بدأتِ في التدوين؟ أحسنت! استمري 👏💭 | تجارب ونصائح 🔮

Tuesday, January 30, 2018


احم احم.. ايش اليوم؟ 
31 يناير!
واللي يوافق ذكرى إنشاء مدونتي 😍 وصاار عمر مدونتي سنتيين!!! 💃🎊🎉🎇🎆
*صوووت زغرووطة طوييييييييييييلة* 

في مثل هذا اليوم من السنة اللي فاتت كتبت تدوينة بعنوان "أشياء كنت أتمنى أعرفها قبل ما أبدأ في التدوين" 
كتبت فيها خلاصة تجربتي بعد مرور سنة، لذلك لو كنتِ مدونة أو ودك تفتحين مدونة وما قريتيها؛ وقفي الحين وروحي اقريها وبعدين ارجعي 😌👏

رجعتي..؟ 
يللا نكمل سواليف 😍😘💕


على إنه النقاط اللي كتبتها كانت تجربة سنة وحدة فقط! إلّا إني كل فترة أرجع لها وأأكد كلامي عليها..
حقيقي الحمدلله صارت تطورات كثيير على مستوى المدونة والتدوين، أولها وأهمها كان قالب المدونة 😃
على إني كنت مرره طايرة في القالب السابق وأحس ألوانه فيها طاقة ومبسوطة إنه من شغلي المتواضع وعرق جبيني وكذا؛ كنت أتحطم لمن تجيني وحدة تقول الخط مو واضح أو الخلفية مزعجة أو الخطوط حقت الخلفية تشتت لأني ما كنت أشوفها كذا في المتصفح حقي <<< وأصلًا مدونتي زي البيبي حقي ما أرضى أحد يقول عليها شيء أحط الخلل في الطرف الثاني 😑
ههههههه ما عليكم تصرفي طبيعي لكنه ما كان في صالحي 😅 لمن أحد صحباتي الثقات قالت لي هالكلام استوعبت هالنقطة! وتذكرت إنه صح والله كذا وحدة قالت لي على نقطة القالب.. أحتاج أستشير أحد مختص وأثق بذوقه 😼
ورحت عند هيا البلوي الله يسعدها ووأخذت رأيها وطلبت منها تصميم القالب الحالي وطلعنا بنتائج مرررره جميلة زي ما انتم شايفين 💅
أمّا بالنسبة للوقو احتفظت فيه لأنه جدًا يعبر عني وعن مدونتي، وقررت أسوي هيدر قريب من شخصيتي بس أهدّي اللعب شويا بدوون حفلة ألوان 😂 
وسويت لي ملف في بينترست عبيت فيه صور أشياء تشبهني وستايلات ملابس وستايلات غرف وكل شيء يمثلني وحاولت أعبر عنه بكلمات بسيطة وطلعت بـ (هادي، قوي، كلاسيك، أنثوي) وجلست أجرب أسوي تصاميم تعطي نفس المواصفات اللي طلعت معايا، وتعلمت تكنيكات جديدة عالفوتوشوب -وبمساعدة من الهزبند لا عدمناه 💖- وطلعت بنتيجتين كانت متقاربة.. الأول كان فيه رسمة لأوراق شجر مسوية زي الريث wreath، والثاني هو الحالي واللي حسيته أقرب لذوقي أكثر ✌😻

