أفكار تغير مشاعرك إتجاه الأعمال المنزلية 🔮🌞

Friday, May 12, 2017



السلام عليكم والرحمة ~ 🔕

نعرف كلنا كيف شغل البيت ثقيل، ومو دائمًا يكون عندنا مود نشتغل وننظف ونرتب ونعزل.. بالذات إننا مقبلين على موسم شغل على مستوى رفيع 😅 يعني لو أسوي رسم بياني لشغل البيت طوال السنة بنلاقي في رمضان المطبخ يشتغل 24 ساعة + الصالة والمجالس، صالة الطعام إليييين بعد العيد تبدأ تتراجع لمستوياتها الطبيعية 🙏

عشان نكون صريحين، الشغل فينا فينا.. سواء نطّينا والا وقعنا والا تحلطمنا 😂 نقدر ناخذ يوم أوف، أو يومين، أو حتى أسبوع بس بالأخير بنرجع له ☠ هيّا الحياة كذا 🎩 لكن فيه خطوات صغييييرة وبسيطة جدًا ممكن نسويها تحسن من شعورنا إتجاه الأعمال المنزلية ونصير نشتغل بدون الإحساس المزعج اللي يلازمنا فيه!
وهالخطوات تبدأ بتغيير نفسك ونظرتك إتجاه العمل بكم فكرة بسيطة 🌱..


1- اهتمي بمظهرك الخارجي.. 

لا تحلمين إن راح يجيك نفس تشتغلين وتفزّين من نفسك طالما إنتي لابسة بجاما في البيت 😶 طبيعي مخك راح يربط لبس النوم لوقت الراحة والنوم، عشان كذا حاولي أول ما تصحين تغيرين ملابسك وتلبسين لبس عملي ومرتب بالذات إذا انتي عندك يومتها شغل..
على الطاري تذكرت مره صدفت ولبست  قبل الشغل جزمة رياضيه لأني كنت طالعه بعدها.. انصدمت صدق من الإنجاز اللي حققته خصوصًا إني كنت شادة جسمي وأنا أشتغل فحسيت بطاقة الرياضة.. فحقيقة إن لبسك يأثر عليك وعلى تصرفاتك دائمًا وركزي بهالنقطة ✨

2- حسني المكان قدر المستطاع..
على سبيل المثال، بالنسبة لي أكثر شي يكرهني بالمطابخ هو إضاءته بالذات إذا صارت بيضاء 😣 إذا إنتي من الأشخاص اللي زيي جربي توزعين لمبات أرضية أو تركبين شرايط إضاءة ليد تحت الدواليب بحيث تضيء لك الكاونترات بشكل جميل في المطبخ، الإضاءة بتعطي جو مختللللف للمكان 180ْ درجة!
كمان جربي تحطين نبتات طبيعية أو صناعية في المكان، لوح أو رسومات جميلة، غيري ترتيب الأجهزة اللي عالكاونتر، غيري أشكال علب البهارات لونيها أو اصبغيها لونك المفضل، اصنعي بنفسك لوحة إلهام ومهام وثبتيها على ثلاجتك..
عندك حلول جدًا كثيرة تحسن لك من جو المكان واستعيني بصديقنا بينترست 💛

3- سوي لك جو ممتع أثناء العمل..
حاولي تحددين لك وقت معين تنجزين فيه شغلك، وقتها أنصحك أثناء الشغل تسمعين محاضرة تحفيزية أو قصة ملهمة أو كتاب مسموع (Audio Book) أو أي شيء يحفزك، مرات أحس إني نشيطة مررره وفيني طاقة أقوم أشغل مقطع زومبا وأحاول أسوي إللي أقدر عليه حسب وضعيتي لو بس أشد جسمي وأتحرك على خفيف أهم شي أكون ضربت عصفورين بحجر وحرقت كالوريز بالمرة.. عاد في بيت أهلي كان فيه راديو على إذاعة القرآن ممنوع ينقفل فكنت فعلًا أستمتع وأستفيد بالذات إذا جت برامج الإفتاء أمخمخ عالأسئلة وأقعد أخمن الفتوى قبل ما يقولها الشيخ قلك أختبر ثقافتي الدينية << مفتية زماني 😂😂 فأتوقع سالفة الراديو هي اللي صارت تكرهني بالشغل بهدوء مطبق.. لازم صوت أو سواليف حتى لو أفتح اليوتيوب وأكتب story time وأسمع قصص اليوتيوبرز 😅


