💫 أفضل بلانرات سنوية جربتها: ban.do planners + Bloom planners

Sunday, December 17, 2017

احم احم 
ألوووو ألوو تيست 👀
فيه أحد يسمعني؟ 🎤 مدري نايمين والا تذاكرون والا مدري وش قاعدين تسوون
أوكي أدري معظمكم غاط هالفترة بس إن شاء الله فترة بسيطة وترجعون تصحصحون وتروقون وتستعيدون نشاطكم وهمّتكم للسنة الجديدة 🌠
وعلى طاري السنة الجديدة أبسولف شويا بخصوص الأجندات والبلانرز على وجه التحديد وبسولف لكم عن البلانر اللي مناهررة عليه مؤخرًا 🌟 😭
عاد ما أحكي لكم وش كانت حياتي من قبل ما أقتني بلانر ورقي، هو صراحة كنت معتمدة على التقويم والنوت بالجوال يعني كل شي تحت السيطرة إلى حد كبير.. وبعدين اشتريت نوت صغيرة صفحاتها فاضية وسادة وكنت أسجل فيها الأفكار والقوائم والجداول وكنت أرسم فيها وأخطط عليها وأحط عصارة مخي باختصار فيها، مرره حبيت فكرة الكتابة بالورقة والقلم 😍 بس بنفس الوقت كنت أحتاج التقويم حق الجوال أسجل عليه التواريخ بعد ما أكتبها في الدفتر يعني في جميع الأحوال كنت مضطرة أستخدم الجوال  << عندي مشكلة مع الثقة بالتكنولوجيا فيما يبدو 😬 




هاذي النوت صار لها عندي حول السنتين تقريبًا أخذتها من جرير وإلى الآن أستخدمها، أحب حجمها الكتكوت يدخل الشنطة عشان كذا أستخدمه كثير في كتابة القوائم زي اللي بالصورة أسماء بعض الشغلات إللي كنت أبغا أشتريها من آيكيا ومكانها بالخدمة الذاتية، وأكتب فيها قائمة المشتريات حقت السوبر ماركت، ومرات أكتب الأشياء اللي أبغا أحطها بالشنطة قبل السفر.. وبالمختصر يعني أشياء من هذا القبيل 💖

وقبل بداية عام 2017 قرأت كثير من التدوينات والتجارب الجميلة عن البلانرز وكان فيه اقتراحات كثير في لبرانرز حازت على إعجاب البنات، بس حقيقي ما كنت عارفة احتياجي بالضبط فيه كيف بيكون بس المهم إنها تكون بالتواريخ الميلادية، فقررت بعد بحث إني أقتني بلانر ban.do حجمه كبير وسلك وهارد كوفر، حبيت ستايله وبساطته ووضوحه << ولاا تهون الستيكرات 😍 حللتها صحححح!




مرره حبيت طريقة الكاليندر الشهري والجدول الأسبوعي اللي بعد كل شهر..
كنت أكتب كل شي أبسويه لنفسي أو لبيتي أو المواضيع والخطط اللي تخص المدونة بالتفاصيل في الجدول الأسبوعي، وبعدين أنقل النقاط الرئيسية والعناوين في التقويم الشهري 👍وحتى التقويم أو الجدول الشهري فيه نوت بالجنب تكتبين ملاحظاتك البسيطة، بالنسبة لي كنت أسمي كل شهر باسم الهدف اللي أبغا أسعى لهه خلال هالشهر، يعني شهر أكتوبر كنت مسميته شهر الديرما رولر (واللي شاف هالتدوينة بيفهم السالفة) 😍 / وشهر نوفمبر اسمه المويا وفكرتي فيه إني أعود نفسي على شرب المويا قدد ما أقدر وهاكزاا..
وطبعًا بالأخير فيه صفحات فاضية بعد شهر ديسمبر هاذي حلوة للخطط اللي على مدار السنة أو النقاط اللي مالها وقت محدد أو ممك حتى تستخدمينها كشكول! 💭
هذا غير الجيب اللي في الصفحة الأولى، حاطة فيه أوراق أحتاجها مثل أوراق مواعيد أو دعوة جتني وأشياء من هذا القبيل..
ومن الأشياء كمان اللي حبيتها فيه إنه فيه جدول فيه كل المناسبات والأيام والأعياد على مستوى العالم وعلى مستوى أمريكا بالذات، كانت مرره تريحني بالتخطيط لأني هنا عندهم إجازات ومناسبات كثير فأحاول أحطها بالحسبان أثناء تخطيطي الشهري 👍








