كيف استعدت نضارة بشرتي بعد ثلاث شهور من السفريات المتواصلة 💣 | تجارب ونصائح 🎁

Thursday, November 30, 2017

طبيعي طبيعي جدًا خلال السفر والتنقلات وركوب الطيارات وتغيرات الجو المفاجئة ومع اختلاف الروتين وكل شي، فجأة بشرتك تقلب عليك 😃 مو شي جديد منها الله يصلحها للأبد بسسسس
طبعًا هذا الشيء حصل معايا في إجازة الصيف سافرت كثييير وكل فترة وأنا بمكان وكل فترة يضطر روتيني يتغير، مسكينة بشرتي جتها صدمة.. عاد وقتها ما كنت مستوعبة شكثر كانت تعاني لأني كنت مضطرة أحط ميك آب بشكل يومي، حتى لو بس كونسيلر وأرسم عيني وحواجبي في أبسط اللوكات << طبعًا هذا كمان أحد الأسباب اللي صدمت بشرتي 😅 يجي نهاية اليوم اغسل وجهي وأنظفه وأحط راسي وأنام.. وبععدين أصحى وأتمكيج ويلااااا سرا الليل 😆
 طبعًا ما استوعبت اللي حصل إلى بعد ما رجعت بيتي في سياتل،  كنت متعوده إنه أقعد بعض الأيام بدون شي على وجهي عشان أخلي بشرتي تتنفس هوا ربنا 😅 بس لاحظت إنه هالاتي وقتها غمقت، طلع لي كلف من حيث لا أحتسب ولا تهون الحبوب كان فيه كم وحدة موزعة بوجهي 😮 
صحيح إني ما كنت ذيك المصدومة لأنه شيء جدًا متوقع بالذات مع العزايم وخربطات الأكل! بس حسيت بالمسؤوللية الحقيقة إنه لالالالا صار لازم نشتغل شغل حقيقي 🚶‍♀

1- اعتمدت غسول واحد للبشرة..
اخترت يكون فيه حبيبات صغيره ويكون لطيف عالبشرة وصار هو الوحيد اللي عالمغسلة، ما حبيت أجرب كذا شيء بنفس الوقت وبعدين ما أدري أيهم إللي بتكون منه الفايدة والا الضرر لا سمح الله.. والسبب الثاني عشان ما تكرفين البشرة بالغسولات وترهقينها بالصوابين وبعدين تقلب عليك وتصير مدهنة أغلب الوقت عشان تعوض الدهون إللي تزيلينها بكثرة الغسولات << يارب نقطتي وضحت 🤲..
بالنسبة لي كان بمحض الصدفة وبطريقة شبه عشوائية اخترت هالغسول من جونسون بس حبيته مرره أحسه يصحصح وجهي في الصباح وينقيه من قلبب وريحته حلوة << في أجمل! 😍


طريقتي، كانت بعد ما أتوضى بمويا عاديه أوزع الغسول على أطراف أصابعي وأسوي مساج وآخذ وقتي بهالخطوة 💆‍♀ بعد ما أخلص أحط المويا عالبااااارررررد وأغسل وجهي كم مره وأتأكد إنه ما بقي شي من الغسول على وجهي << طبعًا ما فيه معلومة طبية تثبت إنه المويا الباردة أفضل للبشرة من الدافية، بس حسيت انه هالطريقة تعطيني شعور بالانتعاش وكذا 😻 وأختمها بطبطبة المنشفة على الوجه.. and I'm ready to go 


2- الترطيب، الترطيب، الترطيب..
هذيك الفترة كنت أول مره أجرب فيها زيت جوز الهند لبشرتي، كنت أسمع وأقرا كلام كثيير يحمس عنه وعن فوائده.. بس حقيقي انصدمت إنه طلع أكثر من رااائع كانت بشرتي مارشميلو 😮💘💘 طبعًا بشرتي أنا عادي مو جافة ولا دهنيه، أحط من الزيت على أطراف أصابعي وأوزعه وأسوي مساج بالذات حول العين وحول الفم << عادة وقتها أكون أتفرج على شي باللابتوب وبنفس الوقت أقعد أمسج وجهي فكنت أمخمخ صدق على هالفقرة أحس وجهي قاعد يتغذا كويسس 😍