4- كوني منظمة قد ما تقدرين..
حاولي تسوين جداول للترتيب والنواقص والوجبات وغيره جدًا راح ترتب لك وقتك.. جربيها! 🐸
اختلف عندي الوضع لمن كنت أشتغل في البيت بشكل عشوائي عن لمن صرت أخطط كل شي بشكل أسبوعي. جد مرره راح تفرق معاكي إذا كل اسبوع خططتي أوقات أشغالك فيه وأوقات راحتك كمان أفضل بكثير من إنك تتركين كل شي سائب إلين ساعة الصفر وبعدها بتقعدين شايلة هم متى يصير لك خلق تنجزين!
فكرة الجداول مو بس حلوة لتخطيط الشغل بس! كمان مره راح تفيدك في التخطيط المسبق لوجبات الأسبوع << وهالطريقة بحد ذاتها راح تساعدك إنك تنتبهين إيش النواقص في البيت وإيش اللي لازم تشترينه واللي عندك فائض منه << بالتالي ما راح تضطرين إنك تتسوقين بشكل عشوائي وتاخذين أشياء ما راح تحتاجينها.

5-  حافظي على نظافة اللي نظفتيه..
تعبتي ونظفتي وعزلتي وصار كل شي زي الفل 🌸، حاولي إنك ترتبين بعدها الحوسات الصغيرة أول بأول عشان ما تتراكم معاك وتضطرين تعيدين اللي سويتيه خلال وقت قصير، وبنفس الوقت حاولي تفهمين اللي معاك سواء أخواتك أو أطفالك وزوجك إنه كل أحد مسؤول بترتيب أي حوسة يخلفها وراؤه بعد الترتيب..

6- أحيطي نفسك بالناس الملهمة..
أعرف الحين جاي رمضان، وبتكثر الحلطمة عن شغل البيت والمواعين والعزايم وكل هالأشياء مهما كانت تضحك وقتها ومعبرة لكن إلّا ما راح ترسخ في عقلك الباطن وبتساهم في تثبيطك وتثقل عليك المهمة أكثر وأكثر. حاولي ما تتفاعلين مع هذا النوع من الحلطمات كثير 😅
حاولي تحيطين نفسك بالناس الإيجابية واللي تحمسك على الإبداع في بيتك << طبعًا هالكلام ما ينطبق بس على الأشخاص اللي حولك فعليًا، كمان عللى الناس اللي تتابعينهم في السوشال ميديا.. زي حسابات أضفتها قريب في السناب تشات كان لها تأثير مرره حلو على نفسيتي إتجاه شغل البيت: حساب سنعة Home_sweethome2  كانت فكرة حسابها إنه كيف نعيش بدون خادمات، حسابها جدًا ثري واستفدت منه كثير 💕 كمان حساب sebaahmad7 من الشخصيات اللي يبان عليها حبها في بيتها بالإهتمام والعناية فيه بطريقة تفتح النفس تبارك الرحمن 🍃
<< لو تعرفون حسابات نفس هالجو اكتبوها لي في الكومنتس رجاءًا 🐥


7- كافئي نفسك بعد العمل..
تعرفون استيراتيجيات تربية الأطفال وأسلوب الثواب والعقاب؟ كمان ترا برضو ينطبق على الكبار البالغين العاقلين 👴😂
حقيقة، جربي في يوم تمنعين نفسك عن شي إلين ما تنجزين شغل البيت، أو مثلًا تكافئين نفسك بشيء وقت ما تنجزين شغل البيت.. يعني مثلًا تمنعين نفسك عن مشاهدة مسلسلك المفضل إلين ما تخلصين شغلك، وتكافئين نفسك بجلسة روقانية مع قهوة وتشوكلين وانتي تتفرجين مسلسلك المفضل! 😍😍💕
بالذات إذا قمتي بمجهود جبّار ضروري تكافئين نفسك عليه وتدلعينها بعده 💌