صدققققق صدق ما أدري كيف ما جا ببالي أقتني بلانر من قبل! 
ما أدري إذا فكرة المدونة والمواضيع اللي أكتبها وأوقاتها كانت أحد الدوافع اللي خلتني أفكر يكون عندي بلانر أرتب فيه وضعي وشغلي وكل شيء.. طبيعي أدمنت الوضع وصرت ما أستغني عنه لدرجة إني مع الوقت صرت أكتب فيه أدنى التفاصيل والمهام اللي لازم أسويها، وصار الوضع أشبه بقائم مهام مصغرة ما بين المهم والعاجل..
فتقريبا على بداية شهر نوفمبر صار عندي تصور كامل لاحتياجي الحقيقي من البلانر، وحسيت إني لازم أبحث من بدري بحكمة على البلانر اللي بيلازمني طوال 2018 ..
صراحة أنا ما زلت مقتنعة في بلانر باندو، حابة ترتيبه وحجمه وبساطته ونوعية الورق حقه والغلاف وحاسته مناسب لي، فدخلت على موقعهم أشوف بلانرات 2018 بس انصدمت حقيقي إنه ما فيه تغير حتى على مستوى تصميم الغلاف الخارجي.. حسيت إني أبغا لون غير، عبارات غير مدري كيف بس كان ودي إنهم غيروا شوي 😕 ما أخفيكم إنه جاني إحباط حبتين ورجعت أبحث من جديد وأشوف البلانرات المعروفة عندنا زي كيت سبيد وكي كي كيي وشفت كمان بلانرات عربية وحست كثيير صراحة وقمت أدور في أمازون على بلانرات وأتعرف على علامات تجارية جديدة مااش مدري كل واحد ألاقي فيه عيب أو شيء مو عاجبني..
إلييييييييييييييييييين طحت على بلانر اسمه Vision Planner من Bloom daily لقيته بأمازون.. تعرفون الحب من أول نظرة؟ 
اوكي علاقتي بهالبلانر كانت حب من أول نظرة 💟 
أول ما لفتني في اسمه Vision planner وفكرته إنك تحطين رؤية وتصور لنفسك / لحياتك / لعملك / كل شيء تبغين تكونين عليه خلال هذا العام.. وباحكي على سالفة الفيجن في موضوع آخر بإذن الله..
الحين بأوصف لكم الفيجن بلانر هذا شكله من الخارج والداخل بالتفصيل 👌
أول شيء حجمه كبير، وهارد كوفر، وتصميمه أنيق، وفيه سلك -أهم شيء- وورقه ثقيل يعني لو جلستي تكتبين بالحبر وتلونين  ماراح يطبع في الجهة الثانية من الورقة 😉



طيب نجي عند الشيء الخرافي بالنسبة لي لهاذي البلانر 😭💓💓💓💓💓
أول شيء في الصفحة الأولى من البلانر فيه كم سطر تكتبين فيها الصورة المثالية إللي تتخيلين فيها السنة الجاية كيف بتكون، فكرتها مرره حلوة حسيتها زي تعهد أو تذكير عشان كذا حاطينها في الصفحة الأولى.. والأجمل في الموضوع إنه البلانر ما يخليك تكتفين بس بالخيال لالالالا 😎 فيه جدول تحطين فيه أهدافك هالسنة + الأشياء اللي تتطلعين لها بهالسنة + والأشياء الجديدة إللي بخاطرك تجربينها هالسنة + والكتب اللي ودك تقرينها بهالسنة!! واااااااااااااااااااااااااااااااااااااااااااااااااااااااااااااو
لالا لحظة مو بس كذا 😭 حاطين تشيك ليست للأماكن اللي تبغين تزورينها هالسنة! 
وبعدين خانة تكتبين فيها الأشياء اللي تبغين تتطورينها خلال هالسنة + والأشياء اللي راح تكونين ممتنة لها خلال هالسنة 💖
وبعدين حاطين صفحة فيها فيجن بورد، تقدرين تحطين فيها الصور اللي تدعم رؤيتك لهالسنة بطريقة لطيفة ويتخللها عبارات إيجابية وتحفيزية..