لاحظت إنه بعد ما غيرت القالب والهيدر زاد حماسي للتدوين 😍 تعرفون شعور لمن تغيرين غرفتك وتصير على مزاجك مررره ودك بس تقعدين فيها طول الوقت وتقعدين تصورينها بكل مكان ودك تسوين عزيمه فيها 😅 هذا شعوري.. رجع حماسي للمدونة أكثر وصرت أنشط أكثر فبالتالي زاد عدد قراء مدونتي  (الشيء اللي تتمناه كل بلوقر) 💖
 ومع الوقت رجع لي الاحساس المحبط اتجاه اسم مدونتي، أحسه مرره بيسك مرره عادي مررره! وذكرت هالشي قبل سنة 😅 اوكي مدونة روان.. 
واسم انستقرامي مدونة روان واسم حسابي في السناب مدونة روان.. طيب حساباتي أصور وأكتب فيها عن نفسي وعن أحداث ويوميات حياتي مو عن مدونتي! 🤕 مع إني وقتها وصلت مرحلة صارت تدويناتي تطلع فيها الصفحة الأولى من بحث قوقل لكن كان فيه كثير مدونات في الوطن العربي اسمهم روان << حتى لو كانت مدوناتهم مهجورة من عام الفيل بس فكرة إنه فيه أحد غيري يشارك مدونتي الاسم كان يعطي شعور محبط شويا 😕 اوكي مو شويا!
فقررت في شهر نوفمبر إني أتخذ القرار وأغير اسم مدونتي، حسيت إني لو ما غيرته الآن ماراح أقدر أغيره بعدين 😐✋
لكن هالمرة ماراح أكرر الغلطة وأتسرع في اتخاذ القرار، باخذ وقتي في التفكير أكثر..
أول شيء خطر في بالي هو اسم مستعار للمدونة، في البداية قررت أسمي مدونتي Rawan's بدون بلوق.. يعني روان + S المُلكية عشان ترتبط بكل شيء يختص فيني.. بأصير زي Mcdonald's  أو Macy's أو اسم محل التشوكليت المفضل See's 😍
Rawan's وااااو تحمست مره للفكرة، لكن لمن جربت أحط الاسم في الدومين لقيته مأخوذ، وفي الانستقرام مأخوذ والتويتر كمان مأخوذ 😕💔 فأزلت الفكرة من راسي لأني أحب أوحّد أسماء حساباتي وكل شيء!
 بعدين فكرت بأشياء حسية أو مادية أحبها، 
طالما تبهرني المجرة والفضاء، أبغا مسمى بجمال الفضاء وسحرة، وأبغا مدونتي تتسع لمواضيع بحجم الكون! 
<< لدرجة قمت أبحث في قائمة المصطلحات المستخدمة في موقع ناسا 😅
طلعت بمصطلح Nebula 😇 نيبولا هي السديم أو الغازات اللي تتجمع وتتشكل وتتلون في الفضاء بألوان جميلة تعطي شكل يسحرررر، المصطلح نفسه جديد عليا لكن الظاهرة نفسها أو التكوين مملية الصور في استديو جوالي 💓
وطبعًا شاورت واستشرت، فتبين لي إنها فكرة غير سديدة لأن الاسم مو سهل وحروفه خفيفة ما تنحفظ بسهولة وبيلخبط..
فرجعت لخياري الأول، أبغا Rawan's! كيف يعني! 😤
فقررت أشقلب فيه وأروح يمين ويسار وقررت اسميها The Rawanz! 🎆
ولقيت الاسم متاح بكل مكان الحمدلله <<خير بعد تخيلي أحد يسمي حساباته ذا روانز 🍼
بس الحمدلله تم تغيير الاسم في كل الحسابات << ما عدا السناب تشات 🐸
ولمن جيت أغير الاسم في دومين صارت حفلة طويلة عريضة!
لأني إذا غيرت الاسم راح تطير كل الروابط في قوقل وغيره من المواضيع، لكني جازفت وغيرت وفعلًا كنت كل ما أكتب اسم موضوع لي في قوقل يطلع بالرابط القديم ولمن أفتح الصفحة يطلع "الرابط معطوب" 💔 كانت العبارة قاصمة للظهر 
واضطريت أعتكف يومين متواصلة عاللابتوب أتعلم كم درس في البرمجة عشان أثبت مدونتي وأعرّفها في قوقل وأقدر أرجع مواضيعي السابقة بالرابط الجديد بشويا مساعدة من مبرمجين قوقل.. كانت تجربة مو سهلة لكن الحمدلله فاقت النتائج توقعاتي 💖
وبطبيعة الحال كمان غيرت الهيدر حق المدونة مع المحافظرة على نفس الستايل كما يظهر أعلاه 👅

هذا فيما يخص الشكل الخارجي..
🎶
أما لو نبغا نتكلم عن المحتوى 💭

فمدونة شخصية أو نمط حياة زي مدونتي تصنيفها يتيح لي مواضيع كثيرة للكتابة فيها، عندي قائمة أكتب فيها كل ما خطر في بالي من مواضيع تحتاج كتابة أو تشدني بشكل عام، جتني فترات كنت جدًا متحمسة ونشيطة في التدوين وفي المقابل مريت في كثير من المرات بفترات كان تركيزي كله وتفكيري يفضل الإنشغال بأشياء ثانية ومرات نادرة يفضّل إنه يكون فاضي وما ينشغل بأي شيء 📂 
طبيعي، جدًا طبيعي.. لأن مصيري أقوم أصحصح وأرجع للتدوين حتى لو بس أكتب مشاعري وافضفض باللي مشغول عقلي فيه وبهالطريقة أضرب عصفورين بحجر 💕