8- انوي الأجر في عملك..
كل عمل تقومين فيه في بيتك، لأطفالك، لأمك، لزوجك، لضيوفك.. احتسبي فيه الأجر من الله..
سواء برحمتك لأمك ومساعدتك لها / إطعام أطفالك وحرصك على صحتهم وتغذيتهم / إرضاء زوجك واهتمامك في بيتكم / إطعام ظيوفك وحسن استقبالهم.. وغيرها الكثيرررر من الأعمال اللي نسويها لو احتسبنا فيها رضا ربنا علينا بتتغير نظرتنا له وطريقة عملنا فيه
<<< ولو إن هالنقطة مفروض تنكتب بالأول بس خليتها بالأخير عشان تكون الأرسخ في ذهنكم 😍⛅

ووو بس يا عزيزاتي 💟
اتمنى لكم بيوت نظيفة ومريحة وتجيب العافية 😂
وأيام ممتعة مليئة بالإنجاز 💐



وفوتتكووا بعاافية 🔮✨
_______________________


🎀

     
  •  
  •  
  •  
  •  
  •  




10 comments:

  1. يا جمال هذه النوعية من التدوينات ��

    اتفق معكِ في النقاط اللي ذكرتيها
    وأبغي أضيف إليها إن التنظيف يكون بشكل مخطط ومنظم لا عشوائي
    يعني تبدئين بشغلة معينة أو غرفة محددة ما تنتقلين منها إلا بعد إنجازها
    لأن التشتت يسبب هدر للجهد وعدم إنجاز


    وبخصوص نقطة سماع شيء خلال العمل هذا أكثر شيء خلاني استمتع وأحب أعمال المنزل، وما اتحسف على الوقت اللي استغرقه في التنظيف

    أنا بطبعي ممكن أحب أسمع واستفيد لكن أسمع فقط بدون أي عمل آخر يجيني نعاس ويدي تحكني، وإني أعمل شيء من الواجبات بدون ما استغله بشيء مفيد أحس ملل ومضيعة وقت، فكان دمج الشيئين هو النقطة الجبارة بالنسبة لي.

    ومؤخرا اشتريت سماعه بلوتوث حتى اسمع بكل وضوح وبدون ما احتاج انقل الجوال معاي.

    من الشخصيات الملهمة بالإضافة للي ذكرتيهم

    https://www.snapchat.com/add/aa.688

    أحب جوها وترتيب بيتها ومرات تصور وهي تنظف

    دمتِ سنعة ونشيطة ��

    ReplyDelete
    Replies
    1. أسعدني ردك سرمدية النقاء ⛅

      فعلًا أنا في البداية كنت ما أرتب إلا لمن أشوف الوضع صار حوسه، وعاد على بال ما يصير حوسه تكون تجمعت كثير من الأعمال على راسي فأستثقلها جدًا 😴

      وأعجبتني فكرة سماعة البلوتوث! فعلًا مررره مو عملي إني أتنقل بالجوال معايا 😅 شكلي بأحطها في قائمة الهدايا خخخخ

      أماا فيما يخص الشخصيات الملهمة راح أضيف هالحساب في قائمتي 😍أثق باختياراتك كثير ✨

      💞

      Delete
  2. كنت منظمة ومرتبة فجاءة انقلبت حياتي بعد ثلاثة أطفال ربي يحفظهم احاول قدر المستطاع الصالة وغرفة النوم وغرف الاطفال تكون مرتبة وبقية الغرف اجيب شغالة بالساعة ،،،،لكن الحمد الله مازال اثر الترتيب السابق موجد يعني احاول قدر الإمكان ارجع كل شئ مكانه وحتى أطفالي بعض الاحيان يفعلون ذلك
    بالنسبة لمشجهني في الترتيب في الاستغرام ام شهد ومنال المفدى هؤلاء ملهميني في التنظيف والترتيب
    سأضع حساباتهم
    ام شهد
    https://www.instagram.com/om_shahoooody/
    تنظيم الجوري(هى نفسها منال المفدى)
    https://mulpix.com/instagram/تنظيم_الجوري.html

