هل اكتشفتي هوايتك الحقيقية؟ 🔮

Wednesday, March 14, 2018

بعد 17 سنة دراسة متتالية؛ قررت فور حصولي على وثيقة تخرجي من الجامعة إني أوقف الركض ورا الشهادات، أشيل من راسي فكرة الوظيفة إللي تأخرها يسبب هلع لكثير من الخريجات.. قررت إني أتفرغ لنفسي! 
يمكن الفكرة ما تكون مفضلة عند كثير من البنات بسبب الفكرة المغروسة حول ارتباط الوظيفة أو الدراسات العليا بالشعور بالإنجازية في الحياة. لكن تسهل لي الهروب من تهم البطالة من المجتمع اللي حولي بسفري كمرافقة لزوجي إلى الولايات المتحدة 
مرّت سنة وكانت من أجمل السنوات اللي بحياتي على المستوى الشخصي والنمو الفكري! 
تعرفون شعور اللي تصيرين تشوفين كل شيء من زاويتك الخاصة، بعيد عن آراء المجتمع الافتراضي والمحيط اللي حولك، تعرفت على نفسي أكثر  صدق والله طول حياتي مشغولة والحياة تركض! أول مره أصير أفكر بنواياي إتجاه أفعالي، أفكر بدون ما أربط نفسي برأي الأغلبية، أفكر بالأسباب العميقة لمعظم آرائي، عرفت إيش الأشياء اللي حقيقي أكره إني أسويها وعرفت الأسباب المنطقية اللي تخليني أتجنب أسويها زي مثلا اكتشفت إني أكره الجري والهرولة  في المقابل المشي هو رياضتي المفضلة. اكتشفت جوانب كثيرة ومهارات مدفونة كان يخفيها الإنشغال. ومن أبرز الأشياء اللي سلطت عليها الضوء خلال هالفترة هو اكتشاف مواهبي وهواياتي الحقيقية 
من أصعب الأسئلة اللي كنت أنسئل عنها في السابق هو (إيش هواياتك المفضلة روان؟)  ااا مدري اامم يمكن السباحة! << اوكي صحيح السباحة والرماية وركوب الخيل تعتبر من الهوايات اللي تنقال عالماشي ههههههههههههههههه 
بس من كنت طفلة كان أبويا حريص يعلمنا أنا وخواتي اللي أصغر مني السباحة، وكنا نروح فندق صلاح الدين بالرياض ونسبح هناك مع الرجال قبل ما ندخل الحضانة  وبعد ما كبرنا حبتين ودخلنا المدرسة صار مسموح لنا نسبح في المسبح الكبير في نادي ضباط القوات المسلحة اللي كنا نروح له كل ويكاند، وكنا نسبح ونلعب وشويا نتعلم ومن هذيك الأيام وأنا أسبح وأتعلم ذاتيًا حتى تعلمت الغوص في المسبح اللي يعتبر بمساحة مسبح أولمبي  يعني لمن أقول أنا أحب السباحة ترا صدق I mean it بس انقطعت عنها بسبب ظروف السفر وانه مافيه نادي ضباط في جدة هففف 
لكن أبغا شيء شيء يعني شيء مختلف، أكيد فيه أشياء في الحياة تتسوى في البيت، أكيد فيه شيء أحب أسويه لمن أكون طفشانه (غير الرقص قدام المراية )..
امممم
من الأشياء اللي تستهويني هو التواصل مع أشخاص جدد، ناس ما أعرفهم، أتخيل كثير إني أشتغل بوظيفة فيها حل مشاكل للناس  أو إني ألتقي بناس ما أعرفهم ونسولف سواليف عميقة ونتبادل النصايح والكلام الحلو ونفترق.. اللاااااه فييه وظيفة كذا؟ اممم لكن يبدو انه مو هذا الشيء اللي ينقال عنه هواية 
بعد عدة محاولات لاكتشاف مواهبي المدفونة، اكتشفت إني بشكل عام أحب الأشياء الفنية اللي فيها ابداع ولمسات شخصية! بس لسى ما عرفت بالضبط إيش الشيء اللي مررره أحبه وأنبسط فيه.. كل فترة أطيح على شيء وبعدين تدريجيًا أسحب عليه وأنتقل لشيء ثاي ويللااااا.. 
