11 عادة صحية للتخلص من مشاكل الجهاز الهضمي | من واقع تجربة! 🌚✨

Tuesday, November 5, 2019
في مرة نزلت صورة للقرانولا اللي سويتها وكنت كاتبة إني صرت مره أستمتع بأكلها كذا كسناك مقرمش من بعد ما قطعت مشتقات الألبان، فسألتني وحدة عن سبب قطعي لها وحكت لي عن مشاكل الهضم اللي تعاني منها مثل الإنتفاخ والإمساك، فكنت مره متحمسة أشرح لها الحلول اللي ساعدتني أتخلص من هالمشاكل -اللي كان من ضمنها الحليب ومشتقاته- لأني برضو كنت أعاني منها.. وصدق سؤالها هذا فتح عيني على هالموضوع لأني متأكدة في كثير يعانون نفس هالمشاكل، فحبيت أنقل تجربتي هنا للجميع بكل شفافية 



قبل سنة من الآن كنت أعاني من أكزيما شديدة جدًا وعلاماتها باقية على بشرتي إلى الآن، وكنت أعاني من انتفاخات في البطن، وكذلك إمساك مزمن لدرجة إني كنت أحسب إنه هذا هو الحال الطبيعي! -TMI- 
أشياء كثير غيرتها في نمط حياتي، وعدلت على نوعية غذائي ودخلت بعض الممارسات اللي ساعدتني كثير بفضل الله إني أتغلب على مشاكل الهضم واللي بدورها حسنت حالة الإكزيما عندي بشكل ملحوووظ جدًا -الحمدلله الحمدلله الحمدلله ياارب- 

بأحكي لكم الحين أهم الأشياء اللي غيرتها بحياتي وكيف كان تأثيرها علي!


أول شيء قررته كان قبل ثلاث شهور، قررت أوقف أخذ حبوب الميتافورمن.. 
كنت آخذها من سبع سنوات مو لأنه عندي السكري من النوع الثاني! لأ! لأن عندي تكيس في المبايض من زماان والدكتورة قالت طالما عندك تكيس أكيد بيكون عندك مقاوومة أنسولين فلازم تاخذين ميتافورمين عشان يعادل مستوى السكر في الدم واللي بدوره ممكن يعدل هرموناتي وتروح مشكلة التكيس.. اللي حمسني إني آخذ الميتافورمن -القلوكوفاج- هو لمن عرفت إنه ينزل الوزن رغم إنه وقتها كان وزني يعتبر جدًا مثالي بس كنت أخاف أسمن لأنه اللي عندهم تكيس يزيدون بسرعة وينقصون بطلعة الروح.. 
أول ما أخذته كان بجرعة أقل لمدة أسبوعين وبعدين أزيدها لمن جسمي ياخذ عليه أكثر! طبعًا ما أنسى المعاناة مع الإنتفاخات اللي كان يسبب لي إياها هالدوا وأثر هالشي علي حتى نفسيًا لمن صرت أداوم بالجامعة بالعباية عشان بطني كان ينتفخ بشكل مره مزعج..
المضحك بالموضوع إنه وزني كان يزيد بعدها ولا نقص مثل ما كنت أتخيل وأسمع وأقرا من تجارب الآخرين، بس كنت ما أزال متمسكة فيه كنت أعتقد إنه هو برضو كويس وانه منحفني واذا تركته راح انفرط  وفعلًا لمن رحت لدكتورتي بأمريكا أطلبها توصف لي الميتافورمن سألتني عن السبب وقلت لها التكيس وكذا، وسوت لي تحليل دم تقيس نسبة السكر عندي وقالت مرره ممتازة ما تحتاجينه ترا! قلت اااا طب أخاف أسمن! معليش بس التكيس يزود الوزن وكذا وأحتاج القلوكوفاج  ااخخ خبالة أدري خلاص!
هاذي كانت قصتي من القلوكوفاج، فجأة قبل كم شهر، صليت المغرب وسلمت والتفت على زوجي قلت بأترك القلوكوفاج! كذا بدون مقدمات هههههه كنت أحتاج أحد يحمسني لأني صدق كنت متمسكة فيه كأني مسحورة ههههههه قلت أوريدي أكلي نظيف وأبدًا ما أستهلك سكر .. حتى بكوب القهوة أحط نص باكيت ستيفيا يعني شويا Guilty free  << عاد الحين حتى الستيفيا ما صرت أحطه بقهوتي!