تعرفون وش جا ببالي الحين وأنا أكتب؟
حسيت لو انتهت 2018 وأنا ما حققت كل شيء مكتوب في البلانر راح أعاقبني صدق! يعني صدق صدق 😐 أكثر من كذا تحفيز وحماس ما شفت.. طول عمري وأنا أكتب أهداف وأخطط بس ما أذكر إني قد احتفظت بالورقة حقت مخططاتي وشيكت عليها كل شهر مثلًا ههههههه بعد ما أكتبها سوبهاان الله تذهب مع الريح.. سنة 2017 لأني كتبت بعضها في البلانر وكتبت بعض خططي في البكت ليست اللي *هنا* قدرت أشوفها بين فترة وفترة وحسيت إني الحمدلله راضية عن نفسي وما وصلت له هالسنة.. بس أتخيل لو يكون الوضع اكسترا شويا وتكون الخطط والأفكار في نفس البلانر اللي تستعملينه بشكل يومي بيكون مرره أحسن وهالشي بيوصلني لأهدافي بطريقة أكثر تنظيم والا؟ 😚



اووه نسيت أقول إنه فوق كل هالأهداف والجداول ترا فيه بكت ليست لـ2018 كمان تكتبين فيها الأشياء اللي تبغين تسوينها بشكل عام نفس طريقة البكت ليست اللي مسويها بمدونتي 😍 بالننسبة لي مرره متحمسة أعبيها مغامرات وأكشنات خارج منطقة الراحة ✌

بعدين نجي عند كل شهر وش مجهزين له؟
حاطين قبل كل شهر رؤية خاصة فيها فيها 8 خانات انتي تعبينها
1- تنمية ذاتية : Personal Growth
2- علاقات : Relationships
3- صحة ولياقة : Health & Fitness
4- مغامرات ومرح : Fun & Adventure
5- الموارد المالية : Finances
6- الدراسة / العمل : Work / School
7- العائلة والمنزل : Family & Home
8- أخرى : Other

امممممم وإيش كمان مسوين؟



قبل كل شهر ميلادي حاطين جدول أسبوعي وفيه زي تشيك ليست تحطين فيها المهام اللي تسوينها عشان توصلك لأهدافك الكبيرة 😍
وبعدين الجدول أو التقويم الشهري، عاد المساحة اللي حاطينها للكتابه مرره واسعه تكفي لكتابة كل شي ودك فيه وكمان حاطين الأيام المهمة والمناسبات ضمن أيام التقويم.. وطبعًا فيه نوت تكتبين فيه ملاحظاتك على جنب، لكن الجميل هنا إنه في كل شهر حاطين لك تحدي تسوينه 😎💪


عاد ما أبغا أحرق عليكم تحديات باقي الشهور، بس في يناير مطلوب إنك تبدئين في ممارسة عادة صحية جديدة زي شرب مويا بكميات أكبر أو أكل خضار أكثر أو تدخلين في روتينك هالشهر تمرين رياضي جديد 😻 أماااانة في أكيت؟