طبعًا اكتشفت إني ما أميل كثير لتصميم الأزياء رغم محاولاتي للانخراط فيه، لكن نفسي كمان أجرب الخياطة مرررره بس لسى ما حصل لي أتعلم على مكينة (للمعلومية: أنا بالثانوي اخترت إني أدرس خياطة كمادة عملية وكان في فصلنا 5 بنات لأنه كانت متنشره فكرة ان اللي تحب الخياطة قرويااه هههههههه أنا كنت قروية بجدارة وتاخذ درجات كاملة على خياطتها  بس هالكلام صار له أكثر من 8 سنوات أتوقع يبغالي إعادة تهيئة ) وكمان نفسي أتعلم الكروشية كثير أتحمس له . حبيت مجال التصميم الداخلي وعلمت نفسي بهالمجال كثيير وبدأت في دورة للتصميم الداخلي لكن ما كملتها.. وعلى طاري الدورات نفس الشيء ينطبق عالتصوير؛ تعلمت كثير وأخذت شهادة في التصوير وكنت متحمسة آخذ الثانية بس امم مدري تثبطت فجأه وما كملت الدورة الثانية  المهم إني إلين الحين ما عرفت إيش هي هوايتي الحقيقية!
لكن إللي لاحظته على مدى السنتين اللي فاتوا إن أكثر تجاربي تدور حول الرسم، كل ما مليت أتجه لنوع مختلف لكن برضو أرجع له كل فترة.
جربت أرسم في السابق بالألوان الشمعية الوستريشنز وكانت ممتعة وعفوية، وجربت أرسم بالألوان الخشبية وبعدين طحت على الألوان الخشبية اللي تتحول مائية (ما زلت للحين أستخدمها وأحبها ) ومنها تحولت للألوان المائية إللي اكتشفت من خلال رسمي بيها إني أرسم بطريقة يناسبها لو رسمت بالأكريلك أكثر من المائي.. وبعدين اشتريت تابليت الرسم Wacom Intuos pro Medium واللي فتح لي عالم آآآآخر وتعلمت من خلاله أكثر عالفوتوشوب وخشيت جو بالرسم فيه والتعديل وتطبيق الكولاج وسويت اليستروشينز وما زلت أتعلم عليه (يكفي إن اللوقو حق مدونتي والأفاتار حق حساباتي كلها كانت في بداياتي الفنية اللي أفخر فيها والله ) ومن الحماس حملّت على جوالي تطبيق Autodesk SketchBook واللي قاعدة كل فترة أحاول أشخبط عليه وأرسم صورة بتعبيرات مختلفة براسي.. لــــكــــــــن .. ميزة / مشكلة الرسم إنه ماراح تتطورين فيه إلّا بالممارسة والتعديل المستمر وإنه يكون عندك ذاكرة تصورية اللي ما قدرت للحين أتقنها لرسم اليد والخشم  كل شيء يكون في الرسمة اوكي إليييييييييييييييييييين ما أوصل عند الخشم يووووه تدريجيًا أرسمه كذا  مع خطين فوق كجسر الخشم!
أو اليد!  اللي يتابع البينترست حقي بيلاقي أغلبه صور طرق رسم اليد (الله يرزقني على كثر ما أحفظ هالصور بدون تطبيق!)
لمن أرسم تتحول اليد كذا ( امم مالقيت شيء يشبه اليد اللي ارسمها، بس عالعموم باحط كل رسوماتي بنهاية الموضوع).
بس لمن أفكر بالشيء اللي أشتهي أسويه لمن أكون طفشانه أو متضايقة يجي في بالي بعد جهد جهيد الكتابة، صحيح أنا أشوف الكتابة كأسلوب تعبير وتنفيس أفضل من الرسم في بعض الأحيان! بس ما أدري إذا فعلا أقدر أعتبرها هواية بجانب التدوين  أحب أعبر وأتفنن باختياري للكلمات، بس مو بالطريقة الفصيحة البلاغية المتوقع من الآخرين يلاقونها إذا قلت لهم أحب الكتابة  الكتابة بالفصيح جمييلة ولها رصانتها وجربت أكتب بالفصيح في تدوينة سابقة  وما أنكر إعجابي فيها، بس ما أحس الكلام هذاك ممكن يطلع في أي وقت عشان أقدر أسميه هواية..