مرت ثلاث شهور من تركت القلوكوفاج، إيش صار لي؟
ما صار لي شيء ما انفرطت أبشركم هههههه العكس تماما صار!.. لمن تعمقت وقرأت أكثر في متلازمة تكيس المبايض، استوعبت إنه أسبابها متعددة (نوع سببه هو مقاومة الأنسولين / ونوع سببه هو زيادة هرمون الذكورة / وآخر زيادة هرمون الحليب / وآخر هرمون الكورتيزول.. وغيرها) فبطبيعة الحال لأن مشكلتي ما كان سببها مقاومة أنسولين فما كان العلاج هذا له تأثير إيجابي لا على التكيس ولا على صحتي بشكل عام. أما بخصوص الانتفاخات فأكيد اختفت بعدها بفترة طبعًا 

في طريقي لتغيير عاداتي الغذائية اشتغلت على أشياء كثيير وأهمها كان

- أقطع السكر الأبيض! رغم إنه إستهلاكي للسكر بشكل مباشر هو  0.001 % إلّا إني حرصت مره أركز على السكر المخفي في الأكل المصنع مثل الكاتشب على سبيل المثال لأني أحبه  وحتى البدائل الصحية اللي كنت أستهلكها بشكل قليل جدًا حاولت إني أقطعها أو أدور بدائل أفضل، مثلًا.. كنت آخذ يوميًا مع قهوتي نص باكيت ستيفيا فقط خلال اليوم كله، بس الحين صرت أشرب القهوة تمامًا بدون سكر أو محلي وأستلذ بمرارتها بعد 

- خل التفاح كل صباح! << الله الله!   فوائد خل التفاح عظيمة يخفف الكوليسترول، يقلل السكر، يخفف الوزن، ويقتل البكتيريا والفطريات اللي عالبشرة والفروة للاستعمال الخارجي!.. أما بالنسبة لي فأنا آخذه لأنه الحمض اللي فيه يساعد في عملية الهضم وينشط البكتيريا النافعة في الأمعاء والحمدلله ما قطعت هالعادة من يوم ما بدأتها
 << طريقة شربي له هو اني أحل ملعقة من خل التفاح في مويا فاترة مع عسل وأشربها عالريق! ما أدري إذا هو صدققق طعمة لذيذ مرره وإلا لأني تعودت على طعمه صرت أستلذ فيه بهالشكل! .



- ايوا العسل! أنا إنسانه أحب العسل بالذات عسل الغابة السوداء أستلذ بأكله كذا بالملعقة، وبالصيف أعطاني أبويا علبة عسل محلي كان لذييييذ مرره كنت آخذه كل يوم قبل النوم بملعقة يممم  وبعدها صرنا نتفنن في اقتناء أنواع العسل .. بالنسبة لي طحت على العسل الخام أو الـ Raw Honey أكله كأني ويني ذا بوه!   اوكي، العسل مره مغذي ومليان مضادات أكسده وفوائده الغذائية تختلف حسب النباتات أو الزهور اللي ياخذ منها الرحيق، بس بشكل عام أشوفه علاج فعال لأكثر مشاكل البطن.. أفتكر مرة حنين من مدونة أنستازيا تكلمت عن العسل إنه من أكثر الأشياء اللي تحرك الأمعاء بالنسبة لها.. كلامها هذاك فتح عيني على حقيقة كنت أعيشها بدون ما أدركها صراحة  (شكرًا حنيين)

- قطعت الحليب ومشتقاته! رغم إني كمان ما أستهلك الحليب والأجبان بكثرة إلّا إني لقيت كثير دراسات توصي بتقليل استهلاك الحليب ومشتقاته، بالذات للي عندهم لخبطة في الهرمونات والدورة الشهرية، هذا غير إنه عندي تحفظ شويا من أنواع الحليب اللي بالأسواق.. ولأني أحتاج وقت ومادة أكبر عشان أحصل على أجبان وحليب  طبيعي وعضوي وخالي من الهرمونات وتكون الأبقار فيه تتغذى عالعشب وترعى خارج الحضاير، فأشوف أسهل لي أقطعها وأرتاح   وأبشركم قهوتي صرت أشربها اسبريسو يا جماعة! 