اصبروا ما خلصنا تفاصيل الكياته في هالبلانر.. 🙈💖💖


بعد التقويم الشهري حاطين جدول لكل يوم، كيفك تبغين تكتبين قائمة مهام، تبغين تكتبين مذكرات، تبغين تكتبين لنفسك تذكير والا تهزيء كيفك 😂
وتحت كل يوم حاطين لك صور 8 كاسات 😎 خل نشوف بتصيرين سنعه وتشطبينهم كلهم نهاية اليوم والا بتشطبين على نص كاسة بس << صدق حركة مرررررررره محفززة!
وبعدين في 7 مربعات بالأسفل مقسمة كالتالي:
- Meals : الوجبات
- Excercise : التمارين الرياضية
- Inspiration : إلهام
- Notes : ملاحظات
- Memories : ذكريات
- ideas : أفكار
- Gratitude : إمتنان
عشان ترتب لك أفكارك وخططك صحح 😍🤚

خلاص تعبت أوففرررر تفاصيل جميل قلبي الصغير لا يتحمل 😭 💗
أقول لكم من الحين هاذي البلانر راح تكون صديقتي الصدوقة من جد والله ما أمزح! 💖 أصلًا وأنا قاعدة أكتب الحين لا شعوريا قاعدة تجيني أفكار ومخططات وأهداف، حقيقي مرره متحمسة لبداية السنة عشان أستخدمه وأعبيه وأقعد أشطب على كل كاسات الموي الثمانية 😉👌

اللي يشاركونيي بالاهتمامات وتعجبهم نفس هالسوالف وأصحاب الأفكار الإبداعية وأصحاب المشاريع والناس المتعددين المهام  صددق مرره متأكدة إن هالبلانر بيعجبكم وبتمخمخووون عليه وعشان أختصر على نفسي وعليكم، زي ما قلت إني طلبتها من أمازون وصاحبتي بشاير كانت بتطلبها من موقعهم بس طلع ما يوصلون للسعودية.. المهم تواصلت معاهم وسألتهم عن منافذ بيع تشحن للسعودية غير الموقع الرئيسي وأمازون..
قالوا إنه متجرهم على موقع إي باي يشحن للسعودية تدخلون له من *هــنــا*
وكمان قالوا إنهم يوفرون بلانرات حصرية على موقع لايف ستايل تلاقونها *هـــنـــا*
<<< بس البلانر نفس اللي عندي ما شفتها بموقع لايف ستايل لكنه موجود في إي باي وتأكدوا إنه Vision Planner مو Academic year

وختااامًا جد عاد أمانة قولوا لي ما يحق لي أنهار عليه! 💭
أحس صدق مرره وااضح تعبانين على فكرته، مو حي الله تقويم وصفحات.. يعرفون إحياجك وكيف يساعدونك للوصول لأهدافك من خلال البلانر وهالشي اللي جد حببني فيه وحسسني إنه يستحق أكتب عنه تدوينه 💫

قولوا لي انتم إيش فيه بلانرات جربتوها وحبيتوها كذا؟ وإيش الشي اللي حبيتوه وحسيتم إنه خدمكم فيها؟  💞

ووو فوتكوا بعاافية 💌 ❤
____________________

🎀

        
  •        
  •        
  •        
  •        
  •        


11 comments:

  1. من ٢٠١٦ أفكر اشتري بلانر بس احس ماله داعي وهذي حالي كل سنه اتعب من التفكير وبعدين أقرر انه مو لازم برامج الجوال تكفي بس أفكر اجربه السنه هذي ...شكراً على التدوينه 💙

    ReplyDelete
    Replies
    1. زيك كذا كنت أول إلين جربت الكتابة عالورق مررره أجمنتها خلاص أحس مستحيل أرجع أعتمد على الجوال تمامًا..
      جربيه وراح تستمتعين بالتجربة بالذات إذا عندك أشغال ومهام في مجالات متعددة 👌💓

      Delete
  2. ما ألومك لو ما انهرتي .. اقرأ التدوينة وانهار معك
    يالله وش هذا الجمال ..خلاص قررت أطلبه وقت بحبه

    ReplyDelete
    Replies
    1. جدددد توو متش بيوتي في أجندة وحدة ههههههههههههههه 😂💖

