Dear Diary -1- || مفكرتي العزيزة ... النيو لوك الصيفي

Thursday, May 19, 2016
أحس إني حاليًا أمر في فترة مليييئة بالأكشنات والأحداث المهم (بالنسبة لي عالأقل)! 😸
أفكار وتأملات تجيني وشطحات تخيلية وكل شيء تكون نهاية التفكير فيه هو الهروب للتفكير في شكلي وكيف إني أسوي نيولوك 💃






إلاّ على طاري النيولوك..
أنا بعد زواجي زاد وزني بسبب حبوب منع الحمل والخربطة الممتعة التي تنتج عن الفرفرة ونحن خاويان البطون << يعني بطوننا خاوية بالعبري 🚀
المهم عاد أنا تزوجت وعلى أساس بيجي قبول بعثة زوجي قريب مرره زي كل السنوات بس سبحااان الله دفعة 2015 من بعثة خادم الحرمين مدري وش اسمها هاذي ما راح ينساها التاريخ.. عاد كانت الخطة إننا بنقعد هنا 3 شهور.. 4 شهور.. هه هه 5 شهووووووور!!
فكان جهازي قبل الزواج من ملابس وغيره لفترة مؤقتة + كانت سنة 2015 راكدة تقريبًا من ناحية المناسبات وما إلى ذلك فالحمدلله ما كثرت ملابس مناسبات...
فسبحان الله تزوجنا وملكت بنت خالي وتزوج ولد عمي وتزوجت بنت عم زوجي وتزوج ولد ولد عم أبوي (بطبططبطبطتنا في بطبطبط بطتكم) وبعد فترة زواج بنت خالي الله يتمم لها ويوفقها يااارب ❤
يعني الصدق المناسبة الوحيدة إللي كنت أعرف عنها هي زواج ولد عمي وكنت شاكة هل بنكون وقتها في السعودية والا لا ههههههههه
فأخذت فستان مناسبات مرره عاجبني ستايله بس يااربي مدري كيف أخذته مووو أنا مرره!! لونه فووشي صااقع مررره وحردة الكم هذيك اللي تجي واسعة امممم لحظة أكيد فيه له صورة بالنت...


هذا هو الفستان إللي اشتريته (تحسبًا لحالات الطوارئ وقد ألبسه بزواج ولد عمي إذا ما سافرنا) .. الفستان حلووو بس مو مدري .. أنا جسمي كيرفي بيكون مرره حلو عليه هالموديل لكني أكره حردة الكم إللي تبدأ من عند الرقبة خصوصًا إن كتفي صغير فيطلع قييييق 👵 + اللون تراه فوووشي فوششي مو زي بالصورة .. يعني ما يناسب أي لون بشرة وبالنسبة لي يعتبر لون جرئ لأني أميل للألوان الرسمية أكثر والغوامق 💂💙

المهم هالفستان للأبد مخليته سبير.. وأخذت كم فستان ناعم .. واحد حللته والثاني ضاق علي وهذا ما أرتاح ألبسه وتمتلي اللستة بملابس صغرت << إيه الملابس عندي هي إللي تصغر 🎩

المهم إنه كان الوزن في ازدياد وأنا مو قادرة أسيطر عليه رغم إني عدلت أكلي كثييرررر + كنت أتمرن كارديو ومقاومة مع المدربة جيليان مايكلز بس مااشش الوضع في إنحطاط 😰💔 عاد صدق كان كل ما جتني مناسبة أو عزيمة وفتحت دولابي كنت أتأزززززممممم نفسيًا وأتوتر ليه زاد وزني ياربي وليه الناس يبغوني ألبس ستايل معين عشان اسم إني (((عروووصة))) 👯

المهم استسلمت للأمر الواقع.. وصرت كل ما قدرت أتخلص من الملابس الميؤوس من رجوع مقاسها، وبقيت الأشياء اللي أحبها اللي تجيب لي السعادة << لأن الملابس إللي تصرّفت فيها كانت تجيب لي التكة للأسف بسبب تغير مقاسي مدري مقاسها 😪
لكن المووههممم.. حضرت كل المناسبات المذكورة أعلاه بتيسير من رب العالمين 😺 مع إني كنت رافضة فكرة إني أشتري فستان وبعدها بأسافر وبيقعد هنا وما باستفيد منه إلا إن الأمور تسهلت.

وبمرور الوقت.. صار فيه لايف ستايل أكثر صحية .. مع إني كنت أشوف سالفة إني أصحى العصر وأنام بعد الشروق فكرة بطّالة وغير صحية أبدًا، إلّا إني أستمتعت فيها جدددددداً أحب الشروق.. أحب المدينة قبل ما تصحى.. أحب القلابة والتميس والطعمية.. أحب منظر الباصات والطلاب وهم طالعين وككلل مظاهر الفجر إللي كان مستحيل أستمتع فيها لو صحيت بدري.. 🌇
صار نظامنا أنا وزوجي هو مشي بالفجر ومشي بالمغرب << مو شرط نداوم على ثنينتهم بس عالأقل نمشي 🚻
وقررت إني بدال ما أقعد أنتظرجسمي إلين يرجع، قررت إني أحبه كذا وأغير اللوك وقصيت شعري (أو بالأحرى تحمست للي يقصون شعورهم ستريت بمكينة الحلاقة وقلت لمحمد يقص لي) وطلعت القصة مرره أحلى مما توقعت + قبل القص كنت صابغة شعري أشقر رماددي بس طالع لونه بني رمادي بما إن لون شعري غامق.. يعني هالصورة هي الأقرب من بعد البحث



وعشان أكمل اللووك إللي أحبه قررت أسوي تاان اااه ياارربي من زماان عالتاان آخر خبري فيه اممم يمكن قبل 4 سنوات.. مع إني أموووت في السماار واللون البرونز لكن بحكم إني ساكنة في شقة ومستحيل أتمصلخ في البلكونة قمت أبحث وأقرا عن السيلف تان ☀💓
قريت عن أنواعه والفروقات بينه وعنن توافره وأسعاره وعن التجارب والريفيووز والتقييم وكل شي كل شي.. بالأخير رسيت على...

السيلف تان سبراي من سيفورا.. عاد لمن كنت أبحث كان سعره تقريبا وقتها في 60 ريال تقريبا .. لمن رحت لقيته ب85 ريال! أكره هالارتفاعات الغير مبررة بس يللااا نقول يسووى بما إنه سبراي فاللون يطلع موحد ما يطلع مبقع وعساه يحدد البكيني لاينز👙 مرره تعجبني آثار الأساور أو السليبر مع التان.. فأتأمل إن السبراي يبينها..

يووووه وش وصلني هنا!! كيف فتحت هالموضوع أنا؟ 👀
ههههههه المهم إنه قررت أسوي كل اللي براسي بأحب جسمي زي ما هو ولن أقف على الأطلال ولن أنتظر الماضي أن يعوود ولن أجلد ذاتي ولن أسمع لكلام أحد ما يعجبني ولن أسمح له يأثر على مزاجي وبأشتري كل اللي يعجبني بمقاسي الجديد << أهم شيء ههههه 🌵😄
عاد صدق التغيير في اللوك والله يحسسسسن النفسية مرررررره ويخليها عاال العال << أهم شي يكون اللوك يعجبك إنتي ولا تنتظرين إطراء الناس وآراءهم ..

وبس والله ما ودي طول عليكم 👾 << لالا أستهبل طولت بما فيه الكفاية يللا فوتتكوا بعافية 🎈

0 comments:

Post a Comment

Top