- التقليل من استهلاك القلوتين! والله كان ودي أقول أقطع القلوتين تمامًا - اقرؤوا عن ارتشاح الأمعاء ومشاكل الجهاز المناعي وعلاقتهم بالغلوتين-، بس خلونا واقعيين.. مرره صعب حاولت مرررره كثير أقطعه تماما! لكن للأسف بدائل الغلوتين ما تتواجد بأي مكان زي بدائل الحليب مثلًا! وزي مانتم عارفين إنه القلوتين موجود في القمح والشعير وغذائنا اليومي قائم على القمح بنسبة كبيرة. بأكمل محاولات خبز مخبوزات خالية من الغلوتين -بعد ما جلطتني أسعارها بالسوق  أجل خبز شامي واحد خالي من الغلوتين بعشرة ريال!-
بنفس الوقت ماراح أعيش نفسي في توتر وضغط نفسي إذا اضطريت آكل باستا أو برغر من آيم هنقري مثلًا  ، بأحاول أخذ أخف الموجود على ضميري.. مثلًا خبز الشوفان من مخابز ريف فيها قمح بس تعتبر نسبته مره قليلة مقارنة بالتورتيا العادية! فبهالطريقة أحاول أنتبه لاستهلاكي له.

- أستمتع بشرب شاي الأعشاب! ما عندي نوع معين من الأعشاب أشربه دائمًا، لكن أحب أسوي خلطات حسب مزاجي.. بابونج، نعناع، دوش، شمر، اكليل الجبل، ميرامية، عطره (ليمون قراس).. بالعادة أشربها بدون شيء وإذا مره كنت مشتهيتها حالية أشربها مع ملعقة عسل  تروق وتخفف الكورتيزول، تريح الأعصاب والجهاز الهضمي، وطعمها وريحتها حلوين! << مافيه أحسن من كذا! 


أما العادات الحركية اللي ساعدتني أتخلص من مشاكل الهضم عندي ووأولها مشكلة الإمساك المزمن كان أولها:

- ممارسة الرياضة! اوكي شيء متوقع هههههه ما باطول حكي بهالنقطة، إذا مالك خلق تسوين مقاومة أو كارديو قومي ارقصي، انزلي امشي! الجو مره صار حلو! روحي السوق اطلقي رجلك، اركضي ورا أطفالك أو أخوانك الصغار والعبوا بالحوش والا عادي في الصالة!.. حركة أمعائك من حركة جسمك << عاد ضميري أنبني وأنا جالسة مدري شكثر أكتب  بأقوم بعد أخلص أمشي في البيت.

- دخول الحمام بشكل دوري! هالنصيحة قالتها لي الدكتورة لمن رحت لها بخصوص هالمشكلة قبل ما يقارب عشر سنوات وطلعت من عندها مقهورة انها ما فحصتني أو سوت لي أشعة ما أعطتني حبوب ملينة! صراحة ما كنت فاهمة كلامها لأنه حياتي وقتها كانت ماشية بالبركة  الحين لمن صار عندي روتين يومي وجدولة لوقتي، صار حتى جسمي متبرمج على أوقات دخولي للحماام فالحمدلله صدق أقدر أقول إنه مشكلتي راحت!

- استعمال ستيب ستول في الحمام << معليش ما لقيت لها ترجمة مناسبة بس بأشرحها لكم  شفتم هذاك الشيء اللي زي الستيب حق الرياضة؟ اللي يحطونه للأطفال عشان يطلعون فوقه ويقدرون يوصلون للمغسلة؟ 
لحظة لحظة أنا ليش قاعدة أتعب نفسي! دقيقة أجيب صورته وأحكيكم عن فائدته!

المصدر: موقع ايكيا

<< سواءًا عندكم هذا أو Squatty Potty أو أي شيء يؤدي غرض رفع الأقدام عن كرسي الحمام -التويلت- لا تفرطون فيه!
تعتبر وضعية الجلوس في الحمام الأرضي أو الحمام العربي (القرفصاء) هي الأفضل لعملية الإخراج ببساطة ، فبما إنه أغلب بيوتنا التويلت فيها بالمقاييس الأوربية اللي تتميز بارتفاعها -مقارنة بالأنواع الأمريكية-، فينصح باستخدام الستيب ستول عند التويلت خصوصًا للي يعانون من مشاكل الإمساك، هالطريقة راح تريح كثير مره!



أما العادة الأخيرة اللي أنصح فيها من قلب.. هي إنك تحافظين على روقانك وتضبطين أعصابك، وتتعاملين بجدية مع التوتر والقلق اللي يجيك.. سواءًا كانت مشكلتك تحتاج حل، استشيري أهل الثقة واسعي في حلها، وإذا ما كان لها حل وكلي أمرك لله فهو نعم المولى ونعم الوكيل وإن شاء الله هو القادر على إخراجك من هالأزمة اللي تمرين فيها.. سلميه أمورك وكملي حياتك! 
أنا قاعدة أكتب هالكلام لأني أعرف قد إيش النفسية السيئة تأثر على صحتك العامة! كل فترة تطلع دراسات تثبت إنه الحزن الشديد أو الخوف الشديد أو مشاعر القلق تأثر فورًا على الأعضاء في البطن! -أبسط مثال لمن تتوترين أيام الاختبارات ويمغصك بطنك!-
 فالمهم هو قبل ما تسكنين أعراض المشكلة، ابحثي عن جذورها ومصدرها وعالجيه  