كنت أحط مره أو مرتين باليوم من زيت جوز الهند حسب احتيا بشرتي، وبالليل في بعض الأحيان أحط من زيت فيتامين إي حول عيني وأقعد أطبطب.. زي ما يعرف أغلبكم إنه قوامه ثقيل ويلصق لكن لمن تطبطبين على بشرتك وانتي حاطته راح يكون مفعوله أفضل وطريقة إمتصاصه أسرع وكمان هالحركة راح تحرك لك الدورة الدموية وتنشط الخلايا على إنها تتجدد 👌🌠


3- سويت لي جدول ألتزم فيه لجلسات الديرما رولر..
أول مره اشتريت الديرما رولر كانت قبل 3 سنوات، وما أخفيكم إنه كان استخدامي لها متقطع فكنت أشوف تحسن بشكل عام بس ما كنت قادره أشوف النتيجة والفروقات بشكل أوضح. لكني خصصت شهر أكتوبر يكون للديرما رولر، كنت مكثفة الجلسات مرره يعني كنت أسوي قبل النوم يوم إيه ويوم لا، أو مرات أسوي بريك يومين حسب وضعي << طبعًا بالنسبة لطول إبر الرولر حقتي كانت الفترة تعتبر شويا مجازفة ومفروض أسوي كل ثلاث أسابيع فما أنصح أحد يسوي زيي 😅


بعد جلسة الرولر تكون البشرة متهيجة وتحتاج ترطيب وحماية، بالنسبة لي كنت معتمدة الزيت جوز الهند وزيت الزيتون في بعض المرات وكمان زيت فيتامين إي 👌 خلال الجلسات طبيعي ما كنت شايفة ولا حتى نص نتيجة لأنه بشرتي ما يمديها تقول هه إلا ومررت عليها الإبر 🤐
خلص شهر اكتوبر وكنت موقفه قبله من الديرما رولر، وجا شهر نوفمبر والحياة مستمرة وعلى نصف شعر نوفمبر بديت ألاحظ النتيجه!! تعرفون إيش يعني نظااارة؟ يعني وجه منوّر ومورّد من دون بي بي كريم ولا تينت 😍🌸
عشان كذا إللي ودها تبدا في الديرما رولر، لا تستعجل على النتيجه وبتشوفها مع الوقت 😉

4- التونر آخر خطوة قبل النوم 🌹
زماان ما كنت أعطي التونر أهميه وكنت أتوقع إنه نفس الكلينزر صراحة بس اختلاف الاسم لأغراض تسويقية 😅 لكن أول مره جربت فيها تونر ويتش هازل من ثايرز انصدمت من الاختلاف الشاسع! ههههههههههههه أصلًا مدري وش اللي حط في بالي انهم زي بعض يمكن لأنه كلهم محلول! مدري عني 😂
زي ما حكيت إنه التونر هو آخر خطوة قبل النوم، بالنسبة لي حاطته على الكومدينة جنب السرير، يصير بعد ما أمسح المكياج وأغسل وجهي بالغسول يصير أحط من التونر على القطن وأمسح فيه وجهي ورقبتي 👌 ليييييه؟ لأنه احنا بشراتنا حمضية وبعد ما نغسلها بصوابين أو غسولات قلوية يختل التوازن الحمضي أو الـpH في البشرة، فتصير تقعد طول الليل تحاول ترجع التوازن للبشرة عشانن كذا كثير من أصحاب البشرة الدهنية بالذات غالبًا لمن يصحون من النوم يحسون إنه بشرتهم دهنت شويا.. فالتونر فائدته إنه يرجع التوازن الحمضي للبشرة أسرع ويخفف من الدهون اللي تطلع عالبشرة، عاد هذا غير إنه يعتبر مغذي جيد (حتى أحد اليوتيوبرز الكوريات كانت تتكلم إنه هم ما يكتفون بطبقة وحدة من التونر عادة يحطون عدة طبقات توصل إلى 8 عشان يكثفون التغذية.. والصدق عاد أقنعتني فكرتهم إللي كنت أشوفها تووو متش! 👀)، برضو فيه وحدة كانت تقول إنها تفرغ التونر في علبة سبراي وترشه على وجهها، حبيت الفكرة مرره بس برضو القطن ما استغني عنه أحسه يمسح كويس..