خلاصة الكلام، 
هل عندكم هوايات حقيقية تحسون إنكم تنعزلون عن العالم أثناء ممارستها وتستهلك طاقتكم وعلى قلبكم زي العسل؟ تتمنون لو وظيفة أحلامكم فيها الكثير من جمال هاذي الهواية؟ أنا تقريبًا لقيت ميلولي لكن حتى الآن ما لقيت الشيء اللي أفرغ فيه  بالمعنى الحرفي لها.. أتمنى ألاقيها قريبًا ..                   ألحين أخليكم مع تجاربي الفنية 



*سكتش سريع لشخصية فؤاد في طاش ما طاش رسمتها بالفوتوشوب كان مفروض تكون هالرسمة جزء من أحد المشاريع التي لم تكتمل  من الرسمات المحببة لقلبي*



*كولاج سويته قبل سنه سميته "المنافقات" هههههههههههه لو تركزون في تعابيرهم بتستوعبون الفكرة أكثر*



*رسومات الفضاء والسماء هي أكثر رسومات أرسمها، مو بس عشاني أحبها؛ كمان لأن تداخل الألوان المائية فيها يعطي منظر يسحر *



*كانت أول تجربة لي بالرسم الحر.. واضح فين الجزء اللي تحمست وبدعت فيه أكثر *



*وقت ما كنت طايحة في التصميم الداخلي استوعبت إنه عندي مشكلة في تصور الأبعاد، وهاذي الرسمة كانت تجربة عشوائية في تطبيق أحد التقنيات لاتقان الأبعاد في الرسومات*



*رسمة للشخصية المفضلة للهزبند  رفيكي*



*كذا فجأة اشتهيت أرسم رجول نونو  أحب رزوول النونوات الصعيلاااه*



*رسمة عالسريع من مخيلتي  مخيلتي اللي ما قدرت تعطيني صورة صح للخشم واليد يااربي*



*رسمات استوحيتها من بنترست، استمتعت برسمها *

*رسمة من مخيلتي  يحتاج أقول لكم كمان الجزء اللي مخيلتي ما تساعدني فيه؟*



*ختامًا مع هاذي الرسمة اللي كانت عبارة عن أفكار أكثر من انها صورة في الخيال جسدتها بهالشكل.. مين الشاطرة اللي تقدر تفسرها؟ 







فوتككوووا بعافية 



            
  •                        
  •                        
  •                        
  •                        
  •                        





6 comments:

  1. لديك موهبة عظيمه وحس فني جميل �� استمري في الرسم واتحفيني بتدوينه مستقبليه تستعرض جديدك واسلوبك الفني الجميل ⚘

    ReplyDelete
    Replies
    1. مررره شكرًا على كلامك المحفز 💕
      ممتنة للطفك 🌷

      Delete
  2. روان استمتعت😍 صح الواحد يتعب لين يلاقي شغفه انا ممكن احس القراءة اكثر شي ممكن يلفتني ✨❤️.رسوماتك رهيبة ماشالله واحس لو كملتي وفتحتي مشروع جدا رهيب وهذي الاشياء هي اللي تجذبنا هالفترة الفن والخط كمان وكل التوفيق ❤️

    ReplyDelete
    Replies
    1. جمييل إنك لقيتي شغفك، أتمنى أحب القراءة بس للأسف الكتب نفسها هي اللي تحببني فيها أو تكرهني ما قدرت أحدد شعوري إتجاهها..
      ومرره شكرًا على لطف كلامك، أتمنى إني أستغل أحد مواهبي تجاريًا لذلك قاعدة أبحث عن شغفي الحقيقي 💓

      Delete
  3. جميلة جداااا مثل روحك الحلوة .. جربت تشوفي فيديوهات في اليوتيوب لطريقة الرسم افضل من الصور ؟!!
    لان اختي مثلك الحين ماشاء الله عليها رسمها خيالي .. ديجتال ارتس والحين ماشاءالله عليها صارت ترسم عيالها ورسمت اختي الثانية .. وكذا هو بالممارسة رح يتطور

    استمري وابدا لا توقفي صدقيني بتوصلي للي تبيه بيوم من الايام ..

    ReplyDelete
    Replies
    1. فعلًا الممارسة والتعلم الذاتي مرره راح تطور بس مشكلتي الأزلية هو انتقالي كل فترة لشيء جديد ☹
      يعني هالفترة مرره كنت أحتاج سيلف بورتريه أحطها في المدونة بدال الحالية هاذي بس ما كان لي مزاج أرسم وأتعلم فقررت "أعطي الخباز خبزه" وتواصلت مع رسامة تنفذ التصور اللي في بالي
      💔

      Delete

Top