ووو بس والله، في الختام حابة أأكد إنه هالأشياء اللي ذكرتها فوق أخذت مني وقت إلين ما صارت عادة ألتزم فيها، لمن حسيت إنه جسمي مو مرتاح بحثت وقرأت كثير وجربت هالأشياء اللي ذكرتها فوق والأهم اني (التزمت فيها) عشان أتخلص من المشكلة نهائيًا.. يعني ما أٌقدر أقول إنه فيه شيء معين لوحدة هو اللي حل مشكلتي أو إنه خلال مدة زمنية بسيطة مشاكلي الهضمية اختفت! 
والنقطة الأهم هي إذا كنتم ناويين يكون هالنظام أسلوب حياة للأبد فراح يجي أوقات لازم يكون عندكم فيها مرونة في اتخاذ القرار عشان ما يأثر هالنظام عليك وعلى اللي حولك سلبًا بطريقة أو بأخرى 


أتمنى تكون تجربتي أفادتكم أو ألهمتكم لو بالقليل..
وإذا كنتِ تعانين من مشاكل بالهضم؛ إيش الطريقة اللي جربتيها وفرقت معاك كثير؟


وفوتتكوا بعاافية 
            
  •                
  •                
  •                
  •                
  •          

4 comments:

  1. آه يا روان تدوينتك بالصميم والله .. تخيلي بعد قاعدة اكتب لك والمناكير لسه ما نشف من كثر الحماس تدويتنك هذه جميلة جدا ... بالنسبة للألبان فعلا أنا فرق معي لم وقفت الحليب البقري وتوجهت للنباتي بطني لصقت بظهري وماما قالت لي على طريقة مرررررة جيدة لطرد الغازات اللي بالبطن وفعلا لاحظتها فورا .. الا وهي كوب ماي دافي وحطي عليه كمون وعصرة ليمون ع الريق يا سلام ما يجي نهاية اليوم إلا وبطنك خالية بأذن الله من الغازات ..

    << بقعد افضفض لك .. تعرفي الحين انا ارضع رهف فما اقدر اشرب قهوتي سبريسوا فلازم حليب تخيلي احيان لم ما القى البديل اضطريت ارجع للمراعي ويا قلبي ع الطعم بس ما أشكيلك بطني شلون صايرة كني وحدة حامل ..

    بعد تدوينتك برجع اشربها سبريسوا وعلى طاريها لأني نومت رهف فالحين أخر الليل قبل النوم اشرب قهوتي اسبريسوا مستلذه بطعمها بطريقة احس ودي اشربها كذا طول الوقت بس رهف حرام ما تستحمل صاير نومها خفيف واحيان ما تقدر تنام 🤣🤣🤣

    عشان كذا بديت اسوي لنفسي روتين بأني اشرب شاي وزهورات وكذا ادخل نفسي جو ثاني بحيث اني اخفف كافيين

    وبس والله تعليقي صاير تدوينة بلحالها :)

    ReplyDelete
    Replies
    1. جدد والله نفسك! ما توقعت كذا راح يبان الفرق!
      هههههه قلبي رهوفة شكلها ما بتكمل ثلاث سنوات والا هي جنبك تكيف بكوب قهوة 😂❤❤❤
      الشواهي برضو من الأشياء الحلوة اللي تروق بس بدون ما تخليك هايبر وسترسد زي القهوة، وإذا كمان ودك بكافيين بس مو بقوة القهوة جربي الهوت تشوكليت خصوصًا واحنا مقبلين عالشتاء أحسه من المشروبات اللي تطبطب عالقلب 💗

      ومرره أسعدني تعليقك على فكرة شكرًا لك 💌

      Delete
  2. الله ياروان دخلت جو مع التدوينة ..

    كلنا في الهوا بس على قولتك الانتباه والحذر أهم شي
    بالنسبة للحليب أول ما أشربه لااحكيلللك الحالة ��
    فلقيت بديل اني اخذ حليب خالي من اللاكتوز اذا اضطريت أضيفه ..


    شكررررا ع المعلومات ����

    ReplyDelete
    Replies
    1. وحلووو مره 😍 الحليب الخالي من اللاكتوز اذكر قد شفته مره بالصدفة قبل ٥ سنوات فقط وما شفتها بعدها وجد انتي اول وحدة تكلمت عن تجربتها معاه 😍👌🏼 حمستيني أتعمق بالموضوع أكثر!

      Delete

Top