إذا فاكرين في الموضوع الأول حق التدوين كتبت عن نقطة البداية، 
وقلت اسألي نفسك أول شيء إيش هدفك من التدوين! حقيقي لازم تكونين صادقة مع نفسك في هالنقطة لأنه نيتك هي اللي راح تكون الوقود إللي يحركك للكتابة والتدوين. كل ما كان هدفك شخصي كل ما ضمنتي استمراريتك في التدوين.
وكل ما كان هدفك شهرة أو عدد قراء أو أي شيء يرتبط بجهة ثانية فتأكدي إنه بتمر عليك أوقات كثير تشككين نفسك فيها وعن مواصلة التدوين.. ⚠ نقطة مهمة: من الجيد إنك تفتحين نفسك على تدوينات كثيرة وتشوفين منها إللي يعجبك سواء شكلًا أو مضمونًا هالشيء راح يطور من آداءك كمدونة لكن خليك حريصة لا تطيحين في فخ التقليد لا شعوريًا، انتبهي لا توصلين للمرحلة اللي تفقدين فيها نفسك لأنك راح تتعبين كثير من المجاراة .. كوني انتي، اكتبي باسلوبك، عبري عن أفكارك، تميزي باختلافك 💫
كلامي لك ما أبغاه يكون محبط بقدر ما إني حريصة أخليك تستوعبين هالنقطة وتتداركينها لو إنتي واقعة فيها 🌹
لأني في المجال هذا على قد ما تعرفت على مدونات كثيير كانت راااائعة إلّا انه كثير منها اختفت، مع مرور الوقت انعدم فيها التدوين لأسباب كثيره وأهمها اللي ذكرتها في الأعلى 🕳

بالنسبة لي، كان هدفي الأساسي هو توثيق أحداث مهمة وتجارب من حياتي ومشاركتها للقراء باسم روان، حتى في بعض التجارب الشخصية اللي حسيتها قربتني أكثر من القراء كان هدفي هو مجرد المشاركة بالذات التجارب والمواقف الصعبة لأني أعرف الشعور الحلو اللي يجي لمن أقرا عن تجربة أحد حاس بنفس شعوري ومر باللي مريت فيه ويقدر يفيدني بتجربته!
حاولت أكون بعيدة كل البعد عن الاستهلاكية والتسويق  (إلّا إذا لقيت شيء من وجهة نظري فعلًا يستحق المشاركة ويمثلني بالدرجة الأولى 👶)
فطالما إنّي على قيد الحياة، فأنا أمر بتجارب وأحداث كثيرة، ومؤخرًا أحاول أطلع كثير من دائرة راحتي وأخوض تجارب ومغامرات جديدة وأمر على أحداث تستحق مشاركتها في المدونة 💖
 فإن شاء الله وقودي في التدوين يكون مستمد من طاقة متجددة 🌞🌀



عجبتني فكرة الطاقة المتجددة! 
خليها وقودك في الحياة كلها مو بس التدوين يعتمد على طاقة متجددة 💌

وفوتككووا بعافية ⛽🚀
____________________

🎀

         
  •          
  •          
  •          
  •          
  •          






20 comments:

  1. ما يميز مدونتك هو اختيارك للمواضيع الهادفه �� واسلوبك الشيق في الكتابة ✍ الذي يتميز بأنه بعيد عن المبالغة في استخدام الكلمات
    والمصطلحات فلذلك كلامك يوصل للقلب مباشرة ❤ واصلي ابداعك وطرحك المميز دائما روان ��

    ReplyDelete
    Replies
    1. هذا الكلام هو اللي يصنع يومي ويحمسني أكثر على المواصلة ومشاركة تدويناتي 💓
      مرره يسعدني إنه تدويناتي تعجبك 💖

      Delete
  2. ازين من يدون ياشيخه
    سنه حلوه يابيبي ، اهنيك والله مدونتك من أكثر المدونات المحبوبه لي ، فيها ارياحيه عجيبه ، واسلوبك لطيف
    التدوين شيء جداً جميل وملهم للمدون بالدرجة الأولى ، مجازفتك شجاعه وثقتك بنفسك بطله ماشاء الله عليك ، فعلاً لازم البداية تكون واضحة حتى ماتتقروشين بعدين ..
    بس حبيت التغيير

    ReplyDelete
    Replies
    1. يسسسعد قلبك حنين والله بعضًا مما لديك 💓💓💓
      مرره أسعدني كلامك شكرًا شكرًا شكرًا 💗😭

      Delete
  3. كل سنه ومدونة روانز ناجحة وبطله يارب ماشاء الله عليك من المدونات الشغوفات الي روحهم حلوه وتحسسينا بالفرح دايما ربنا يسعدك ويوفقك وعقبال ماتحققي كل احلامك وامنياتك سنه سعيده ومنجزة بإذن الله ❤️

    ReplyDelete
    Replies
    1. ربي يسعدك إيمان على هالأمنيات الحلوة 😍💖
      مرررره شكرًاااا 💘💘💘💘💘💘😭

      Delete
  4. سنه جميله لك ولمدونتك اللطيفه. انا كمان استعنت بهيا البلوي في القالب الله يسعدها مره فادتني😻💕، وع طاري الاسم انا حاليا امر بهذا الشي مدري ايش اسمي مدونتي مو عاجبني الاسم الحالي 😐💔 .