بالنسبة لي واضح كيف إني طايحة على الهازل ويتش تونر بموير الورد، موجودة في كل مكان هنا بأمريكا وفي آيهيرب كمان، طبعًا ما يحتاج هالتونر مدحي قده واصل السماء، وأنا أشوفه يستاهل أكثر والله 💖 ما بأتكلم على إنه يخذي ويوازن الـpH وهالسوالف العميقة، بس ألاحظ في بعض المرات بعد ما أمسح بقطنة التونر إنه كان فيه بقايا ميك اب ما شالتها المناديل أو الكلينزر وغيره، فهو يعمل بالنسبة لي بعمل الرتوش بعد ما أنظف وجهي.. الشيء الثاني هو الترطيب والنداوة في البشرة اللي أحس فيه بعد ما أحط هذا التونر على وجه الخصوص تعطيني شعور نظييف ومنتعش بالذات لمن يكون التونر بارد يالله 🤤

5- اشرب مويا / ماء / مياه / ميّه / ماي .. اللي هو 💧
تحسون هالكلام كليشيه صح؟ هههههههههه مرره مكرر ومعروف ومدري وشو وعارفين اننا نحتاج نشرب 8 كاسات أو لتر وهالسوالف كلها، بس حقيقة جربي أغصبي نفسك تشربين غصب من جد ترا ماحد يشرب لك 8 كاسات وهو عطشان والا مبسوط يتذوق ويمخمخ.. الموضوع موضوع احتياج يعني لازم يعني غصب.. وضحت الصورة؟ 😂
المهم أنا الوضع كذا مشي معاي، غصب ما أنتظر غلين أعطش وهالشي خلاني أضطر كل شويا أروح الحمام وأحقد زيادة عالمويا هههههه بس معليش في سبيل الصحة والعافية ثم الجمال والله يستاهل ✨


بالنسبة لي حبيت الشرب في هالعلبة، كنت أستخدمها أول للبروتين شيك بعدين شلت السبرينق اللي كانت جوتها وصرت أحط فيها مويتي واتابع قد إيش شربت خلال اليوم مع القياسات الموجوده برا العلبة 


عاد بالنسبة للماسكات ما راح أعتبرها ضمن روتيني، لأني ما كنت أحطها إلا إذا حسيت إنه بشرتي تحتاج تنقيه مسامات أو إذا أبغا اسوي لي أجواء سبا وكذا 🧘‍♀

امممم تقريبًا هاذي أهم الأشياء الي التزمت عليها ومررررررره الحمدلله فرقت معايا وصرت أقدر أطلع بكل ثقة بدون لا كونسيلر ولا بي بي كريم، وراح الكلف مدري التبقعات هاذي وراحت الحبوب وخفت الهالات بنسبة كبيييرة جدًا خصوصًا بعد ما صرت أقوم الفجر وأنام 9 الليل 🌛
هي تغييرات مرره بسيطة وغير مكلفة، خصوصًا إني قمت ألاحظ نفسي قاعدة أتوجه للأشياء الطبيعية أكثر لأنها أفود وأغنى بالغذاء ومتاحة أكثر لمختلف الميزانيات.. والا شرايكم بعد! 🤔

المهم ماذا عنكم صديقاتي؟ 😍 
إيش الأشياء اللي تسوونها عشان تحافظون على بشرتكم من الاستعباط المفاجئ في السفر؟




وفوتككوا بعافية 💝🌹
____________________

🎀

       
  •      
  •      
  •      
  •      
  •      


3 comments:

  1. أفضل شيء سويتيه إنج اعتمدتي روتين بسيط وغير متكلف ومن ضمنه مواد طبيعية.

    الديرمارولر انتبهي منها ترى تسوي فتحات كبيرة، أفضل منها الديرما بن. والأفضل استشارة اللي عندهم مشاكل بالبشرة طبيب ثقة. لأن هذه جروح مافيها لعب.

    ReplyDelete
    Replies
    1. صحيح هالشيء ساعدني أقيم اللي يناسب بشرتي من اللي ما يناسبها 💓
      بالنسبة للديرما رولر هي فكرتها انها تعمل جروح صغيرة على سطح البشرة وهالحركة تساعد في بناء خلايا جديدة بطريقة طبيعية
      💖ومنها تصير البشرة تبدو أكثر نضارة... بالنسبة للديرما بين ما قد سمعت عنها تصدقين 🤔 حمستيني أبحث عنها

      Delete
  2. أهلا مرة ثانية .. مبين اني فاضية وقاعدة افر في مدونتك ..

    حبيت كثير روتين عنياتك تقريبا هو قريب من روتين عنايتي باختلافات بسيطة مع اختلاف المنتجات ..

    قريبا بإذن الله بنزل بوست عنه .. لانه فرق معي كثير ..

    ReplyDelete

Top