. لكن بحكم إن موقع آيكيا مركزهم الرئيسي في كاليفورنيا وإنه الطلب يستغرق 3 أسابيع إلين يوصل سياتل قررنا نروح لآيكيا إللي في سياتل أو إللي هو حقيقةً برا سياتل.. يعني أقل شي نص ساعة روحة مع أوبر ونص ساعة بالقليل مشوار الرجعة..
اشترينا القطع وحملناها الله يعطينا العافية وكلنن بعربيته ومافيه صديق تعال شيل.. ووديناها عن مكتب التوصيل ووصلوها اليوم الثاني، سوينا تشيك آوت من الفندق وأخذنا شنطنا وقرابيعنا وعلى بيتنا الجديد 💌


أول يومين كانت هلاااك ههههههه باختصرها بهالصور





 تنظيف عميق وترتيب الشنط والملابس وتركيب الأثاث وإستلام الطرود
إلين صار بيتنا بيت ولله الحمد ❤

أتوقع هذا كل شيء تقريبا في ما يخص التجربة كاملة، استغرقت الإجراءات أكثر من سنة من بداية التقديم حتى صولنا لمقر البعثة.. كانت تجربة شيقة رغم العقبات والترقب والإنتظار لكل شيء!
شخصيًا قمت أحس بالإستقرار في منزلي الصغير والحمدلله صرت أطبخ ههههههه صار عندنا روتين وإن شاء الله عمّا قريب تبدا الدوامات وينتظم يومنا أكثر.

طيب يا روان نفهم إنه الصعوبات بس كانت في حدود نطاق الإنتظار؟
اممم قررت أسوي سكيب على النفسية إللي جتني أول أيام والهوم سيك ونوبات القلق اللي كانت تجيني وإنه كل شي هنا خايس أبغا أرجع جدة وإلا حتى دومة الجندل أصلا كل السعودية حلوة 😢💚 
وبأسوي سكيب على سالفة الملحقية وإنهم ما أضافوني إلين يومكم هذا وتقريبا عايشين على نص مكافأة <<بس الحمدلله اليوم بالتويتر لقيت هاشتاق عن شؤون المرافقين بالملحقيه وكثير ناس اشتكوا فقاعدين يعالجون القضيه 👋
وبأسوي سكيب على بطاقة الباص إللي طلبناها أونلاين وليومكم هذا ما أرسلوها ولا أعطونا رقم تتبع ولا حتى يردون على الإيميلات 🐍
وبأسوي سكيب على وقف الصرف إللي بينزل هالشهر علينا عشان مادري إيش!!

يعني من الآخر مافيه شي بيرفكت 100% تجربة التغرب مو شي سهل بالذات إنه بعد بكرا عيد الأضحى (أو بكرا عيد الأضحى بتوقيت السعودية) واحنا بعيدين عن أهالينا ⚠

بس ربي يعدي هاذي الأيام ويمتعنا فيها على خير وصحة وسعادة ويردّنا لأهالينا لا فاقدين ولا مفقودين 💐
*صح تذكرت ترا اليوم عرفة والساعة عندنا حاليًا 1:27 الظهر،، والجزء الآخر من العالم فكّوا صيامهم وقاموا يتجهزون للعيد والأضاحي، بالليل بتوقيتنا راح نكلمهم ونعايد عليهم بعد ما يذبحون خروفهم* 😍 💕

🐑 🐑 🐑 🐑 🐑 🐑
يللا فوتتكوا بعافية 🐏🍗

3 comments:

  1. الله ييسر أموركم
    ويسهل عليكم غربتكم
    وترجعون بالشهادة اللي ترفع الراس
    استمتعت في تدويناتك .. استمري

    ReplyDelete
    Replies
    1. ربي يسعدك إيمان ويعطيك أضعاف دعواتك الجميلة 💕
      نورتي المدونة كلها،، وسعدت أكثر لمن عرفت إنك مترجمة 💟

      Delete

Top