حلطمة ميك آبيّة 🚧

Sunday, December 11, 2016




يسعد صباحكم / مساءكم وين ما كنتم 🍃


في هالبوست أبغا أسولف عندي هذرة شويا أو يمكن كثير مدري.. وأتمنى أقرا أراءكم تحت حول هالموضوع لأنه صدق ألاحظ إنه قاعد يزيد عن حده 👻
في الفترة إللي زادت فيها حسابات التجميل وصار كل ماكييرة تسمي نفسها ميك آب أرتست 
وكل من لبس سمى نفسه فاشنستا .. وكل من جمع صور أزياء سمى نفسه فاشن بلوقر << عاد ما ينرفزززني صدق إلّا إللي كاتبه بانستقرامها بلوقر وهي بالأساس ما عندها بلوق \ مدونة!! كييييييف كييييف 


وشفنا كيف شركات الميك آب صايره تخترع منتجات جديدة تززززيد من خطوات المكياج! ويبدأ التسويق هنا 
ويحسسونك إنك لو ما امتلكتي هذا المنتج فإنتي ااه ولا شي خليك عالروج السحري  خسرتي أهم خطوات مكياجك يا جميلة
  .. وبالأخير حاطين صور لمارلين مونرو واودري بكل مكان ويتغزلون بالجمال الناعم الطبيعي..
وأشوف كيف الهوس زاد عن حده في كثييييييرر من البوستات الإنستقرام غييير إللي في حساب هدى بيوتي سواء من أماكن وإلا طرق الكونتور إللي بالشراريرب واللي بالأكل واللي بالفوط النسائية!!  من كثر ما الموضوع صار فيه هوس بالموضوع حتى المستأنثين من الذكور لقيو سوقهم فيه للأسف.. ❌
إللي فقع مرارتي وخلّاني أتحلطم بهالطريقة كان للأسف قراءتي لأكثر من بوست عن روتين مكياج "يومي" حسيته كان جدًا مبالغ بطريقة شنيعة، بحيث إنه عااادي جدًا مكياج يومي صباحي يحتوي على برايمر \ كوريكتر \ كونسيلر \ بلشر \ وفوقها مثبببببتتتتتتتتتت.. ليييه؟
وبما إنه مكياج روتيني أو صباحي صار بس المختلف فيه إن ألوان المنتجات فواتح بس.. حراام اللي قاعد يصير! 💔
البرايمر ما يخفي المسامات يا قلبي انتو، البرايمر يعبي المسامات بحيث ما تصير باينه وبعد فترة تتوسسع هالمسامات وتتسدد إذا ما نظفتيها وتعدم بششرتك بطريقة شنيييعة! 🌵
بالنسبة للكوريكتر مع الكونسيلر كل صباح،، أكيد لكل وحدة رأيها وحريتها إذا تبغا تحط هالطبقات بشكل يومي أو لا.
بس أنا عني،، فيني هالات وخط تحت عيني، ما أشوف إنها عيب يفشل بحيث أغطيه كل يوم وأستحي.. أتمنى الشخص إللي قرر يحول النمش من عيب خلقي إلى شكل جميل الناس ترسمه بالمكياج وتسوي منه تاتوو يجي يتفاهم مع الهالات اللي حول العين.. 
أنا ما أنكر إنه بعض أنواع البشرة معدومة لدرجة إن صاحبتها تشعر بالحرج منها وتغطيها بشكل يومي، بس لازم نتصالح مع أنفسنا، نتصالح مع عيوبنا وعيوب أجسامنا إللي ما نقدر نغيرها (وفيه فرق بين التغيير والإصلاح وبين التغطيه والترقيع المؤقت). بعضنا يعرف عارضة الأزياء ,Winnie Harlow ويني هارلو إللي فيها بهاق أبيض في وجهها وكل جسمها، تصالحت معاه، شعرت إنه شي مميز فيها وليس عيب خلقي تسعى لتغطيته كما يعتقد الببعض! حبته، صارت تظهره وتتصور فيه مفتخرة، في المقابل انعكس هالشعور على الناس حبوه عليها، وصاروا ينظرون لعيب جلدها الخلقي كعلامة جميلة فيها واشتهرت في مجال الإستعراض والموديلنق. 
ما نقدر نحب نفسنا ونحبب الناس بعيوبنا؟ والا نخلي الناس هي اللي تقرر وتحدد جمالك وتصنفه؟ 