      Delete
  3. الله عليك يا روان ! انا نفسك اعتمد على "البوليت جورنال" تقريبا نفس فكرة دفترك كل شي تكتبينه فيه , حبيت التقويم الجديد وانه يكون عندك تصور عن الي كيف صورتك بالسنه الجديدة مرة رهيبة الفكرة .
    انا نظامي بالبلانر "بوليت جورنال" و قوقل كالندر , تقريبا بوليت جورنال اكتب فيه يوميا و اكتب فيه قوائم وخرابيط و مرات ارسم و الصق و اكتب اتجازاتي تقريبا كانه يوميات وفيه تودو ليست وفيه ارقام و فيه افكار وفيه كل شي هههه
    قوقل كالندر كل المواعيد فيه وتقريبا السكادجول الاسبوعي هناك اخططه أحلى شي مرتبط بالجوال بالايباد بالكمبيوتر

    ReplyDelete
    Replies
    1. حلووو 😍💗 ميزة البوليت جورنال إنه يعطيك مساحة من الإبداع أكبر بحيث إنك تشوفين نفسك وشخصيتك وتنظيمك فيه
      حقيقي ماقد جربت القوقل كاليندر بس كثير أشوف يوتيوبرز معتمدين عليه

      Delete
  4. أنا اشتريت هابي بلانر (بديت اعجب ببلوم بعد ما قريت تفصيله عندك الصراحه ) لكن وجدت النسخة الجديدة من مفكرة آماد تفي بكثير من الأمور خاصة للمبتدئات انصح بها وبشدة موجودة في مكتبة جرير وجرير اونلاين

    ReplyDelete
    Replies
    1. فعلًا سمعت مدح كثير عن البلانرات اللي منزلتها جرير هالسنة، ما أعرف إسمها بس يبدو إنها نفس اللي قلتي عليها 👌
      وعمومًا كبداية حلو الوحدة تاخذ أجندة بسيطة وتشوف إيش اللي تستفيد منه فيها وتعرف إحتياجها كيف وبعدين تسوي أبديت لنوع آخر 💖

      Delete
  5. عالبرركة التغييراات الجديدة للمدونة!!

    بالنسبة لي البلانر جزء مهم في حياتي وكل سنة اجرب ديزاين جديد،، دايم اخذهم من تارقت حبيب القلب

    https://corporate.target.com/_media/TargetCorp/news/2016/07/Sugarpaper%20Office/SugarPaper-Target-agenda-signature-kraft-web.jpg?preset=defaultMosaic

    هذا اللي استعملته جميل وبسيط بس عيبه انه ثقيل وتعبني في التنقلات والكوفر كرتون مو عملي ابدا
    اكثر ميزة تهمني انه يكون التسطير بلون فاااتح والديزاين الداخلي ابيض عشان احس براحة نفسية ،،
    حبييت جدا تقسيم الفيجن بلانر بالذات الصفحات الاولى

    ان شاءالله بسوي تقرير قريبا جداً

    شكرا ياروان عالتدوينة اللطيفة

    ReplyDelete
    Replies
    1. ربي يبارك فيك ياارب 😍❤

      مرره حبيت شكل البلانر اللي نزلتيه كاان نفسي أكون لقيت شي يشابهة لمن رحت تارقت أبحث عن بلانر 😭😭
      كانت أغلبها أجندات أكاديمية أو بعضها يجي ورقه خفييف زي الدفتر العادي..

      ننتظر تقريرك بفاارغ الصبر جد شوقتتيني أشوفه من جواا 💖

      Delete
  6. اهلاً وسهلاً، للتو عرفت مدونتك وتقريباَ مريت على اغلبها، مرره الهمتيني في حاجات كثيرررة الله يعطيك العافية ويوفقك ويسعدك
    بالنسبة للاجندة انا اول مره اشتري شريت اجندة آماد من جرير وكمان فيه لهم موقع، مرره حبيتها ولسا بادية اكتب اهدافي

    ReplyDelete

Top