    "كوني انتي، اكتبي باسلوبك، عبري عن أفكارك، تميزي باختلافك"
    جميله هذي العباره فعلا ماحد يحتاج نسخ مكرره، الموجودين يكفو، الجمال يكون بالاختلاف ولازم الواحد يفرق بين الالهام والتقليد نقطه مهمه مره ذكرتيها برافو 💕🙏🏼

    ReplyDelete
    Replies
    1. يسعدك ربي غيداء على كلامك الحلوو💖
      وفعلًا حاسة بشعورك اتجاه الاسم مررره مو شيء سهل أحس يحتاج توصلين لمرحلة الصفاء الذهني عشان تختارين الاسم المناسب لك واللي تكونين مقتنعة فيه 100% 👌
      وشكرًاا مره ثانية على تعليقك اللطيف 💖🌹

      Delete
  5. يا رب عقبال تكتبين لين 100 سنة وأكثر 😆
    من التدوينات المضافة لقائمة المفضلات عندي 👍
    حبيت قصتك واهتمامك بمدونتك الي خلاك تتعلمين أشياء جديدة ومفيدة تفيدك في أكثر من مجال ماشاء الله
    بالتوفيق يا رب, وسدد الله بنانك💙

    ReplyDelete
    Replies
    1. اللااااه يسعدني إنه مدونة رهيبة زيك تعد مدونتي من مفاضلاتك 💓💓
      مرره شكرًا لك على الكلام الحلو والدعوات اللطيفة 🌹💕

      Delete
  6. وااو مستحيل امر من تدوينة متعوب عليها مثل تدوينتك وما اضع تعليق ، استمري ، ترى عندك متابعين

    ReplyDelete
    Replies
    1. مرررره شكرًا لك وأقدر تعليقك كثيررر 🌷

      Delete
  7. كل عام وانتي من افضل لافضل 🙊💖💖
    احب تدويناتك جدا 😴🍃🍃

    ReplyDelete
    Replies
    1. يسعدك عفااف مرره شكرًا على كمية الكياته اللي قاعدة أشوفها في تعليقك 💖💖💖😭

      Delete
  8. هلا والله يا أجمل من يدون كلامك كله صح الصح انا حاليا غيرت اسم مدونتي وغيرت تفاصيل في الصور وهدفي مثلك انقل تجاربي للغير توي لي سنه تقريبا حاسة نفسي بسبح في التدوين ماتشطرت لمرحلة الغوص العميق بس حاسة بإذن الله انها حتكون شيء جميل لأني بطور وأفكر فيها دائما لانها زي ماقلتي مني وفيني ما ارضى لها الا كل حلو❤️

    ReplyDelete
    Replies
    1. جمييل أتمنى أقول لكل أحد أقابله عن تجربة التدوين لأنها مو بس فيها إفادة لغيرك! كمان تعطي شعور ممتع، شعور لذيذ لمن تضغطين على زر "نشر" 😍💕
      أتمنى لك ولمدونتك الإزدهار دائمًا بشاير 💫

      Delete
  9. مدونتك يا روان من المدونات لي أحبها بقوة صراحة، أسلوبك في الكتابة و التعبير عن أفكارك جمييل و خفيف على القلب و شخصيا كثير رجعت لتدويناتك و استفدت منها. بخصوص التدوين فعلا يحتاج هدف و نية صادقة علشان الاستمرارية تكون. و الاجمل مثل ما قلتي لما تلاقي أحد يشارك تجربتو بصدق عن موقف صعب قل الحديث عنه. و هذه أجمل غاية و هدف

    ReplyDelete
    Replies
    1. ربي يسعدك هاجر ممررره شكرًا على كلامك اللطيف 💕
      حقيقي حسيت نقطة النية والهدف الأساسي هي اللي تحدد إذا البلوقر راح تستمر والا بتتعب وبتوقف خلال وقت قصير!

      Delete
  10. جداً حبيت كلامك في التدوينة و حسيت و أنا أقرأه إنه طالع من قلبك 💕 و هابي بيرثداي لمدونتك الجميلة 🎉🎉

    ReplyDelete
    Replies
    1. يسعدني إنه وصلك هالشعور 💕
      شكرًا يا لطيفة 😍💓

      Delete

Top