وفي المقابل ما أختلف إن فيه منتجات تجميلية تضفي شكل وتبرز جمال الملامح، بس نعرف متى وكيف نحطها ونتأكد إذا نحتاج استخدامها فعلًا أو لا وقد إيش الكممية إللي بنستخدمها!
 بس لروتين يومي أشوف إنه كل ما كانت الخطوات والأدوات أقل كل ما كان أجمل بالذات في النهار زي رسم خط كحل على منبت الرموش العلوي، روج أو مرطب بلون طبيعي، رسم الحواجب بلون هادي.. برأيي هاذي الأشياء إللي ممكن تعطي إضافة بسيطة جميلة ناعمة ممكن تسوينها بشكل يومي ولا تغير شكلك إذا طلعتي بدونها..
أنا بنت زيي زيكم أحب المكياج، تبهرني ألوانه، أتابع تتوريالز، لكن يبقى أفرق بين المكياج اليومي ومكياج الطلعات ومكياج المناسبات، وكمان أفرق بين المنتج الجيد وبين المنتج المسوّق له!
وضروري نفرّق بين محتويات شنطة الماكييرة (إللي نروح لها في المناسبات) | والميك آب أرتست (إلي تسوي مكياج تصوير وتتفننن في تغيير الملامح) | وبين محتويات شنطة مكياج البنت العادية. 
مو ضروري كل ما انمدح شي ناخذه!
قبل ثلاث أو أربع سنوات مدحوا باليت شادو نيكد أربن ديكاي وطااااححوا الناس فيه وطلعوا منه اصدار 2 واصدار 3 من هبة الناس عليه.. بعدين طاحوا على ميت مات وإصدارات ذا بالم وبعدين كولور بوب وبعدين مورفي وبعدين هدى بيوتي وباليت كايلي!!!! أمانة تحسون طبيعي الوضع وإلا أنا أبالغ؟ 
كم مره تحطين شادو؟ كم مدة صلاحيته؟ هل قد خلصتتي باليت كامل؟ هل فعلًا تشوفين إن درجات البني إللي في باليت ميت مات مختلفة عن درجات البني إللي في باليت مورفي بحيث انك كل مره تمدحين فيها؟ هل كل مره تستخدمين درجة من باليت مختلف؟ وإلا مجرد حب تملّك وهواية تجميع؟ أو ممكن شعورك وانتي تحطين صورة المنتج "الهبّة" في الانستقرام يعجبك؟ 

جدًا الموضوع يدعو للتساءل وأنا ما أعصم نفسي عن حالات "التشرّي" بس جدًا أحاول أسأل نفسي هل أنا أحتاجه أو أنا أبغاه؟ الإجابة تفرق.. وأتمنى تعيششون الحياة إللي إنتم تبغونها انتم بدون سيطرة آراء الناس أو آراء المجتمع في السوشيال ميديا، وأتمنى تستمتعون في إكتشاف أساليب التسويق إذا حسيتم إن أحد أقنعكم بشدة لاقتناء شيء عندكم له بديل 
أخيرًا.. عندي نصيحة صغيرة..
ركزوا على مين تتابعون في السوشيال ميديا لأنكم راح تقتبسون من صفاتهم الكثير، ولا يعني بالضرورة أن كل مشهور ولديه متابعين هو فعلًأ إنسان يستحق وقتك الثمين للمتابعة 




وو بس خلاص فضفضت.. طلعت اللي بخاطري~
فوتتكووا بعافية 




🎀

     
  •  
  •  
  •  
  •  
  •  





🚧    🚧   🚧


⚠ تنويه: كلامي هذا ارتجاالي وحلطمي بحت، ما كنت أقصد فيه أحد معيّن لكن حبيت أوصل لكم بعض التساؤلات إللي تدور في رأسي، وشكرًا لمروركم.

8 comments:

  1. احيانا الناس تشتري عشان الشكل يجذب، واحيانا بس عشان يصورون 💔💔

    ReplyDelete
    Replies
    1. صحححح كلامك، يعني مو معقول إن فيه شركة كل منتاجتها بيرفكت لدرجة الناس تشتري كل شي جديد ينزل منها << زي ذا بالم وبينفت.. الشكل صاير مناسب مع هبة المورد والشابي شيك هههههههه

      Delete
  2. نفس الكلام اللي يقرقع بقلبي 🤔! يعطيك العافية ❤️

    ReplyDelete
    Replies
    1. ربي يعافيك بشاير ✨
      أهم شي نستوعب اللي يحصل ونوقفه عند حده عشان ما يتفاقم الوضع 🙏

      Delete
  3. كلام سليم مية مية 👌🏾

    ReplyDelete
    Replies
    1. 💛💛💛💛💛💛💛
      أشكر مرورك دعاء
      💛💛💛💛💛💛💛
      أهم شيء نركز إذا كان المنتج حقيقي يستحق الإقتناء وإلا عنصر الدعاية غلب عليه

      Delete
  4. الهبة اللي صايرة عند البنات خلتني أحس إني بنت مب سليمة لأني ما استخدم غير الأساسيات أو بالأخرى شنطة مكياجي شنطة البنت العادية مب شنطة ميكب آرتست ^^"

    شكرا للحلطمة اللي أعادت لي ثقتي بنفسي ��

    ReplyDelete
    Replies
    1. 😁😁😁
      لا بالعكس إنتي جدًا طبيعية وناعمة وإهتماماتك أكبر وأعمق من مجرد تجميع المكياج!
      جدًا سعيدة بقراءتك لحلطمتي سرمدية 💛

      Delete

Top