    ReplyDelete
    Replies
    1. أهلا وسهلا ميشو 😍
      أكيد كل ما كبرت الأسرة زادت المسؤوليات والمهام كان الله في عونك وبارك لك في أطفالك 💗 عاد كل ما كانوا أصغر كانت حاجتهم للإكتشاف والتفتيش أكبر وما نقدر نمنعهم لأن خربشاتهم هي جزء من نموهم، بس في مرحلة ما ضروري نبدأ نعطيهم مهام يسوونها مناسبة لأعمارهم إلين يوصلون مرحلة مبكرة يكونون يعتمدون فيها على نفسهم 👍

      بالنسبة لمنال المفدى فعلًا حسابها رهيييب خصوصا انها تنشرك مشاركات متابعاتها فتشوفين أفكار من كل مكان 😍
      وحمستيني أضيف أم شهد 🎀

      مرررره شكرًا لك ميشوو 💟

      Delete
  3. جيتي على الجرح أبرز نقطة حابة أركز عليها هيا التخطيط يعني أخطط كيف أرتب كيف انظف ابدأ من أي مكان وفيه حاجات أسبوعية ويومية وشهرية أنا أرتحت على طريقة التقسيم شغل عميق مع الشغل اليومي مثلا المطبخ أمسك الشباك الثلاجة الفرن بيوم مع هذي شغل عميق مع أعمالي اليومية ثاني يوم الدولايب مع اعمالي اليومية وهكذا افتكر كان في منتدى عالم حواء موضوع عن التنظيف كنت احبهم لأني تعلمت منهم أشياء كثيرة وللان أنا بتعلم وأجرب طرق وروتين في التنظيف كمان تعلمت حركة الدمج زي أنا أتفرج اذا جيت بسمع يكون ترفيه ما أحب اسمع شي مفيد وانا بشتغل كل شوي اوقف واعيد ابمقطع هههههه اناشيد شيلات ممكن غيره مقدر بس احب اتفرج جالس احاول اقنع زوجي يركب لي تلفزيون في المطبخ فكرة الدمج ادمج شي ممتع لي مع شي غير ممتع زي الكوي مع مسلسل زي المواعين مع صوتيات وبحاول اشوف كيف اسهل على نفسي بحلول روتينيه وعادات اتعلمها موضوعك جميل

    ReplyDelete
    Replies
    1. حللللوة فكرة جدول التننظيف الاأسبوعي واليومي والشهري شفتها في أحد الحسابات بس الأهم إنك انتي اللي تسوينها عشان تعرفين احتياجات منزلك من التنظيف.. يعني وحدة عندها أطفال غير عن وحدة لحالها غير عن وحدة يجونها ضيوف 👏👏👏 يختي جميلة المنتديات والحسابات اللي تشجعك تهتمين ببيتك 😍❣

      بالنسبة لفكرة الدمج فعلًا تغير من جو الشغل تماااامًا، وعالطاري أختي كان عندها تلفزيون صغير مثبتته على ستاند جداري بمطبخها.. عاد أنا كنت أستمتع فيه لمن كنت أزورها أبلط بالمطبخ هههههه

      Delete
  4. برااافو والله براافو ، مع انها كلها بديهية ومعروفة ولكن سبحان الله لمن يقولها لي أحد أو أقرأها تتجدد عندي واحس كانو سار عليها هايلايتر فمخي
    جداً حبيت التدوينة يعطيك العافية رونه

    ReplyDelete
    Replies
    1. فعلًا كثير أشياء نعرفها بس نحتاج أحد ينبهنا لها 😍
      ربي يعافيك حنين 💞

      Delete
  5. ههههه حلوة كثييير ،، تنظيم وتخطيطك كثيير عجبوني الله يسعدك على هذي المواضيع الحلوة^^💞

    ReplyDelete
    Replies
    1. مرره أسعدني إنهم أعجبووك 😍❤❤❤❤
      ويسعدك ربي أضعااف 💖💖

      Delete

Top